N’alegheri Ni?

Iḍiodi phọ, oye dị k’aḍigh oghuugh umuụm akị erelhe, aakolobian ghan ika?

MEM mọ aPọl, arughuugh umuụm dị esaạny ghan we bịn i/tọl ghan. Kụ iḍighi kụ oghị erelhe, pọ iwạ ghan mọ oye phọ aapuruan alegheri mughumọ oghuugh omuul ḍighi (oghuugh adool) odi ni dị rakị ekpisi phọ dị rawạ bọ oghị phọ, ḅilhẹ mọ kameera ni asaạny aani oye. (Iiḍighi 21:2, 3) Ghalamọ oghuugh phọ ra/kị ekạr ekpisi phọ oye phọ rakị bọ, odị kaḍigh ni asi ogboku eten, kụ aḍigh onhọn dị kasiemi nyodị ekpisi phọ dị rakị bọ.—Iiḍighi 27:1-6.

Imoọgh ghan ni mem siphẹ alhạ phọ dị oghuugh phọ aḅetenu ghan bọ, kuolọ i/kạr ghan idaphạn kaị mem mọ. Etigheri oḅẹm mọ okuaḍio kụ edị u/nighẹ, abukiilom dị omoọgh ighiil odọ aremeeraam uubinyemiom ghan ni erelhe phọ loor esi amạgh, idiphọ amem dị eekiọgh elẹl siphẹ oḍigh oghuugh phọ kụ elọ, obobọ mem dị bidị omhiịn oghuugh dị aḅi siphẹ ogbạl ophiịny phọ. Abukiilom arughuugh udạph ghan ookuugh phọ, kụ iḍighi kụ, mem dị ookuugh phọ rakugh bịn bidị moḅetenu. Oye phọ romiịn oghuugh oḍigh, kụ akị epẹ rosule ghan bọ oghuuph phọ r’asidool odị kụ atọl akoriom mem dị kogbeelom mọ oghuugh phọ rawạ oḅetenu.

Oniin ogbaạm iphirigba dị oghol mọ Lionel Kasịn aḅẹm mọ, “aRom kụ umhoọgh ghan imạ iikolobian osaanyọgh awe, dị i/wạ ghan dị awe koteleyogh iboom owạ oghuugh oḍigh. Arughuugh phọ isul ghan siphẹ esiḍia phọ aTiber. Ebạm emhạ phọ Ostia erọl ghan bọ etuman esiḍia phọ, imoọgh ghan ni rifịs siphẹ egbogh erugh phọ. Ibadị arifịs phọ iphẹn phọ iḍighi ghan ilọ abuphẹ osaanyọgh ghan bọ sidool siphẹ esiḍia phọ: abudị osaạny ghan sidool aNaboni [Frạns] umhoọgh nyoniin, abudị osaạny ghan sidool aKatez [Tunisia] omhoọgh nyoniin, . . . Ḅilhẹ r’abunhọn. Kụ iḍighi kụ torobọ oye dị rawạ oghị erelhe, aghị ghan bịn ateẹny ofịs ekpisi phọ odị rakị bọ.”

Erelhe dị oye phọ aḍigh oghuugh umuụm iigborion ghan agey, kuolọ iḅarạm aani ghan ni ootor’osooromineen. Ibadị amem, oghuugh abuọ aPọl aḅi ghan ni eten.—2 Kọr. 11:25.