Iiḍighi Abutelhedom Mọ

2 Ḍio Ẹyaal Ạ Pẹntịkọst phọ, oomo ạbumatuan phọ uukpomhoghan ni eniin esi. 2 Kụ ekperenhom bịn ọnhaghan ọyugh dị ạḍua ẹpe k’ạke ratu, dị ạghigh ọlo ookuugh dị rakugh iboom, kụ amuza sịphe otu phọ bịdi ọrol bọ. 3 Kụ bịdi ọmhiin rạraar dị ẹghigh nem ạnian kụ ẹghi ẹrolhoghu ạnyu ạrumhu ạbidi, oye ye eniin, 4 kụ uwaloor iigbia phọ amuza loor oomo ạbidi kụ omhiigh ọḅa ạrunhu kịrokiro, tọrobo ọnyo ạbidi ạḅa ghan ọnhu phọ uwaloor iigbia phọ aḍighi bọ ịdi ọdi katue ạḅa.

5 Mem mọ ọpo phọ ạbuo a Ju dị ọmhoogh oghiilhaan Ẹnhaan dị ọḅua oomo areelhe aḅirinhi phọ kụ oru ụrol li Jeruselem. 6 Esi ịduon phọ aḍiboom aḍita awe uukpomhoghan ni mem mọ ọnhaghan bọ ọyugh phọ, kụ eḍighi iikia esi ạbidi, loor esi dị tọrobo ọnyo ạbidi ạnhaghan ni dị ạbumatuan phọ rọḅa ọnhu ẹmha ọdi. 7 Ịkar kụ eḍighi iikia esi ạbidi kụ ọḅem ghan mọ: “Ịmiin, oomo awe phọ ạbuen phọ ạbuo ạ Gạlili, kị́dipho? 8 Kụ uḍighi ika kụ tọrobo ọnyo ayira rạnaghan bọ ọnhu ẹmha ọdi? 9 Buniin ayira ạbuo ạ Pạtịạ, ra Midia, ra Ilạm, r’ạbuo ạ Mẹsopotemia, ra Judia rạ Kạpạdosia, rạ Pọntọs ra Esia, 10 ra Frijia rạ Pạmfilia, ra Ijipt r’ạbuo arokool phọ a Libia etuman bọ Sạịrini, r’ạbuo a Ju r’awe dị moḍigh aani ẹku ịiḅereghi ạbuo a Ju phọ dị ọḅua Rom kụ oru, 11 r’ạbuo a Krit rạ Ạrebia, kụ yira rọnaghan ni dị bịdi rọkaaph ịlo iiḍighi ịikpo phọ Ẹnhaan rụnhu phọ ayira.” 12 Ii, ịphen phọ ịkar kụ eḍigh ḍiigu esi oomo ạbidi, kụ oniin apuru ghan nyoniin mọ: “Eeghe kụ ẹmhu ịphen phọ?” 13 Kụolo bụnhon ụgilaam ghan bịdi mọ: “Amumhoom amiim kụ rakiigh bịdi.”

14 Kụ a Pita ra Ḍioph ra Oniin phọ ọmheregha kụ a Pita ạḅem r’ẹḍogh dị ẹghi ạnyu mọ: “We a Judia r’oomo ạbuen orugh bọ Jeruselem, ịmaar ẹnhaghan ịphen mị kịḅenhi bọ inyinha. 15 Amiim kụ rákiigh we phọ ạbuen phọ ịdipho nyinha rẹetughian bọ, loor esi dị ọphon phọ omhunhenhiom ịraar ạwa aḍio phọ.* 16 Kpạripe ghụn, ịphen phọ remuneni ịpe oyil phọ Joẹl ạghaaph bọ mọ: 17 ‘Ẹnhaan ạḅem mọ: “Riiḍio eekunha phọ, mị kaakuom ni uwaloor phọ ạmhi we kịrokiro, kụ ạnmuny r’ạnmanyaan phọ anyinha ọkaaph ịpe mị aganhanhamhi bọ, kụ ugheel ạnmuny phọ anyinha ọmiin uḍien kịrokiro kụ ikumor awe phọ ọmala rạmala. 18 Kụ ghạlhamo r’ạrebenhe phọ ạmhi, lhephiri phọ r’ạnmariir phọ, bịn mị kaakuom ni uwaloor phọ ạmhi riiḍio phọ ịpe phọ, kụ bịdi ọkaaph ịpe mị aganhanhamhi bọ. 19 Mị kaḍighi ni ịiḍaany ẹpe k’ạke phọ ạḅilhe aḍighi ịdi areḍeenhaan kemite sịen ade phọ, kụ ịphen phọ keḍighi ịḅaal r’ạnian r’ạmughi. 20 Erumhuḍio phọ keḍighi ni ufiri kụ ụnwanyu phọ aḍighi ịḅaal kụ egbi ọteeny aḍigbogh aḍio phọ a Jehova* keḍighan bọ ni elhegh. 21 Kụ kọpel li tọrobo oye lọ ạmhagh ḍien phọ a Jehova.”’*

