Ọdaphan Luk

9 Kụ ọdi ạmhagh Ḍioph r’ Ịyal phọ aakpomhoghi kụ ạngo bịdi ịikpo ophoroghom oomo ịkaraph aruwaloor phọ r’ookonhom ạreezegh. 2 Kụ ọdi arom bịdi ọghi ogbeelhom Ọmhar phọ Ẹnhaan r’ookonhom ạbulo úmoon, 3 kụ ạḅenhi bịdi mọ: “Kẹ́pam ịyaar kụ ẹghimhom erelhe phọ, mọ ịkpara mọ okuru eḍien mọ ạ brẹd mọ ikpoki;* kụ kẹ́pam kẹn ịyal ạrusuoma.* 4 Kụolo tọrobo ekpisi lọ nyinha ẹghi, ịtol otu lọ nyinha eḍigh tụtu nyinha ẹḍua ẹpe phọ. 5 Kụ tọrobo esi dị awe inyinha ị́sighe, ịikpa ịisaar aruwol phọ anyinha mem dị nyinha emite ẹmha phọ, pịdi bịdi olegheri mọ mọphur ri bịdi rụru.” 6 Kụ bịdi onyeenhe, ọḅua ẹmha ọgba ẹmha, ogbeelhom ghan iiḅi ịinhaghan phọ ọḅilhe ookonhom we tọrobo ekpisi.

7 Kụ ạ Hẹrọd* ọtooghia ekool phọ ạnhaghan ni oomo ịpe remite bọ, kụ ólhegheri r’ịyaar oḍighi loor esi dị buniin awe ụḅem ghan mọ moḅeton Jọn esi aḍuugh, 8 kụolo buniin ụḅem ghan mọ Ẹlạịjạ mạḅilhe aḅula, kụ bụnhon ọḅem ghan kẹn mọ oniin sịphe ariil iḍiodi phọ maḅetenhu esi aḍuugh. 9 Kụ ạ Hẹrọd ạḅem mọ: “Mị masoph ẹmhu ạ Jọn. Kụ ọphon mị ạḅilhe bọ rạnaghan ịlo ọdi ạnhian?” Esi ịduon phọ ọdi ạkparagha ghan ọmhiin ọdi.

10 Abutelhedom mọ roḅula, kụ ọḅenhi Jizọs oomo ịpe bịdi oḍighi bọ. Kụ ọdi ạpham bịdi ạghimhom ẹmha dị oghol mọ ạ Bẹtseidạ pịdi oginha ạbidi ọtol. 11 Kụolo aḍita awe phọ rolhegheri kụ ọdaph nyọdi. Kụ ọdi aghuraam bịdi agey kụ amhiigh ọghaaph ịlo Ọmhar phọ Ẹnhaan ọḅenhi ạbidi, ạḅilhe aakonhom bụphe úmoon bọ. 12 Adulhe rekul, kụ a Ḍioph r’ Ịyal phọ oru ọteeny nyọdi ọḅenhi mọ: “Ḅẹnhi mọ aḍita awe phọ oghelheghu, pịdi bịdi ọki ẹpe ạramha phọ r’ạsiraaghanha phọ ekoom bọ ẹphen phọ ọwa riisi ọmhinha r’ạraraar olhe, loor esi dị awe úlo ẹphen yira odi bọ.” 13 Kụolo ọdi ạḅenhi bịdi mọ: “Ịngo bịdi ịyaar olhe.” Kụ bịdi mọ: “R’ịyaar iyoor ílho sịen emuton oogh iiḅoghoḍi ạ brẹd r’ịyal ina, epel lọ eeni yoor kụ kọki oko eḍien ọngo oomo awe phọ ạbuen phọ.” 14 Alhephiri ạnmuny dị ọrol sịphe phọ rọki ni ọmhan 5,000. Kụ ọdi ạḅenhi bụmatuan phọ ọdi mọ: “Ịḅenhi awe phọ ọrolhoghu ude rugu, kụ awe dị rọki ọmhan 50 kụ ọrol tọrobo egu.” 15 Kụ bịdi ọtuugh ịphen phọ oḍighi kụ oomo awe phọ ọrolhoghu ude. 16 Kụ ọdi ạsighe oogh iiḅoghoḍi ạ brẹd phọ r’ịyal phọ ina phọ kụ aphogh ẹpe k’ạke ạaḅereghi.* Kụ ọdi ạparion ạ brẹd phọ kụ ạḅogh ạ brẹd phọ r’ina phọ ạngo bụmatuan phọ ọdi ọngo aḍita awe phọ. 17 Kụ oomo ạbidi olhe ẹpherogh, kụ ạbumatuan phọ ọson ipoḍi phọ ịpe esugha bọ kụ eḍigh 12 ạrigiel.

