Ọdaphan Jọn
15 Mị kụ ogey oozin ạ vạịn phọ, kụ Ọde phọ ạmhi kụ opoghom ạ vạịn phọ. 2 Ọdi rạgba ghan ni ọla dị rámuum iimhumha kạsighe loor ạmhi, kụ aselhemhi* ọla dị ramuum iimhumha pịdi amuum apuemhi pạ. 3 Kụ nyinha mẹḅaal loor esi ikpo ọnhu phọ mị mịḅenhi bọ inyinha. 4 Ịkiom ghisigh ẹḅoph r’ạmhi, bịn mị kạkiom ni ghisigh ạḅoph r’anyinha. Ịdipho ọla kátue bọ amuum iimhumha ḍịo ọdi emuton dị odi sịphe oozin ạ vạịn phọ, kụ ẹdi nyinha kétue emuum iimhumha emuton dị nyinha ẹghiom ghisigh ẹḅoph r’ạmhi. 5 Mị kụ oozin ạ vạịn phọ; kụ nyinha ịla phọ. Tọrobo oye lọ ạghiom ghisigh ạḅoph r’ạmhi kụ mị ạḅoph r’ọdi kamuum ni iboom iimhumha; loor esi dị mị úlo nyinha kétue eḍighi r’eniin ịyaar. 6 Oye lọ ụ́kiom ghisigh ụḅoph r’ạmhi kạtol ịdipho ọla dị osoph oroph kụ ạgharaghar. Kụ awe rookpomhoghi ghan ni ịla phọ ịphen phọ koguom nịan. 7 Eru mạar dị nyinha ẹghiom ghisigh ẹḅoph r’ạmhi kụ ikpo ọnhu phọ ạmhi ẹrol sịphe ilhoghi phọ anyinha, pọ ipuru tọrobo ịyaar lọ nyinha rẹwa bịn kịngo ni inyinha. 8 Mem dị nyinha emhuum ghan iboom iimhumha rekuenhi ghan ni Ọde phọ ạmhi, kụ eḍeenhaan mọ nyinha ạbumatuan ạmhi. 9 Ịdipho Ọde phọ ụphomhoghian bọ ịmhi kụ ịdi mị mịphomhoghian aani inyinha; ịkiom ghisigh ẹrol sịen ẹphomhoghian phọ ạmhi. 10 Eḍighi mạar dị nyinha ẹdaph ghan ịto phọ ạmhi, pọ nyinha kẹkiom ni ghisigh ẹtol sịen ẹphomhoghian phọ ạmhi, ịduon mị mạdaph bọ ịto Ọde phọ kụ ạghiom bọ ghisigh odi sịphe ẹphomhoghian phọ ọdi.
11 Mị ịḅenhi inyinha rạraar phọ ịphen phọ pịdi nyinha ẹmoogh aani ibo phọ mị ạmhoogh bọ, ḅịlhe ibo phọ anyinha emuza. 12 Ọphon kụ olhogh phọ ạmhi, mọ oniin ạphomhoghian nyoniin ịduon mị ịphomhoghian bọ inyinha. 13 Oye ólho dị ạmhoogh ẹphomhoghian dị epu nyẹen phọ, dị kạtuan rịghiri ọdi kụ ạngo ghuḍum* ọdi. 14 Nyinha ạrighiri ạmhi eru mạar dị nyinha eḍighi ghan ịphen mị ạto bọ rịḅenhi inyinha. 15 Mị inyinha rị́mhagh ghan mụn mọ ạrebenhe loor esi dị ẹbenhe rálegheri ghan ịyaar dị ọde otu ọdi raḍighi. Kụolo mị mịmhagh inyinha mọ ạrighiri, loor esi dị mị mịḅenhi inyinha oomo ạraraar phọ mị ạnhaghan bọ ọnhu Ọde phọ ạmhi. 16 Nyinha kụ ịmhi ị́saḅar, mị kụ ịsaḅar inyinha, kụ ịma inyinha ọghi omhuum ghan iimhumha dị kẹtol ghan bịn, pịdi tọrobo ịyaar dị nyinha eghol ḍien ạmhi kụ epuru Ọde phọ, ọdi ịngo inyinha.
17 “Mị ạto ịphen phọ rịḅenhi inyinha, pịdi oniin ạphomhoghian nyoniin. 18 Eru mạar dị aḅirinhi phọ ịlhogh inyinha ḍien, pọ ilegheri mọ bịdi mụlhogh ni ịmhi ḍien kụ ogbi bọ ọlhogh aani anyinha ḍien. 19 Mọ nyinha iḍighi bụo aḅirinhi phọ, ọbo aḅirinhi phọ mịphomhoghian ni inyinha. Kụolo nyinha íḍighi bụo aḅirinhi phọ, loor esi dị mị mịsaḅar inyinha ạsighe sịen aḅirinhi phọ, pọ kụ ịyaar phọ aḅirinhi phọ ịlhogh bọ inyinha ḍien. 20 Kébulha ịpe mị ịḅenhi bọ inyinha mọ: Ẹbenhe rápu ghan ọde otu ọdi. Eḍighi mạar dị bịdi ụgbiphoghom ni ịmhi, pọ kịgbiphoghom aani ni inyinha; kụ eḍighi mạar dị bịdi ọdaph ni ikpo ọnhu phọ ạmhi, pọ kọdaph aani ni ịpe anyinha. 21 Kụolo bịdi kokol li ẹmhu aḍien phọ ạmhi iḍighi inyinha rạraar phọ ịphen phọ, loor esi dị bịdi úlegheri Ọpo urom bọ ịmhi. 22 Mọ mị mútu bọ ụḅenhi bịdi rạraar phọ ịphen phọ, ọbo ịkaraph ílo loor ạbidi. Kụolo nyịidipho bịdi kótue ọparanhaan ịkaraph phọ ạbidi. 23 Tọrobo oye lọ ụlhogh ịmhi ḍien pọ ạlogh aani ḍien Ọde phọ ạmhi. 24 Mọ mị múḍighi bọ sịphe igbo phọ ạbidi rạraar dị ọnhon oye kőḍighi ghan, ọbo ịkaraph ílo loor ạbidi; kụolo nyịidipho bịdi mụmhiin ịmhi, kụ ụlhogh ịmhi ḍien ọḅilhe ọlogh Ọde phọ ạmhi ḍien. 25 Kụolo ịphen phọ imite omhunhenhi ịpe ọge bọ sịphe Olhogh phọ ạbidi mọ: ‘Bịdi ụga ni bịn ụlhogh ịmhi ḍien.’ 26 Mem mọ ọlogh ḍịghaagh phọ mị kạboor bọ Ọde phọ iruom inyinha, uwaloor igey phọ Ọde phọ kụ rạngo ghan bọ, kasi bọ, kạkaaph ni ịpe eru bọ ịne ịlo ạmhi; 27 kụ nyinha kẹn kẹkaaph ni ịpe eru bọ ịne ịlo ạmhi, loor esi dị nyinha edi ghan r’ạmhi k’emhiighom mọ.