Ọdaphan Ịpe ạ Mạk Ạge Bọ

11 Bịdi rotuman Jeruselem kụ ọmheera sịphe Ẹeḅaraph phọ Olivs, ẹpe ạ Bẹtfạji rạ Bẹtạni odi bọ, kụ ọdi arom ịyal ạbumatuan ọdi, 2 kụ ạḅenhi mọ: “Iḍigh ẹmha phọ nyinha rẹmiin bọ, nyinha reḍigh bịn nyinha kẹmiin ni ọony ẹnham adool dị ọkpo dị oye kọ̋rolhom ghan. Ịkatan ẹsighe eru sịen. 3 Kụ eru mạar dị oye ipuru inyinha mọ, ‘Uḍighi ika kụ nyinha rẹkatan bọ?’ ịḅenhi mọ, ‘Uwo Ẹmhoogh phọ kụ ạḅem mọ ọsighe ọghiom nyịnho kụ kạnuun ni aḅulhemhi.’” 4 Kụ bịdi ọghi ọmhiin ọony ẹnham adool phọ dị ọkpo ghisigh eghuugh otu dị atuman eten, kụ bịdi ọkatan. 5 Kụolo buniin awe dị ọmheregha sịphe phọ upuru ni bịdi mọ: “Uḍighi ika kụ nyinha rẹkatan bọ ọony ẹnham adool phọ?” 6 Kụ bịdi ọtuugh ịpe a Jizọs ạghaaph bọ ọḅenhi we phọ, kụ omheera mọ bịdi ọsighe ọḍuanham.

7 Kụ bịdi ọsighe ọony ẹnham adool phọ oruom Jizọs, kụ ọsighe rụsuoma ạnyu ạbidi ozuughiom ọmhan ọony ẹnham adool phọ kụ ọdi ạrolhom. 8 Kụ ịbadi ụdeeghi ni kẹn rụsuoma ạnyu phọ ạbidi sịphe eten phọ, kụ bụnhon ọde ịphiph ireeny dị bịdi ogbo ghan ẹpe elhegheḍum mọ. 9 Kụ bụphe odi bọ ẹpe aghisigh phọ r’ạbuphe ọḍua bọ ẹpe ọmhan phọ rotu ọlo ghan mọ: “Yoor rọoḅereghi ghan mọ pẹl nyọdi! Ạḍiseph kụ edianhaan ọpo ratumom bọ ḍien phọ a Jehova!* 10 Ạḍiseph kụ edianhaan Ọmhar phọ ratu bọ, Ọmhar a Devid ọde phọ ayira! Yoor rọoḅereghi ghan mọ pẹl nyọdi, nạ phọ odi bọ ẹpe k’ạke phọ!” 11 Ọdi rosi Jeruselem kụ aḍigh otu ịiḅereghi phọ, aphogh oomo ạraraar phọ akitonhom, kụolo loor ịduon amem mẹghi bọ, ọdi ra Ḍioph r’ Ịyal phọ uḅula ni Bẹtạni.

12 Rẹteeny ḍio phọ etum bọ sịphe, bịdi rọḍua Bẹtạni, kụ ọkoony asiph nyọdi. 13 Kụ ọdi ạrol k’egher ạmhiin oreeny a fig dị ạmhoogh rịnya, kụ ạghi ophogh mụghumo amuum ni. Kụolo ọdi asi bọ, ọ́mhiin eemhumha, ạrinya bịn kụ ịrol, ịdi eḍighi bọ kẹ̋teeny mem dị a fig ramuum ghan. 14 Kụ ọdi ạḅenhi oreeny phọ mọ: “Oye kále mụn ni bịn eemuma ạna.” Kụ ạbumatuan phọ ọdi ụnhaghan ni ịphen phọ.

15 Bịdi uru ni osi Jeruselem. Kụ ọdi aḍigh otu ịiḅereghi phọ kụ amhiigh ophorogh yogh ạbuphe robolhoghi bọ rạraar sịphe otu ịiḅereghi phọ r’ạbuphe roko bọ, kụ anyuughi alhereghi ịdaabili ạbuphe ronmeeghi ghan bọ ikpoki phọ r’ạsigada ạbuphe robolhoghi bọ rukuru ghọzo phọ, 16 kụ ọdi ómheera mọ oye ạpham ịyaar atenhom ẹpe otu ịiḅereghi phọ. 17 Kụ ọdi ạtughemhi ghan we phọ mọ: “Ụ́ge ḍịen sịphe Ịge Iigbia phọ mọ, ‘Kokol otu phọ ạmhi mọ otu ịiḅereghi oomo areelhe’? Kụolo nyinha metenhe otu ạruḅa.” 18 Kụ aruwo ẹmhu ạbupinyon rịkia phọ r’ạbutughemhia Olhogh phọ ọnhaghan bọ ịphen phọ, bịdi umhiigh ni ọwa areten oghiigh ọdi; kụolo bịdi ughiilhaan ni nyọdi ịdi eḍighi bọ ịtughemhi phọ ọdi iḍighi ni iikia esi aḍita awe phọ.

