Bidị Ukạr Kụ Omhiịn Ephomhoghiạn Dị Oḍeenhaan Bidị

YOMARA r’abumor odị—Marcelo r’aHiver—odi ghan ebạm emhạ epẹ Guatemala. AYomara amhiigh ni otuughạ aBaibul phọ r’Abugbaanhaạn phọ, esighẹ rekị bịn abumor odị omhiigh otuughạ aani. Kuolọ iiḅaghamhị irọl li. Umaranhi phọ ophọn phọ r’iyạl abumor phọ odị eten ro/miịn ghan, kụ kẹn ko/tue obạl ḍinyạ abraille. Esi iduọn phọ, opọ ratughemhị bọ bidị kụ rabạl ghan ḍinyạ phọ r’ariisi aBaibul phọ kaḅenhị bidị.

Ikparanhaạn ghan kẹn ni bidị oghị ghan ituughạ. Bidị bịn u/tue ghan utelhe erelhe 40-ikalhạ usi Kindọm Họl phọ atuman bọ bidị. Kuolọ abumor phọ siphẹ ookpomhoghan phọ abidị ulhoghonhaạn ghan ni ḍighaạgh dị bidị kokị ghan oomo ituughạ phọ. Mem mọ bidị omhiigh bọ oḍighi asaimẹnt siphẹ ituughạ ogbo awiki phọ, abumor phọ ulhoghonhaạn ni bidị ḍighaạgh otuughạ idị koḅẹm ghan dị esi u/pogh.

Unwanyụ aMay 2019, umhiigh ni ophạm ituughạ siphẹ emhạ phọ abidị. Mem mọ amuphẹ phọ olom r’anhịr dị oḍighi bukọy eten oomo amem moghị siphẹ emhạ phọ abidị. Kụ bidị onyaaghiạn otughemhị iraạr phọ abidị ilọ aạl ḅilhẹ r’ogẹ onhụ abraille, ghalhamọ r’iduọn bidị u/legheri bọ ni ilọ aạl ḅilhẹ r’ogẹ abraille. Kụ bidị oghị laibrị otuughạ ilọ aạl r’otughemhị abraille.

Iyạl ikpo aruwnanyụ reten, bịn iraạr phọ abidị omhaạr aạl abraille, bịn edughanhaan bidị oghị aghisigh eten aruwaloor.a Nyiidiphọ aYomara, Marcelo, r’aHiver moḍighi bukọy eten oomo amem. AMarcelo maḍighi odị raloghonhaạn ḍighaạgh ikumor awe. Torobọ awiki bidị rolọgh ghan ni muboom amem okumu aZihova. Oophugh phọ bidị oḍeenhaan bọ meḍighi idị abunhọn moḍeenhaan aani oophugh.

Iraạr phọ abumor phọ okạr kụ rosereghiạn ephomhoghiạn phọ ookpomhoghan phọ oḍeenhaan bọ. AYomara aghaạph mọ: “K’eḅẹl amem mọ yoor oozuanhaan bọ Bugbaanhaạn phọ, bidị muḍeenhaan ni iyoor egey ephomhoghiạn aKristẹn.” AMarcelo aḅarạm mọ: “Yoor omoọgh ni imạ arighirị ephẹn ookpomhoghan phọ ayoor, kụ yoor oḍighi aani pakirị abumor oomo isiẹn aḅirinhi phọ ephomhoghiạn kụ eḅophoghị bọ.” Yomara r’abumor phọ odị rokori ni omhiịn amem dị ade phọ meḍighi paradaịs.—Ps. 37:10, 11; Isa. 35:5.