Ọdaphan Ịpe ạ Mạk Ạge Bọ

3 Kụ ọdi ạḅilhe ạghi aḍigh oniin obughotu, kụ oye dị ạḍighaagh emhugh ạrol li sịphe phọ. 2 Kụ bịdi ogbon nyọdi ọmhiin mụghumo kaakonhom ni oye phọ Ḍio Oophoghian phọ pịdi bịdi osiph nyọdi olhogh. 3 Kụ ọdi ạḅenhi oye phọ ạḍighaagh phọ emhugh bọ mọ: “Ḅetenhu aru sịen ogbo phọ.” 4 Kụ ọdi apuru bịdi mọ: “Ẹkpeanhaan oḍighi eeghe Ḍio Oophoghian phọ, oḍighi egey ịyaar ọbobo ẹkaraph ịyaar, ọphel aghuḍum ọbobo ophiemhi?” Kụolo bịdi ụ́pagharanhaan nyọdi. 5 Ọdi rophogh oomo phọ ạbidi r’ọghagh olhoghi, kụ olhoghi ọdi eeph iboom loor ịgbagara ilhoghi phọ ạbidi, kụ ọdi ạḅenhi oye phọ mọ: “Gbụton ḍịghaagh phọ ạna.” Kụ oye phọ ạgbuton, kụ ạḍighaagh phọ ọdi emhoon. 6 Kụ mem mem mọ bịn ạbuo ạ Fạrisi phọ umite ni ọghi ọpham ruupuruan r’ạbumatuan phọ ạ Hẹrọd, ịlo oghiigh ọdi.

7 Kụolo a Jizọs r’ạbumatuan phọ ọdi ụḅua ni sịphe phọ onyeenhe ẹpe ọphiiny ạbazi phọ, kụ aḍiboom aḍita awe ụḅua ni Gạlili ra Judia ọdaph nyọdi. 8 Aḍiboom aḍita awe ụḅua ni kẹn Jeruselem r’ Idumia r’ẹḅeenyom Ọphiiny ạ Jọdạn r’ạramha phọ ekoom bọ Tạyạ rạ Sạịdọn oru ọteeny nyọdi, mem mọ ọnhaghan bọ ịlo ịbadi ạraraar phọ ọdi raḍighi bọ. 9 Kụ ọdi ạḅenhi bụmatuan phọ ọdi mọ ọwaanhaan nyịnho ọbam oghuugh ọbo awe phọ kọtiir ghan bọ nyọdi. 10 Loor ịduon ọdi maakonhom bọ ịbadi awe, oomo ạbuphe ọmhoogh bọ ịgbagara ạreezegh uru ni okoom nyọdi ọḅogh ọdi. 11 Ghạlhamo r’awe dị ịkaraph aruwaloor rẹeḅaghamhi bịn umheel ghan ni ghisigh ọdi tọrobo amem dị ọmhiin nyọdi, kụ ọlooghi ghan mọ: “Nạ kụ Ọony phọ Ẹnhaan.” 12 Kụolo ịbadi amem ọdi ạphur ghan ni bịdi rụru mọ kụ́ḅenhi we ọdo oye phọ ọdi aru bọ.

13 Kụ ọdi ạsiiny ẹeḅaraph kụ ạmhagh bụphe ọdi rạwa bọ, kụ oru ọteeny nyọdi. 14 Kụ ọdi ạsaḅar 12 awe, kụ aghol egu phọ ẹphen phọ mọ abutelhedom. Bụen phọ kụ kọdaph ghan bọ nyọdi ḅịlhe ạbuen phọ kụ ẹdi ọdi katom ghan ọghi ogbeelhom adom mọ Ẹnhaan. 15 Bịdi kụ ẹdi ọdi kạngo ịikpo ophoroghom ghan ịkaraph aruwaloor.

