Ọdaphan Ịpe ạ Mạtiu Ạge Bọ

25 “Kọsighe Ọmhar k’ạke phọ ọmaaniom ḍioph arisinha ạnmanyaan dị ọsighe ịtozi ạbidi omite ọghi ọteeny oye dị rapin ạnhir. 2 Oogh ạbuno ụ́su olhoghi, ạbueripho oogh phọ kụ ụsu olhoghi. 3 Bụphe ụ́su bọ olhoghi phọ ụpham ịtozi phọ ạbidi bịn, mụum ọtozi ụ́pamham, 4 kụolo bụphe ọsu bọ olhoghi phọ ụpham ni ịtozi phọ ạbidi r’ạmunhon ạmuum ọtozi dị bịdi ọlhogh ruuku. 5 Ịduon ọpo rapin bọ ạnhir phọ raabinya bọ, ạralha ạphu ni oomo ạbidi kụ ọnhaanhi yogh. 6 Rẹteeny ogbo aḍughul kụ ọnhaghan ẹḍogh dị ẹlo mọ: ‘Ịporono oye phọ rạwa bọ ophin ạnhir phọ, imite ẹghi ẹteeny nyọdi.’ 7 Kụ oomo arisinha ạnmanyaan phọ oḅerenhu ookolhobian ịtozi phọ ạbidi. 8 Kụ bụphe ụ́su bọ olhoghi phọ ọḅenhi bụphe ọsu bọ olhoghi phọ mọ, ‘Ịngo aani iyoor mọony ẹnum ạmuum ọtozi, loor esi dị ịtozi phọ ayoor reḍim.’ 9 Kụ bụphe ọsu bọ olhoghi phọ ọphagharanhaan bịdi mọ: ‘Eeni mụen phọ iyira kúlheeny. Ịki ghụn ẹteeny bụphe robool bọ, egho mụo anyinha.’ 10 Bịdi omite bọ rọki ogho, bịn oye phọ rapin bọ ạnhir phọ aru asi. Kụ arisinha phọ ạbuphe ookolhobian bọ ọdaph oye phọ oḍigh ẹpe kole bọ male apinien phọ, kụ oghughi eghuugh phọ. 11 Mọony amem bịn ạbueripho arisinha ạnmanyaan phọ oḅula, kụ ọḅem mọ, ‘Oye phọ, Oye phọ, ughughuronhaan iyoor!’ 12 Kụ oye phọ ạphagharanhaan bịdi mọ, ‘Ọgba agey, mị inyinha ílhegheri.’

13 “Esi ịduon phọ, igon ghan, loor esi dị nyinha ílegheri ḍio phọ ọbobo mem mọ.

14 “Ọmhar phọ ạkigh oye dị rạwa ọghi ẹnhon eelhe kụ ạmhagh rẹbenhe ọdi ạḅogh rạraar phọ ọdi ạmhoogh bọ ạlhogh ḍighaagh ạbidi. 15 Ọdi ạngo oogh ạ tạlẹnt* oniin, ạngo ọnhon ịyal, ạḅilhe ạngo onhọn oniin. Ạngo tọrobo ọnyo ạbidi ịdi ẹdaphan ịnyaam mọ ạbidi kụ agbi onyeenhe erelhe phọ. 16 Eginha amem bịn ọpo ạar bọ oogh ạ tạlẹnt phọ ạsighe ikpoki phọ ạghi amhuulhom ḍighi ạḅilhe ạmhoogh ịnhon oogh ạ tạlẹnt. 17 Iginha phọ kẹn, ọpo ạar bọ ịyal ạ tạlẹnt phọ ạḅilhe ạmhoogh ịnhon ịyal ạ tạlẹnt. 18 Kụolo ẹbenhe phọ opọ ạar bọ oginha oniin ạ tạlẹnt phọ ạghi ni aguph ude aḍi ikpoki* ọde otu phọ ọdi ạaghi.

