Ọdaphan Ịpe ạ Mạtiu Ạge Bọ

12 Mem mọ ọpo phọ a Jizọs atelhe raten ozo ịizupha Ḍio Ophooghian phọ, kụ ọkoony asiph bụmatuan phọ ọdi kụ omhiigh ọku ikpo ịizupha phọ olhe. 2 Ạbuo ạ Fạrisi phọ rọmhiin ịphen phọ, kụ ọḅenhi nyọdi mọ: “Mịin! ạbumatuan phọ ạna roḍighi ghan ịyaar dị ị́kpe oḍighi aḌio Ophooghian phọ.” 3 Kụ ọdi ạḅenhi bịdi mọ: “Nyinha kạ̋al ghan ịpe a Devid aḍighi bọ mem mọ ọkoony phọ asiph bọ nyọdi r’awe phọ ọdaph bọ nyọdi? 4 Ịpe ọdi aḍigh bọ otu phọ Ẹnhaan, kụ bịdi olhe bọ ạ brẹd phọ oseere bọ ghisigh Ẹnhaan, ịyaar dị ọdi ọbobo bụphe rọdaph bọ nyọdi ụ́kpe olhe, emuton bụpinyon rịkia phọ? 5 Ọbobo nyinha kạ̋al ghan sịphe Olhogh phọ, mọ Ḍio Ophooghian phọ ạbupinyon rịkia phọ odi bọ sịphe otu ịiḅereghi phọ rọka ghan ni olhogh aḌio Ophooghian phọ kụolo rọ́pioman ghan? 6 Kụolo mị rịḅenhi ghan inyinha mọ ịyaar dị ẹbugh epu otu ịiḅereghi phọ edi ni sịen. 7 Tọrobo ịpe ẹrol bọ, mụghumo nyinha ịnhaghanhan ni ẹmhu ikpo ọnhu phọ ẹḅem bọ mọ, ‘Mị rạwa mọ iḍeenhaan ghan ọnma ighirigiir kpạripe r’ọphinyon ghan ạrikia,’ ọbo nyinha mísoph ọoruen ipumhe we dị ụ́piom. 8 Loor esi dị Ọony phọ oye Uwo Ẹmhoogh aḌio Ophooghian phọ.”

9 Ọdi rọḅua sịphe phọ kụ ạghi ẹpe obughotu phọ ạbidi, 10 kụ oye ạrol li sịphe phọ dị ạḍighaagh emhugh! Kụ buniin awe ụwa ghan ni ịyaar osiphom ọdi olhogh, kụ opuru mọ, “Ẹkpeanhaan ni ookonhom ghan oye Ḍio Ophooghian phọ?” 11 Kụ ọdi ạḅenhi bịdi mọ: “Eḍighi mạar dị nyinha ẹmhoogh oyool ọga kụ oyool ọga phọ asuma epogh Ḍio Ophooghian phọ, ọnyo anyinha odi ni dị kạ́ki ạpam apunhe? 12 Oye ạman ni mạar apu oyool ọga! Esi iḍuon phọ, ẹkpeanhaan ni oḍighi egey ịyaar Ḍio Ophooghian phọ. 13 Kụ ọdi ạḅenhi oye phọ mọ: “Gbụton ḍịghaagh phọ ạna.” Kụ oye phọ ạgbuton ḍịghaagh phọ, kụ emhoon aani ịdipho ạḍieripho ạḍighaagh phọ. 14 Kụolo ạbuo ạ Fạrisi phọ umite ni ọghi oopuruan ịlo oghiigh ọdi. 15 A Jizọs rolhegheri ịphen phọ, kụ ạḅua sịphe phọ. Ịbadi awe ụdaph ni nyọdi, kụ ọdi aakonhom oomo ạbidi, 16 kụolo ọdi ạphur bịdi rụru mọ kụ́ḅenhi we ọdo oye phọ ọdi aru bọ, 17 ịphen phọ imite omhunhenhi ịpe oyil phọ Ạịzạyạ ạghaaph bọ mọ:

18 “Mịin! Ọphon ẹbenhe phọ ạmhi mị ạsaḅar bọ, ọpo mị ạphomhoghian bọ, eḍighinhom ịyaar phọ ọdi ịḅeraan ịmhi iboom! Mị kạngo ni nyọdi uwaloor phọ ạmhi, kụ ọdi aganhanhamhi aḍeenhaan reelhe phọ ịyaar dị elhiom ọoruen eru. 19 Ọdi kạ́tuan ọruonhu ḅịlhe oye kạ́naghan ẹḍogh ọdi ẹpe aroḅodo phọ. 20 Ọdi kạ́sam ikpu dị menyororo, ḅịlhe káḍime ọtozi dị oḍigh phọ ramunheen, tụtu ọdi ạsighe aru elhiom ọoruen. 21 Ọkar agey, areelhe kịrokiro koḍuom ni olhoghi ḍien phọ ọdi.”

