Ọdaphan Ịpe ạ Mạtiu Ạge Bọ

27 Rẹḅaal ḍịroor, kụ oomo aruwo ẹmhu ạbupinyon rịkia phọ r’ikumor awe phọ omite ezue oopuruan ịlo oghiigh a Jizọs. 2 Bịdi rọghoroghi rạghaagh ọdi, kụ ọsighe nyọdi ọghi ọngo Pạịlet, opoghom mọ.

3 Mem mọ a Judas, ọpo aal bọ Jizọs, ạmhiin bọ mọ mosophonhaan Jizọs ọoruen aḍuugh, ọdi alhoghoma ni sại kụ aḅulhemhi 30 ipoḍi a silva phọ ạngo ruwo ẹmhu ạbupinyon rịkia phọ r’ikumor awe phọ, 4 kụ ạḅem mọ: “Mị ụpioman ni aal oye dị olhogh úsoor ọlhogh ạḍighaagh anyinha mọ ikiigh.” Kụ bịdi ọphagharanhaan nyọdi mọ: “Eeghe kụ ịmhoogh iyoor? Nạ kụ ulhegheri ịlo nạ kaḍighi!”* 5 Kụ ọdi aroph ipoḍi a silva phọ ạlhogh ẹpe otu ịiḅereghi phọ. Kụ ạḅua ạghi asinha amhugh. 6 Kụolo aruwo ẹmhu ạbupinyon rịkia phọ ụsighe ni ipoḍi a silva phọ kụ ọḅem mọ: “ị́kpe ọsighe ikpoki phọ ịphen phọ ọlhogh ẹpe roseere ghan bọ iisogh otu ịiḅereghi phọ, loor esi dị ịphen phọ ikpoki ịḅaal.” 7 Bịdi roopuruan rọmhan kụ ọsighe ikpoki phọ oghoom de ọḅolhom aroko ọbo oḍi ghan ruuruen. 8 Esi ịduon phọ, okol de phọ ạḍiphe phọ mọ Ade Ịḅaal k’arodon. 9 Ịphen phọ imhunhenhi ịpe oyil phọ Jerimạyạ ạghaaph bọ mọ: “Kụ bịdi ọsighe 30 ipoḍi a silva phọ, ọnhu ikpoki phọ abuniin ạnmuny phọ Izrẹl omheeraam bọ ọkpe ẹmhu ọdi, 10 kụ oghoom de ọḅolhom aroko phọ, ọdaphan ịpe a Jehova* ạto bọ ụḅenhi ịmhi.”

11 Ụmheremhi ni Jizọs ghisigh ạ Pạịlet, kụ ạ Pạịlet apuru nyọdi mọ: “Nạ kụ Uwo Ẹmha ạbuo a Ju phọ ni?” Kụ a Jizọs ạphagharanhaan mọ: “Nạ r’aloor kụ rạkaaph.” 12 Kụolo mem mọ aruwo ẹmhu ạbupinyon rịkia phọ r’ikumor awe phọ rọgbaaghi bọ sịagba kọḅam ẹmhu ọdi, ọdi ịyaar ọ́ghaaph. 13 Kụ ạ Pạịlet apuru nyọdi mọ: “Nạ ọ́nhaghan oomo ịphen phọ ọgbaaghi bọ rọḅam ẹmhu ạna?” 14 Kụolo ọdi ọ́phagharanhaan nyọdi, kụ ịphen phọ iḍighi ni iikia iboom esi ạ Pạịlet.

