Ọdaphan Jọn

9 Ịduon ọdi arelhe bọ rạki, ạmhiin ni oye dị rạ́miin ghan eten k’amem dị ọmhar. 2 Kụ ạbumatuan phọ ọdi opuru nyọdi mọ: “Rạbạị, sịen oye phọ ọphon phọ r’ọde r’onhiin phọ ọdi, ạnhian kụ aḍighi ịkaraph kụ ọmhar bọ nyọdi kụ rạ́miin ghan bọ eten?” 3 Kụ a Jizọs ạphagharanhaan mọ: “Oye phọ ọphon phọ óḍighi ịkaraph, kụ ọde r’onhiin phọ ọdi kẹn úḍighi ịkaraph, kụolo ịphen phọ keḍighi ịdi awe kọmiin ịyaar dị Ẹnhaan katue aḍighi ịlo ạdol phọ ọdi ạḍien phọ. 4 Yira ọmoogh oḍighi oḍighi ọpo urom bọ ịmhi sịen aḍio phọ edi bọ; aḍughul kekul li dị oye kátue mụn aḍighi oḍighi. 5 Ịduon mị odi bọ ni sịen aḅirinhi phọ, mị kụ ạḍiḅaal aḅirinhi phọ.” 6 Ọdi rọghaaph ịphen phọ, kụ ạsin ịghor ude ạtoghoḍiom ọogha kụ ạsighe agbul riḍien oye phọ, 7 kụ ạḅenhi oye phọ mọ: “Kịa aatolha riḍien ạna ẹpe ebaraph phọ a Siloạm” (ẹmhu phọ pọ “Morom”). Kụ ọdi ạghi aatolha, kụ aḅula bọ mamhiigh rạmiin eten.

8 Kụ abumatuman r’awe dị olhegheri mọ ọdi ọlom le omhiigh ọḅem mọ: “Ọphon ḍịen kóye phọ ạlhomhian ghan bọ?” 9 Buniin ụḅem ghan mọ: “Ọdi phọ ni.” Kụ bụnhon mọ: “Eeye, ạkigh aani ni bịn.” Kụ oye phọ ạḅem ghan bịn mọ: “Mị ni.” 10 Kụ bịdi opuru nyọdi mọ: “Kụ iigo ika kụ nạ rạmiin bọ eten?” 11 Kụ ọdi ạphagharanhaan mọ: “Oye phọ oghol bọ mọ a Jizọs kụ ạtoghoḍi ịyaar agbul riḍien phọ ạmhi kụ ụḅenhi ịmhi mọ, ‘Kịa ẹpe Siloạm aatolha.’ Kụ mị ạghi aatolha bịn mị amhiigh ọmhiin eten.” 12 Kụ bịdi opuru nyọdi mọ: “Odi ẹghen oye phọ?” Kụ ọdi mọ: “Mị úlegheri.”

13 Kụ bịdi ọpham oye phọ ụ́miin ghan bọ eten phọ ọghiom bụo ạ Fạrisi phọ. 14 Kụ aḍio phọ a Jizọs ạsighe bọ ọogha phọ agbul riḍien oye phọ kụ oye phọ ạmhiin bọ eten iḍighi Ḍio Ophooghian. 15 Kụ ạbuo ạ Fạrisi phọ omhiigh opuru aani oye phọ ịpe eḍighi bọ kụ ọdi rạmiin bọ eten. Kụ ọdi ạḅenhi bịdi mọ: “Ọdi agbul ịyaar dị ọdi ạtoghoḍi riḍien ạmhi, kụ mị ạghi aatolha, kụ mị rạmiin bọ eten.” 16 Buniin ạbuo ạ Fạrisi phọ umhiigh ni ọḅem mọ: “Ẹnhaan kụ órom oye phọ ọpo phọ, loor esi dị ọdi ráako ghan olhogh a Ḍio Ophooghian phọ.” Bụnhon mọ: “Oḍighinhom ịkaraph kaḍighi bọ ika ọdo ịiḍaany phọ ịphen phọ?” Kụ amadia amite igbo ạbidi. 17 Kụ bịdi ọḅilhe opuru oye phọ ụ́miin ghan bọ eten phọ mọ: “Nạ ạkaaph aani eeghe ịlo ọdi, sịen dị ọdi kụ aḍighi bọ ịdi nạ rạmiin eten?” Kụ oye phọ mọ: “Ọdi oyil.”

18 Kụolo ạbuo a Ju phọ úmeeraam mọ oye phọ ọ́mhiin ghan eten kụ mamhiigh rạmiin, kụ ọghi ọmhagh ọde r’onhiin oye phọ mamhiigh bọ rạmiin eten. 19 Kụ opuru mọ: “Ọphon phọ ni kụ ọony phọ anyinha nyinha ẹḅem bọ mọ ọ́mhiin ghan eten k’amem dị ọmhar? Uḍighi ika kụ rạmiin bọ eten nyịidipho?” 20 Kụ ọde phọ r’onhiin phọ ọphagharanhaan mọ: “Ọphon kụ ọony phọ ayoor phọ ni, kụ ọmhar bọ nyọdi ọ́mhiin ghan eten. 21 Kụolo ịpe eḍighi bọ kụ ọdi rạmiin bọ eten nyịidipho yoor úlegheri; kụ oye phọ aḍighi bọ ịdi ọdi rạmiin bọ eten yoor úlegheri kẹn. Ipuru nyọdi. Ọdi mạmhanham ni. Ọdi katue ni ạkaaph ịlo ọdi.” 22 Ọde r’onhiin oye phọ ụghaaph ịphen phọ loor esi oghiilhaan ạbuo a Ju phọ, ịdi eḍighi bọ ạbuo a Ju phọ mosopha mọ koporogh sịphe obughotu phọ tọrobo oye lọ ạḅem mọ a Jizọs kụ ạ Krạịst phọ. 23 Pọ kụ ịyaar phọ ọde r’onhiin oye phọ ọḅem bọ mọ: “Ipuru nyọdi. Ọdi mạmhanham ni.”

