ORỌL GHAN ADỌL ONYỌ AKRISTẸN
Ipẹ Nạ Kasilor Bọ Siphẹ Ituughạ ABaibul Phọ Anạ
K’eḅeeraạn ni nyinhạ omoọgh aani omeeraam idiphọ aDaniẹl ḍughụm? ADaniẹl agbor ghan atuughạ Ekpo-onhụ phọ Enaạn, ghalamọ r’imiịn dị ekpạr ri iboom onaghanhạn. (Da 9:2) Ogbor ghan otuughạ aBaibul phọ kalhoghonhaạn nyinhạ ḍighaạgh okparamị omeeraam mọ anạ. Ika? Keḍighi iyaạr dị nạ k’ameeraam mọ aruguanaan phọ Enaạn k’ekạr ri emunughan. (Jos 23:14) Keḅilhẹ kẹn ebughẹ ephomoghiạn phọ nạ amhoọgh bọ esi Enaạn, kụ enyu nyinạ oḍighi ipẹ enighẹ bọ. (Ps 97:10) Kuolọ nạ kamiighom ika? Ooḅeghiọn omhiịn iraạr areten.
Mị Katuughạ Eeghe? Egey edeọm ituughạ aBaibul eḅarạm ookolobian ghan kụ ogbi oghị ituughạ. Mem dị nạ awaaghị aphogh riisi ibạl aBaibul awiki phọ dị nạ u/kạr unaghanhạn, kụ edị nạ kakạr akelhọm ituughạ phọ. Oḅarạm isiẹn phọ, abunhiin awe osaḅạr otuughạ ariisi aBaibul dị eghaạph ilọ imiịn, ilọ iimuma uwaloor iigbia phọ, ilọ arikpisi kirokirọ phọ otelhedom mọ aPọl aghiighị bọ ogbeelhom iiḅi iinaghạn phọ, obobọ ilọ olhẹm mọ aJihova. Eḍighi maạr dị nạ amiịn esi aBaibul dị nạ u/kạr unaghanhạn, pọ miịn ni mọ nạ agẹ ni alọgh esi, obọ nạ akori aphogh enhọn amem lọ nạ aphạm ituughạ aBaibul ogina anạ.
Mị kakị ḍighen kụ amiịn ophanyanhaạn asipuru phọ? Pogh vidio phọ oghol bọ mọ: Research Tools for Discovering Spiritual Treasures, omhiịn araraạr dị keloghonhaạn nyinhạ ḍighaạgh. Ophogh mọ nạ katue ni aḍighi aani, pọ wạ alhegheri iikpọ itooghị kirokirọ phọ ilhom inhạm mọ omhiịn bọ siphẹ Daniel emhụ phọ 7 remạ ghan bọ.
Amem mọ mị kasighẹ ghan bọ atuughaạm Baibul phọ kedoọny ghan eleeny ika? Ogbor ghan otuughạ aBaibul phọ rekparamị ghan siya oye phọ r’aJihova. Nạ katue ni amiighom iyạl ikpo ikalhạ bịn, esighẹ rekị, kụ amhiigh obughẹ amem mọ enụm enụm. Ituughạ aBaibul phọ ekịgh idiphọ oye dị raguphogh ghan ude, omhiịn aruphua dị aaghiạn; oye phọ ramiịn ruphua phọ, bịn inyaạm mọ rebụgh oghiọm aghisigh aguphogh! (Pr 2:3-6) Kụ aḍiḅeeraạn phọ anạ ilọ Ekpo-onhụ phọ Enaạn ebụgh, bịn nạ kaa/sophion ghan ituughạ aBaibul phọ anạ.—1Pit 2:2.
ILHOM INHẠM MỌ OMHIỊN BỌ SIPHẸ DANIEL 7, REMẠ GHAN EEGHE?
Da 7:4
Da 7:5
Da 7:6
Da 7:7
AḌIPURU DỊ OPUMHOM:
Ipẹ ogẹ bọ siphẹ Daniel 7:8, 24 imunhughan ika?
ENHỌN EMHUOGHAẠPH OTUUGHẠ:
Ilhom inhạm mọ omhiịn bọ siphẹ Ogananami 13 remạ ghan eeghe?