16 Egu a 12 awe phọ ọdi ạsaḅar bọ pọ ạ Sạịmọn, ọpo ọdi aghol bọ mọ a Pita, 17 ra Jems ọony ạ Zẹbẹdi rạ Jọn umor phọ ọdi (bụen phọ ọdi ạta mọ a Boanẹjis, kụ ẹmhu phọ pọ “Ạnmuny Ọomhaany”), 18 r’ Ạndrụ, ra Filip, rạ Bạtọlọmiu, rạ Mạtiu, rạ Tọmọs, ra Jems ọony phọ Ạlfiọs, rạ Tạdiọs, rạ Sạịmọn oye oophugh phọ, 19 ra Judas Iskạrịọt, ọpo eekunha phọ aal bọ nyọdi.

Kụ ọdi arelhe aḍigh olhoghi otu, 20 kụ aḍita awe phọ ọḅilhe ookpomhoghan, dị tụtu bịdi ụ́moogh eepoogh olhe eḍien. 21 Kụolo mem mọ asiya phọ ọdi ọnhaghan bọ ịphen phọ, bịdi umite ni ọghi osiph ọdi, loor esi dị bịdi ụḅem ghan mọ: “Ẹmhu phọ rẹeḅaghamhi.” 22 Kụ ạbutughemhia Olhogh phọ ọḅua bọ Jeruselem oru ụḅem ghan kẹn mọ: “A Biẹlzịbọb* odi loor ọdi, kụ ọdi ạsighe ịikpo ọtooghia ịkaraph aruwaloor phọ kụ raporoghom ghan bọ ịkaraph aruwaloor phọ.” 23 Ọdi rọmhagh bịdi mọ oru, kụ ạtughemhiom bịdi rạghaaph ọmaanhiom, mọ: “Ika kụ ịdi a Setạn kaporogh bọ Setạn? 24 Eru mạar dị ịtooghi kụ media, pọ kétue ẹmeera; 25 kụ eru mạar dị otu kụ madia, pọ otu phọ ọpo phọ kátue ạmeera. 26 Iginha phọ kẹn, eru mạar dị a Setạn rabian loor ḅịlhe amadia odi igbo awe phọ ọdi, pọ ọdi kátue ạmeera kpạripe ghụn eekunha ọdi kụ rẹteeny. 27 Ọkar ọghaaph, oye ólho dị katue aḍigh otu oye dị ạmhoogh ịikpo bịn amiighi rạraar, emuton dị ạphur ạphaḍi oye phọ. Pọ kụ amem dị katue ạsigheogh rạraar sịphe otu oye phọ. 28 Mị ạkar rịḅenhi ghan inyinha mọ, kọsar ri ọbilhenhaan we tọrobo ịkaraph dị bịdi oḍighi r’ịkaraph ạraraar dị bịdi ọghaaph. 29 Kụolo kọ́sar ri bịn ọbilhenhaan oye dị ạghaaph ịkaraph ịlo uwaloor iigbia phọ, ọdi maḍighi ịkaraph dị kẹtol bịn k’agee-pọ.” 30 Ọdi ạghaaph ịphen phọ loor esi dị bịdi ụḅem ghan mọ: “Ọkaraph uwaloor kụ odi loor ọdi.”

31 Onhiin ọdi r’abumor ọdi uru ni kụ ọmheregha erugh, kụ orom oye mọ ạghi ạmhagh nyọdi. 32 Kụ ịduon aḍita awe phọ ọrol bọ okoom nyọdi, bịdi ụḅenhi nyọdi mọ: “Onhiin ạna r’abumor ạna odi ẹpe erugh rọwa ghan ọḅaanhaan ạna.” 33 Kụ ọdi apuru bịdi mọ: “Ạnhian kụ onhiin ạmhi, kụ ạbuo ạnhian kụ abumor ạmhi?” 34 Kụ ọdi aphogh bụphe ọrol bọ okitonhom nyọdi kụ ạḅem mọ: “Pọrono onhiin ạmhi r’abumor ạmhi! 35 Tọrobo oye dị raḍighi ghan ogbi phọ Ẹnhaan, kụ umor ạmhi r’umaranhi ạmhi r’onhiin ạmhi.”