24 Kụ bịdi ọḅilhe ọmhagh oye phọ ụ́miin ghan bọ eten phọ kụ ọḅenhi mọ: “Ngọ Ẹnhaan rughuenhian phọ; yoor olegheri ni mọ oye phọ ọpo phọ oḍighinhom ịkaraph.” 25 Kụ ọdi ạḅem mọ: “Mụghumo ọdi oḍighinhom ịkaraph, mị úlegheri. Ịyaar dị mị alhegheri pọ, mị ụ́miin ghan eten, kụolo mị rạmiin nyịidipho.” 26 Kụ bịdi opuru nyọdi mọ: “Ọdi ạkar aḍighi ika kụ nạ rạmiin bọ eten nyịidipho?” 27 Kụ ọdi ạphagharanhaan bịdi mọ: “Mị mịḅenhi ni inyinha, kụ nyinha ímeera ịnaghan. Uḍighi ika kụ nyinha ẹḅilhe bọ rẹwa dị mị kịḅenhi inyinha? Nyinha rẹwa oḍighi aani ạbumatuan ọdi ḍụghum?” 28 Kụ bịdi ọḅenhi nyọdi eten ạrigilaam mọ: “Nạ kụ ạmatuan oye phọ ọpo phọ, yoor ạbumatuan a Mozis. 29 Yoor olegheri mọ Ẹnhaan ạḅaanhaan ni Mozis, kụolo ẹlo oye phọ ọpo phọ, yoor úlegheri ekpisi lọ ạḅua kụ aru.” 30 Kụ ọdi ạphagharanhaan bịdi mọ: “Ẹkar kụ eḍighi iikia mọ nyinha ílegheri ekpisi phọ oye phọ ọpo phọ ạḅua bọ aru, mem dị ọdi kụ aḍighi ịdi mị rạmiin eten. 31 Yira olegheri mọ Ẹnhaan rạ́naghan ghan ịiḅereghi abuḍighinhom ịkaraph, kụolo ọdi rạnaghan ghan ni ịiḅereghi oye dị rakiilhaan nyọdi kạḅilhe aḍighi ogbi ọdi. 32 Kọ̋nhaghan ghan mọ oye aḍighi ịdi oye dị kọ̋mhiin ghan eten k’amem dị ọmhar ạmhiin eten. 33 Eḍighi mạar dị Ẹnhaan kụ útom oye phọ ọpo phọ ọbo mútue uḍighi rạraar phọ ịphen phọ.” 34 Kụ bịdi ọphagharanhaan nyọdi mọ: “Nạ phọ ọmharam bọ ịkaraph phọ kụ rụtughemhi ghan iyoor?” Kụ bịdi oroph nyọdi omiteom erugh!

35 A Jizọs ạnhaghan ni mọ mophorogh oye phọ omiteom, kụ ọdi rọmhiin oye phọ, kụ apuru mọ: “Nạ rạmoogh omheeraam kạghi esi Ọony phọ oye ḍụghum?” 36 Kụ ọdi ạphagharanhaan mọ: “Oye phọ, ọdi ạnhian? Ụḅenhi ịmhi pịdi mị ạmoogh omheeraam ạki esi ọdi.” 37 Kụ a Jizọs ạḅenhi nyọdi mọ: “Nạ mạmhiin nyọdi, kụ ọkar ọghaaph, ọdi kụ rạḅaanhaan bọ nyịnha.” 38 Kụ oye phọ mọ: “Mị ạmoogh ni omheeraam ạki esi ọdi, Uwo Ẹmhoogh.” Kụ akpuḍian ạngo Jizọs. 39 Kụ a Jizọs ạḅem mọ: “Mị uru sịen aḅirinhi phọ, pịdi ạraraar phọ ịpe mị raḍighi bọ eḍighi ịdi bụphe rọ́miin bọ eten kọmiin r’ịdi bụphe rọmiin bọ eten kọ́miin.” 40 Kụ mem mọ ạbuo ạ Farisi phọ ọrol bọ ra Jizọs ọnhaghan bọ ịphen phọ, upuru nyọdi mọ: “Tọ yoor úḍighi aani bụphe rọ́miin bọ eten phọ o?” 41 Kụ a Jizọs ạḅenhi bịdi mọ: “Mọ nyinha iḍighi bụphe rọ́miin bọ eten, ọbo ịkaraph ílo loor anyinha. Kụolo sịen nyinha mẹḅem bọ mọ, ‘Yoor rọmiin ni,’ pọ ịkaraph phọ anyinha edi ni r’anyinha.”