19 “Ịsighe ni ẹedoony amem kụ ọde otu ạrebenhe phọ ạbuen phọ agbi origheel, kụ ọdi r’ạbidi omhiigh ogbiighi ikpoki phọ. 20 Kụ ọpo ạar bọ oogh ạ tạlẹnt phọ aru ạngo ikpoki phọ kụ ạḅaram ịnhon oogh ạ tạlẹnt, kụ ạḅem mọ, ‘Oye phọ, nạ ụngo bọ ịmhi oogh ạ tạlẹnt; kụ mịin, mị mạmhoogh ịnhon oogh ạ tạlent ạḅaram.’ 21 Kụ ọde otu phọ ọdi ạḅenhi nyọdi mọ: ‘Maḍighi, nạ ogey ẹbenhe dị ạkpe oḍuom olhoghi! Nạ maḍeenhaan mọ nạ ạkpe ni oḍuom olhoghi esi ịbam ạraraar. Esi ịduon phọ, mị kạma nyịnha ophogh ghan ịbadi ạraraar. Tue aḍighan uwo otu phọ ạna abo.’ 22 Kụ ọpo ạar bọ ịyal ạ tạlẹnt phọ aru kụ ạḅem mọ, ‘Oye phọ, nạ ụngo bọ ịmhi ịyal ạ tạlẹnt; kụ mịin, mị mạmhoogh ịnhon ịyal ạ tạlẹnt ạḅaram.’ 23 Kụ ọde otu phọ ọdi ạḅenhi nyọdi mọ: ‘Maḍighi, nạ ogey ẹbenhe dị ạkpe oḍuom olhoghi! Nạ maḍeenhaan mọ nạ ạkpe ni oḍuom olhoghi esi ịbam ạraraar. Esi ịduon phọ, mị kạma nyịnha ophogh ghan ịbadi ạraraar. Tue aḍighan uwo otu phọ ạna abo.’

24 “Kụ eekunha phọ ọpo ạar bo oniin ạ tạlẹnt phọ aru kụ ạḅem mọ: ‘Oye phọ, mị alegheri ni mọ nạ ọgbagara oye dị rabugha ghan esi dị nạ úḅeph, ḅịlhe raakpomhoghi ghan esi dị nạ ụ́sal. 25 Esi ịduon phọ, mị ughiilhaan ni kụ ạghi ạaghi tạlẹnt phọ ạna ude. Pọrono, ịphen kụ ikpoki phọ ạna.’ 26 Kụ ọde otu phọ ạḅenhi nyọdi mọ: ‘Ọkaraph ẹbenhe dị ạmhoogh ẹgbogholeer, tọ nạ ụḅem mọ nạ alegheri ni mọ mị rabugha ghan esi dị mị úḅeph, kạḅilhe aakpomhoghi esi dị mị ụ́sal? 27 Nạ mụsighe ikpoki* phọ ạmhi ạlhogh bạnk, bịn ọbo mị aḅula bọ mị mụteeny ni ikpoki phọ ạmhi r’ạsuo dị mụḅaram.

28 “‘Esi ịduon phọ, ịboor nyọdi tạlẹnt phọ ẹngo ọpo ạmhoogh bọ ḍioph ạ tạlẹnt phọ. 29 Ọlo ạmhoogh, kọngo ni ọbughe, kụ ọdi ạmoogh ạbalhabalhamhi. Kụolo ọpo ụ́moogh bọ, ghạlhamo r’ịpe ọdi ạmhoogh bọ bịn kọboor ri nyọdi. 30 Itoph ẹbenhe phọ ọphon ụ́moogh bọ mạar oḍighinhom emiteom erugh ẹpe ufiri phọ. Sịphe phọ kụ ẹdi ọdi kạtol amoghi yogh ạḅilhe ạkirigha rạlhaal ọdi.’

31 “Mem mọ Ọony phọ oye kạpam bọ oomo ạruukpaany phọ atumhom r’eghuan phọ ọdi, ọdi kạtolhom ni ogbogh ạgada ịtooghi phọ ọdi. 32 Oomo areelhe phọ kookpomhoghan ni ghisigh ọdi, kụ ọdi ạgbarion we phọ ịdipho opoghom rạgbarion ghan bọ iyool ịga r’ạrutu ịga. 33 Ọdi kaseere iyool ịga phọ ḍịghaagh elhiom ọdi, kụ aseere rụtu ịga phọ ḍịghaagh ekeeny.