15 Tọrobo Ẹyaal Ọphel Otenhe, opoghom mọ aseere ghan ni oniin ọnyo ikoli, kụ iḍighi ghan tọrobo ọlo awe phọ rọwa. 16 Mem mọ ọpo phọ osoroghuom iilhogh dị aalheghaany dị oghol mọ ạ Bạrạbạs ạrol li ikoli. 17 Aḍita phọ rookpomhoghan, kụ ạ Pạịlet apuru bịdi mọ: “Nyinha rẹwa mọ mị useere ạnhian kụ ịngo inyinha, Bạrạbạs ọbobo Jizọs, ọpo rọmagh ghan bọ mọ Krạịst?” 18 Ịdi eḍighi bọ ạ Pạịlẹt alhegheri ni mọ aloor ẹḍim kụ ẹdi bịdi ọḅogh bọ Jizọs ọngo nyọdi. 19 Ọḅaram ịsiphe, ạnhir ọdi arom ni dom ạghiom nyọdi sịphe ọdi ạrolhom bọ ạgada ịiruen phọ mọ: “Kpọrion rạghaagh oye elhiom eḍighinhom ịyaar phọ ọpo phọ, ịdi eḍighi bọ mị ụmhiinhom ni agey ụmalha rodon phọ loor esi ọdi.” 20 Kụolo aruwo ẹmhu ạbupinyon rịkia phọ r’ikumor awe phọ ụḅenhi ḍita phọ mọ ọḅem mọ oseere Bạrạbạs, kụ oghiigh Jizọs. 21 Kụ ạ Pạịlet ạḅilhe apuru mọ: “Ạnhian sịen ịyal phọ ạbidi kụ ẹdi nyinha rẹwa mọ mị useere ụngo inyinha?” Kụ bịdi mọ: “Bạrạbạs.” 22 Kụ ạ Pạịlet apuru bịdi mọ: “Kụ nyinha rẹwa mọ mị uḍighi eeghe Jizọs phọ rọmagh ghan bọ mọ Krạịst?” Kụ oomo ạbidi mọ: “Kạn nyọdi loor oreeny aghiigh!” 23 Kụ ọdi apuru bịdi mọ: “Eeghe kụ iḍighi? Ọdi asoor eeghe olhogh?” Kụ bịdi ọkuamhi ghan bịn ọlo mọ: “Kạn nyọdi loor oreeny aghiigh!”

24 Ạ Pạịlet ạmhiin bọ mọ ịpe ọdi rạwa bọ oḍighi phọ rẹ́moogh ẹmhu, mọ awe phọ ọḅilhe bịn rọnyaaghian ghan, ọdi ạsighe ni mụum aatolha rạghaagh ọdi ghisigh aḍita phọ, kụ ạḅem mọ: “Ịḅaal oye phọ ọphon ílo ẹmhu ạmhi. Edi ẹmhu anyinha.” 25 Kụ oomo awe phọ ọphagharanhaan nyọdi mọ: “Ịḅaal ọdi ẹrol ẹmhu ayoor r’ạnmuny ayoor.” 26 Kụ ọdi aseere Bạrạbạs, kụolo ạto mọ ọgurogh Jizọs kụ ạḅogh nyọdi ạngo bụo ẹgham mọ mọ ọghi ọkan loor oreeny oghiigh.

27 Kụ ạbuo ẹgham mọ ạ Pạịlet ọpham Jizọs oḍighom ẹpe ogiga opoghom mọ, kụ bịdi ookpomhoghi oomo aḍita awe ẹgham mọ kụ okoom nyọdi. 28 Kụ ọkporion ạsuoma ọdi, kụ ọkpolhoghi nyọdi ọtotogh ọodoony ạsuoma, 29 kụ bịdi ọsighe iitoor olhoom eghoony uwo ẹmha ozu nyọdi kụ ọsighe ịkpara ọngo nyọdi mọ ạphamham ḍịghaagh elhiom ọdi. Bịdi ukpuḍian ni ghisigh ọdi, kụ ọgilaam ghan nyọdi, kụ ọḅem ghan mọ: “Yoor rọmagh ni o Uwo Ẹmha ạbuo a Ju phọ!” 30 Kụ bịdi ọsinoghom nyọdi ịghor kụ ọsighe ịkpara phọ omhiigh ọguroghom ẹmhu ọdi. 31 Bịdi rọgilaam nyọdi rọmhan, kụ ọkporion nyọdi ọodoony ạsuoma phọ, ọkpolhoghi ạsuoma ạnyu phọ ọdi, kụ ọsighe nyọdi onyeenheom dị kọkan loor oreeny.

