Ọdaphan Ịpe ạ Mạtiu Ạge Bọ
1 Ạḍinya dị ẹghaaph ịlo iphirigba phọ a Jizọs* Krạịst,* ọony phọ a Devid, ọony phọ Ebrạhạm:
2 Ebrạhạm aḍighi ọde Ạịzik;
Ạịzik aḍighi ọde a Jekọb;
a Jekọb aḍighi ọde a Juda r’abumor phọ ọdi;
3 A Juda aḍighi ọde a Pirẹz ra Zirạ, kụ a Temạ kụ ạmharanhaan;
a Pirẹz aḍighi ọde ạ Hẹzrọn;
ạ Hẹzrọn aḍighi ọde ạ Rạm;
4 Ạ Rạm aḍighi ọde Ạmịnạdạb;
Ạmịnạdạb aḍighi ọde ạ Nạsọn;
ạ Nạsọn aḍighi ọde ạ Sạlmọn;
5 Ạ Sạlmọn aḍighi ọde a Boạz, kụ a Rehạb kụ ạmharanhaan;
a Boạz aḍighi ọde Obẹd, kụ a Rut kụ ạmharanhaan;
Obẹd aḍighi ọde ạ Jẹsị;
6 Ạ Jẹsị aḍighi ọde a Devid uwo ẹmha phọ.
A Devid aḍighi ọde ạ Sọlọmọn kụ ạnhir phọ a Yurạyạ kụ ạmharanhaan;
7 Ạ Sọlọmọn aḍighi ọde a Rehoboam;
a Rehoboam aḍighi ọde Ạbạịjạ;
Ạbạịjạ aḍighi ọde Esạ;
8 Esạ aḍighi ọde a Jehosạfạt;
a Jehosạfạt aḍighi ọde a Jehorạm;
a Jehorạm aḍighi ọde Ụzạyạ;
9 Ụzạyạ aḍighi ọde a Jotạm;
a Jotạm aḍighi ọde Ehạz;
Ehạz aḍighi ọde ạ Hẹzịkạyạ;
10 Ạ Hẹzịkạyạ aḍighi ọde ạ Mạnạsạ;
ạ Mạnạsạ aḍighi ọde Emọn;
Emọn aḍighi ọde a Josạyạ;
11 A Josạyạ aḍighi ọde a Jekonạyạ r’abumor phọ ọdi mem mọ reteẹny bọ dị kọsighe we phọ Izrẹl okeelhom Bạbịlọn.
12 Rọsighe we phọ rogheelhom Bạbịlọn, kụ a Jekonạyạ aḍighi ọde ạ Siẹltịẹl;
ạ Siẹltịẹl aḍighi ọde ạ Zẹrụbạbẹl;
13 Ạ Zẹrụbạbẹl aḍighi ọde Ạbạyọd;
Ạbạyọd aḍighi ọde Ẹlịạkịm;
Ẹlịạkịm aḍighi ọde Ezọ;
14 Ezọ aḍighi ọde a Zedọk;
a Zedọk aḍighi ọde Ekim;
Ekim aḍighi ọde Ẹlạyọd;
15 Ẹlạyọd aḍighi ọde Ẹlịeza;
Ẹlịeza aḍighi ọde ạ Mạtạn;
ạ Mạtạn aḍighi ọde a Jekọb;
16 A Jekọb aḍighi ọde a Josẹf olom mọ a Meri, opọ ạmhar bọ Jizọs phọ ọmhagh ghan bọ mọ Krạịst.
17 Oomo arighiil phọ, emhiigh Ebrạhạm kụ ẹteeny Devid iḍighi 14 arighiil, emhiigh Devid kụ ẹteeny mem mọ ọsighe bọ we phọ Izrẹl ogheelhom Bạbịlọn, 14 arighiil; emhiigh mem mọ ọsighe bọ we phọ Izrẹl ogheelhom Bạbịlọn kụ ẹteeny mem mọ ạ Krạịst, 14 arighiil.
18 Ịduon kụ ẹdi ọmhar bọ Jizọs Krạịst. A Josẹf aguan ni ophin a Meri onhiin phọ a Jizọs, kụolo tụtu bịdi kọbalhan bọ a Meri asoph ni eghun dị eego esi uwaloor iigbia phọ. 19 Kụolo, loor ịduon a Josẹf olom mọ ọdi aḍighi bọ oye elhiom eḍighinhom ịyaar kụ ụ́wa bọ oofolhomi ọdi, ạatughian ni oseere ọdi eten ịbooghian. 20 Ọdi rọotughian bọ oḍighi ịduon phọ, kụ ọokpaany a Jehova* amitenhaan nyọdi ụmalha, kụ ạḅenhi mọ: “Josẹf ọony a Devid, kákiilhaan ophin a Meri, loor esi dị eghun phọ ọdi asoph bọ iigo esi uwaloor iigbia phọ. 21 Ọdi kạmar rị olhephiri ọony, kụ nạ kakol nyọdi mọ a Jizọs,* loor esi dị ọdi kụ kạtagharan bọ we phọ ọdi esi ịkaraph.” 22 Oomo ịphen phọ imhunhenhi ịpe a Jehova* ạghaaph bọ dị eego esi oyil phọ ọdi mọ: 23 “Mịin! Esinha ọnyanhi dị oye esi kọ̋rolhan ghan kaamor ri kụ ạmar olhephiri ọony, kụ kokol ọony phọ mọ Ịmạnụẹl,” ẹmhu aḍien phọ pọ, “Ẹnhaan odi r’ayira.”
24 A Josẹf rọsuma kụ ạghi aphin Meri agheelhom olhoghi otu ịdipho ọokpaany phọ a Jehova* ạḅenhi bọ nyọdi. 25 Kụolo ọdi ọ́rolhan esi ạnhir phọ ọdi tụtu ạmhar mọony phọ, kụ ọdi aghol mọony phọ mọ a Jizọs.