Aḍita Awe Ẹgham Mọ A Jehova

Uwo ẹmha phọ a Siria, Bẹn-hedạd, ạwa ghan reten ozuom awe phọ Izrẹl ẹgham. Kụolo tọrobo amem dị ọdi ạnya rạki, oyil phọ Ẹlạịsạ ạḅenhi ghan ni uwo ẹmha phọ Izrẹl ịlo oḍighi pịdi ọdi akpetenhaan. Esi ịduon phọ, a Bẹn-hedạd ạwa ghan reten osiph Ẹlạịsạ. Mem dị a Bẹn-hedạd ạnhaghan mọ Ẹlạịsạ odi ẹmha dị oghol mọ Dotạn, ọdi arom ni we ẹgham mọ ọdi ọghi osiph Ẹlạịsạ.

Awe ẹgham mọ a Siria usi ni Dotạn ḍughul kụ ooghironhom ẹmha phọ. Mem dị ạḍiroor ẹḅaal kụ otelhedom Ẹlạịsạ amite erugh kụ ạmhiin we phọ, ọdi ạmhoogh ni oghiilaan kụ ạlo mọ: ‘Yira koḍighi bọ ika ịduon phọ?’ Ẹlạịsạ ạḅenhi nyọdi mọ: ‘Ạbudi odi r’ayira kụ upu bụdi odi r’ạbidi.’ Mem mem mọ bịn a Jehova aḍighi ịdi otelhedom mọ Ẹlạịsạ ạmhiin rụsu r’arughuugh ẹgham dị reemor nịan dị edi ẹpe ạraaḅaraph phọ ekitonhom bọ ẹmha phọ.

Mem dị awe ẹgham mọ a Siria ọwa osiph Ẹlạịsạ, Ẹlạịsạ ạaḅereghi ạḅenhi a Jehova mọ ạlhoghonhaan nyọdi ḍịghaagh. Esi ịduon phọ, a Jehova ạgbaragbaramhi ni ịitughian awe ẹgham mọ bịn bịdi úlegheri mụn esi phọ bịdi odi bọ. Kụ Ẹlạịsạ ạḅenhi we ẹgham mọ a Siria, mọ: ‘Oye phọ nyinha rẹwa bọ ólho sịen ẹmha phọ ẹphen phọ. Ịdaph ịmhi mị kịsighe inyinha ạki esi phọ ọdi odi bọ.’ Kụ bịdi ọdaph Ẹlạịsạ tụtu osi Sạmeria, ẹpe uwo ẹmha phọ Izrẹl odi bọ.

Bịdi rosi Sạmeria bịn ịitughian phọ ạbidi eḅula, kụ bịdi olhegheri esi phọ bịdi odi bọ. Uwo ẹmha phọ Izrẹl apuru Ẹlạịsạ mọ: ‘Mị ụze bịdi ḍụghum?’ Ẹlạịsạ ạphagharanhaan mọ: ‘Eeye, kạ́ze bịdi. Ngọ bịdi ịyaar olhe kụ ạḅenhi mọ bịdi ogheel.’ Esi ịduon phọ, uwo ẹmha phọ Izrẹl ạsa ni riiḍien amuzeḍi, kụ bịdi rolhe kụ ạḅenhi bịdi mọ ogheel. Ẹlạịsạ ómheera mọ oḍighi we phọ ạbuen phọ ịpe bịdi ọwa bọ oḍighi ọdi.