18 Eniin aḍio dị oginha ọdi odi rạaḅereghi, ạbumatuan phọ uru ni ọteeny nyọdi, kụ ọdi apuru bịdi mọ: “Aḍita awe phọ rọḅem ghan mọ mị ạnhian?” 19 Kụ bịdi ọphagharanhaan mọ: “Buniin rọḅem ghan mọ nạ ạ Jọn Oḍiinyeom Mụum mọ, bụniin mọ nạ Ẹlạịjạ, kụ bụnhon mọ oniin sịphe ariil iḍiodi phọ kụ maḅetenhu esi aḍuugh.” 20 Kụ ọdi apuru bịdi mọ: “Nyinha phọ rẹḅem aani ghan mọ mị ạnhian?” Kụ a Pita ạphagharanhaan mọ: “Nạ kụ ạ Krạịst phọ, Ọpo Ẹnhaan Mạsaḅar bọ.” 21 Kụ ọdi ạkuamhi ạphur bịdi rụru mọ kụ́ḅenhi oye ịphen phọ, 22 kụ ạḅenhi bịdi mọ: “Ọony phọ oye kạmiinhom ni iboom ịmhinhimhiin, kụ ikumor awe phọ r’aruwo ẹmhu ạbupinyon rịkia phọ r’ạbutughemhia Olhogh phọ okel ọḅilhe okiigh nyọdi, kụ Ẹnhaan aḅeton nyọdi esi aḍuugh omhunhenhiom ịraar aḍughul otu phọ.”

23 Kụ ọdi ạḅenhi oomo awe phọ mọ: “Oye lọ rạwa oḍighi ọnyo ạmatuan ạmhi kạparanhaan loor ọdi, kụ ạsighe ghan oreeny ịmhinhimhiin* phọ ọdi ḍio etum ḍio ụdapham ghan ịmhi. 24 Ịdi eḍighi bọ tọrobo oye lọ rạwa ọphel aghuḍum mọ ọdi kamugh ni, kụolo tọrobo oye lọ aghol ẹmhu ạmhi amhugh kụ kạpel ghuḍum mọ ọdi. 25 Ọkar ọghaaph, eeghe ạsuo kụ ẹdi oye kạmoogh eru mạar dị ạmhoogh oomo aḅirinhi phọ kụolo amhugh ọbobo ạkom ịiḅaghamhi ạngo loor ọdi? 26 Tọrobo oye dị ughiilhom ịmhi r’ikpo ọnhu phọ ạmhi umugholoor, Ọony phọ oye kakiilhom aani ni oye phọ ọpo phọ umugholoor mem mọ ọdi katumhom bọ eghuan phọ ọdi r’ẹpe Ọde phọ r’ịpe ạruukpaany iigbia phọ. 27 Kụolo mị ạkar rịḅenhi ghan inyinha mọ buniin ạbuen ọmheregha bọ sịen phọ kómugh tụtu ọmhiin Ọmhar phọ Ẹnhaan.”

