Ọdaphan Ịpe ạ Mạk Ạge Bọ
2 Tọrobo ịpe ẹrol bọ, ịyal ikpo aḍughul otu reten kụ ọdi ạḅilhe aḍigh Kạpạnịọm, kụ awe ọnhaghan mọ ọdi odi olhoghi otu. 2 Kụ ịbadi awe ookpomhoghan sịphe ọdi odi bọ, dị tụtu r’esi ọrol ị́tol mụn ghạlhamo r’ịpa ọnhu aḍibuo phọ, kụ ọdi amhiigh ogbeelhom adom mọ Ẹnhaan ọḅenhi ạbidi. 3 Kụ awe ọsighe oye dị ariisi aloor emhuughu dị inya alhephiri ạnmuny kụ ọpham oruom nyọdi. 4 Kụolo loor aḍita awe phọ bịdi útue ụsighe nyọdi usiemhi ọkar esi phọ a Jizọs ạrol bọ. Esi ịduon phọ bịdi ụtuugh sịphe ọdi ạrol bọ kụ ogbonyon ạnyu otu phọ, kụ omhiigha loor osoore ẹmhinha phọ oye phọ ạmhinha bọ. 5 A Jizọs rọmhiin omheeraam mọ ạbidi, kụ ạḅenhi oye phọ aloor phọ ị́nighe bọ mọ: “Mọony ạmhi, mọsar ịkaraph ạna ọwilhenhaan nyịnha.” 6 Buniin ạbutughemhia Olhogh phọ dị ọrol aani ude sịphe phọ, umhiigh ni ọotughian ịsiphe olhoghi ạbidi mọ: 7 “Uḍighi ika kụ oye phọ ọphon phọ rạkaaph bọ ịduon phọ? Ọdi rạapu ḍien Ẹnhaan. Ạnhian kụ katue ạsar ịkaraph ạbilhenhaan emuton Ẹnhaan?” 8 Kụolo mem mem mọ bịn a Jizọs alhegheri ni mọ bịdi rọotughian ghan ịduon phọ sịphe igbo phọ ạbidi, kụ apuru bịdi mọ: “Uḍighi ika kụ nyinha rẹetughian bọ ịphen phọ sịphe arokpom mọ anyinha? 9 Sịen ọḅenhi oye phọ aloor phọ ị́nighe bọ mọ, ‘Mọsar ịkaraph ạna ọwilhenhaan nyịnha,’ r’ọḅem mọ, ‘Ḅetenhu ạsighe ẹmhinha phọ ạna arelhe,’ ẹghen kụ idugh epu? 10 Kụolo pịdi nyinha elhegheri mọ Ọony phọ oye ạmoogh ni ịikpo ọsar ọwilhenhaan ịkaraph sịen ade phọ—” kụ ọdi ạḅenhi oye phọ ariisi aloor phọ emhuughu bọ mọ: 11 “Mị rạḅenhi ghan nyịnha mọ, Ḅetenhu, ạsighe ẹmhinha phọ ạna, agheel k’ạna.” 12 Kụ oye phọ aḅetenhu mem mem mọ kụ ạsighe ẹmhinha phọ ọdi arelhe ạḅua sịphe ghisigh oomo ạbidi. Kụ ịphen phọ iḍighi ni iikia esi oomo ạbidi, kụ oghuenhi Ẹnhaan kụ ọḅem ghan mọ: “K’ekulha yira kọ̋mhiin ghan ọdo ịphen phọ.”
13 Ọdi ạḅilhe ni ạghi ẹpe oogbom ọphiiny ạbazi phọ, kụ oomo aḍita awe phọ oru ghan ọteeny nyọdi kụ ọdi amhiigh ọtughemhi ạbidi. 14 Kụ ọdi atelhe raten, kụ ạmhiin Livạị ọony phọ Ạlfiọs dị ạrol ude sịphe otu oḍighi ạbubonyiom iisogh phọ, kụ ạḅenhi mọ: “Tue aḍighi ọnyo ạmatuan ạmhi.” Kụ ọdi aḅetenhu ạdaph nyọdi. 15 Ịphen phọ reten, ọdi odi rale ghan eḍien ka Livạị, kụ ịbadi ạbubonyiom iisogh r’abuḍighinhom ịkaraph oru olhean ghan r’ọdi r’ạbumatuan phọ ọdi, loor esi dị ịbadi ạbidi kụ ụdaph ghan nyọdi. 16 Kụolo mem mọ ạbutughemhia Olhogh phọ ạbuphe oḍighi bọ bụo ạ Fạrisi phọ ọmhiin bọ mọ ọdi ralean ghan buḍighinhom ịkaraph r’ạbubonyiom iisogh phọ, bịdi umhiigh ni opuru ạbumatuan phọ ọdi mọ: “Uḍighi ika kụ ọdi ralean ghan bọ bụbonyiom iisogh r’abuḍighinhom ịkaraph phọ?” 17 A Jizọs rọnhaghan ịphen phọ, kụ ạḅenhi bịdi mọ: “Awe dị úmoon kụ umhoghi oyil, kạ́bulo omhoon. Mị uru ọmhagh abuḍighinhom ịkaraph, kạ́buo elhiom eḍighinhom ịyaar.”
