Ọdaphan Ịpe ạ Mạk Ạge Bọ
4 Ọdi ạḅilhe ni amhiigh ọtughemhi ẹpe oogbom ọphiiny ạbazi phọ, kụ aḍiboom aḍita awe ookpomhoghan sịphe ọdi odi bọ. Kụ ọdi ạghi aḍigh oghuugh ạrol ude kụ ọzoghiom nyọdi ẹnum ọḍuanham sịphe oogbom ọphiiny ạbazi phọ, kụ oomo aḍita awe phọ ọrolhoghu ẹpe ạnyu ade phọ. 2 Kụ ọdi amhiigh ọsighe ạraghaaph ọmaanhiom ọtughemhiom ạbidi ịbadi ạraraar, kụ ạḅem mọ: 3 “Ịnaghan. Oḅephom ozo ạghi ni ọzuph ikpo ịizupha, 4 ịduon ọdi rạzuph bọ, iniin ikpo ịizupha phọ imhelheghu ọgbal eten, kụ ịnhun eru eekpophi. 5 Ịnhon imhelheghu de asighiigh dị ịisaar ị́kar ilo, bịn eginha amem ẹraarogh loor esi dị ịisaar phọ ị́bugh. 6 Kụolo ogogo romite, bịn ạsel ịizupha phọ, kụ ẹnhuughi loor esi dị ị́moogh sịnhi. 7 Ịnhon imhelheghu esi iitoor, kụ iitoor phọ esiighi ẹze ịizupha phọ, bịn ímuum iimhumha. 8 Kụ ịnhon imhelheghu ḍịma ade, kụ eḍum ẹmhanham, emhiigh omhuum iimhumha. Iniin imhuum epu ọnhu ịpe ọzuph bọ 30 amem, ịniin 60 amem, ịnhon 100 amem.” 9 Kụ ọdi ạlhoghom mọ: “Ọlo ạmhoogh reḅeri ạnhaghan.”
10 Kụ mem dị oginha ọdi bịn odi, ạbumatuan phọ ọdi ra Ḍioph r’ Ịyal phọ uru ni ọteeny nyọdi omhiigh opuru ọdi ẹmhu ạraghaaph ọmaanhiom mọ. 11 Kụ ọdi ạḅenhi bịdi mọ: “Nyinha kụ ẹdi mọngo rạraar ịbooghian Ọmhar phọ Ẹnhaan, kụolo ịdi egbolhomaam bụeripho, oomo ạraraar phọ bịdi ọnhaghan bọ eḍighi rạghaaph ọmaanhiom bịn. 12 Pọ kụ ịyaar phọ ghạlhamo bịdi uphogh ni, kopogh ni bịn kụolo kọ́miin ịyaar, kụ ghạlhamo bịdi ụnhaghan ni, kọnaghan ni bịn kụolo kọ́naghanhan ẹmhu ịyaar phọ; kụ kóoghiraan oḅula esi Ẹnhaan ọmoogh ọsar ọwilhenhaan.” 13 Kụ ọdi ạḅilhe ạḅenhi bịdi mọ: “Nyinha ị́naghanhan bọ ọghaaph ọmaanhiom mọ ọphon phọ, nyinha kẹnaghanhan bọ ika ịphoripho ạraghaaph ọmaanhiom mọ?
14 “Oḅephom ozo phọ ạzuph ekpo ọnhu phọ Ẹnhaan. 15 Ikpo ịizupha phọ emhelheghu bọ ọgbal eten phọ pọ awe dị ọnhaghan ekpo ọnhu phọ kụ mem mem mọ a Setạn aru ạsighe ekpo ọnhu phọ ọzuph bọ sịphe arokpom mọ ạbidi. 16 Iginha phọ kẹn, ịpe emhelheghu bọ de asighiigh phọ pọ awe dị ọnhaghan ekpo ọnhu phọ kụ eginha amem ọsighe r’ibo. 17 Kụ ekpo ọnhu phọ rẹtol ghan ni sịphe arokpom mọ ạbidi ekulha amem kụolo sịnhi rési ghan; bịn omeel eginha amem mem dị ịiḅaghamhi ọbobo ịgbiphoghom ẹteeny bịdi loor esi ekpo ọnhu phọ. 18 Ịnhon edi ni dị emhelheghu esi iitoor. Ịphen phọ pọ awe dị ọnhaghan ekpo ọnhu phọ, 19 kụ oboom ọoḅaghamhian aloor ịlo aghuḍum sịen aḅirinhi phọ* r’ịikpo iikelheghian phọ ikpoki ẹmhoogh bọ, r’ẹephua ọmhoogh oomo ịphoripho ạraraar phọ eru eḍigh sịphe arokpom mọ ạbidi kụ eghiigh ekpo ọnhu phọ, bịn ítue imuum iimhumha. 20 Okureriom, ịpe emhelheghu bọ ḍịma ade phọ pọ awe dị ọnhaghan ekpo ọnhu phọ, kụ ọsighe ọḅilhe omhuum iimhumha. Buniin umhuum opu ọnhu ịpe ọzuph bọ 30 amem, bụnhon 60 amem, bụeripho 100 amem.”
