Ọdaphan Ịpe ạ Mạtiu Ạge Bọ

6 “Ịmiin mọ nyinha íḍighi iiḅi phọ anyinha ghisigh awe pịdi ịmhiin inyinha; nyinha eḍighi iiḅi phọ anyinha ghisigh awe pọ nyinha kẹ́moogh ịikpia ḍịghaagh Ọde phọ anyinha odi bọ k’ạke. 2 Mem dị nạ raanmo ruunmo ọlhoghonhaan ạḍighaagh bụlo ekuom,* kápula ghan ọkuodu, ịdipho awe ịyal arisigh phọ roḍighi ghan bọ ẹpe arubughotu phọ r’ikol areten phọ, pịdi awe okuenhi bịdi. Mị ạkar rịḅenhi ghan inyinha mọ, bịdi mọmhoogh ni ịikpia phọ ạbidi omuneni. 3 Kụolo mem dị nạ raanmo ruunmo ọlhoghonhaan ạḍighaagh bụlo ekuom, kámeera ạḍighaagh ekeeny ạna elhegheri ịlo ạḍighaagh elhiom reḍighi, 4 pịdi nạ ạngo dị ọnhon oye úlegheri. Bịn Ọde phọ ạna rạmiin ghan bọ rạraar ịbooghian kạkpe ni nyịnha.

5 “Ḅịlhe kẹn, mem dị nyinha rẹeḅereghi, kéḍighi aani ghan ịpe awe ịyal arisigh phọ roḍighi ghan bọ, rẹḅeraan ghan bịdi ọmheera arubughotu r’ọgbal esi dị areten eezuanhaan* kụ ọoḅereghi pịdi awe ọmiin bịdi. Mị ạkar rịḅenhi ghan inyinha mọ, bịdi mọmhoogh ni ịikpia phọ ạbidi omuneni. 6 Kụolo mem lọ nạ rạaḅereghi, ḍigh osoph ạna, nạ roghughi eghuugh phọ, kụ ạaḅereghi ạngo Ọde phọ ạna odi bọ esi ịbooghian. Bịn Ọde phọ ạna rạmiin ghan bọ rạraar ịbooghian kạkpe ni nyịnha. 7 Mem dị nyinha rẹeḅereghi, kéeḅulha ghan iniin phọ ikpo ọnhu phọ ịdipho awe areelhe phọ roḍighi ghan bọ, bịdi rọotughian ghan mọ Ẹnhaan kạtuan ịidoony ịiḅereghi phọ ạbidi kụ ạnaghan ịpe bịdi rọkaaph bọ. 8 Esi ịduon phọ kẹ́kigh aani bịdi, ịdi eḍighi bọ tụtu nyinha kepuru bọ Ọde phọ anyinha, bịn ọdi alegheri ni rạraar dị nyinha emhoghi.

9 “Ịiḅereghi ghan eten phọ ẹphen:

“‘Ọde phọ ayoor odi bọ ẹpe k’ạke, ọḅaalhamhi ni ḍien phọ ạna.* 10 Ọmhar phọ ạna aru ni. Ogbi phọ ạna amhunhughan sịen ade phọ, ịdipho edi bọ epẹ k’ạke phọ. 11 Ụngo iyoor eḍien* ẹlo arodon; 12 sạr ụwilhenhaan iyoor ọmhugh ịkaraph phọ ayoor, ịduon yoor mọsar bọ ọwilhenhaan ịlo ạbunhon. 13 Kámeera yoor omheel oḍighanhaan ọdegh ophogh,* ụtagharan ghụn iyoor ạsighe ḍịghaagh ọkaraph oye phọ.’

14 “Eḍighi mạar dị nyinha ẹsar ịkaraph ạbunhon awe ẹwilhenhaan, pọ Ọde k’ạke phọ anyinha kạsar aani ni ịwilhenhaan inyinha; 15 kụolo nyinha ị́sar ịkaraph awe ị́bilhenhaan, pọ Ọde phọ anyinha kásar aani ịwilhenhaan inyinha.

16 “Mem dị nyinha rẹkaagh ẹḍogh, kékiriri yogh ghan mụn ịdipho awe ịyal arisigh phọ, bịdi rópogha ghan risigh ạbidi pịdi awe olegheri mọ bịdi rọkaagh ẹḍogh. Mị ạkar rịḅenhi ghan inyinha mọ, bịdi mọmhoogh ni ịikpia phọ ạbidi omuneni. 17 Kụolo mem dị nạ rạkaagh ẹḍogh, gbulha ẹmhu ạna elo, aatolha risigh ạna, 18 ọbo awe kolegheri ghan bọ mọ nạ rạkaagh ẹḍogh, oginha Ọde phọ ạna odi bọ esi ịbooghian bịn kụ alhegheri. Bịn Ọde phọ ạna rạmiin ghan bọ rạraar ịbooghian kạkpe ni nyịnha.

