Ọdaphan Ịpe ạ Mạtiu Ạge Bọ

22 A Jizọs ạḅilhe ni ạngo bịdi rạghaaph ọmaaniom, mọ: 2 “Kọsighe Ọmhar k’ạke phọ ọmaaniom uwo ẹmha dị rapinhanhaan ọony ọdi ạnhir kụ ạsa riiḍien. 3 Ọdi arom rẹbenhe ọdi mọ ọghi ọomhaghagh bụphe ọḅenhi bọ mọ oru aani pinien phọ, kụolo úmeera utu. 4 Ọdi ạḅilhe ni arom bụnhon ạrebenhe ọdi, kụ ạḅenhi mọ, ‘Ịki ẹḅenhi bụphe ọomhaghagh bọ mọ: “Mị mạsa riiḍien phọ, ạze sịnam mọ r’ịbunhabunha ịnham mọ ạmhi, moḍighi oomo ạraraar ọman. Itu pinien phọ.”’ 5 Kụolo awe phọ ọomhaghagh bọ urelhe ni bịn ọḅua mụdi ịyaar bịdi ị́mooghom, buniin ọghiighi iizo ạbidi, bụnhon ọghi omhuul aḍighi; 6 kụ bụeripho usiph ni rẹbenhe phọ ọdi, okuphogh kụ ọze.

7 “Ịphen phọ ịghagh ni olhoghi uwo ẹmha phọ kụ arom bụo ẹgham ọdi kụ ọghi ọze bụphe ọze bọ rẹbenhe phọ ọdi ọḅilhe ọsu ẹmha phọ ạbidi. 8 Kụ ọdi ạḅenhi rẹbenhe phọ ọdi mọ, ‘Mọsa eḍien apinien phọ, kụolo bụphe ọomhaghagh bọ ụ́kpeanhaan oru apinien phọ. 9 Esi ịduon phọ, ịki ẹpe aroḅodo ẹmha phọ, ẹmhagh tọrobo oye lọ nyinha ẹmhiin mọ aru aani pinien phọ.’ 10 Kụ ạrebenhe phọ ọghi ẹpe aroḅodo phọ ọmhagh tọrobo oye lọ bịdi ọmhiin, bụkaraph r’abugey; kụ awe omuza omhiigh olheeghi eḍien sịphe ọpham bọ pinien phọ.

11 “Uwo ẹmha phọ aḍigh bọ ọmhiin aruuruen phọ, ạmhiin ni oye dị ụ́kpolhoghian ạsuoma apinien. 12 Kụ ọdi ạḅenhi nyọdi mọ, ‘Mọo, nạ uḍigh ika sịen phọ dị ạsuoma apinien nạ ụ́kpolhoghian?’ Kụ oye phọ ịyaar ọ́ghaaph. 13 Kụ uwo ẹmha phọ ạḅenhi rẹbenhe phọ ọdi mọ, ‘Ịpaḍi nyọdi rạghaagh r’aruwol eroph emiteom erugh ẹpe ufiri phọ. Ẹpe kụ ẹdi ọdi kạtol amoghi yogh ạḅilhe ạkirigha rạlhaal ọdi.’

14 “Ụmhagh ni ịbadi awe, kụolo ụsaḅar iphurukpu ạbidi bịn.”

15 Ạbuo ạ Fạrisi phọ ụghi ni oopuruan ịdi bịdi koḍighi pịdi ọsighe ịyaar dị ọdi kạkaaph osiphom nyọdi. 16 Esi ịduon phọ bịdi urom ni bụmatuan ạbidi r’ạbumatuan ạ Hẹrọd, mọ ọghi ọteeny nyọdi ọḅenhi mọ: “Ọtughemhia, yoor olegheri mọ nạ rạgba ghan agey ḅịlhe mọ nạ rạtughemhi ghan ịdi eru ịne ịlo Ẹnhaan. Nạ ráḍighi ghan rạraar ọnhighe aghisigh awe, loor esi dị nạ rápogh ghan we ạnyu r’ạnyu bịn. 17 Ụḅenhi iyoor, nạ ạatughian aani ika? Ẹnighe ni osogh iisogh ọngo a Siza ọbobo ị́nighe?” 18 Kụ a Jizọs alhegheri bọ ni ịkaraph ịitughian phọ ạbidi, ạḅem mọ: “We ịyal arisigh, uḍighi ika kụ nyinha rịdegh bọ ịmhi kephogh? 19 Iḍeenhaan ịmhi kọịn phọ rosoghom ghan bọ iisogh phọ.” Kụ bịdi oruom nyọdi oniin a dinerịọs.* 20 Kụ ọdi apuru bịdi mọ: “Ọphon phọ arisigh ạnhian, kụ ạḍien phọ aḍien ạnhian?” 21 Kụ bịdi mọ: “Ịlo a Siza.” Kụ ọdi ạḅenhi bịdi mọ: “Esi ịduon phọ, ịngo Siza ịpe eru bọ ịlo a Siza, kụ ẹngo Ẹnhaan ịpe Ẹnhaan.” 22 Bịdi ọnhaghan bọ ịphen phọ, iḍighi ni iikia esi ạbidi, kụ ọwilhe nyọdi ọḅua.