34 “Kụ uwo ẹmha phọ kạḅenhi ni bụphe odi bọ elhiom mọ ọdi mọ: ‘Itu, nyinha ạbuen Ọde phọ ạmhi mạseph bọ, elhe erua Ọmhar phọ iikolhobinhaan bọ inyinha k’emhiighom* aḅirinhi phọ. 35 Mem dị ọkoony usiph ịmhi nyinha ịngo ni ịmhi ịyaar olhe; ạmuum ụphu ịmhi nyinha ịngo ịmhi mụum ọphughol. Mị uḍighi ooruen kụ nyinha ịlhogh ịmhi otu. 36 Mem dị mị ụ́moogh ịyaar ọkpolhoghian* nyinha iinmenemhi ni ịmhi. Mị ạrol émoon kụ nyinha iphogh ịmhi. Mị ụrol li otu ikoli kụ nyinha eru ịmhiin ịmhi.’ 37 Kụ ạbuo elhiom eḍighinhom ịyaar phọ opuru nyọdi mọ: ‘Uwo Ẹmhoogh, pụr amem kụ ẹdi yoor ọmhiin dị ọkoony rasiph nyịnha kụ ọngo nyịnha ịyaar olhe, ọbobo dị ạmuum rạphu nyịnha kụ ọngo nyịnha mụum ọphughol? 38 Pụr amem kụ ẹdi yoor ọmhiin dị nạ aḍighi ooruen kụ ọlhogh nyinha otu, ọbobo dị nạ ụ́moogh ịyaar ọkpolhoghian kụ oonmenemhi nyịnha? 39 Pụr amem kụ ẹdi yoor ọmhiin dị nạ úmoon ọbobo dị nạ ạrol otu ikoli kụ oru ọmhiin nyịnha?’ 40 Kụ Uwo Ẹmha phọ kạpagharanhaan ni bịdi mọ, ‘Mị ạkar rịḅenhi ghan inyinha mọ, tọrobo ịyaar lọ nyinha eḍighinhaan ghạlhamo r’oniin ọdi aḍighi ọkaraghi ọbam igbo abumor phọ ạmhi ạbuen phọ, pọ nyinha iḍighinhaan ịmhi.’

41 “Kụ ọdi kạḅenhi bụphe odi bọ ekeeny phọ ọdi mọ: ‘Ịḍua sịen, nyinha ạbudi mosophonhaan bọ ọoruen oḍigh ạnian phọ kẹtol bọ k’agee-pọ, ḍịphe ookolhobinhaan bọ Eru phọ r’ạruukpaany phọ ọdi. 42 Mem dị ọkoony usiph ịmhi, nyinha ịmhi ị́ngo ịyaar olhe; ḅịlhe mem dị ạmuum ụphu ịmhi, nyinha ịmhi ị́ngo mụum ọphughol. 43 Mem dị mị aḍighi ooruen, nyinha ịmhi ị́lhogh otu. Mem dị mị ụ́moogh ịyaar ọkpolhoghian, nyinha ịmhi íinmenemhi; mị ạrol émoon r’otu ikoli, nyinha ịmhi íphogh.’ 44 Kụ bịdi opuru aani nyọdi mọ: ‘Uwo Ẹmhoogh, pụr amem kụ ẹdi yoor ọmhiin dị ọkoony rasiph nyịnha, ọbobo ạmuum rạphu nyịnha, ọbobo nạ aḍighi ooruen, ọbobo nạ ụ́moogh ịyaar ọkpolhoghian, ọbobo nạ ạrol émoon, ọbobo nạ ạrol otu ikoli kụ yoor nyịnha ụ́lhoghonhaan ḍịghaagh?’ 45 Kụ ọdi ạpagharanhaan bịdi mọ: ‘Mị ạkar rịḅenhi ghan inyinha mọ, tọrobo ịyaar lọ nyinha ẹwilhe oḍighinhaan ghạlhamo r’oniin ọdi aḍighi ọkaraghi ọbam igbo ạbuen phọ, pọ mị kụ ẹdi nyinha íḍighinhaan.’ 46 Bụen phọ komuughu ni kụ kọ́moogh mụn ni bịn ghuḍum,* kụolo ạbuo elhiom eḍighinhom ịyaar phọ kọmoogh ni ghuḍum k’agee-pọ.”