19 “Kékpolhoghi mụn ruphua anyinha sịen ade phọ, ạraraar ketue bọ ni egbo, ọsari aḍiku, ḅịlhe ạruḅa ọka oḍigh omi. 20 Kpạripe ghụn, ikpolhoghi ruphua phọ anyinha k’ạke, ẹpe ạraraar kétue bọ egbo, ọsari káḍigh bọ, ḅịlhe ạruḅa kótue bọ ọka oḍigh omi. 21 Loor esi dị, esi lọ ephua ạna edi kụ ẹdi ekpom ạna kẹtol aani.

22 “Ekpeḍien phọ kụ ọtozi aloor phọ. Eḍighi mạar dị ekpeḍien phọ ạna egbon eniin esi,* pọ oomo aloor phọ ạna kesoor ri.* 23 Kụolo eḍighi mạar dị ekpeḍien phọ ạna regbeghian,* pọ oomo aloor phọ ạna kekul li. Kụ eru mạar dị ọkar ạḍiḅaal phọ edi bọ loor phọ ạna kụ eḍighi ufiri, pọ eeghe ịdi ufiri phọ ọpo phọ alheeny!

24 “Oye ólho dị katue aḍighi ẹbenhe ịyal ạburude otu; loor esi dị ọdi kạlogh ni ḍien nyoniin kụ ạpomoghian nyọoripho, ọbobo ọdi kạḅar nyoniin kụ ạbilhe ọlhogh eegu nyọoripho. Nyinha kétue eḍighi rẹbenhe Ẹnhaan r’ạrebenhe ikpoki.

25 “Esi ịduon phọ mị rịḅenhi ghan inyinha mọ: Kẹ́moogh mụn oboom ọoḅaghamian aloor ịlo aghuḍum mọ* anyinha ịdi egbolhomaam ịyaar olhe ọbobo ịyaar ọphughol, ọbobo ịlo aloor phọ anyinha ịdi egbolhomaam ịyaar ọkpolhoghian. Aghuḍum mọ* kụ ọ́mhan mạar opu eḍien ḅịlhe aloor phọ kụ ị́man mạar ipu iinmenhan? 26 Ipogh ekiririom ịnhun phọ rẹpeeph bọ ẹpe k’ạke phọ; bịdi ịizupha rẹ́zuph ghan, kụ ibugha rébugha ghan ḅịlhe réekpomhoghi ghan kẹlhogh otu dị rosereghi ghan rạraạr, kụolo Ọde k’ạke phọ anyinha rạngo ghan ni bịdi eḍien. Nyinha kụ ị́man mạar ipu bịdi ḍụghum? 27 Ọghen ọnyo anyinha kụ ẹdi oboom ọoḅaghamian aloor katue ạdoonye ghuḍum mọ ghạlhamo r’oniin a kubit?* 28 Nyinha ịtuan eeghe kụ rẹeḅaghamian bọ kẹn loor ịlo iinmenhan? Ịtuugha ịyaar esi ịpe ạsifalhaway elhegheḍum mọ reḍum ghan bọ; bịdi rékumuan ghan, kụ rélo ghan kẹn rukpe; 29 kụolo mị rịḅenhi ghan inyinha mọ ghalhamọ r’ịduon ạ Sọlọmọn ạmhoogh bọ ni ịbadi ịma ạraraar bịn iinmenhan phọ ọdi ị́nighe iileeny sịfalhaway phọ. 30 Eru mạar dị Ẹnhaan raanmenhemhi ghan ni ịduon ịizupha elhegheḍum mọ ịpe rodon ọmhiin iḍue kotoph bọ ni osumeeny nịan, ọdi inyinha kíinmenhemhi apuemhi sịen ḍụghum, nyinha awe dị omheeraam aghom? 31 Esi ịduon phọ, kẹ́moogh oboom ọoḅaghamian aloor ẹḅem ghan mọ, ‘Yoor kole bọ eeghe?’ ọbobo, ‘Yoor kọpughol bọ eeghe?’ ọbobo, ‘Yoor kọkpolhoghian bọ eeghe?’ 32 Loor esi dị ịphen kụ ạraraar phọ awe areelhe phọ ọlhogh bọ ikuph rọwa. Ọde k’ạke phọ anyinha alegheri ni mọ nyinha emoghi rạraar phọ ịphen phọ.

33 Esi ịduon phọ, ịpur ghan ẹwa Ọmhar phọ r’ạraraar dị eḍighi elhiom ghisigh Ẹnhaan, bịn kịḅaranhaan ni inyinha oomo ạraraar phọ ịphen phọ. 34 Esi ịduon phọ kẹ́moogh oboom ooḅaghamian aloor ịlo ạḍieripho aḍio phọ, loor esi dị ạḍieripho aḍio phọ kẹmoogh ni rạraar oghol ọoḅaghamian aloor ịlo ọdi. Tọrobo aḍio ẹmoogh ni ịiḅaghamhi ịlo ọdi.