Enhaạn Kụ Alhẹm Kẹ Phọ r’Ade Phọ

AJehova Enhaạn phọ kụ alhẹm oomo araraạr. Odị kụ alhẹm raraạr phọ ipẹ yira romiịn bọ r’idị yira ko/tue omiịn. AJehova aphụr alhẹm ruukpaạny aseere epẹ k’akẹ phọ kụ agbi bọ olhẹm atorobọ iyaạr dị yira romiịn. Abuọ anhiạn kụ aruukpaạny phọ? Aruukpaạny phọ oḍighi rebenhẹ aJehova dị yira ko/tue omiịn, idiphọ yira ko/tue bọ omiịn aJehova. Oḅẹl ookpaạny phọ aJehova alhẹm bọ alhoghonhaạn ni aJehova ḍighaạgh mem mọ ralẹm bọ raraạr. Esi omaạm, ookpaạny phọ opọ phọ alhoghonhaạn ni ḍighaạgh aJehova mem mọ ralẹm bọ raanhaạn phọ, rughede, r’inhọn araraạr. Ade phọ eḍighi aani ni ḍiniin ughede kuolọ ade phọ kụ edị aJehova alhẹm eten dị awe kotọl.

AJehova aselhemhi ni de phọ pidị awe r’inhạm otue otọl. Odị aḍighi idị erumuḍio phọ kemụ siẹn ade phọ. Kụ alhẹm raaḅarạph, riphiịny ḅilhẹ r’abazị phọ.

AJehova aḅilhẹ alhẹm eeghe? AJehova aḅẹm mọ onọ kaḅilhẹ alẹm ‘odọ kirokirọ arooghọ, iizuphạ r’ireeny dị kemuum ghan iimhumha.’ Esi iduọn phọ, aJehova aḍighi ni idị asirooghọ r’iikiriphạ r’asifalhawạy emhiigh osi. AJehova aḅilhẹ kẹn ni alhẹm odọ kirokirọ ina, r’inhụn, r’inhạm. Iniin inhạm mọ iphẹn phọ retelhe ghan, kụ inhọn rekuura ghan. Iniin ekom kụ inhọn ebụgh. Esi omaạm, aḍiwo ekom kụ oomạ abụgh. Eghẹn enhạm kụ ikạr eḅeraạn nyinhạ?

AJehova r’olhẹm raraạr phọ iphẹn phọ, kụ aḅenhị oḅẹl ookpaạny phọ mọ: “Olhẹm oye.” Kuolọ awe phọ kogbatanhaạn ni r’inhạm. Oye katue ni aatughiạn iyaạr alẹm, akaạph iyaạr, amilhọgh reẹr aḅilhẹ aaḅereghị. Bidị kẹn kụ kopogh de phọ r’inhạm mọ. Nạ alegheri ni ḍien oḅẹl oye phọ aJehova alhẹm bọ? Oghị omhiịn.