Ọdaphan Ịpe ạ Mạtiu Ạge Bọ

21 Bịdi rotuman Jeruselem kụ ọmheera Bẹtfạji ẹpe Ẹeḅaraph phọ Olivs, kụ a Jizọs arom ịyal ạbumatuan ọdi, 2 kụ ạḅenhi mọ: “Iḍigh ẹmha phọ nyinha rẹmiin bọ, nyinha reḍigh bịn nyinha kẹmiin ni ẹnham adool dị ọkpooghi r’ọony ọdi. Ịkarion iruom ịmhi. 3 Kụ eru mạar dị oye ịḅenhi inyinha ịyaar, pọ ịḅenhi nyọdi mọ, ‘Uwo Ẹmhoogh phọ kụ ạḅem mọ ọsighe ọghiom nyịnho.’ Bịn kameera ni mọ ịsighe.”

4 Ịphen phọ imite omhunhenhi ịpe oyil phọ ạghaaph bọ mọ: 5 “Ḅẹnhi ọnyanhi phọ ạ Zạyọn mọ: ‘Mịin! Uwo ẹmha phọ ạna ratu, ọdi aḍighi ọophonheen oye kụ aḍigh ẹnham adool, ii, ọony ẹnham adool.’”

6 Kụ ạbumatuan phọ ọghi ọtuugh ịpe a Jizọs ạḅenhi bọ bịdi oḍighi. 7 Bịdi ụsighe ni ẹnham adool phọ r’ọony phọ orumhom, kụ ọsighe rụsuoma ạnyu ạbidi ozuughiom ọmhan ịnham mọ kụ ọdi ạrolhom. 8 Ogbogh opol awe phọ ụdeeghi rụsuoma ạnyu phọ ạbidi sịphe eten phọ, kụ bụnhon ogbo ghan ịphiph ireeny ọde sịphe eten phọ. 9 Kụ aḍita phọ ạbuphe odi bọ ghisigh ọdi r’ạbuphe odi bọ ọmhan ọdi ọlo ghan mọ: “Yoor rọoḅereghi ghan mọ pẹl Ọony phọ a Devid! Ạḍiseph kụ edianhaan ọpo ratumhom bọ ḍien phọ a Jehova!* Yoor rọoḅereghi ghan mọ pẹl nyọdi, nạ phọ odi bọ ẹpe k’ạke phọ!”

10 Ọdi aḍigh bọ Jeruselem, oomo ẹmha phọ iphiigha ni kụ opuru ghan mọ: “Ọphon phọ ạnhian?” 11 Kụ aḍita awe phọ ọdaph bọ nyọdi ọḅem ghan mọ: “Ọphon phọ oyil phọ Jizọs, ọpo ạ Nạzạrẹt ẹpe Gạlili!”

12 Kụ a Jizọs aḍigh otu ịiḅereghi phọ kụ aphorogh yogh oomo ạbuphe robolhoghi bọ rạraar sịphe otu ịiḅereghi phọ r’ạbuphe roko bọ, kụ anyuughi alhereghi ịdaabili ạbuphe ronmeeghi ghan bọ ikpoki phọ r’ạsigada ạbuphe robolhoghi bọ rukuru ghọzo phọ. 13 Kụ ọdi ạḅenhi bịdi mọ: “Ọge ni sịphe Ịge Iigbia phọ mọ, ‘Kokol otu phọ ạmhi mọ otu ịiḅereghi,’ kụolo nyinha metenhe otu ạruḅa.” 14 Kụ awe dị rọ́miin ghan eten r’ạbudi oḍiku rạagha uru ni ọteeny nyọdi sịphe otu ịiḅereghi phọ, kụ ọdi aakonhom.

15 Mem mọ aruwo ẹmhu ạbupinyon rịkia phọ r’ạbutughemhia Olhogh phọ ọmhiin bọ ịiḍaany phọ ọdi aḍighi bọ r’ạnmuny phọ ọlo ghan bọ sịphe otu ịiḅereghi phọ mọ, “Yoor rọoḅereghi ghan mọ pẹl Ọony phọ a Devid!” bịdi ụghagh ni olhoghi 16 kụ opuru nyọdi mọ: “Nạ ạnaghan ni ịphen bịdi rọḅem bọ?” Kụ a Jizọs ạphagharanhaan bịdi mọ: “Ii. Nyinha kạ̋al ghan ịpe ọge bọ sịphe Ịge Iigbia phọ mọ, ‘Nạ maḍighi ịdi ịbam ạnmuny r’ạnmuny dị kőghinhe mạmaam roboom nyịnha’?” 17 Kụ ọdi ạwilhe bịdi ạḅua, amite sịphe ẹmha phọ ạghi ẹpe Bẹtạni kụ ạmhinha.

