ORỌL GHAN ADỌL ONYỌ AKRISTẸN

Emhoom Iyaạr Dị M’oḅarạm Siphẹ Ituughạ Ogboku Awiki Phọ

Emhiigh January 2018, ituughạ ogboku awiki phọ keḅarạm raraạr ituughạ, r’asividio siphẹ agạ phọ oghol bọ mọ study edition of the New World Translation of the Holy Scriptures (nwtsty) siphẹ olhoghi intanẹt phọ, ghalamọ r’iduọn eeni ạ study edition onhụ phọ opọ anạ ko/mite bọ. Iikia i/lo, iphẹn phọ kekạr kụ ekuamhị eten phọ epẹ nạ raakolhobian ghan bọ kụ agbi oru ituughạ. Dị ekạr emhạn maạr iboom pọ, rowạ mọ eḍur nyinhạ egbiemhị Enaạn ph’ayira amhoọgh bọ ephomhoghiạn phọ, Jihova!

ARARAẠR ITUUGHẠ

Araraạr ituughạ phọ kingọ iyira orọph omhiịn ilọ iḍighinhom araraạr awe, aramhạ, ḅilhẹ r’arunhụ aḍiaḅạ dị edi ibadị ariisi aBaibul.

Matiu 12:20

Oḍigh otozị dị raḍim: Otozị dị aatura ghan mem mọ amuphẹ phọ pọ obạm otozị dị oḍighinhom onyokị, amuụm otozị dị olhọgh ghan p’olive oil. Oḍigh phọ kụ kamoọph muụm otozị phọ kụ agbi oomor. Ekpo-onhụ aGrik phọ ogbạ bọ mọ ‘oḍigh otozị dị raḍim’ mọ, remạ ghan oḍigh dị ramiteom mughị, loor esi ebile phọ retọl ghan bọ mem dị moḍimhe obobọ mem dị anem aniạn otozị phọ reḍim. Imiịn phọ Isaiah 42:3 ighaạph ilọ aghusạn phọ aJizọs mọ; odị ka/ḍime oọny oḍuomolhoghi abuphẹ osooromhi bọ loor ḅilhẹ romiinhẹ bọ.

Matiu 26:13

Okạr agey: Ekpo-onhụ aGrik phọ A menʹ, odaphạn ipẹ aHibru rokol ghan bọ ʼa·menʹ, remạ ghan mọ “erọl li idiphọ,” obobọ ‘agey phọ ni.’ AJizọs agbor ghan aḅạ ekpo-onhụ phọ ephẹn phọ omhiighom oghaạph, oḍeenhaan oguanhaan, obobọ imiịn, oḍeenhaan mọ iyaạr phọ emạn ni maạr, ḅilhẹ ekpẹ ni oḍuomolhoghi. Eten phọ aJizọs aḅaạm ghan bọ ekpo-onhụ phọ ephẹn mọ ‘okạr agey’, obobọ erọl li idiphọ phọ, edi rinyạ phọ eghaạph bọ ebughẹ ilọ aJizọs bịn. Odị aḅạ iyạl amem (a·menʹ a·menʹ), idiphọ omiịn bọ siphẹ aḍinyạ phọ aJọn, pọ kogbạ mọ ‘okạr agey.’—Jọn 1:51.

IDỊ KOMIỊN R’ILỌ ONHAGHANHẠM ARURỤ

Asifoto, idoronheẹn, asividio dị eḍọgh i/lo ḅilhẹ r’asikatun dị kegbạ ghan raraạr dị emiteghu dị ogẹ siphẹ aBaibul phọ.

Betfage, Eeḅarạph phọ Olivs, ḅilhẹ r’aJeruselem

Ookpera avidio phọ ophọn aḍeenhaan eten dị eḍuạ epẹ erumhuḍio phọ remite ghan bọ kụ rekị Jeruselem, emhạ phọ epẹ oghol bọ rodon mọ et-Tur—uḅẹm mọ eniin phọ esi phọ kụ edị aBetfage oghaạph bọ oghol siphẹ aBaibul phọ arọl ghan—etuman bọ Eeḅarạph phọ Olivs. ABetani arọl ghan epẹ erumhuḍio phọ remite ghan bọ, dị oḍuạ Betfage kụ rokị epẹ esoorom Eeḅarạph phọ Olivs. AJizọs r’abumatuạn phọ odị ugbor ghan omhinhạ Betani, torobọ amem dị bidị oghị Jeruselem. Rodon emhạ dị edi siphẹ phọ ughol mọ el-ʽAzariyeh (El ʽEizariya), kụ aḍien phọ aḍiẹn phọ onhụ Arab, dị remạ ghan mọ “Emhạ ALazarọs.” Dị iikia i/lo aJizọs arọl ghan ni k’abuọ, aLazarọs. (Mat 21:17; Mạk 11:11; Luk 21:37; Jọn 11:1) AJizọs aḍuạ k’abuọ aLazarọs kụ rakị Jeruselem, aago ghan eten dị eghịgh nyeẹn oḍeenhaan bọ siẹn avidio phọ. Unwanyụ aNisan 9, 33 C.E., mem mọ aJizọs aḍigh bọ oọny enhạm adool phọ oye ko/ḍigh ghan bọ aḅeẹny eeḅarạph phọ Olivs oghị aJeruselem, odị aago Betfage.

Eten dị eḍuạ Betani rekị Betfage
Betfage
Eeḅarạph Olivs
Eḍiiny aKidrọn
Esi Phọ Otu Iiḅereghị Ph’arọl Ghan Bọ

Oḍugh Dị Okạn Oḅararạ Eeghim

Afoto dị aḍeenhaan oḅararạ eeghim oye dị okạn oḍugh dị apel li ḍidoọny aḍunhụgh aḍighaạgh oye (4.5 in.). Oḍugh phọ odi bọ oḅararạ eeghim oye phọ umhiịn lhạ phọ 1968, mem dị roguphogh raraạr epẹ esiinyọm aJeruselem, kụ eḍeenhaan mọ oye phọ amhugh k’amem itooghị awe aRom. Iphẹn abuẹn rowaaghị ghan bọ raraạr phọ omhiịn bọ eḍeenhaan mọ ibadị amem usighẹ ghan ni oḍugh kụ okanhạm ruwol r’araghaạgh oye lọ rowạ oghiigh loor oreeny. Oḍugh phọ ophọn phọ akịgh nyophọ awe eghạm mọ aRom osighẹ bọ okanhạm Jizọs. Eeghim mọ ephẹn phọ umhiịn olhoghi igbe dị oḍighinhom ḍighiigh, esi dị oroḅolhoghi ghan iḅararạ awe dị momhuughu, siphẹ phọ kụ edị omhiịn ghan igharaghạr iḅararạ awe dị moḅoroghụ. Iphẹn phọ emạ emiteom mọ oye lọ okạn loor oreeny kụ oghiigh kotue ni osighẹ okị oḍi.—Mat 27:35.