Iiḍighi Abutelhedom Mọ

3 Ḍiniin aḍio a Pita rạ Jọn unyeenhe ni ẹpe otu ịiḅereghi phọ mem mọ rọoḅereghi ghan bọ, ịduon phọ pọ omhunhenhiom esugha ạwa* phọ. 2 Kụ mem mọ ọpo phọ, awe ụpham ni oye dị aḍighi ẹkugha k’amem dị ọmhar rọkimhom ẹpe otu ịiḅereghi phọ, sịphe ọnhu aḍibuo phọ oghol bọ mọ Ịma. Kụ tọrobo aḍio, bịdi useere ghan nyọdi otumeriom ọnhu aḍibuo phọ, pịdi ọdi ạlom ghan ịlom we dị roḍigh ẹpe otu ịiḅereghi phọ. 3 Kụ ọdi amhiigh ni ọlhom a Pita rạ Jọn mem mọ ạmhiin bọ dị rotu oḍigh ịsiphe otu ịiḅereghi phọ. 4 Kụolo a Pita rạ Jọn uughiraan ni osoman nyọdi, kụ a Pita ạḅenhi nyọdi mọ: “Uphogh iyoor.” 5 Kụ ọdi agbon riḍien ọdi bịdi, agon ghan ọteeny ịyaar ḍịghaagh ạbidi. 6 Kụ a Pita ạḅenhi nyọdi mọ: “Mị ụ́moogh silva ra gol, kụolo ịyaar lọ mị ạmhoogh kụ ẹdi mị kạngo nyịnha. Esi aḍien a Jizọs Krạịst ọpo ạ Nạzạrẹt phọ, mị rạḅenhi ghan nyịnha mọ, telhe!” 7 Ọdi rọghaaph ịphen phọ kụ ạpham ḍịghaagh elhiom oye phọ rạmeremhi, bịn mem mem mọ ạrada oye phọ r’ịikpighonhu oye phọ ẹekparagh; 8 kụ oye phọ akem ạmheera, kụ amhiigh orelhe kụ ạdaph bịdi aḍigh ẹpe otu ịiḅereghi phọ, ratelhe yogh kạḅilhe apelheghu aboom Ẹnhaan. 9 Kụ oomo awe phọ ọmhiin dị ọdi ratelhe kaboom Ẹnhaan. 10 Kụ bịdi ọlhogh nyọdi elhegh, mọ ọdi oye phọ ạrol ghan bọ ude sịphe Ịma Ọnhu Aḍibuo otu ịiḅereghi phọ ạlhomhian. Kụ ịphen emitenhaan bọ nyọdi iḍigh ni iboom ḍiigu esi ạbidi.

11 Oye phọ ạpam ni Pita rạ Jọn, kụ awe phọ oghiil ọghi ọteeny bịdi ẹpe oghol bọ mọ Ạ Vạrạndạ Ạ Sọlọmọn, kụ ịphen emite bọ iḍighi ni iikia esi ạbidi. 12 A Pita rọmhiin ịphen phọ kụ apuru we phọ mọ: “We Izrẹl, uḍighi ika kụ ịphen phọ eḍighi bọ iikia esi anyinha, kụ uḍighi ika kụ nyinha riphogh bọ kẹn iyoor mụdi esi ịikpo ayoor ọbobo ịdi yoor rokumu Ẹnhaan iboom kụ yoor orue bọ oḍighi ịdi oye phọ ọphon phọ ratelhe? 13 Ẹnhaan phọ Ebrạhạm rạ Ạịzik ra Jekọb, Ẹnhaan ạburude ạburude phọ ayira, maghuenhi Jizọs Ẹbenhe phọ ọdi, ọpo nyinha ẹḅogh bọ ẹngo we ẹḅilhe eghel ghisigh ạ Pạịlet, ghạlhamo r’ịduon ọdi masopha bọ ni oseere ọdi. 14 Ii, nyinha ighel li oye phọ ọpo phọ aḍighi bọ oye iigbia r’oye elhiom eḍighinhom ịyaar kụ ẹḅem mọ oseere oye dị aḍighi ọokom enu, 15 kụ eghiigh Ọkpanha Oḍiemhiom aghuḍum mọ. Kụolo Ẹnhaan aḅeton ni nyọdi esi aḍuugh, kụ yoor ụkar ri ọmhiin ịphen phọ r’ariḍien ayoor. 16 Iigo esi aḍien phọ ọdi, r’omheeraam mọ yoor ọmhoogh bọ ọghi esi aḍien phọ ọdi, kụ oye phọ ọphon phọ nyinha rẹmiin bọ ẹḅilhe elhegheri amhoon bọ. Omheeraam mọ yoor ọmhoogh bọ loor ẹmhu ọdi kụ aḍighi bọ ịdi oye phọ ọphon phọ amhoon bọ sịen ghisigh anyinha. 17 Bumor phọ, mị alegheri ni mọ élegheri kụ iḍighi bọ ịyaar phọ nyinha eḍighi bọ ịpe phọ, ịdipho ạbutooghia phọ anyinha. 18 Kụolo ịphen phọ imite omhunhenhi ịpe Ẹnhaan ạghaaph bọ k’ẹpe ọmhan dị eego esi oomo ariil phọ mọ ạ Krạịst phọ kạmiinhom ni.

19 “Esi ịduon phọ, ikiton, kụ eeghiraan esoman Ẹnhaan ọbo ọdi agbuurogh ịkaraph phọ anyinha, pịdi ịnyaam ẹḍua ḍịghaagh a Jehova r’aloor etu* 20 kụ ọdi atom Krạịst phọ ọdi mịmaanhaan bọ inyinha mọ aru, ịduon phọ pọ a Jizọs. 21 Ọdi kạtol li ẹpe k’ạke tụtu ẹteeny mem mọ koḅulhemhi bọ oomo ạraraar ịpe ẹkpe bọ ọrol, ịdipho Ẹnhaan ạghaaph bọ dị eego esi ariil aruukuan phọ ọdi iḍiodi phọ. 22 Ọkar ọghaaph, a Mozis ạḅem mọ: ‘A Jehova* Ẹnhaan phọ anyinha kimiteomonhaan inyinha oyil ịduon ạmhi sịphe igbo phọ anyinha. Kụ nyinha ẹmoogh ọnhaghanhan ạtorobo ịlo ọdi ịḅenhi inyinha. 23 Ọkar ọghaaph, kopiemhi ni tọrobo oye* igbo awe phọ Ẹnhaan dị ụ́naghanhan oyil phọ ọpo phọ.’ 24 Kụ emhiigh Sạmụẹl kụ rẹki, oomo ariil dị mọghaaph ghan ịlo ịphen phọ, mọghaaph ni eten dị eegholhaany ịlo ariiḍio phọ ịphen phọ. 25 Nyinha kụ ạnmuny ariil phọ r’ạnmuny phọ ọghaaph bọ oghol sịphe ịyo phọ Ẹnhaan aghiran bọ bụrude ạburude phọ anyinha. Ọdi ạḅenhi Ebrạhạm mọ: ‘Oomo arughun otu ade phọ kọmoogh ni ḍịseph dị eego esi ọony* ạna.’ 26 Ẹnhaan romiteom bọ Ẹbenhe phọ ọdi, kụ arom mọ ạphur aru ịteeny inyinha ạseph, esi oḍighi ịdi nyinha kekiton esi ịkaraph iḍighinhom ạraraar phọ anyinha.”