18 Eḅon ạḍiroor ọdi raḅula ẹpe ẹmha phọ, kụ ọkoony asiph nyọdi. 19 Kụ ọdi ạmhiin oreeny a fig dị odi ọgbal eten phọ kụ arelhe ạghi, kụolo ọ́mhiin eemhumha, ạrinya bịn kụ ịrol. Kụ ọdi ạḅenhi oreeny phọ mọ: “Nạ kámuum mụn ni bịn iimhumha.” Kụ oreeny a fig phọ amhugh mem mem mọ. 20 Kụ ạbumatuan phọ ọmhiin bọ ịphen phọ, iḍighi ni iikia esi ạbidi kụ opuru mọ: “Uḍighi ika kụ oreeny a fig phọ amhugh bọ ịduon mem mem mọ?” 21 Kụ a Jizọs ạphagharanhaan bịdi mọ: “Mị ạkar rịḅenhi ghan inyinha mọ, eru mạar dị nyinha ẹmhoogh omheeraam kụ ị́moogh iikia, pọ nyinha kéḍighi ịphen mị aḍighi bọ oreeny a fig phọ bịn, kụolo nyinha ẹḅenhi ẹeḅaraph phọ ẹphen phọ mọ, ‘Tuphuronhu asuma ẹpe ọphiiny ạbazi phọ,’ kemite ni. 22 Kụ nyinha ẹmhoogh ni omheeraam, pọ kịngo ni inyinha tọrobo ịyaar lọ nyinha ẹlhom esi ịiḅereghi.”

23 Ọdi roḍigh sịphe otu ịiḅereghi phọ rạtughemhi, kụ aruwo ẹmhu ạbupinyon rịkia phọ r’ikumor awe phọ oru ọteeny nyọdi kụ opuru mọ: “Ịghen ịikpo kụ ẹdi nạ ạsighe bọ raḍighinhom ghan rạraar phọ ịphen phọ? Kụ ạnhian kụ ạngo bọ nyịnha ịikpo phọ?” 24 Kụ a Jizọs ạḅenhi bịdi mọ: “Mị kipuru aani inyinha ḍiniin aḍipuru. Nyinha ịphagharanhaan ịmhi, pọ mị kịḅenhi ni inyinha ọdo ịikpo phọ mị ạsighe bọ raḍighinhom ghan rạraar phọ ịphen phọ: 25 Ịikpo phọ ạ Jọn aḍiinyeom ghan bọ we mụum mọ ịḍua ẹghen kụ eru? K’ạke ọbobo esi awe?” Kụ bịdi omhiigh oopuruan sịphe igbo phọ ạbidi mọ: “Eḍighi mạar dị yira ọḅem mọ, ‘Ịḅua k’ạke,’ pọ ọdi kụḅenhi iyira mọ, ‘Eru ịdipho, uḍighi ika kụ nyinha ímeeraam bọ nyọdi?’ 26 Kụolo eḍighi mạar dị yira ọḅem mọ, ‘Ịḅua esi awe,’ oghiilhaan ịlo ịpe aḍita awe phọ komegheron bọ odi ni, loor esi dị bịdi ụsighe Jọn ịdipho oyil.” 27 Kụ bịdi ọphagharanhaan Jizọs mọ: “Yoor úlegheri.” Kụ ọdi ạḅenhi bịdi mọ: “Pọ mị kẹn inyinha rị́ḅenhi ịikpo phọ mị ạsighe bọ raḍighinhom ghan rạraar phọ ịphen phọ.

