Ọdaphan Ịpe ạ Mạk Ạge Bọ
15 Rekpoghoronhu bịn, aruwo ẹmhu ạbupinyon rịkia phọ r’ikumor awe phọ r’ạbutughemhia Olhogh phọ, oomo ạ Sạnhẹdrin phọ, omite ezue, kụ ọghoroghi rạghaagh a Jizọs kụ ọsighe nyọdi ọghi ọngo Pạịlet. 2 Kụ ạ Pạịlet apuru nyọdi mọ: “Nạ kụ Uwo Ẹmha ạbuo a Ju phọ ni?” Kụ a Jizọs ạphagharanhaan mọ: “Nạ r’aloor kụ rạkaaph.” 3 Kụolo aruwo ẹmhu ạbupinyon rịkia phọ ụgbaaghi ni ịbadi ạsiagba ọḅam ẹmhu ọdi. 4 Kụ ạ Pạịlet ạḅilhe amhiigh opuru ọdi mọ: “Nạ ọ́mhoogh aani ịyaar ọghaaph? Nạ rạnaghan bọ ni ịbadi iilhogh phọ bịdi rosiphi bọ nyịnha.” 5 Kụolo a Jizọs ọ́phagharanhaan nyọdi, kụ ịphen phọ iḍighi ni iikia esi ạ Pạịlet.
6 Tọrobo Ẹyaal Ọphel Otenhe, ạ Pạịlet aseere ghan ni oniin ọnyo ikoli dị awe phọ ọlhom. 7 Kụ mem mọ ọpo phọ, oye dị oghol mọ ạ Bạrạbạs ạrol li ikoli r’ạbunhon awe dị oghiigh oye mem dị bịdi rọgbagharan bụo ịtooghi phọ. 8 Esi ịduon phọ aḍita awe phọ uru ni ọteeny Pạịlet kụ omhiigh ọlhom mọ aḍighi ịpe ọdi raḍighinhaan ghan bọ bụno. 9 Kụ ọdi apuru bịdi mọ: “Nyinha rẹwa mọ mị useere Uwo Ẹmha ạbuo a Ju phọ ḍụghum?” 10 Ịdi eḍighi bọ ạ Pạịlet alhegheri ni mọ aloor ẹḍim kụ ẹdi aruwo ẹmhu ạbupinyon rịkia phọ ọḅogh bọ Jizọs ọngo nyọdi. 11 Kụolo aruwo ẹmhu ạbupinyon rịkia phọ ụḅenhi ghan ḍita awe phọ mọ ọḅem mọ oseere ghụn Bạrạbạs. 12 Kụ ạ Pạịlet ạḅilhe apuru bịdi mọ: “Kụ nyinha rẹwa mọ mị uḍighi eeghe nyọon nyinha rẹmagh ghan bọ mọ Uwo Ẹmha ạbuo a Ju phọ?” 13 Kụ bịdi ọḅilhe ọlo mọ: “Kạn nyọdi loor oreeny aghiigh!” 14 Kụolo ạ Pạịlet apuru bịdi mọ: “Eeghe kụ iḍighi? Ọdi asoor eeghe olhogh?” Kụ bịdi ọkuamhi ghan bịn ọlo mọ: “Kạn nyọdi loor oreeny aghiigh!” 15 Kụ loor ịduon ạ Pạịlet rạwa bọ oḍighi ịdi olhoghi aḍita awe phọ kạḅaal, ọdi aseere ni Bạrạbạs; kụ rọto mọ ọgurogh Jizọs, kụ ạḅogh nyọdi ạngo bụo ẹgham mọ ọghi ọkan nyọdi loor oreeny oghiigh.