23 Ḍiniin phọ aḍio phọ ạbuo ạ Sạdusi phọ úmeeraam bọ mọ oḅetenhu esi aḍuugh odi ni, uru ni ọteeny nyọdi kụ opuru mọ: 24 “Ọtughemhia, a Mozis ạḅem mọ: ‘Eru mạar dị oye ụ́mar mọony kụ amhugh, pọ umor ọdi aphin ạnhir phọ amiteghomonhaan nmụny umor phọ ọdi mamhugh bọ.’ 25 Oḍual abumor ụrol li dị okumoor phọ aphin ạnhir bịn amhugh, kụ loor ịdi ụ́mar mọony, umor ọdi kụ ạḅilhe aphin ạnhir phọ. 26 Iniin phọ kụ imitenhaan omhunhenhiom ịyal r’omhunhenhiom ịraar phọ, bịn k’omhunhenhiom oḍual phọ. 27 Kụ eekunha phọ, ạnhir phọ amhugh aani. 28 Mem oḅetenhu esi aḍuugh phọ, ọdi kaḍighi ạnhir ạnhian sịphe oḍual phọ ạbidi? Sịen dị oomo phọ ạbidi ophin bọ ni nyọdi.”

29 Kụ a Jizọs ạḅenhi bịdi mọ: “Nyinha ẹpiom ni, loor esi dị nyinha ílegheri Ịge Iigbia phọ r’ịikpo phọ Ẹnhaan; 30 ịdi eḍighi bọ mem oḅetenhu esi aḍuugh phọ awe kópin ghan nmạriir kụ kónughenyan ghan nmạnyaan, kụolo bịdi kọtol ịdipho ạruukpaany phọ edi bọ ẹpe k’ạke phọ. 31 Ịdi egbolhomaam oḅetenhu esi aḍuugh phọ, nyinha kạ̋al ghan ịpe Ẹnhaan ịḅenhi bọ inyinha sịphe Ịge Iigbia phọ mọ: 32 ‘Mị Ẹnhaan Ebrạhạm r’Ẹnhaan Ạịzik r’Ẹnhaan a Jekọb’? Ọdi Ẹnhaan ạbuen odi bọ, kẸ́nhaan ạbuphe momhuughu bọ.” 33 Aḍita awe phọ ọnhaghan bọ ịphen phọ, ịtughemhi phọ ọdi iḍighi ni iikia esi ạbidi.

34 Ạbuo ạ Fạrisi phọ ọnhaghan bọ mọ ọdi makpomori ọnhu ạbuo ạ Sạdusi phọ, oomo ạbidi uru ni ọteeny nyọdi. 35 Ọdegh ọdi ophogh, oniin ọnyo ạbidi dị alhegheri Olhogh phọ agey apuru ni nyọdi mọ: 36 “Ọtughemhia, sịphe iilhogh phọ ọghen kụ ọkaraghi ogbogh?” 37 Kụ ọdi ạḅem mọ: “‘Pọmoghian a Jehova* Ẹnhaan phọ ạna r’oomo ekpom ạna r’oomo aghuḍum* ạna r’oomo olhoghi ạna.’ 38 Ọphon kụ ọkaraghi ogbogh r’ọḅel olhogh phọ. 39 Kụ omhunhenhiom ịyal phọ ịdipho ọḅel phọ ni, ạḅem mọ: ‘Pọmoghian matuman ạna ịdipho aloor phọ ạna.’ 40 Ọkpasi oomo Olhogh phọ r’ịge Ariil phọ sịen ịyal phọ iilhogh phọ ịphen phọ.”

41 Ịduon ạbuo ạ Fạrisi phọ odi bọ ni sịphe phọ, a Jizọs apuru ni bịdi mọ: 42 “Nyinha ẹetughian aani ika ịlo ạ Krạịst phọ? Ọdi ọony ạnhian?” Kụ bịdi ọphagharanhaan mọ: “Ọony a Devid.” 43 Kụ ọdi apuru bịdi mọ: “Eru ịdipho, uḍighi ika kụ uwaloor iigbia phọ anyu bọ Devid ọmhagh ọdi mọ Uwo Ẹmhoogh, mem mọ ạḅem bọ mọ, 44 ‘A Jehova* ạḅenhi Uwo Ẹmhoogh phọ ạmhi mọ: “Tọl ḍịghaagh elhiom ạmhi tụtu mị ạsighe bụmulhogh ḍien phọ ạna aseere ẹeḍian aruwol ạna”’? 45 Eru mạar dị a Devid ạmhagh nyọdi mọ Uwo Ẹmhoogh, ika kụ ịdi ọdi aḍighi bọ ọony ọdi?” 46 R’oniin oye órue ọphagharanhaan nyọdi, kụ emhiigh ḍio phọ ạḍiphe phọ kụ rẹki, oye óḅom mụn ẹmhu opuru nyọdi ḍipuru.