22 “We Izrẹl, ịnaghan ịphen mị kịḅenhi bọ inyinha: A Jizọs phọ ọpo ạ Nạzạrẹt phọ oye dị Ẹnhaan aganhanhami iḍeenhaan inyinha dị eego esi iiḍighi ịikpo phọ r’ịiḍaany phọ r’areḍeenhaan phọ ọdi ạsighe bọ nyọdi aḍighinhom sịphe igbo phọ anyinha, ịdipho nyinha r’aloor bịn elhegheri bọ ni. 23 Kụ iḍighi kẹn ogbi Ẹnhaan mọ ọḅogh nyọdi ọlhogh ḍịghaagh anyinha, kụ nyinha ẹsighe nyọdi ẹngo busoroghuom iilhogh kụ ẹkan loor oreeny eghiigh, kụ Ẹnhaan alhegheri ni k’ẹpe ọmhan ịpe kemite bọ. 24 Kụolo Ẹnhaan aḅeton ni nyọdi esi aḍuugh, ii, ạtagharan ni nyọdi ạsighe esi ịikpo* aḍuugh loor esi dị aḍuugh ítue ịpam nyọdi ikpophonhom. 25 Ịdi eḍighi bọ a Devid ạghaaph ni ịlo ọdi mọ: ‘Mị aseere a Jehova* ghisigh ạmhi oomo amem, kụ mị kạ́moogh ọoḅaghamhian aloor loor esi dị ọdi odi ni ḍịghaagh elhiom ạmhi. 26 Esi ịduon phọ mị ụmhoogh ni oboom ọḅaal olhoghi kụ ibo emuza kẹn ịidoronhu ạmhi. Kụ mị kạtol r’oḍuom olhoghi; 27 loor esi dị nạ ịmhi kụ́wilhe* sịphe Oḍi phọ,* kụ nạ kámeera kẹn mọ aḍizu oye dị ạḅar nyịnha ẹḅor. 28 Nạ muḍeenhaan ịmhi eten aghuḍum; kụ nạ kụngo ịmhi iboom ibo sịphe nạ odi bọ.’