22 Kụ awe ọsighe oruom nyọdi oye dị ọkaraph uwaloor odi loor phọ dị rạ́miin ghan eten ḅịlhe rạ́ḅa ghan, kụ ọdi aakonhom, kụ oye phọ ụ́ḅa ghan bọ amhiigh ọḅa r’ọmhiin eten. 23 Ịphen phọ iḍighi ni iikia esi aḍita awe phọ kụ omhiigh ọḅem mọ: “Ọphon phọ kụ Ọony phọ a Devid ḍụghum?” 24 Ạbuo ạ Fạrisi phọ rọnhaghan ịphen phọ kụ ọḅem mọ: “Oye phọ ọphon ạsighe ịikpo a Biẹlzịbọb,* ọtooghia ịkaraph aruwaloor phọ, kụ raporoghom ghan bọ ịkaraph aruwaloor phọ.” 25 Ọdi alhegheri ni ịitughian phọ ạbidi kụ ạḅenhi bịdi mọ: “Tọrobo ịtooghi dị amadia odi kepe ni, ḅịlhe tọrobo ẹmha ọbobo otu lọ amadia odi kạ́meera. 26 Eniin phọ eten phọ, eru mạar dị a Setạn raporogh Setạn, pọ ọdi mamhiigh rabian loor; kụ ịtooghi phọ ọdi kẹmeera bọ ika?” 27 Ḅịlhe kẹn, eru mạar dị mị ạsighe ịikpo a Biẹlzịbọb kụ raporoghom ghan ịkaraph aruwaloor, ịghen ịikpo kụ ẹdi ạnmuny phọ anyinha ọsighe bọ roporoghom aani ghan? Pọ kụ ịyaar phọ bịdi kụ koḍighi bọ buugboom ịiruen anyinha. 28 Kụolo eḍighi mạar dị mị ạsighe ni ịikpo Ẹnhaan kụ raporoghom ghan ịkaraph aruwaloor phọ, pọ ọkar agey Ọmhar phọ Ẹnhaan mạar inyinha eten. 29 Oye ólho dị katue aḍigh otu oye dị ạmhoogh ịikpo bịn ạsigheogh rạraar, emuton dị ạphur ạphaḍi oye phọ. Pọ kụ amem dị katue ạsigheogh rạraar sịphe otu oye phọ. 30 Tọrobo oye lọ úlo gạ ạmhi pọ rurupheom ịmhi elhephiri, kụ tọrobo oye lọ ịmhi úḍighan ookpomhoghi ạbunhon pọ rạwalhalhamhi ghan ghụn.

31 “Esi ịduon phọ mị rịḅenhi ghan inyinha mọ, kọsar ri ọbilhenhaan we tọrobo ịkaraph dị bịdi oḍighi r’ịkaraph dị bịdi ọghaaph, kụolo kọ́sar ọbilhenhaan oye dị ạghaaph ịkaraph ịlo uwaloor phọ Ẹnhaan. 32 Esi ọmaam, tọrobo oye lọ ạghaaph ịkaraph ilọ Ọony phọ oye, kọsar ri ọbilhenhaan, kụolo ọlo ạghaaph ịkaraph ịlo uwaloor iigbia phọ kọ́sar ọbilhenhaan, mụghumo ịsien ạḅirinhi phọ ọphon* phọ ọbobo ọpo ratu bọ.