28 “Nyinha ẹetughian ika? Oniin oye ạmhoogh ịyal ạnmuny. Kụ ạghi ạteeny ọḅel phọ kụ ạḅenhi mọ, ‘Mọony ạmhi, kịa akumuan ẹpe ozo ạ vạịn phọ rodon phọ.’ 29 Kụ ọphon phọ ạphagharanhaan mọ, ‘Mị rạ́ki,’ kụolo mọony amem, kụ alhoghoma sại kụ ạghi. 30 Kụ ọdi ạghi ạteeny omhunhenhiom ịyal phọ, ạtuugh iginha phọ ạḅenhi. Kụ ọphon phọ ạphagharanhaan mọ, ‘Mị kạki ni Oye phọ,’ kụolo ọ́ghi. 31 Ọghen sịen ịyal phọ ạbidi kụ aḍighi ịpe ọde phọ rạwa bọ?” Kụ bịdi mọ: “Ọḅel phọ.” Kụ a Jizọs ạḅenhi bịdi mọ: “Mị ạkar rịḅenhi ghan inyinha mọ ạbubonyiom iisogh phọ r’ạrukunhakunha phọ kụ mịphur inyinha roḍigh Ọmhar phọ k’Ẹnhaan. 32 Loor esi dị ạ Jọn aru oḍeenhaan anyinha eten phọ ẹpe ẹnhighe bọ,* kụ nyinha ímeeraam nyọdi. Kụolo ạbubonyiom iisogh phọ r’ạrukunhakunha phọ umheeraam ni nyọdi, kụ ghạlhamo r’ịduon nyinha ẹmhiin bọ ni ịphen phọ, bịn nyinha íloghoma sại imeeraam nyọdi.

33 “Ịnaghan ọnhon ọghaaph ọmaaniom: “Oniin uwo ozo ạzuph ni ozo ạ vạịn, kụ aghoony aaghironhom ạḅilhe aguph epogh ọzeer iimhumha phọ kụ ạlhogh otu dị aphoph ạghi ạnyu pạ ozo phọ. Kụ ọdi ạngo ozo phọ buḅephom iizo mọ ophoghonhaan nyịnho kụ ạḅua ạghi ẹnhon eelhe. 34 Rẹteeny mem mọ iimhumha phọ rẹḅaal ghan bọ, kụ arom rẹbenhe ọdi mọ ọghi ọteeny buḅephom iizo phọ ọsighe bin ọdi. 35 Kụolo abuḅephom iizo phọ usiph ni rẹbenhe phọ, okuphogh oniin, oghiigh oniin, oroḅol ikpo ọnhon. 36 Ọdi ạḅilhe ni arom bụnhon ạrebenhe ọdi, dị opu bụḅel phọ, kụolo bịdi ụtuugh ni iginha phọ oḍighi bụen phọ. 37 Eekunha phọ ọdi arom ni ọony ọdi, kụ ạḅem mọ, ‘Bịdi kọlogh ni eegu ọony phọ ạmhi.’ 38 Abuḅephom iizo phọ rọmhiin ọony phọ, kụ oopuruan mọ, ‘Ọphon kụ kale bọ erua ozo ạ vạịn phọ. Itu oghiigh nyọdi ọsighe erua phọ ọdi!’ 39 Kụ bịdi osiph nyọdi ọḍuanham sịphe ozo ạ vạịn phọ oghiigh. 40 Esi ịduon phọ, mem dị uwo ozo ạ vạịn phọ aru, kaḍighi eeghe buḅephom iizo phọ ạbuen phọ?” 41 Kụ bịdi ọḅenhi nyọdi mọ: “Loor ịduon bịdi oḍighi bọ bụkaraph awe, ọdi kạze ni bịdi kụ ạḅogh ozo ạ vạịn phọ ạngo bụnhon abuḅephom iizo, dị kọngo nyọdi bin iimhumha phọ ọdi mem dị ẹḅaal.”

42 Kụ a Jizọs ạḅenhi bịdi mọ: “Nyinha kạ̋al ghan sịphe Ịge Iigbia phọ mọ, ‘Aḍighiigh phọ ạbuloghom ruutu phọ oghel bọ meḍighi ḍighiigh dị ẹmhan mạar epu ịnhon.* Ịphen phọ ịḅua esi a Jehova* kụ eru, kụ ẹmaar ẹnighe sịen ariḍien phọ ayira’? 43 Pọ kụ ịyaar phọ mị rịḅenhi ghan bọ inyinha mọ, kạar ri inyinha Ọmhar phọ Ẹnhaan ọngo we dị roḍighi ghan ịpe Ẹnhaan rạwa bọ. 44 Kụ oye lọ amheelhom ḍighiigh phọ ạḍien phọ kaatughuḍian ni. Kụ aḍighiigh phọ kẹegbi ni tọrobo ọlo emheelhom.”

45 Mem mọ aruwo ẹmhu ạbupinyon rịkia phọ r’ạbuo ạ Fạrisi phọ ọnhaghan bọ rạghaaph ọmaaniom mọ ọdi, bịdi ulhegheri ni mọ ọdi rạkaaph ghan ịlo ạbidi. 46 Ghạlhamo r’ịduon bịdi ọwa bọ ni osiph ọdi, bịdi ughiilhaan ni ḍita awe phọ loor esi dị ọsighe nyọdi ịdipho oyil.