Ọdaphan Ịpe ạ Mạtiu Ạge Bọ

24 A Jizọs rạḍua bọ sịphe otu ịiḅereghi phọ, kụ ạbumatuan phọ ọdi oru ọteeny nyọdi, ọma oḍeenhaan ọdi ruutu phọ edi bọ sịphe otu ịiḅereghi phọ. 2 Kụ ọdi ạḅenhi bịdi mọ: “Tọ nyinha rẹmiin ni oomo ạraraar phọ ịphen phọ? Mị ạkar rịḅenhi ghan inyinha mọ, aḍighiigh kẹ́tol mụn ni bịn ạnyu aḍighiigh sịen phọ dị kóler.”

3 Ịdipho ọdi ạrol bọ sịphe Ẹeḅaraph phọ Olivs, ạbumatuan phọ ọdi uru ni ọteeny nyọdi mem dị oginha ọdi bịn odi, kụ opuru mọ: “Ụḅenhi iyoor, ịphen phọ kemite pụr amem, kụ eeghe kụ keḍeenhaan bọ mọ nạ maru* ḅịlhe mọ eekunha aḅirinhi phọ* mẹteeny?”

4 Kụ a Jizọs ạphagharanhaan bịdi mọ: “Igonha loor ọbo oye kiikelheghi ghan bọ inyinha, 5 loor esi dị ịbadi kotumhom ghan ni ḍien phọ ạmhi kụ ọḅem ghan mọ, ‘Mị kụ ạ Krạịst phọ,’ kụ ookelheghi ịbadi awe. 6 Nyinha kẹnaghan ni ịlo ạraagham dị etuman r’ịdi ẹkelhan. Kụolo kéekpereghaany, loor esi dị ịphen phọ kemite ni, kụolo eekunha phọ kẹ̋teeny.

7 “Eelhe kozuom ni eelhe ḅịlhe ọmhar azuom ọmhar, kụ ekuom eḍien kẹtol li ḅịlhe ade phọ kepiigha ni rikpisi kịrokiro. 8 Oomo phọ ịphen phọ eḍighi emhiighom ẹgbagara eephinha dị ẹghigh eephinha oghunhughun.

9 “Kụ awe kịgbiphoghom ni inyinha* ọḅilhe ịze inyinha, kụ oomo areelhe phọ kokol li ẹmhu aḍien phọ ạmhi ịlhogh inyinha ḍien. 10 Ḅịlhe kẹn, ịbadi komeel li, kụ oniin abool nyoniin ḅịlhe oniin ạlogh ḍien nyoniin. 11 Ịbadi ariil ọkpe komite ni kụ ookelheghi ịbadi; 12 kụ loor ịduon osoroghu iilhogh kapogh ghan bọ bịn ọbugh, ẹphomhoghian ogbogh opol awe kẹephoom ni. 13 Kụolo ọpo mạkparam* bọ asi ẹpe eekunha phọ, kọpel li. 14 Kụ kogbeelhom ni iiḅi ịinhaghan phọ ịlo Ọmhar phọ oomo ịsien aḅirinhi phọ, ọgba oleenye oomo areelhe phọ kụ eekunha phọ egbi oru.

15 “Esi ịduon phọ, mem dị nyinha ẹmhiin ịyaar ạḅaphanya phọ rẹkom ghan bọ muphe phọ dị ẹmheera esi iigbia, ịdipho oyil phọ Dạnịẹl ạghaaph bọ (ọpo rạbal bọ* ạmhoogh ọroph ọmhiin), 16 pọ bụphe odi bọ Judia omhiigh osumughu ọghi ẹpe ạraaḅaraph phọ. 17 Oye dị odi ạnyu otu kúsoor ookoroghian ạraraar otu ọdi, 18 kụ oye dị odi ozo kúḅula olhoghi otu ọsighe ạsuoma ạnyu ọdi. 19 Ịmhinhimhiin kụ kẹtolhonhaan nmạriir dị odi r’eghun r’ạbulo ọpham nmụny dị kőghinhe mạmaam mem mọ ọpo phọ! 20 Ịiḅereghi ghan mọ amem mọ nyinha kesumughu bọ kíḍighi mem ẹephoom ọbobo Ḍio Ophooghian; 21 mem mọ ọpo phọ, igbogh ịiḅaghamhi kemite ni, dị ke̋mite ghan k’amem mọ aḅirinhi phọ amhiigh bọ kụ ẹteeny nyịidipho, kụ emite, kémite mụn. 22 Ọkar ọghaaph, riiḍio phọ ịpe phọ kụ ụ́soph ukpere, pọ r’oye kákpetenhaan; kụolo kọtuan ni bụphe mọsaḅar bọ osoph riiḍio phọ ịpe phọ okpere.

23 “Kụ oye ịḅenhi inyinha mọ, ‘Ịmiin! Ạ Krạịst phọ odi ẹphen,’ ọbobo, ‘Ẹpe!’ kémeeraam. 24 Loor esi dị ariil ọkpe r’awe dị oghophora mọ bụno ạ Krạịst komite ni kụ oḍighi yogh igbogh ịiḍaany ookelheghiom awe, ghạlhamo r’ạbuphe mọsaḅar bọ, lọ edugh ni. 25 Ịmiin! Mị mịphur inyinha rụru. 26 Esi ịduon phọ, eru mạar dị oye ịḅenhi inyinha mọ, ‘Ịmiin! Ọdi odi ẹpe ẹdala phọ,’ kẹ́ki; ‘Ịmiin! Ọdi odi olhoghi osoph,’ kémeeraam. 27 Ịduon rọtol ghan bọ ni ẹpe erumuḍio phọ remeel ghan bọ kọmhiin mem dị aḍio rẹmepheghian ẹpe erumuḍio phọ remite ghan bọ, kụ ịdi kẹtol aani mem mọ Ọony phọ oye katu bọ.* 28 Tọrobo esi dị ạraraar emhuughu kụ ẹdi aruga* reekpomhoghan ghan.

