Ọdaphan Ịpe ạ Mạtiu Ạge Bọ

19 A Jizọs rọghaaph ịphen phọ rọmhan, kụ ạḅua Gạlili ạghi asi ẹpe ạruuku phọ a Judia edi bọ ẹḅeenyom Ọphiiny phọ ạ Jọdạn. 2 Aḍiboom aḍita awe ụdaph ni nyọdi, kụ ọdi aakonhom bịdi ẹpe phọ.

3 Kụ ạbuo ạ Fạrisi phọ oru ọteeny nyọdi r’ạḍiitughian ọdegh ọdi ophogh, kụ opuru mọ: “Ẹkpeanhaan ni dị oye kạtuan tọrobo ịyaar bịn aseere ạnhir ọdi ḍụghum?” 4 Kụ ọdi ạphagharanhaan mọ: “Nyinha kạ̋al ghan mọ ọpo ạlhem bọ bịdi k’emhiighom mọ ạlhem bịdi ẹya r’elhephiri 5 kụ ạḅem mọ: ‘Esi ịduon phọ, oye kạbilhe ọde r’onhiin ọdi kụ ạḅoph r’ạnhir ọdi, kụ ịyal ạbidi oḍighi iniin iphulhupul?’ 6 Kụ iḍighi kụ bịdi úḍighi mụn ịyal, kụolo iniin iphulhupul. Esi ịduon phọ, bụphe Ẹnhaan mạḅophoghi bọ, oye kụ́gbarion.” 7 Kụ bịdi opuru nyọdi mọ: “Uḍighi bọ ika kụ a Mozis ạḅem bọ mọ oye dị rạwa oseere ạnhir ọdi ạngo ghan ạnhir phọ ḍịnya oseereom ạnhir kụ agbi nụun ophorogh ọdi?” 8 Kụ ọdi ạphagharanhaan bịdi mọ: “A Mozis ạtuan ịgbagara arokpom mọ anyinha kụ amheera bọ mọ iseere ghan nmạriir phọ anyinha, kụolo ị́tol ghan ịdipho k’emhiighom mọ. 9 Mị rịḅenhi ghan inyinha mọ tọrobo oye dị úkol ẹmhu ọrolhan esi dị ụ́ḅaal* kụ aseere ạnhir ọdi ạghi aphin ọnhon pọ malhe ẹmha.”

10 Kụ ạbumatuan phọ ọḅenhi nyọdi mọ: “Eru mạar dị ḍịphe kụ eḍighi dọl olom r’ạnhir pọ ị́kpeanhaan ophin ạnhir.” 11 Kụ ọdi ạḅenhi bịdi mọ: “Oomo awe kụ kótue oḍighi ịphen phọ, emuton bụphe ọmhoogh bọ inmo phọ. 12 Ịdi eḍighi bọ aroophoony awe odi ni dị ọmharam ịdipho, buniin awe kụ upho, kụ bụnhon ọtuan Ọmhar k’ạke phọ kụ oḍighi roophoony. Oye lọ katue ni ạtol dọl phọ ạḍien phọ ạrol li.”

13 Uruom ni nyọdi ịbam ạnmuny dị ọdi kạḅamam bịdi rạghaagh ọdi kụ ạaḅereghinhaan, kụolo ạbumatuan phọ ụḅaam ni bịdi. 14 Kụolo a Jizọs ạḅem mọ: “Imeera ịbam ạnmuny phọ oru ụteeny ịmhi, késophoghom bịdi, loor esi dị Ọmhar k’ạke phọ ọlo ọdo ạbuen phọ.” 15 Kụ ọdi ạḅamam bịdi rạghaagh ọdi kụ ạḅua ẹpe phọ.

