Ọdaphan Ịpe ạ Mạtiu Ạge Bọ

14 Mem mọ ọpo phọ, ạ Hẹrọd ọtooghia ekool phọ, ạnhaghan ni ịlo a Jizọs 2 kụ ạḅenhi rẹbenhe ọdi mọ: “Ọphon phọ ạ Jọn Oḍiinyeom Mụum mọ. Moḅeton nyọdi esi aḍuugh, pọ kụ ịyaar phọ ạmhoogh bọ ịikpo oḍighinhom ịiḍaany phọ ịphen phọ.” 3 Ẹpe ọmhan, ạ Hẹrọd* asiph ni Jọn ạlhogh ikoli loor ạ Hẹrodiạs ạnhir phọ a Filip umor phọ ọdi. 4 Ịdi eḍighi bọ ạ Jọn ạḅenhi ghan nyọdi mọ: “Ị́kpeanhaan dị nạ kapin nyọdi.” 5 Kụ ghạlhamo r’ịduon ọdi ạwa bọ ni oghiigh ạ Jọn, ọdi aghiilhaan ni ḍita awe phọ, loor esi dị bịdi ọsighe Jọn ịdipho oyil. 6 Kụolo mem dị ạ Hẹrọd rale ẹyaal aḍio phọ ọmhar bọ nyọdi, ọnyanhi ạ Hẹrodiạs ạgher ri ịḅa ghisigh awe phọ kụ ẹḅeraan Hẹrọd iboom 7 dị tụtu aghunya ọngo ọnyanhi phọ tọrobo ịyaar dị apuru nyọdi. 8 Kụ ọnyanhi phọ ạdaph oromha onhiin phọ ọdi kụ ạḅem mọ: “Lọgh ẹmhu ạ Jọn Oḍiinyeom Mụum mọ ẹtelhelheeny ụngo ịmhi sịen.” 9 Ghạlhamo r’ịduon ịphen phọ ị́ḅaal bọ olhoghi uwo ẹmha phọ, ọdi ạto ni mọ oḍighi, loor iikunya phọ ọdi aghunya bọ ghisigh ạbuphe rolean bọ r’ọdi. 10 Kụ ọdi arom oniin ọnyo ẹgham ọdi mọ ạghi ẹpe otu ikoli phọ asoph ẹmhu ạ Jọn. 11 Kụ ọsighe ẹmhu phọ ọlhogh ẹtelhelheeny oru ọngo ọnyanhi phọ, kụ ạsighe ạghi ạngo onhiin phọ ọdi. 12 Ịpe reten kụ ạbumatuan phọ ọdi oru ọsighe ḍizu phọ ọdi ọghi oḍi; kụ ọru ọḅenhi Jizọs ịpe memite bọ. 13 A Jizọs rọnhaghan ịphen phọ, kụ aḍigh oghuugh ạḅua ẹpe phọ ạghi ekpisi dị awe úlo pịdi oginha ọdi ạtol. Kụolo aḍita awe phọ ọnhaghan bọ ịphen phọ, ụḅua ni rạmha phọ ạbidi orelhe owol ọdaph nyọdi.

14 Ọdi rosul, bịn ạmhiin ḍiboom aḍita awe, kụ ạmhoogh igbiririph ạghi esi ạbidi, kụ aakonhom bụphe úmoon bọ. 15 Kụolo adulhe reghul, kụ ạbumatuan phọ ọdi oru ọteeny nyọdi kụ ọḅem mọ: “Awe úlo ẹphen phọ, kụ amem mẹghi kẹn; ḅẹnhi mọ aḍita awe phọ oghelheghu, pịdi bịdi ọki ẹpe ạramha phọ oko eḍien ole.” 16 Kụolo a Jizọs ạḅenhi bịdi mọ: “Ị́wa mọ bịdi oghelheghu; ịngo bịdi ịyaar olhe.” 17 Kụ bịdi ọḅenhi nyọdi mọ: “R’ịyaar iyoor ílho sịen emuton oogh iiḅoghoḍi ạ brẹd r’ịyal ina.” 18 Kụ ọdi mọ: “Ịsighe iruom ịmhi.” 19 Kụ ọdi ạḅenhi ḍita phọ mọ ọrolhoghu ude sịphe ạroogho phọ. Kụ ạsighe oogh iiḅoghoḍi ạ brẹd phọ r’ịyal ina phọ, aphogh ẹpe k’ạke, ạaḅereghi,* rọparion ạ brẹd phọ, kụ ạḅogh ạ brẹd phọ r’ina phọ ạngo bụmatuan phọ ọdi, kụ ạbumatuan phọ ọngo ḍita awe phọ. 20 Kụ oomo ạbidi olhe ẹpherogh, kụ ạbumatuan phọ ọson ipoḍi phọ ịpe esugha bọ, kụ emuza 12 ạrigiel. 21 Awe phọ olhe bọ rọki ni ọmhan 5,000 alhephiri ạnmuny, dị úgbiom nmạriir r’ịbam ạnmuny. 22 Ịpe reten, íbia bịn a Jizọs ạḅenhi bụmatuan phọ ọdi mọ oḍigh oghuugh oḍia ghan ọphoripho ạga ọphiiny ạbazi phọ. Ịduon bịdi rọḍua bọ kụ ọdi ạḅenhi ḍita awe phọ mọ oghelheghu.

