Ọdaphan Ịpe ạ Mạtiu Ạge Bọ

18 Mem mọ ọpo phọ ạbumatuan phọ uru ni ọteeny Jizọs kụ opuru mọ: “Ạnhian kụ ọkaraghi ogbogh ẹpe Ọmhar k’ạke phọ?” 2 Kụ ọdi ạmhagh ọbumoony ạmheremhi sịphe ogbo ạbidi 3 kụ ạḅem mọ: “Mị ạkar rịḅenhi ghan inyinha mọ, nyinha kéḍigh ni bịn Ọmhar k’ạke phọ, emuton dị nyinha enme rạaghara phọ anyinha kụ ẹrol ịdipho ịbam ạnmuny. 4 Esi ịduon phọ, tọrobo oye lọ asooromhi loor ọdi ịdipho ọbumoony phọ ọphon phọ kụ ọkaraghi ogbogh ẹpe Ọmhar k’ạke phọ; 5 kụ tọro oye lọ ạtuan ḍien ạmhi kụ aghuraam we dị ọrol ịduon ọbumoony phọ ọphon phọ, pọ mughuraam aani ịmhi. 6 Kụolo tọrobo oye lọ aḍighi ịdi oniin sịen ạbubam mọ ạbuen phọ ọmhoogh bọ omheeraam oru esi ạmhi akpetaan, mịnighe ghụn ọsighe ẹna phọ rọgbeom ghan bọ ikpo ịizupha, ẹpe ẹnham adool kụ reeghiremhi ghan bọ, ọkpoom orum ọdi osumeeny ọphiiny ạbazi pịdi aḅi.

7 “Ịmhinhimhiin kụ kẹtolhonhaan aḅirinhi phọ loor esi asighiigh okpetaan phọ! Ọkar agey, olegheri ni mọ asighiigh okpetaan ẹmoogh oru, kụolo ịmhinhimhiin kụ kẹtolhonhaan oye phọ ọpo aḍighiigh okpetaan phọ keego bọ esi ọdi kụ etu! 8 Esi ịduon phọ, eḍighi mạar dị ạḍighaagh ạna ọbobo owol ạna kụ raḍighi ghan ịdi nạ kakpetaan, pọ soph aroph. Ẹnighe epu dị nạ kạtol dị aḍiniin ạḍighaagh ọbobo aḍiniin aḍuwol ílo kụ ạmoogh ghuḍum r’ọrolhom ịyal ạraghaagh r’ịyal aruwol kụ koroph nyịnha osumeeny nịan phọ keemor bọ k’agee-pọ. 9 Ḅịlhe kẹn, eḍighi mạar dị ekpeḍien ạna kụ reḍighi ghan ịdi nạ kakpetaan, pọ pọghoron aroph. Ẹnighe epu dị nạ kạtolhom eniin ekpeḍien kụ ạmoogh ghuḍum r’ọrolhom ịyal ariḍien kụ koroph nyịnha osumeeny Gẹhẹnạ,* esi phọ ạnian phọ edi ghan bọ. 10 Ịmiin mọ nyinha ípogh isooromhi oniin sịen ạbubam mọ ạbuen phọ, loor esi dị mị rịḅenhi ghan inyinha mọ ạruukpaany phọ ạbidi ẹpe k’ạke phọ edi ghan ghisigh Ọde phọ ạmhi odi bọ k’ạke phọ oomo amem. 11* ——

12 “Nyinha ẹetughian ika? Eḍighi mạar dị oye ạmhoogh 100 iyool ịga kụ oniin aphe, ọdi kạ́bilhe 99 phọ ẹpe ạnyu ạraaḅaraph phọ ạki amiigh ọwa oniin phọ ọpo aphe bọ ḍụghum? 13 Eḍighi mạar dị ạmhiin, mị ạkar rịḅenhi ghan inyinha mọ, kakol li ẹmhu ọpo phọ abo ibo dị epu ịlo 99 phọ ípe aani bọ. 14 Iginha phọ kẹn, ị́ḅeraan Ọde phọ ạmhi* odi bọ k’ạke phọ dị r’oniin ọnyo ạbubam mọ ạbuen phọ kape.

15 “Ọḅaram ịsien, eḍighi mạar dị umor ạna aḍighi ịkaraph, pọ kịa ạḅenhi nyọdi ọpioman phọ ọdi* mem dị ọdi r’ạna bịn edi. Eḍighi mạar dị ạnhaghanhan nyịnha, pọ nạ mạlhoghonhaan ḍịghaagh umor phọ ạna oḍighi ịdi ẹnhighe. 16 Mọ nyịnha ọ́nhaghanhan, pọ mạgh oniin mụghumo ịyal awe ọdaph nyịnha, pịdi oomo ọghaaph phọ ạmeera ọdaphan ọnhu ịyal ọbobo ịraar phọ awe phọ. 17 Mọ ọdi bịdi ọ́nhaghanhan, pọ ḅạanhaan ookpomhoghan phọ. Kụ eḍighi mạar dị ụ́naghanhan kẹn ookpomhoghan phọ, pọ sịghe nyọdi ịdipho oye ọlo areelhe phọ r’ịdipho ọbonyiom iisogh.

