Nạ Alegheri Ni?

Uḍighi ika kụ osighẹ aruukumude r’igaamị arukurugh-ozọ ophighironhọm ekiạ eḍighi bọ imạ iikolhobian?

EEḌIẠN Olhogh phọ, aZihova asighẹ ghan ni rikiạ dị ophinyonhọm ruukumude r’igaamị arukurugh-ozọ. Siphẹ olhogh phọ u/kol ghan oniin dị u/kolhom nyoorị phọ, kụ uḍighinhom ghan ni torobọ olọ omhiịn. (Lev. 1:14; 12:8; 14:30) Uḍighi ika kụ iphẹn phọ eḍighi bọ imạ iikolhobian? Eniin ephigh phọ pọ, u/gbor ghan umiịn ruukumude phọ. Eeghe kụ iḍighi?

Aruukumude phọ retọl ghan ni oomo Izrạl runwanyụ egholhoghọl. Torobọ unwanyụ October, bidị repeẹph ghan keghị reelhe dị eghologhọl edi gạ esoorom ade phọ, kụ eḅulha Izrạl mem dị osoor ramiigh. (Song of Sol. 2:11, 12; Jer. 8:7) Iphẹn phọ remạ ghan mọ ikparanhaạn ghan ni we phọ Izrạl omhiịn aruukumude ophighironhọm ekiạ mem eephoọm.

Kuolọ igaamị arukurugh-ozọ phọ, re/kạr ghan keghiighị inhọn arikpisi, esi iduọn phọ awe phọ Izrạl umhiịn ghan ni torobọ amem siphẹ alhạ phọ. Igaamị arukurugh-ozọ phọ inhụn orughom otu. (Poghom Jọn 2:14, 16.) Odaphạn ḍinyạ phọ Bible Plants and Animals, “torobọ emhạ r’arokool aPalestine umhoọgh ghan ni igaamị arukurugh-ozọ ilhoghi arutu. Torobọ otu amhoọgh ghan ni okporoma igaamị arukurugh-ozọ, obobọ epogh siphẹ iikpe phọ dị inhụn phọ ketọl.”—Poghom Isaiah 60:8.

AZihova aḍeenhaan mọ onọ amoọgh ephomhoghiạn ḅilhẹ ra/puru ghan idị epel we loor, esi osighẹ ghan arikiạ dị ophinyonhọm inhụn dị abuọ Izrạl phọ komiịn torobọ amem.