Ọdaphan Ịpe ạ Mạtiu Ạge Bọ
11 A Jizọs rọḅenhi 12 ạbumatuan phọ ọdi ịlo oḍighi, kụ ạḅua ạghi rạmha phọ etuman bọ sịphe ạtughemhi ghan ạḅilhe agbeelhom ghan iiḅi ịinhaghan phọ.
2 Kụolo mem mọ ạ Jọn ạrol bọ ẹpe ikoli phọ ạnhaghan ịlo iiḍighi ạ Krạịst phọ, arom ni bụmatuan ọdi 3 mọ ọghi opuru nyọdi mọ: “Nạ kụ Ọpo Ratu bọ ni, ọbobo ọnhon oye ratu ni?” 4 Kụ a Jizọs ạphagharanhaan bịdi mọ: “Ịki ẹḅenhi Jọn ịphen nyinha rẹnaghan bọ ẹḅilhe bọ rẹmiin: 5 Awe dị ụ́miin ghan eten rọmiin ḅịlhe bụdi oḍiku rạagha rotelhe, ạbuo ẹzegh ọku ufe mọḅaal ḅịlhe ạbuḅaaghaph ḅạaghaph rọnaghan, roḅerion bụdi omhuughu, ḅịlhe rọkaaph iiḅi ịinhaghan phọ kọḅenhi rukulhom mọ. 6 Ọḅaal olhoghi odianhaan ni ọpo ụ́miin bọ ịyaar oghol okpetaan esi ạmhi.”
7 Ạbumatuan phọ ạ Jọn rọḍua, kụ a Jizọs amhiigh ọghaaph ịlo ạ Jọn ọḅenhi aḍita awe phọ, mọ: “Nyinha ịghi ẹpe ẹdala phọ ọmhiin eeghe? Ikpu dị ookugh rạpiphoghom ḍụghum? 8 Nyinha ịkar ẹghi ọmhiin eeghe? Oye dị ạkpolhoghian ịma* ạrusuoma ḍụghum? Kụari bụphe rọkpolhoghian ghan bọ ịma ạrusuoma phọ otughogh ruutu aruwo ẹmha. 9 Ịkar ẹghaaph, uḍighi ika kụ nyinha ẹghi bọ ẹpe phọ? Ọmhiin oyil ḍụghum? Ii, ọdi oyil li, kụ apu kẹn ni riil phọ. 10 Ọphon kụ ọdi ọge bọ ịlo ọdi mọ: ‘Mịin! Mị ratom otelhedom ạmhi oḍiemhi ghan* oseleminhaan ạna eten phọ ạna! 11 Mị ạkar rịḅenhi ghan inyinha mọ, oye ólho dị mọmhar ghan dị apu Jọn Oḍiinyeom Mụum mọ, kụolo oye lọ aḍighi ọbam ẹpe Ọmhar k’ạke phọ apu ni nyọdi. 12 Emhiigh k’amem mọ ạ Jọn Oḍiinyeom Mụum mọ kụ ẹteeny nyịidipho, awe rọkparagha ni oḍigh aani Ọmhar k’ạke phọ, kụ bụphe rọkparagha bọ roḍigh ni. 13 Loor esi dị, kụ ạ Jọn agbi bọ oru, oomo ịge Ariil phọ r’Olhogh phọ, ịghaaph ni ịpe kemite bọ ghisigh; 14 nyinha emheeraam nyinha ímeeraam, ọdi kụ Ẹlạịjạ phọ ọghaaph bọ mọ katu.’ 15 Ọlo ạmhoogh reḅeri ạnhaghan.