32 Bịdi otelhe romite, kụ ọmhiin oye ọlo ạ Sạịrini dị oghol mọ ạ Sạịmọn. Kụ ọkpaariom nyọdi orool oreeny ịmhinhimhiin* phọ a Jizọs. 33 Bịdi rosi esi dị oghol mọ ạ Gọlgọtạ, ịduon phọ pọ, Esi Ọkeeghi Ẹmhu, 34 kụ ọngo nyọdi miim dị okirionhom ịyaar dị rekiḍim; kụolo ọdi ạanema bọ, ómheera ọphughol. 35 Bịdi rọkan nyọdi sịphe oreeny phọ, kụ ọsa ẹlhel odiighi ạsuoma ạnyu phọ ọdi, 36 kụ ọrol ude ogon ghan nyọdi. 37 Bịdi ụge kẹn ni olhogh phọ osiph bọ nyọdi ọkan sịphe oreeny phọ ạnyu ẹmhu ọdi, mọ: “Ọphon a Jizọs Uwo Ẹmha ạbuo a Ju phọ.”

38 Ụkan aani ni ịyal ạruḅa loor ireeny ịigaany a Jizọs, oniin ḍịghaagh elhiom ọphoripho ḍịghaagh ekeeny. 39 Kụ abutenhenheen phọ ọḅenhi yogh ghan nyọdi, kụ ooḅoghomhi ghan rụmhu ạbidi 40 kụ ọḅem ghan mọ: “Nạ ụḅem mọ nạ kalereghi otu ịiḅereghi phọ kụ ạḅilhe ạlogh esi ịraar aḍughul otu, pẹla nụun loor ạna! Mọ nạ ọony Ẹnhaan, pọ ḍụa sịphe oreeny ịmhinhimhiin* phọ asoor!” 41 Aruwo ẹmhu ạbupinyon rịkia phọ r’ạbutughemhia Olhogh phọ r’ikumor awe phọ umhiigh aani ni ọgilaam ọdi, kụ ọḅem ghan mọ: 42 “Ọdi ạphel li bụnhon, kụolo órue ọphelha loor ọdi! Mọ ọdi Uwo Ẹmha Izrẹl, pọ ọdi ạḍua sịphe oreeny ịmhinhimhiin* phọ asoor, bịn yira komeeraam ni nyọdi. 43 Tọ ọdi aḍuom olhoghi Ẹnhaan; kụ ạḅem bọ mọ, ‘Mị Ọony Ẹnhaan’? Mọ Ẹnhaan rạwa ni nyọdi pọ aru ạphel nyọdi nyịidipho.” 44 Ghạlhamo r’ạruḅa phọ ọkan bọ loor ireeny ịigaany ọdi, bịn ụḅenhi yogh aani ni nyọdi.

45 Rẹteeny omhunhenhiom odiiny ạwa* phọ, kụ ufiri amheelhom de phọ tụtu ẹteeny omhunhenhiom esugha ạwa* phọ. 46 Kụ omhunhenhiom esugha ạwa phọ, kụ a Jizọs ạlo mọ: “Ẹli, Ẹli, lạmạ sạbạktạni?” ịduon phọ pọ, “Ẹnhaan ạmhi, Ẹnhaan ạmhi, uḍighi ika kụ nạ mụḅitonhaan bọ ịmhi?” 47 Buniin ạbudi ọmeera aani sịphe phọ rọnhaghan ịphen phọ, kụ omhiigh ọḅem mọ: “Oye phọ ọphon phọ rạmagh ghan Ẹlạịjạ.” 48 Kụ mem mem mọ bịn oniin ọnyo ạbidi aghiil ạghi ạsighe iisighom ạlhogh olhoghi ạmiim dị rạlagh ạpharari loor oreeny ạngo nyọdi mọ ạphughol. 49 Kụolo abụeripho ụḅem mọ: “Ịbilhe nyọdi. Ophogh mụghumo Ẹlạịja katu ni ạpel nyọdi.” 50 Kụ a Jizọs ạḅilhe ạlo bịn esophaany.