29 “Kụ ịiḅaghamhi ariiḍio phọ ịpe phọ reten bịn, erumuḍio phọ keḍighi ni ufiri, ḅịlhe ụnwanyu phọ kạ́ngo mụn ḍịḅaal phọ ọdi, kụ ạraanhaan phọ kẹḍua ni ẹpe k’ạke phọ emeleghu, ḅịlhe ịikpo ạsike phọ kepiigha ni. 30 Eḍeenhaan Ọony phọ oye kemite ni ẹpe k’ạke phọ, kụ oomo arughunhughun ade phọ ọgiphigha yogh rokpolhoghi ạbidi omeelhom ọto, kụ ọmiin Ọony phọ oye ẹpe ọotu ạke phọ dị ạpham ịikpo r’eboom eghuan kụ ratumhom. 31 Ọdi katom ni rụukpaany phọ ọdi r’egbogh ẹḍogh ọkuodu, kụ bịdi ọki inya ạsiagaany ade phọ ookpomhoghi bụphe mọsaḅar bọ, emhiigh eniin eekunha ạke phọ kụ esi ẹphoripho eekunha phọ.

32 “Ịtuugha esi ọghaaph ọmaaniom oreeny a fig phọ: Mem dị omhoom ọla a fig amite asi esi dị rạtaarogh, bịn nyinha relegheri ghan ni mọ aghozogh matuman. 33 Eniin phọ eten phọ, mem dị nyinha ẹmhiin oomo ạraraar phọ ịphen phọ, pọ ilegheri mọ Ọony phọ oye matuman pạ eghuugh phọ. 34 Mị ạkar rịḅenhi ghan inyinha mọ oghiil phọ ọphon phọ káten ni bịn tụtu oomo ạraraar phọ ịphen phọ emite ẹmhan. 35 Ạke phọ r’ade phọ kepe ni, kụolo ikpo ọnhu phọ ạmhi képe ni bịn.

36 “Kụ ịlo aḍio phọ ạḍiphe phọ r’amem mọ oye ólhegheri, ghạlhamo r’ạruukpaany ẹpe k’ạke phọ r’Ọony phọ bịn úlegheri, emuton Ọde phọ. 37 Ịdipho ẹrol bọ mem mọ a Noa, kụ ịdi kẹtol aani mem mọ Ọony phọ oye katu bọ.* 38 Loor esi dị siḍughul otu phọ rẹki bọ ọteeny Ạmuum Aḍigho phọ, awe ulhe ghan ni ọḅilhe ọphughol, alhephiri ạnmuny ophinhogh ghan nmạriir, awe ọḅilhe ọnhughenyan yogh ghan nmạnyaan ạbidi, tụtu ẹteeny bọ ḍio phọ a Noa aḍigh bọ oghuugh phọ. 39 Bịdi úkiririom upogh rạraar phọ remiteghu bọ tụtu Ạmuum Aḍigho phọ aru bọ aḅeer oomo ạbidi ạsigheogh. Ịpe kụ ịdi kẹtol aani mem mọ Ọony phọ oye katu bọ. 40 Ịyal awe kọtol li ozo; kụ ọsighe oniin ọbilhe nyọoripho. 41 Ịyal ạnmariir kọtol li esi ọgbeom ghan ẹna ịyaar; kụ ọsighe oniin ọbilhe nyọoripho. 42 Esi ịduon phọ, igon ghan, loor esi dị nyinha ílegheri ḍio phọ Uwo Ẹmhoogh phọ anyinha ratu bọ.

43 “Ilegheri mọ: Mọ uwo otu phọ alhegheri ni mem mọ* ọḅa phọ katu bọ, ọdi muumhanham ni kụ múmeera ạka otu ọdi aḍigh. 44 Esi ịduon phọ, iḍeenhaan mọ nyinha ẹnyaaghian ni, loor esi dị Ọony phọ oye ratu mem dị nyinha ị́itughian mọ katu.

45 “Ạnhian nụun kụ ẹbenhe phọ ạkpe bọ oḍuom olhoghi ạḅilhe ạsu olhoghi, ọpo ọde otu phọ ạma bọ mọ aphogh rẹbenhe phọ ọdi, ạḅilhe ạngo ghan bịdi eḍien ạbidi mem lọ ẹkpeanhaan? 46 Ọḅaal olhoghi kụ odianhaan ẹbenhe phọ ọpo phọ eḍighi mạar dị ọde otu phọ ọdi aru kụ ạmhiin dị ọdi raḍighi ni ịduon phọ! 47 Mị ạkar rịḅenhi ghan inyinha mọ, ọde otu phọ kạma ni nyọdi mọ aphogh oomo ạraraar phọ ọno ạmhoogh bọ.

48 “Kụolo eru mạar dị ọkaraph ẹbenhe ạatughian sịphe ekpom ọdi mọ, ‘Ọde otu phọ ạmhi raabinya ni,’ 49 kụ amhiigh okuphogh ạbueripho ạrebenhe phọ ạḅilhe amhiigh olhean r’ọphughol r’awe dị olhegheri mọ ạbupughol miim, 50 ọde otu ẹbenhe phọ ọpo phọ katu ḍio dị ọdi úseere olhoghi r’amem dị ọdi úlegheri, 51 kụ ạliom ẹbenhe phọ iboom kụ aseere nyọdi esi dị awe ịyal arisigh kụ odi. Ẹpe kụ ẹdi ọdi kạtol amoghi yogh ạḅilhe ạkirigha rạlhaal ọdi.