16 Kụ oye aru ạteeny nyọdi kụ apuru mọ: “Ọtughemhia, ẹghen egey ịyaar kụ ẹdi mị kaḍighi kụ ạmoogh ghuḍum k’agee-pọ?” 17 Kụ ọdi ạḅenhi nyọdi mọ: “Uḍighi ika kụ nạ rupuru bọ ịmhi ịlo ịyaar dị eḍighi egey? Oniin oye bịn kụ aḍighi ogey. Kụolo, eḍighi mạar dị nạ rạwa ọmhoogh aghuḍum pọ kooko ghan iilhogh phọ.” 18 Kụ ọdi apuru nyọdi mọ: “Ịghen?” Kụ a Jizọs mọ: “Kạ́ko enu, kále ẹmha, kámi imhi, kạ́gbaanhaan oye ịkaraph ạsiagba, 19 lọgh eegu ọde r’onhiin ạna, ḅịlhe pọmoghian matuman ạna ịdipho aloor phọ ạna.” 20 Kụ ọnyo ugheel ọony phọ ạḅenhi nyọdi mọ: “Mị raako ghan ni oomo phọ ịphen phọ; eeghe kụ isugha dị mị kőḍighi?” 21 Kụ a Jizọs ạḅenhi nyọdi mọ: “Eru mạar dị nạ rạwa omhunhughan, pọ kịa aalhaghi rạraar ạna kụ ạngo ikpoki phọ rukulhom mọ, bịn nạ kạmoogh ni ephua ẹpe k’ạke; kụ aru aḍighi ọnyo ạmatuan ạmhi.” 22 Ọnyo ugheel ọony phọ ạnhaghan bọ ịphen phọ, akururu ni kụ ạḅua, loor esi dị ọdi ạmoogh iboom ạraraar. 23 Kụ a Jizọs ạḅenhi bụmatuan phọ ọdi mọ: “Mị ạkar rịḅenhi ghan inyinha mọ kẹkpar ri dị ọolha kaḍigh Ọmhar k’ạke phọ. 24 Mị ạḅilhe rịḅenhi ghan inyinha mọ, edugh ghụn dị ạ kạmẹl kạbol epogh ạlaga epu dị ọolha kaḍigh Ọmhar phọ Ẹnhaan.”

25 Ạbumatuan phọ ọnhaghan bọ ịphen phọ iḍighi ni iikia esi ạbidi iboom, kụ ọḅem mọ: “Ạnhian nụun kụ ẹdi kọkar bọ ọpel?” 26 Kụ a Jizọs aphogh bịdi akiririom, kụ ạḅenhi bịdi mọ: “Esi awe ịphen phọ kétue emite, kụolo ịyaar ílo dị Ẹnhaan kátue aḍighi.”

27 Kụ a Pita ạphagharanhaan mọ: “Yoor mọwilhe oomo ạraraar ọdaph nyịnha. Eeghe ạsuo kụ ẹdi yoor kọmoogh?” 28 Kụ a Jizọs ạḅenhi bịdi mọ: “Mị ạkar rịḅenhi ghan inyinha mọ, mem mọ koḍighi bọ oomo ạraraar imhoom, kụ Ọony phọ oye kạtolhom bọ ogbogh ạgada ịtooghi phọ ọdi, nyinha phọ ạbuen rịdaph bọ ịmhi kẹtolhoghuom 12 ạsigada ịtooghi, kụ eegbo ghan ịiruen ẹngo 12 arughunhughun phọ Izrẹl. 29 Kụ tọrobo oye lọ mạwilhe ruutu ọbobo bumor ọbobo bumaranhi ọbobo ọde ọbobo onhiin ọbobo ạnmuny ọbobo rere loor ẹmhu aḍien phọ ạmhi kạmoogh ni okuron amem apuemhi ịphen phọ kụ ạḅilhe ạmoogh ghuḍum k’agee-pọ.

30 “Kụolo ịbadi awe dị oḍighi bụḅel koḅula ni ọmhan, kụ bụdi odi ọmhan oḍighi bụḅel.