23 Ọdi roḍighi ịduon phọ, kụ ạsiiny ạnyu ẹeḅaraph phọ ọoḅereghi. Kụ oginha ọdi ạrol ẹpe phọ tụtu ekpereghian. 24 Mem mọ ọpo phọ oghuugh phọ mạkelhan ạnyu ade ịbadi arukuron a mita,* kụ ạbumatuan phọ rọkparagha ghan ọzoghi loor esi oolhogh phọ, ịdi eḍighi bọ oghim mọ ạda bịdi. 25 Kụolo eḅon ạḍiroor mem dị ke̋kpoghoronhu,* a Jizọs arelhe ni ạnyu ạmuum mọ aru ạteeny bịdi. 26 Ạbumatuan phọ ụmhoogh ni oghiilhaan mem mọ bịdi ọmhiin bọ dị ọdi ratelhe ạnyu ạmuum mọ, kụ ọḅem mọ: “Ọphon phọ uwaloor!” Kụ bịdi ọlooghi loor esi oghiilhaan. 27 Kụolo mem mem mọ bịn a Jizọs ạḅenhi ni bịdi mọ: “Ikpọ oḅio! Mị ni; kékiilhaan.” 28 Kụ a Pita ạphagharanhaan nyọdi mọ: “Uwo Ẹmhoogh, mọ ạna ni, pọ ụḅenhi ịmhi mị utelhe ạnyu ạmuum mọ utu ụteeny nyịnha.” 29 Kụ ọdi ạḅem mọ: “Tue!” Kụ a Pita ạḅua sịphe oghuugh phọ asoor arelhe ạnyu ạmuum mọ anyeenhe ẹpe a Jizọs odi bọ. 30 Kụolo mem mọ ọdi amhiigh bọ ophogh ịikpo oghim mọ, ạmhoogh ni oghiilhaan. Kụ raḅi, kụ ạlo mọ: “Uwo Ẹmhoogh, ụphel ịmhi!” 31 Eginha amem bịn a Jizọs ạgbuton ḍịghaagh ạpham nyọdi, kụ ạḅenhi nyọdi mọ: “Nạ oye dị omheeraam aghom, uḍighi ika kụ nạ aakia bọ?” 32 Bịdi roḍigh olhoghi oghuugh phọ, bịn oghim mọ ạpho. 33 Kụ bụphe ọrol bọ sịphe oghuugh phọ okpuḍian ghisigh ọdi, kụ ọḅem mọ: “Ọkar agey, nạ kụ Ọony phọ Ẹnhaan ni.” 34 Kụ bịdi ọḅeeny ọphoripho ạga ọphiiny ạbazi phọ osul Gẹnẹsạrẹt.

35 Awe ẹmha phọ rọlhogh Jizọs elhegh, kụ orom dom ọghiom oomo awe arokool phọ ekoom bọ sịphe, kụ awe ọsighe oomo ạbuphe úmoon bọ oruom nyọdi. 36 Kụ bịdi ọoḅereghian nyọdi mọ bụno ọḅogh aani ịghelhe ạsuoma ạnyu phọ ọdi, kụ oomo ạbuphe ọḅogh bọ omhoonhogh.