16 Kụ ạbuo ẹgham mọ ọpham nyọdi oḍighom ẹpe ogiga phọ, ịduon phọ pọ, ẹpe amarugh opoghom mọ, kụ ọmhagh oomo aḍita awe ẹgham mọ ookpomhoghi. 17 Kụ bịdi ọkpolhoghi nyọdi oodor ạsuoma kụ ọsighe iitoor olhoom eghoony uwo ẹmha ozu nyọdi; 18 kụ omhiigh ọḅenhi ọdi mọ: “Yoor rọmagh ni o, Uwo Ẹmha ạbuo a Ju phọ!” 19 Bịdi ụguroghom ni kẹn ẹmhu ọdi ịkpara ọḅilhe ọsinhoghom ịghor, kụ okpuḍian ghisigh ọdi ozumeri rụmhu ạbidi. 20 Bịdi rọgilaam nyọdi rọmhan, kụ ọkporion nyọdi oodor ạsuoma phọ, ọkpolhoghi ạsuoma ạnyu phọ ọdi. Kụ bịdi ọsighe nyọdi onyeenheom dị kọkan loor oreeny. 21 Bịdi ụkpaariom ni kẹn oniin oye dị raten orool oreeny ịmhinhimhiin* phọ a Jizọs. Ḍien oye phọ ughol mọ ạ Sạịmọn kụ olọ ạ Sạịrini, ọde Ạlẹgzạndạ ra Rufọs. Mem mọ ọpo phọ ọdi atelhe raḍigh ẹpe ẹmha phọ.
22 Kụ bịdi ọsighe nyọdi osiemhi esi phọ oghol bọ mọ ạ Gọlgọtạ, kụ ẹmhu phọ pọ, “Esi Ọkeeghi Ẹmhu.” 23 Sịphe phọ bịdi ụghi ni ọngo ọdi miim dị okironhom ọogho dị oghol mọ ạ mạạ, kụolo ọdi ómheera ọphughol. 24 Kụ bịdi ọkan nyọdi sịphe oreeny phọ, odi rụsuoma ạnyu phọ ọdi, kụ ọsa ẹlhel olhegheriom abin dị tọrobo ọnyo ạbidi kạsighe. 25 Mem mọ ọpo phọ mẹteeny omhunhenhiom ịraar ạwa* phọ, kụ bịdi ọkan nyọdi sịphe oreeny phọ. 26 Kụ ụge ni kẹn olhogh phọ osiph bọ nyọdi mọ: “Uwo Ẹmha ạbuo a Ju phọ.” 27 Bịdi ụkan aani ni ịyal ạruḅa loor ireeny ịigaany a Jizọs, oniin ḍịghaagh elhiom ọphoripho ḍịghaagh ekeeny. 28* —— 29 Kụ abutenhenheen phọ ọḅenhi yogh ghan nyọdi, kụ ooḅoghomhi ghan rụmhu ạbidi kụ ọḅem ghan mọ: “Ịhii! Nạ ụḅem mọ nạ kalereghi otu ịiḅereghi phọ kụ ạḅilhe ạlogh esi ịraar aḍughul otu, 30 ḍụa nụun sịphe oreeny ịmhinhimhiin* phọ asoor ạphelha loor ạna.” 31 Aruwo ẹmhu ạbupinyon rịkia phọ r’ạbutughemhia Olhogh phọ ụgilaam aani ghan ni nyọdi sịphe igbo phọ ạbidi, kụ ọḅem ghan mọ: “Ọdi ạphel li bụnhon, kụolo órue ọphelha loor ọdi! 32 Mọ ọdi ạ Krạịst phọ ni, Uwo Ẹmha phọ Izrẹl, pọ ọdi ạḍua sịphe oreeny ịmhinhimhiin* phọ asoor, pịdi yira ọmiin kụ omeeraam nyọdi.” Ghạlhamo r’ạbuphe ọkan bọ loor ireeny ịigaany ọdi, bịn ụḅenhi yogh aani ni nyọdi.