21 Ọdi ạḅilhe ni apuru bịdi mọ: “Rọsu ghan ni ọtozi kokpereghiom egunhum* ọbobo kọlhogh ọdurukpata ḍụghum? Rọ́su ghan ḍịen kọḅam ạnyu ọmheremhiom ọtozi? 22 Ịyaar ílo dị ạaghi kụ kómiteom; ịyaar ílo dị omhiigha loor okpereghi kụ kókpegheron dị awe kọmiin. 23 Ọlo ạmhoogh reḅeri ạnhaghan.”
24 Kụ ọdi ạḅilhe ạḅenhi bịdi mọ: “Iler rụru ẹngo ịphen nyinha rẹnaghan bọ. Ọtoom mọ nyinha ẹtoom bọ rẹngo bụnhon kụ ẹdi kọtoom aani ịngo inyinha, ii, kọḅaram kẹn ni ịnhon ịngo inyinha. 25 Loor esi dị tọrobo oye lọ ạmhoogh, kọngo ni ịnhon ọḅaram, kụolo oye lọ ụ́moogh, ghạlhamo r’ịpe ọdi ạmhoogh bọ bịn kọboor ri nyọdi.”
26 Kụ ọdi ạḅilhe ạḅem mọ: “Kọsighe Ọmhar phọ Ẹnhaan ọmaanhiom mem dị oye ạsar ikpo ịizupha pạ ade phọ. 27 Ọdi rạnaanhi ghan ḍughul kạsuma ḍịroor, kạmhiin dị ịizupha phọ ọdi mẹraarogh ẹḅilhe ephoph, kụolo ịpe remite ghan bọ ọdi ólhegheri. 28 Ade phọ kụ reḍighi ghan ịdi ekpo ẹezupha phọ keḍum ẹnum ẹnum. Kẹpur emiteom ọmhiigh, kụ emiteom ḍịgba, kụ eekunha phọ emuum iimhumha. 29 Kụ ịizupha phọ rẹkpo, kụ ọdi ạsighe elhool phọ ọdi ạki agboom, loor esi dị amem ibugha mẹteeny.”
30 Kụ ọdi ạḅilhe ạḅem mọ: “Yira kọmaanhiom Ọmhar phọ Ẹnhaan eeghe, ọbobo ọghen ọghaaph ọmaanhiom kụ ẹdi yira kọsighe ọgbaam ẹmhu phọ? 31 Ạkigh ekpo ạ mọstạd phọ eghom bọ epu ịnhon ikpo ịizupha sịen ade phọ mem mọ rọzuph bọ. 32 Kụolo rọzuph, rạbugh ghan bọ kapu ịnhon ịizupha kạḅilhe ạmhoogh igbogh ịla, pịdi ịnhun phọ ẹki edoghoḍi ruutu kụ ịla phọ ọdi ẹngo bịdi uba.”
33 Ịbadi ạraghaaph ọmaanhiom dị ẹrol ịduon phọ kụ ẹdi ọdi ạtughemhiom bịdi ekpo ọnhu phọ Ẹnhaan, ọdaphan ọnhaghanhan ạḍughum mọ ạbidi. 34 Ọkar agey, ọdi ọ́tughemhi ghan bịdi ịyaar dị úḍighinhom ọghaaph ọmaanhiom, kụolo ọdi ạgba ghan ni ẹmhu oomo ạraraar ạḅenhi bụmatuan phọ ọdi mem dị oginha ạbidi bịn odi.
35 Kụ rẹteeny dulhe aḍio phọ ạḍiphe phọ, kụ ọdi ạḅenhi bịdi mọ: “Ọḅeeny ọphoripho ạga ọphiiny ạbazi phọ.” 36 Bịdi rọḅenhi ḍita awe phọ mọ oghelheghu bịn ọsaany nyọdi oghuugh, kụ ịnhon arughuugh ịrol li sịphe phọ. 37 Kụ ọgbagara oghim aḍighi ịdi oolhogh amite, dị tụtu ạwa oḅiemhi oghuugh phọ. 38 Kụolo ọdi ạrol ẹpe eti oghuugh phọ, ạmhinhanham oḅetenhuom ẹmhu rạnaanhi ghan. Kụ bịdi oru ọsumeeny nyọdi kụ ọḅenhi mọ: “Ọtughemhia, ị́kigh ịyaar esi ạna mọ yoor rope?” 39 Kụ ọdi aḅetenhu kụ amhooghaam oghim mọ kụ ạḅenhi ọphiiny ạbazi phọ mọ: “Mẹnhighe! Ḅoorian!” Bịn oghim mọ óghim mụn, kụ ẹpho bịn nam. 40 Kụ ọdi apuru bịdi mọ: “Nyinha ẹkar rekiilhaan ghan eeghe? Nyinha kẹ̋mhoogh ni r’ẹnum omheeraam?” 41 Kụolo aruugu asiph ni bịdi, kụ bịdi opuru ghan sịphe igbo phọ ạbidi mọ: “Ọphon phọ ọghen ọdo oye? Ghạlhamo r’oghim mọ r’ọphiiny ạbazi phọ bịn rẹnaghanhan ni nyọdi.”