19 Aḍughul rekul, kụ a Jizọs r’ạbumatuan phọ ọdi ọḅua sịphe ẹmha phọ. 20 Kụolo eḅon ạḍiroor ạḍieripho aḍio phọ, bịdi otelhe roten kụ ọmhiin dị oreeny a fig phọ mamhugh k’azin. 21 Kụ a Pita rọotughian ịpe emite bọ kụ ạḅenhi nyọdi mọ: “Rạbạị, mịin! oreeny a fig phọ nạ asu bọ ọnhu phọ mamhugh.” 22 Kụ a Jizọs ạphagharanhaan bịdi mọ: “Ịmoogh omheeraam esi Ẹnhaan. 23 Mị ạkar rịḅenhi ghan inyinha mọ tọrobo oye lọ ạḅenhi ẹeḅaraph phọ ẹphen phọ mọ, ‘Tuphuronhu asuma ẹpe ọphiiny ạbazi phọ,’ kụ ụ́moogh iikia sịphe ekpom mọ ọdi kụolo ạmhoogh omheeraam mọ ịpe ọdi ạghaaph bọ kemite ni, pọ kemite ni. 24 Pọ kụ ịyaar phọ mị rịḅenhi ghan bọ inyinha mọ, oomo ạraraar lọ nyinha ẹlhom esi ịiḅereghi, ịmoogh omheeraam mọ nyinha mẹmhoogh, bịn nyinha kẹmoogh ni. 25 Kụ mem dị nyinha rẹeḅereghi, ịsar ẹwilhenhaan tọrobo ịyaar lọ oye iḍighi inyinha, pịdi Ọde phọ anyinha odi bọ ẹpe k’ạke phọ ạsar aani ịkaraph anyinha ịwilhenhaan inyinha.” 26* ——

27 Kụ bịdi ọḅilhe oru Jeruselem. Kụ ọdi ratelhe ẹpe otu ịiḅereghi phọ, kụ aruwo ẹmhu ạbupinyon rịkia phọ r’ạbutughemhia Olhogh phọ r’ikumor awe phọ oru ọteeny nyọdi 28 kụ opuru mọ: “Ịghen ịikpo kụ ẹdi nạ ạsighe bọ raḍighinhom ghan rạraar phọ ịphen phọ? Kụ ạnhian kụ ạngo bọ nyịnha ịikpo oḍighinhom ghan ịphen phọ?” 29 Kụ a Jizọs ạḅenhi bịdi mọ: “Mị kipuru aani inyinha ḍiniin aḍipuru. Nyinha ịphagharanhaan ịmhi, pọ mị kịḅenhi ni inyinha ọdo ịikpo phọ mị ạsighe bọ raḍighinhom ghan rạraar phọ ịphen phọ. 30 Ịikpo phọ ạ Jọn aḍiinyeom ghan bọ we mụum mọ ịḍua k’ạke kụ eru ọbobo esi awe? Ịphagharanhaan ịmhi.” 31 Kụ bịdi omhiigh oopuruan ṣiphe igbo phọ ạbidi mọ: “Eḍighi mạar dị yira ọḅem mọ, ‘Ịḅua k’ạke,’ pọ ọdi kạḅem mọ, ‘Eru ịdipho, uḍighi ika kụ nyinha ímeeraam bọ nyọdi?’ 32 Kụ yira kótue kẹn oḅom ẹmhu ọḅem mọ, ‘Ịḅua esi awe.’” Bịdi ughiilhaan ghan ḍita awe phọ, loor esi dị oomo ạbidi ụsighe Jọn ịdipho oyil. 33 Kụ bịdi ọphagharanhaan Jizọs mọ: “Yoor úlegheri.” Kụ a Jizọs ạḅenhi bịdi mọ: “Pọ mị kẹn inyinha rị́ḅenhi ịikpo phọ mị ạsighe bọ raḍighinhom ghan rạraar phọ ịphen phọ.”