28 Ọkar ọghaaph, ọdi ạḅa bọ ikpo ọnhu phọ ịphen phọ ephu ọphaanya aḍughul otu reten, kụ ọdi ạpham Pita, rạ Jọn, ra Jems ạsiinyom ẹeḅaraph ọoḅereghi. 29 Kụ ọdi odi ni rạaḅereghi, bịn arisigh phọ ọdi anmia kụ ạsuoma phọ ọdi ạḅaal forororo kụ rạnmanha. 30 Kụ ịyal awe ụghaaphan ghan ni nyọdi; bụen phọ pọ a Mozis r’ Ẹlạịjạ. 31 Ịyal phọ awe phọ omite bọ ụmhu ịdipho ạḍiḅaal kụ omhiigh ọghaaph ịpe a Jizọs kạḍua bọ sịen aḅirinhi phọ, mọony amem kemunhughan bọ ẹpe Jeruselem. 32 Mem mọ ọpo phọ ạralha aḅogh ni Pita r’ịyal phọ ạbueripho ạbumatuan phọ, kụolo bịdi roomhanham kụ ọmhiin eghuan phọ a Jizọs r’ịyal phọ awe phọ ọmheera bọ r’ọdi. 33 Kụ ịduon ịyal phọ awe phọ ọwilhe bọ Jizọs rọḍua, a Pita ạḅenhi nyọdi mọ: “Ọtughemhia, ẹnighe agey ịduon yoor odi aani bọ sịen. Esi ịduon phọ yoor ụlogh sịen ịraar arogbogo, oniin ọlo ạna, oniin ọlo a Mozis, oniin ọlo Ẹlạịjạ.” Kụolo ọdi ólhegheri ịyaar phọ ọdi ạghaaph ghan bọ. 34 Kụ ịduon ọdi rạkaaph bọ ịphen phọ bịn ọotu amite amhiigh osoorom ạbidi. Kụ bịdi ughiilhaan ni mem mọ ọotu phọ aakpereghiom bọ bịdi. 35 Kụ ẹḍogh ẹḅa sịphe ọotu phọ mọ: “Ọphon kụ Ọony phọ ạmhi, ọpo mị mạsaḅar bọ. Ịnaghanhan nyọdi.” 36 Kụ mem mọ ẹḍogh phọ ẹḅa bọ, bịdi ụmhiin dị oginha a Jizọs bịn odi. Kụolo bịdi uḅoorian ni bịn, kụ ụ́ḅenhi oye riiḍio phọ ịpe phọ rạraar phọ bịdi ọmhiin bọ.

37 Bịdi osoor bọ ẹeḅaraph phọ ḍio phọ etum bọ sịphe, aḍiboom aḍita awe uru ni ọteeny nyọdi. 38 Kụ oniin oye sịphe aḍita awe phọ ạlo ạḅem mọ: “Ọtughemhia, seseeny pogh aani ọony phọ ạmhi, loor esi dị ọdi bịn kụ ẹdi mị ạmhoogh. 39 Mịin! Ọkaraph uwaloor raḍigh ghan ni loor ọdi, kụ ekperenhom bịn ọdi amiigh ọlooghi, kụ aḍighi ịdi ọdi kamiigh osiphi isughuna kụ afugh oopha ọnhu phọ. Kụ rẹkpar ghan ni kụ ạḍua loor phọ ghạlhamo maḍighi yogh ni ọony phọ rạraar. 40 Mị ụuḅereghian bụmatuan phọ ạna mọ ophorogh ọkaraph uwaloor phọ, kụolo bịdi útue.” 41 Kụ a Jizọs ạḅem mọ: “Oghiil dị omheeraam ụ́moogh ḅịlhe mạphu ạmhan, mị kạtol r’anyinha ạḅilhe ạminoghom rọozo phọ anyinha ịphen phọ kạpur amem? Sịghe ọony phọ ạna arumom ẹphen.” 42 Kụolo ọkaraph uwaloor phọ alher ri ọony phọ ghạlhamo r’ịduon ọony phọ ratu bọ ọteeny a Jizọs, kụ aḍighi ịdi asiphi isughuna iboom. Tọrobo ịpe ẹrol bọ, a Jizọs ạḅaam ni ọkaraph uwaloor phọ ạḅilhe aakonhom ọony phọ kụ ạḅogh ạngo ọde phọ. 43 Bịdi ọmhiin bọ igbogh ịikpo phọ Ẹnhaan iḍighi ni iikia esi oomo ạbidi.

Kụ ịduon ạraraar phọ ịphen ọdi raḍighi bọ ẹghiom bọ ni ghisigh eḍighi iikia esi ạbidi, ọdi ạḅenhi bụmatuan phọ ọdi mọ: 44 “Ịmaar elher rụru kụ kébulha ikpo ọnhu phọ ịphen phọ: ‘Kobool li Ọony phọ oye ọlogh ḍịghaagh awe.’” 45 Kụolo bịdi ụ́naghanhan ịyaar phọ ọdi ạghaaph ghan bọ. Ọkar ọghaaph, ạaghinhaan ni bịdi ịphen phọ ọbo bịdi kọnaghanhan ghan bọ, kụ bịdi ughiilhaan ni opuru ọdi ḍipuru ịlo ịphen ọdi ạghaaph bọ.