18 Ạbumatuan phọ ạ Jọn r’ạbuo ạ Fạrisi phọ ụkaagh ghan ni ẹḍogh. Esi ịduon phọ awe uru ni opuru nyọdi mọ: “Uḍighi ika kụ ạbumatuan phọ ạ Jọn r’ạbumatuan ạ Fạrisi phọ rọkaagh ghan bọ ni ẹḍogh, kụ ạbumatuan phọ ạna rọ́kaagh aani ghan bọ?” 19 Kụ a Jizọs ạphagharanhaan bịdi mọ: “Ạrighiri oye dị rapin ạnhir ọmoogh ni ịyaar ọtuan ọkaagh ẹḍogh mem dị oye phọ odi r’ạbidi ḍụghum? Kẹ́wa mọ bịdi ọkaagh ẹḍogh mem dị oye phọ odi r’ạbidi. 20 Kụolo amem retu ni dị kọsighe oye phọ rapin bọ ạnhir phọ igbo ạbidi, pọ kụ amem dị bịdi kọkaagh ẹḍogh. 21 Oye ólho dị kạsighe ọpherepe omhoom ukpe kụ ạkolhom ogbaany ukpe dị ạphaaru. Ọdi aḍighi ịduon phọ, pọ omhoom ukpe phọ kạpoghoronhu ni ạḍua, kụ esi phọ ẹphaaru bọ ẹbugh epu ịpe ẹrol ghan bọ. 22 Ḅịlhe kẹn, oye ólho dị kạsighe mumhoom amiim ạlogh ogbaany okuru amiim dị oḍighinhom ozu ẹnham. Ọdi aḍighi ịduon phọ, pọ amiim mọ kạpaar ri okuru phọ, kụ amiim mọ azuan kụ okuru phọ kạ́moogh mụn mạar oḍighinhom. Rọlogh ghan mumhoom amiim omhoom okuru amiim.”
23 Ọdi atelhe raten ozo ịizupha Ḍio Ophooghian phọ, kụ ạbumatuan phọ ọdi omhiigh ọku ikpo ịizupha phọ ịduon bịdi orelhe bọ rọki. 24 Kụ ạbuo ạ Fạrisi phọ opuru nyọdi mọ: “Uḍighi ika kụ bịdi roḍighi ghan bọ ịyaar dị ị́kpe oḍighi a Ḍio Ophooghian phọ?” 25 Kụ ọdi ạphagharanhaan bịdi mọ: “Nyinha kạ̋al ghan ịpe a Devid aḍighi bọ mem mọ ọdi ụ́moogh bọ ịyaar olhe kụ ọkoony phọ asiph bọ nyọdi r’awe phọ ọdaph bọ nyọdi? 26 Sịphe ọghaaph phọ Ạbạyạtạ uwo ẹmhu ạbupinyon rịkia phọ, ọdi aḍigh otu phọ Ẹnhaan kụ alhe ạ brẹd phọ oseere bọ ghisigh Ẹnhaan, ị́kpeanhaan bọ dị ọnhon oye kale emuton bụpinyon rịkia phọ, kụ ạḅilhe ạsighe iniin ạngo we phọ rọdaph bọ nyọdi.” 27 Kụ ọdi ạḅenhi bịdi mọ: “Ụtuan oye kụ omiteom bọ Ḍio Ophooghian phọ, ụ́tuan Ḍio Ophooghian phọ kụ ọlhem oye. 28 Esi ịduon phọ, Ọony phọ oye Uwo Ẹmhoogh a Ḍio Ophooghian phọ kẹn.”