Iiḍighi Abutelhedom Mọ
1 Tiọfịlọs, sịphe ạḍiḅel ạḍinya phọ mị ạge bọ, mị ụghaaph ni ịlo oomo ạraraar phọ a Jizọs aḍighi bọ ạḅilhe ạtughemhi 2 tụtu ẹteeny ḍio phọ Ẹnhaan ạsighe bọ nyọdi agheelhom k’ạke. Kụ dị eego esi uwaloor iigbia phọ, ọdi ạngo ni iromhoghiom butelhedom mọ ọdi mạsaḅar bọ kụ agbi bọ ogheel k’ạke. 3 Ọdi ạmhiinhom bọ ạḅilhe amhugh, aḍeenhaan ni loor ọdi bịdi ịbadi amem pịdi bịdi omeeraam okuphom owol mọ ọdi odi ni r’ighuḍum. Kụ esi 40 aḍughul otu, ọdi amitenhaan ni bịdi ịbadi amem kụ ạḅenhi ghan bịdi ịlo Ọmhar phọ Ẹnhaan. 4 Ọdi amitenhaan bọ bịdi, ạḅenhi bịdi mọ: “Kẹ́ḍua Jeruselem, ịkiom ghisigh ekori ghan ịyaar phọ mị ịḅenhi bọ inyinha mọ Ọde phọ aguan ọngo. 5 Ạ Jọn aḍiinye ghan we mụum, kụolo mọony amem kiḍiinyeom inyinha uwaloor iigbia.”
6 Bịdi rookpomhoghan, kụ opuru nyọdi mọ: “Uwo Ẹmhoogh, nạ raḅulhemhi ọmhar phọ sịen Izrẹl nyịidipho?” 7 Kụ ọdi ạḅenhi bịdi mọ: “Inyinha ísi olhegheri amem mọ r’ariiḍio phọ* Ẹnhaan bịn kụ ạmhoogh bọ elhiom ogu. 8 Kụolo nyinha kẹmoogh ni ịikpo mem dị uwaloor iigbia phọ isoorom inyinha, kụ nyinha ẹkaaph ịlo ạmhi ẹḅenhi we sịen Jeruselem, r’oomo a Judia rạ Sạmeria r’oomo ạrughulhukul ade phọ.” 9 Ạbumatuan phọ ọdi odi ni ropogh nyọdi mem mọ ọdi ạghaaph bọ rạraar phọ ịphen phọ ạmhan, kụ Ẹnhaan ạsighe nyọdi anyeenhiom ẹpe okuaḍio phọ, kụ ọotu aakpereghiom nyọdi bịn bịdi ụ́miin mụn nyọdi. 10 Kụ bịdi odi ni ropogh ẹpe okuaḍio phọ ịduon ọdi rạki bọ, bịn ịyal awe dị ọkpolhoghian ịphalhaḅaal ạrusuoma ọmheera otuman bịdi 11 kụ ọḅenhi bịdi mọ: “We ạ Gạlili, uḍighi ika kụ nyinha ẹmeregha bọ sịen phọ repogh ghan ẹpe okuaḍio phọ? A Jizọs phọ ọphon mọsighe bọ sịen igbo anyinha ọghimhom ẹpe okuaḍio phọ kạḅilhe ni aḅula eniin phọ eten phọ nyinha ẹmhiin bọ dị ọdi rạki ẹpe okuaḍio phọ.”
12 Kụ bịdi ọḅua sịphe ẹeḅaraph phọ oghol bọ mọ Ẹeḅaraph Olivs onyeenhe ẹpe Jeruselem. Kụ ọḍua ịpa phọ osi a Jeruselem rẹki ni ọmhan oniin a kilomita.* 13 Bịdi rosi, kụ ọghi ẹpe osoph ạnyu phọ bịdi ọrol bọ. Kụ awe phọ oru bọ pọ a Pita rạ Jọn ra Jems rạ Ạndrụ, ra Filip rạ Tọmọs, rạ Bạtọlọmiu rạ Mạtiu, ra Jems ọony phọ Ạlfiọs, rạ Sạịmọn oye oophugh phọ, ra Judas ọony phọ a Jems. 14 Kụ bịdi r’abuniin ạnmariir ra Meri onhiin phọ a Jizọs r’abumor phọ a Jizọs ụḅoph ni ilhoghi ọoḅereghi ghan.
15 Siḍughul otu phọ ịpe phọ, a Pita ạmheera ni igbo abumor phọ (awe phọ ọrol bọ pạ phọ rọki ni ọmhan 120) kụ ạḅem mọ: 16 “We phọ, bumor phọ, dị eego esi a Devid, uwaloor iigbia phọ ạghaaph ni ịlo a Judas, ọpo aḍiemhiom bọ bụphe ọghi bọ osiph Jizọs, kụ ẹkpeanhaan ni dị esi ịge iigbia phọ kemunughan. 17 Ịdi eḍighi bọ ọdi aḍighi ghan ni oniin ọnyo ayoor ạḅilhe akumuan ghan r’ayoor. 18 (Oye phọ ọphon phọ ạsighe ni ikpoki phọ ọkpe bọ nyọdi ịlo ẹkaraph eḍighinhom ịyaar phọ ọdi aghoom de. Kụ ọdi amheelhom ẹmhu ọdi, kụ aruphaany kụ ịlha phọ emiteghu. 19 Kụ oomo awe dị orugh Jeruselem ulhegheri ni ịlo ịphen phọ kụ oghol esi phọ ọnhu ẹmha ạbidi mọ Ạkẹldạmạ, ịduon phọ pọ, “Ade Ịḅaal.”) 20 Kụ ọge ni sịphe ạḍinya Ạsuor phọ mọ, ‘Amarugh phọ ọdi aagulhaany, kụ oye kútugh pạ phọ’ ḅịlhe mọ, ‘Dọl phọ ọdi ịdipho opoghom, ọnhon oye kụ ạsighe.’ 21 Esi ịduon phọ ẹkpeanhaan ni dị oye kạsighe esi ọdi, oniin sịphe igbo ạbuphe ụdaph ghan bọ iyoor oomo amem mọ Uwo Ẹmhoogh phọ Jizọs akumuan ghan bọ rukumuan phọ ọdi sịen igbo phọ ayoor, 22 emhiigh mem mọ ạ Jọn aḍiinye bọ nyọdi mụum kụ ẹteeny mem mọ ọsighe bọ nyọdi ogheelhom k’ạke. Ẹkpeanhaan ni dị oye phọ kuḍighan iyoor ạkaaph ghan ịlo oḅetenhu esi aḍuugh phọ ọdi.”
23 Kụ abumor phọ oghol ịyal awe, Mạtạyạs ra Josẹf phọ ọmhagh ghan bọ mọ ạ Bạsạbạs, ọḅilhe ghan bọ kẹn ọmhagh mọ ạ Jọstọs. 24 Kụ bịdi ọoḅereghi mọ: “Jehova,* nạ kụ ulhegheri rokpom oomo awe, uḍeenhaan iyoor ọpo nạ mạsaḅar bọ sịen ịyal phọ awe phọ ạbuen phọ 25 okumuan arukumuan phọ ịphen phọ r’oḍighi otelhedom, ọsighe esi a Judas phọ ạwilhe bọ ịphen phọ ạghi ẹlo ọdi.” 26 Kụ bịdi ọsa ẹlhel olhegheriom oye phọ, kụ emheelhom Mạtạyạs, kụ ọsighe nyọdi ọḅaram 11 abutelhedom mọ.