18 “Mị ạkar rịḅenhi ghan inyinha mọ, tọrobo ịyaar lọ nyinha ẹghoroghi sịen ade phọ pọ ẹdi mọghoroghi ni ẹpe k’ạke, kụ tọrobo ịyaar lọ nyinha ẹekpo sịen ade phọ pọ ẹdi mọokpo ni ẹpe k’ạke. 19 Ḅịlhe kẹn mị ạkar rịḅenhi ghan inyinha mọ, eru mạar dị ịyal awe sịen igbo phọ anyinha ọḅoph ọnhu sịen ade phọ ọlhom ịyaar dị ẹmhan mạar, pọ Ọde phọ ạmhi odi bọ ẹpe k’ạke phọ kạngo ni bịdi. 20 Loor esi dị esi lọ ịyal ọbobo ịraar oghol ḍien ạmhi kụ ookpomhoghan pọ mị odi ni pạ r’ạbidi.”

21 Kụ a Pita aru ạteeny nyọdi kụ apuru mọ: “Uwo Ẹmhoogh, ika amem umor ạmhi kụpioman bọ ịmhi kụ mị ạsar ghan ạbilhenhaan? Ẹmhan ni oḍual amem ḍụghum?” 22 Kụ a Jizọs ạphagharanhaan nyọdi mọ: “Mị ạkar rạḅenhi ghan nyịnha mọ, kóḍual amem bịn, kụolo ẹmhan ni 77 amem.

23 “Pọ kụ ịyaar phọ kọsighe bọ Ọmhar k’ạke phọ ọmaaniom uwo ẹmha dị ạwa ogunhogh ịimhugh rẹbenhe ọdi. 24 Ọdi romhiigh ogunhogh ạbidi, kụ ọsighe oruom nyọdi oye dị alhe ọmhugh ọdi 10,000 ạ tạlẹnt.* 25 Kụolo loor ịduon ọdi kátue bọ ạkpe, ọde otu phọ ọdi ạto mọ aal nyọdi r’ạnhir phọ ọdi r’ịbam ạnmuny phọ ọdi r’oomo ạraraar dị ọdi ạmhoogh ọkpeom ọmhugh phọ. 26 Kụ ẹbenhe phọ akpuḍian ghisigh ọdi, kụ ạḅem mọ, ‘Ụngo ịmhi mọony amem, mị kạkpe ni nyịnha ạmadan.’ 27 Kụ loor esi igbiririph, ọde otu phọ ạḅenhi ni mọ ẹbenhe phọ ạḍua kụ ạwilhenhaan nyọdi ọmhugh phọ. 28 Kụolo ẹbenhe phọ ọphon phọ rọḅua kụ ạghi ạmhiin ọnhon ẹbenhe dị alhe ọmhugh ọdi 100 a dinerạị* kụ asiph nyọdi ạpogh ooko phọ kụ ạḅem mọ, ‘Ụkpe ịmhi oomo ọmhugh phọ ạmhi nạ alhe bọ.’ 29 Kụ ọphoripho ẹbenhe phọ akpuḍian ạaḅereghian nyọdi mọ, ‘Ụngo ịmhi mọony amem, mị kạkpe ni nyịnha.’ 30 Kụolo ọdi ómheera, ạḅem ghụn mọ ọlhogh ikoli ọphoripho ẹbenhe phọ tụtu ạkpe ọmhugh phọ ọdi alhe bọ. 31 Kụ mem dị ạbueripho ạrebenhe phọ ọmhiin bọ ịpe emite bọ, ịkar kụ ẹeḅaghamhi bịdi, kụ ọghi ọḅenhi ọde otu phọ ạbidi oomo ịpe memite bọ. 32 Kụ ọde otu phọ ạmhagh nyọdi kụ ạḅenhi mọ: ‘Ọkaraph ẹbenhe, mị ụwilhenhaan ni nyịnha oomo ọmhugh phọ ọpo nạ alhe bọ mem mọ nạ ụuḅereghian bọ ịmhi. 33 Ị́kpe dị nạ mụnma aani ighirigiir ọphoripho ẹbenhe phọ ịduon mị ạnma bọ nyịnha ḍụghum?’ 34 Ịphen phọ ịkar kụ ẹghurughur ekpom ọde otu phọ, kụ ạḅogh nyọdi ạngo bukoriom ikoli phọ mọ ọlhogh nyọdi ikoli tụtu ạkpe oomo ọmhugh phọ ọdi alhe bọ. 35 Ịpe kụ ịdi Ọde k’ạke phọ ạmhi kiḍighi aani inyinha eru mạar dị tọrobo ọnyo anyinha ụ́sar ghan ụbilhenhaan umor ọdi k’ekpom.”