16 “Mị kạtomaam oghiil phọ ọphon phọ bụo ạnhian? Ọkigh ịbam ạnmuny dị ọrol ude ḍighi rọmagh ghan bụnhon ịbam ạnmuny dị ropegh ghan ephegh r’ạbidi, 17 kọḅenhi mọ: ‘Yoor iphulhanhaan ni inyinha eeḍue phọ, kụolo nyinha ị́ker ịḅa; yoor omhoghi yogh, kụolo nyinha íkururu.’ 18 Eniin phọ eten phọ, ạ Jọn aru bọ ólhe ọphughol ịdipho ạbunhon awe, kụolo awe rọḅem ghan mo, ‘Ọkaraph uwaloor kụ odi loor ọdi.’ 19 Kụ Ọony phọ oye atu ale rạpughol, kụ awe rọḅem ghan mọ, ‘Ịmiin! Oye eboom eḍien r’ọpughol miim, ọyaghiri ạbubonyiom iisogh r’abuḍighinhom ịkaraph.’ Tọrobo ịpe ẹrol bọ, oye raḍeenhaan ghan mọ ọdi ạsu ni olhoghi* esi iiḍighi phọ ọdi.”
20 Kụ ọdi amhiigh ọḅaam ạramha phọ ọdi ạrol bọ aḍighi ịbadi ịiḍaany phọ, loor esi dị úmeera ukiton. Ạḅem mọ: 21 “Ịmhinhimhiin kụ kịrolhonhaan inyinha, we a Korezin! Ịmhinhimhiin kụ kịrolhonhaan inyinha, we ạ Bẹtseidạ! loor esi dị mụghumo uḍighi ịiḍaany phọ oḍighi bọ rạmha phọ anyinha ẹpe Tạyạ rạ Sạịdọn ọbo bịdi mokiton k’aḍiodi ọkpolhoghian rụsuoma ọto ọtol ude esi ọoru. 22 Kụolo mị rịḅenhi ghan inyinha mọ, Ḍio Ịiruen phọ ạraraar kedughanhaan ni Tạyạ rạ Sạịdọn epu rạmha phọ anyinha. 23 Kụ nyinha awe ạ Kạpạnịọm, kiphophe ni inyinha osiemhi k’ạke ḍụghum? Eeye, nyinha kẹki ghụn sịphe Oḍi phọ;* loor esi dị mụghumo uḍighi ịiḍaany phọ oḍighi bọ ẹmha phọ anyinha ẹpe Sọdọm, ọbo odi ni k’ạnyiidipho. 24 Kụolo mị rịḅenhi ghan inyinha mọ, Ḍio Ịiruen phọ ạraraar kedughanhaan ni de phọ ạ Sọdọm epu ẹmha phọ anyinha.”
25 Kụ ịpe phọ reten kụ a Jizọs ạḅem mọ: “Mị raboom ni nyịnha sịen ogbo awe phọ Ọde, Uwo Ẹmhoogh ạke phọ r’ade phọ, loor esi dị nạ mạaghinhaan rạraar phọ ịphen phọ we dị ọsu olhoghi ọḅilhe ọmhaar ḍịnya kụ aganhanhamhi aḍeenhaan ịbam ạnmuny. 26 Ii Ọde, loor esi dị ịphen kụ ịdi nạ rạwa.” 27 A Jizọs ạḅilhe ạḅem mọ: “Ọde phọ ạmhi mạḅogh oomo ạraraar ụngo ịmhi, kụ oye ólho dị ạkar alhegheri Ọony phọ emuton Ọde phọ; ḅịlhe kẹn oye ólho dị ạkar alhegheri Ọde phọ emuton Ọony phọ r’ạtorobo oye lọ Ọony phọ rạwa oganhanhamhi Ọde phọ ọdi oḍeenhaan. 28 Itu ịteeny ịmhi, oomo phọ anyinha aloor phọ medugh bọ ḅịlhe erool bọ dool dị ẹemor, bịn mị kịngo ni inyinha ophooghian. 29 Ịsighe ọfeguma phọ ạmhi ẹgban rụpha anyinha ẹḅilhe ẹtuugha ḍịghaagh ạmhi, loor esi dị mị ọophonheen oye dị asooromhi loor, bịn nyinha kepooghian ni. 30 Ịdi eḍighi bọ ọfeguma phọ ạmhi adugh ni ọgban, kụ adool phọ ạmhi eephoogh ni.”