33 Rẹteeny omhunhenhiom odiiny ạwa* phọ, kụ ufiri amheelhom de phọ tụtu ẹteeny omhunhenhiom esugha ạwa* phọ. 34 Kụ omhunhenhiom esugha ạwa phọ, kụ a Jizọs ạlo mọ: “Ẹli, Ẹli, lạmạ sạbạktạni?” kụ ẹmhu phọ pọ, “Ẹnhaan ạmhi, Ẹnhaan ạmhi, uḍighi ika kụ nạ mụḅitonhaan bọ ịmhi?” 35 Kụ buniin ạbudi ọmheera otuman sịphe phọ rọnhaghan ịphen phọ, kụ omhiigh ọḅem mọ: “Ịmiin! Ọdi rạmagh ghan Ẹlạịjạ.” 36 Kụ oye aghiil ạghi ạsighe iisighom ạlhogh olhoghi amiim dị rạlagh, ạpharari loor oreeny ạngo nyọdi mọ ạphughol, kụ ạḅem mọ: “Ịbilhe nyọdi! Ophogh mụghumo Ẹlạịjạ katu ni ạpam nyọdi asoore.” 37 Kụ a Jizọs ạlo bịn esophaany. 38 Kụ ukpe phọ osophom bọ esi iigbia phọ ạkoghoronhaan k’ạnyu k’ude. 39 Mem mọ uwo ẹmhu ạbuo ẹgham mọ, ọpo ạmheera bọ asoman Jizọs ạmhiin bọ rạraar phọ emiteghu bọ mem mọ ọdi amhugh bọ, ạḅem mọ: “Ọkar agey, oye phọ ọphon phọ kụ Ọony phọ Ẹnhaan phọ ni.”
40 Kụ ạnmariir ụrol li kẹn ekpisi dị ẹkel ophogh ghan ịpe remite bọ, buniin ạbidi pọ a Meri Mạgdạlin, ra Meri onhiin Ọbam a Jems ra Josis, rạ Sạlomi. 41 Bụen phọ ụdaph ghan nyọdi ọḅilhe ọlhoghonhaan nyọdi ḍịghaagh mem mọ ọdi ạrol bọ ẹpe Gạlili. Kụ aḍita ạbunhon ạnmariir dị ọdaph aani nyọdi oru Jeruselem ụrol aani ni sịphe phọ.
42 Mem mọ ọpo phọ, rẹki ọteeny ọgbal adulhe, kụ loor ịduon eḍighi bọ Ḍio Iikolhobian, dị eten kẹteeny bọ Ḍio Ophooghian phọ, 43 oye dị oghol mọ a Josẹf ọlo Ạrịmạtia aru ni, ọdi aḍighi aani okumor oye dị ọlhogh eegu sịphe Ọkaraghi Ogbogh Otu Ịiruen ạbuo a Ju phọ, ḅịlhe akori aani ghan Ọmhar phọ Ẹnhaan. Kụ r’ạkpo oḅio ọdi ạghi ạteeny Pạịlet ạlhom ọsighe aḍizu phọ a Jizọs ọghi oḍi. 44 Kụolo ạ Pạịlet ạwa ni olhegheri mụghumo ọdi mamhugh ni, esi ịduon phọ apuru ni uwo ẹmhu ạbuo ẹgham mọ mụghumo a Jizọs mamhugh ni. 45 Kụ uwo ẹmhu ạbuo ẹgham mọ rọḅenhi nyọdi mọ mamhugh ni, kụ amheera mọ a Josẹf ạsighe ḍizu phọ. 46 A Josẹf rọghi ogho ịma oodugha ukpe, rosoore nyọdi, kụ aphurughiom ịma oodugha ukpe phọ ạsighe ạghi ạlhogh oḍi dị oguph loor aḍighiigh; kụ aakilhemhi ḍighiigh apukiom ọnhu oḍi phọ. 47 Kụ a Meri Mạgdạlin ra Meri onhiin phọ a Josis ụghiom ni ghisigh ophogh ghan sịphe ọlhogh bọ nyọdi.