46 Kụ bịdi omhiigh ọogbaghanhaan sịphe igbo phọ ạbidi ịlo oye dị aḍighi ọkaraghi ogbogh. 47 Kụ a Jizọs alhegheri bọ ni ịitughian phọ ạbidi, ạsighe ni ọbumoony ạmheremhi ọogaany ọdi, 48 kụ ạḅenhi bịdi mọ: “Oye lọ ạtuan ḍien ạmhi kụ aghuraam ọbumoony phọ ọphon phọ, pọ mughuraam aani ịmhi; kụ oye lọ ughuraam ịmhi, pọ maghuraam aani Ọpo urom bọ ịmhi. Loor esi dị oye dị aseere loor ọdi ịdipho ọdi aḍighi ọbam kụ ogbogh sịen igbo phọ anyinha.”

49 Kụ ạ Jọn ạḅenhi nyọdi mọ: “Ọtughemhia, yoor ụmhiin oye dị aghol ḍien phọ ạna raporogh ghan ịkaraph aruwaloor, kụ yoor ọghi okikima ọdi, loor esi dị ọdi iyira rụ́daph aani ghan.” 50 Kụ a Jizọs ạḅenhi nyọdi mọ: “Kẹ́ki okikima ọdi, loor esi dị oye lọ inyinha ísophoghom pọ odi ạga anyinha.”

51 Ịduon amem mọ ọdi kạki bọ k’ạke phọ rẹteeny bọ,* ọdi ạnya ni ọghi a Jeruselem. 52 Kụ ọdi ạḅenhi buniin ạbumatuan phọ ọdi mọ oḍia ghan. Kụ bịdi ọghi oḍigh eniin ẹmha awe ạ Sạmeria ookolhobinhaan ọdi rạraar. 53 Kụolo awe ẹmha phọ úkuraam nyọdi, loor esi dị ọdi mạnya ọghi a Jeruselem. 54 Mem mọ ạbumatuan phọ ọdi Jems rạ Jọn ọmhiin bọ ịphen phọ, ụḅem mọ: “Uwo Ẹmhoogh, nạ rạwa ni mọ yoor ụmagh nịan k’ạke uugulhemhiom bịdi ḍụghum?” 55 Kụ ọdi akiton asoman bịdi kụ ạḅaam. 56 Kụ bịdi ọḅua onyeenhe ẹnhon ẹmha.

57 Kụ ịduon bịdi orelhe bọ rọki, oye ạḅenhi ni nyọdi mọ: “Mị kạdaph aani nyịnha ạki tọrobo ekpisi lọ nạ rạki.” 58 Kụ a Jizọs mọ: “Ạruukpa ako ẹmoogh ni ropogh ḅịlhe ịnhun ẹmoogh ni ruutu, kụolo Ọony phọ oye ọ́mhoogh esi ẹlo ọdi dị kạminha.” 59 Kụ ọdi ạḅenhi ọnhon oye mọ: “Tue aḍighi ọnyo ạmatuan ạmhi.” Kụ oye phọ ạḅem mọ: “Uwo Ẹmhoogh, meera mị ụpur ụki uḍi ọde ạmhi.” 60 Kụ ọdi ạḅenhi oye phọ mọ: “Bịlhe bụphe momhuughu bọ oḍiighi iḍim ạbidi, kụolo kịa agbeelhom Ọmhar phọ Ẹnhaan alheenye elheeny.” 61 Kụ ọnhon oye ạḅilhe ạḅem mọ: “Mị kạdaph ni nyịnha Uwo Ẹmhoogh, kụolo meera mị ụpur ụki ụḅenhi bụo olhoghi otu ạmhi mọ ọmhaar ọrol.” 62 Kụ a Jizọs ạḅenhi nyọdi mọ: “Oye lọ ạpham ịyaar rabulhom de kụ ạḅilhe rapogh ghan rạraar dị edi ọmhan ọ́kpeanhaan oḍigh Ọmhar phọ Ẹnhaan.”