29 We phọ, bumor phọ, r’ophooph olhoghi, mị katue ni ịḅenhi inyinha ịlo uwo ẹmhu eghun otu phọ Devid, mọ ọdi amhugh ni kụ oḍi nyọdi, ḅịlhe mọ oḍi phọ ọdi odi ni sịen ẹmha phọ ẹphen phọ k’arodon. 30 Kụ loor ịduon ọdi aḍighi bọ oyil kụ ạḅilhe bọ alhegheri mọ Ẹnhaan maghunya ọrolhomhi oniin ọony ọdi sịphe ạgada ịtooghi phọ ọdi, 31 ọdi ạmhiin ni ạḅilhe ạghaaph ịlo oḅetenhu esi aḍuugh ạ Krạịst phọ, mọ ụ́bilhe nyọdi sịphe Oḍi phọ* ḅịlhe mọ aḍizu phọ ọdi ị́ḅor. 32 Ẹnhaan aḅeton ni Jizọs esi aḍuugh kụ oomo phọ ayoor ụmhiin ni ịphen phọ r’ariḍien ayoor. 33 Kụ ọdi magheel k’ạke ạtol sịphe ạḍighaagh elhiom mọ Ẹnhaan ạḅilhe ạteeny uwaloor iigbia phọ Ọde phọ aguan bọ, pọ kụ ịyaar phọ ọdi muukuom bọ iyoor uwaloor iigbia phọ, kụ nyinha rẹmiin bọ kẹḅilhe ẹnhaghan ịphen phọ. 34 A Devid ọ́ghi k’ạke, kụolo ọdi r’aloor ạḅem mọ, ‘A Jehova* ạḅenhi Uwo Ẹmhoogh phọ ạmhi mọ: “Tọl ḍịghaagh elhiom ạmhi 35 tụtu mị aḍighi bụmulhogh ḍien phọ ạna ịkasi ọkpasaghiom aruwol ạna.”’ 36 Esi ịduon phọ, oomo awe phọ Izrẹl olhegheri mọ ọkar agey Ẹnhaan maḍighi Jizọs phọ nyinha ẹkan bọ loor oreeny eghiigh, Uwo Ẹmhoogh rạ Krạịst.”

37 Bịdi ọnhaghan bọ ịphen phọ, itir ri bịdi iboom kụ opuru Pita r’ạbueripho abutelhedom mọ mọ: “We phọ, bumor phọ, yoor uḍighi eeghe?” 38 Kụ a Pita ạḅenhi bịdi mọ: “Ikiton, ḅịlhe tọrobo ọnyo anyinha aḍiiny mụum esi aḍien phọ a Jizọs Krạịst pịdi ọsar ịkaraph anyinha ọbilhenhaan, bịn nyinha kẹmoogh ni uwaloor iigbia phọ Ẹnhaan rạngo ghan bọ oopho. 39 Loor esi dị uwaloor iigbia phọ uguan ọngo anyinha r’ạnmuny phọ anyinha, r’oomo ạbuphe odi bọ rikpisi dị ẹkelhogh, oomo ạbuphe a Jehova* Ẹnhaan phọ ayira kạmagh bọ ạloghoma.” 40 Ọdi ạkuamhi ni ạghaaph ịbadi ịnhon ạraraar ịlo iiḅi ịinhaghan phọ kụ ạḅenhi ghan bịdi mọ: “Ịbilhe ọkaraph oghiil phọ ọphon phọ pịdi nyinha ekpetenhaan muphe.” 41 Kụ uḍiinye ni mụum bụphe ọsighe bọ ikpo ọnhu phọ ọdi r’ibo, kụ ḍio phọ ạḍiphe phọ ephu 3,000 awe uḍighi aani ni bụmatuan. 42 Kụ bịdi ọkuom loor ạbidi ọnhaghan ghan ịtughemhi abutelhedom mọ, ooḍikuan ghan, ookpomhoghan ghan olhe eḍien, ọḅilhe ọoḅereghi ghan.

43 Ọkar agey, oomo awe phọ ụmhoogh ni oghiilhaan, kụ abutelhedom mọ uḍighi yogh ni kẹn ịbadi ịiḍaany. 44 Kụ oomo ạbuphe omheeraam bọ uukpomhoghan ni eniin esi kụ oseere oomo ạraraar ạbidi ogbo, 45 kụ bịdi aalhaghi rere ạbidi r’oomo ạraraar ạbidi kụ ọdaph ghan dọl ạtorobo oye kụ odi ikpoki phọ. 46 Ḍio etum ḍio bịdi ụḅoph ghan ni ọghi ẹpe otu ịiḅereghi phọ, kụ ookpomhoghan ghan ruutu kịrokiro ọḅophan ghan olhe riiḍien phọ ạbidi r’ibo. Kụ bịdi uḍighi ghan oomo ạraraar r’ophooph olhoghi, 47 oboom ghan Ẹnhaan ọḅilhe ọḅeraan oomo awe. Kụ ḍio etum ḍio a Jehova* aḍighi ghan ni ịdi bụphe ọdi rạpel bọ koḍighan bịdi.