“Ọmhar Phọ Ạna Aru Ni”

A Jehova aguanhaan ni ọmhar awe mọ: ‘Amem retu ni dị emoghi, eephinha r’aḍuugh kẹ́tol mụn. Ḅịlhe mọ ọdi kagbuurogh ni izin ạsighe riḍien awe. Kụ awe kọ́otughian ghan mụn ịkaraph ạraraar dị emite.’

A Jehova aseere Ạdạm ra Iv ịma oghoony phọ Iden dị bịdi kọtol r’ẹepho r’ọḅaal olhoghi. Ọdi ạwa dị bịdi kọoḅereghi oginha ọdi bịn kụ ọḅilhe ọmar omuzeḍi de phọ. Kụolo Ạdạm ra Iv ụ́naghanhan a Jehova. Ghạlhamo r’ịduon phọ, ịpe a Jehova ạwa bọ dị ọmhar awe kọtol kénmia. Ạḍinya phọ ạḍien phọ mịlhoghonhaan iyira ḍịghaagh ọmhiin mọ Ẹnhaan raḍighi ghan ni tọrobo ịyaar dị ọdi aguan. Esi ịduon phọ, dị eego esi Ọmhar phọ ọdi, ọdi kạseph ni oomo awe dị kọtol de phọ, ịdipho ọdi aguanhaan bọ Ebrạhạm.

Mọony amem a Setạn, r’ịkaraph aruwaloor phọ ọdi, r’ạbukaraph awe kọ́tol mụn. Tọrobo oye dị kạtol sịen ade phọ kạaḅereghi ghan oginha a Jehova. Kụ émoon r’aḍuugh kẹ́tol mụn, kụ tọrobo aḍio lọ yira oḅetenhu, yira kọmoogh ghan ịnyaam r’ọḅaal olhoghi ọrolhom. Oomo ade phọ keḍighi pạrạdạịs. Igey ariiḍien r’ịma aruutu kụ kẹtol. Kụ oginha awe dị ọmhoogh ẹphomhoghian kụ kọtol. Ilhom ịnham kékiilhaan mụn we, kụ awe kẹn kókiilhaan mụn ilhom ịnham.

P’eeghe ịdi olhoghi ayira kạḅaal mem dị a Jehova kamiigh bọ oḅerion awe dị omhuughu. Yira kọmiin ni we dị moḅerion ịdipho Ebẹl, Noa, Ebrạhạm, Serạ, Mozis, Rut, Ẹstạ, ra Devid. Bịdi r’ayira kụ kọḅophoghan oḍighi de phọ pạrạdạịs. Ịbadi iiḍighi dị yira kọkelhom kẹtol kẹn ni.

A Jehova ạkar kụ rạwa dị nạ kạtol aani sịphe phọ. Loor esi dị nạ kạḅilhe ni alegheri nyọdi reten dị nạ kőlhegheri ghan. Esi ịduon phọ, ọghiom ni ghisigh ọkparamhi ghan rịghiri phọ ayira ra Jehova tọrobo aḍio, tụtu k’ẹpe omhoom aḅirinhi phọ!