33 “Nyinha ẹmhaar ephogh oreeny, pọ kạnighe ni kụ amuum ịma iimhumha, kụolo nyinha ị́maar ipogh, pọ kaḍighi ọḅoria kụ amuum ịḅoria iimhumha, loor esi dị rọsighe ghan iimhumha phọ kụ olegheriom ọdo oreeny phọ. 34 Nmụny ạsiḅom, nyinha kẹkaaph bọ ika igey ạraraar mem dị nyinha eḍighi bụkaraph awe? Loor esi dị ịpe emuza bọ ekpom mọ kụ ẹdi ọnhu phọ rạkaaph ghan kamiteom. 35 Ogey oye ramiteom ghan igey ạraraar sịphe igey aruphua phọ ọdi, kụolo ọkaraph oye ramiteom ghan ịkaraph ạraraar sịphe ịkaraph aruphua phọ ọdi. 36 Mị rịḅenhi ghan inyinha mọ koogbonhaan ni we ịiruen Ḍio Ịiruen phọ esi ạtorobo ịḅoria ikpo ọnhu dị bịdi ọḅa; 37 loor esi dị esi ikpo ọnhu phọ ạna kụ ẹdi kogbeelhom mọ nạ oye elhiom eḍighinhom ịyaar, ḅịlhe esi ikpo ọnhu phọ ạna kụ ẹdi kosoph ọoruen ophumhe nyịnha.”

38 Kụ buniin ạbutughemhia Olhogh phọ r’ạbuo ạ Fạrisi phọ ọphagharanhaan nyọdi mọ: “Ọtughemhia, ḍighi amiteom eḍeenhaan yoor ọmhiin.” 39 Kụ ọdi ạphagharanhaan bịdi mọ: “Ọkaraph oghiil dị mọwilhe Ẹnhaan* rọwa ghan ọmhiin eḍeenhaan, kụolo kọ́ngo bịdi eḍeenhaan emuton eḍeenhaan oyil phọ Jona. 40 Ịdipho a Jona ạrol bọ ịraar aḍughul otu* sịphe ọkuruḅaka egbogh ena phọ, kụ ịdi Ọony phọ oye kạtol aani ịraar aḍughul otu* sịphe oḍi phọ. 41 Ḍio Ịiruen phọ awe phọ a Niniva r’oghiil phọ ọphon phọ koḅerenhu ni esi aḍuugh, kụ awe phọ a Niniva osoph ọoruen opumhe bịdi, loor esi dị bịdi ukiton ni mem mọ ọnhaghan bọ dom mọ a Jona. Kụolo ịmiin! oye dị apu Jona odi ni sịen. 42 Ḍio Ịiruen phọ ukuenhi ạnhir esoorom mọ r’oghiil phọ ọphon phọ koḅerenhu ni esi aḍuugh, kụ ọdi asoph ọoruen apumhe bịdi, loor esi dị ọdi ạḅua ni k’ekpisi dị ẹkel aru ọnhaghan ọsu olhoghi phọ ạ Sọlọmọn. Kụolo ịmiin! oye dị apu Sọlọmọn odi ni sịen.

43 “Mem dị ọkaraph uwaloor ạḍua loor oye, ratelhe yogh ghan rikpisi dị ạmuum úlo ọwa amarugh. Kụ eru mạar dị ụ́miin, 44 kụ ạḅem mọ: ‘Mị kaḅula sịphe otu phọ ạmhi mị ạḅua bọ amite,’ rosi kụ ạmiin mọ oye órugh esi phọ, kụolo oḅeer ọḅaalhamhi ọḅilhe ọnighemhi. 45 Kụ amite ạki ạmagh oḍual ịnhon ịkaraph aruwaloor dị ẹgbagara epu nyọdi, kụ oḍigh pạ phọ otugh; kụ ạdol oye phọ ọpo phọ ebeeph epu ịpe ẹrol ghan bọ ẹḅel amem mọ. Ịduon kẹn kụ ịdi kẹtolhonhaan ọkaraph oghiil phọ ọphon phọ.”

46 A Jizọs odi ni rạḅaanhaan ḍita awe phọ, kụ onhiin phọ ọdi r’abumor ọdi oru ọmheregha ẹpe erugh, ọwa ghan ọḅaanhaan ọdi. 47 Kụ oye ạghi ạḅenhi nyọdi mọ: “Onhiin ạna r’abumor ạna ọmeera ẹpe erugh, rọwa ghan ọḅaanhaan ạna.” 48 Kụ ọdi ạphagharanhaan oye phọ ạḅaanhaan bọ nyọdi mọ: “Ạnhian kụ onhiin ạmhi, ḅịlhe ạbuo ạnhian kụ abumor ạmhi?” 49 Kụ ọdi ạma bụmatuan phọ ọdi, kụ ạḅem mọ: “Pọrono onhiin ạmhi r’abumor ạmhi! 50 Tọrobo oye dị raḍighi ghan ogbi Ọde phọ ạmhi odi bọ k’ạke phọ, kụ umor ạmhi r’umaranhi ạmhi r’onhiin ạmhi.”