51 Kụ ukpe phọ osophom bọ esi iigbia phọ ạkoghoronhaan k’ạnyu k’ude, kụ ade phọ ephiigha, kụ asighiigh eḅomoghian yogh. 52 Kụ iiḍi phọ ekpegherenhu yogh, kụ ịbadi aruzu awe aruukuan dị momhuughu yogh emiteghu 53 kụ ịbadi ọmhiin. (Kụ roḅeton nyọdi esi aḍuugh, kụ abuniin awe ọḅua ẹpe iiḍi phọ edi bọ oḍigh ẹpe ẹmha iigbia phọ). 54 Kụolo mem mọ uwo ẹmhu ạbuo ẹgham mọ r’ạbuphe ọrol bọ r’ọdi rogon Jizọs ọmhiin bọ dị ade phọ ephiigha r’ạraraar phọ remiteghu bọ, bịdi ụmhoogh ni oboom oghiilhaan kụ ọḅem mọ: “Ọkar agey, ọphon phọ kụ Ọony phọ Ẹnhaan phọ ni.”

55 Kụ ịbadi ạnmariir dị ọdaph Jizọs mem mọ ọdi rạḍua bọ Gạlili pịdi ọlhoghonhaan ghan nyọdi ḍịghaagh, ụrol li ekpisi dị ẹkel ophogh ghan ịpe remite bọ; 56 buniin ạbidi pọ a Meri Mạgdạlin ra Meri onhiin phọ a Jems ra Josis r’onhiin ạnmuny phọ ạ Zẹbẹdi.

57 Rẹki ọteeny ọgbal adulhe, kụ ọolha ọlo Ạrịmạtia, dị oghol mọ a Josẹf, dị aḍighi aani ọnyo ạmatuan a Jizọs ạḅua aru. 58 Kụ ạghi ạteeny Pạịlet kụ ạlhom ọsighe aḍizu phọ a Jizọs ọghi oḍi. Kụ ạ Pạịlet ạto mọ omheera ọdi ạsighe. 59 Kụ a Josẹf rọghi ọsighe ḍizu phọ, kụ ạsighe ịma oodugha ukpe dị ạḅaal aphurughiom, 60 kụ ạsighe ạghi ạlhogh omhoom oḍi ọdi, dị aguph loor aḍighiigh. Kụ aakilhemhi ḍigbogh aḍighiigh apukiom ọnhu oḍi phọ, kụ ạḅua. 61 Kụolo a Meri Mạgdạlin r’ọphoripho a Meri phọ ụ́ḍua aani, bịdi ụrol li sịphe osoman oḍi phọ.

62 Rẹteeny ḍio phọ ạḍiphe etum bọ ḍio iikolhobian aḌio Ophooghian phọ, kụ aruwo ẹmhu ạbupinyon rịkia phọ, r’ạbuo ạ Fạrisi phọ ọghi ọteeny Pạịlet, 63 kụ ọḅem mọ: “Oye phọ, yoor ọotughian ni mọ mem mọ ọgbaam ọkpe phọ ọpo phọ kőmhugh bọ, ọdi ạḅem ni mọ, ‘Ịraar aḍughul otu reten mị kaḅetenhu ni.’ 64 Esi ịduon phọ, ngọ ịto mọ ọmhaar okori oḍi phọ tụtu ẹteeny omhunhenhiom ịraar aḍughul otu phọ, ọbo ạbumatuan phọ ọdi kọki ghan bọ omi ḍizu phọ ọdi bịn ọḅenhi we mọ, ‘Moḅeton nyọdi esi aḍuugh!’ Ịphen phọ kụ emite pọ ọkpe phọ ọphon phọ kabeeph ni apu ọḅel phọ.” 65 Kụ ạ Pạịlet ạḅenhi bịdi mọ: “Nyinha etue ni ẹsighe we ẹgham mọ ạbuen phọ ẹkimhom pịdi bịdi ọtol okori oḍi phọ ịpe nyinha rẹwa bọ.” 66 Kụ bịdi ọghi ọkuamhi opuki ọnhu oḍi phọ kụ oseere we ẹgham ophogh ghan.