Ḍighinhom Atamaḍiki Phọ Agey

Onyọ amatuạn phọ Jems atomaạm Baibul phọ atamaḍiki dị rulhoghonhaạn ghan iyira ḍighaạgh omhiịn oye olhoghi phọ. (Jems 1:​22-25) Ika kụ idị yira kotue oḍighinhom Baibul phọ agey idiphọ atamaḍiki?

Miigha loor kụ aạl. Eḍighi maạr dị yira ophogha atamaḍiki bịn oogborion osighẹ riḍien ayira pa atamaḍiki phọ, eeni yira ko/miịn iyaạr dị ekpẹ oolemhi siphẹ aloor phọ ayira. Eniin phọ eten phọ kẹn, yira oogborion bịn aạl Baibul phọ, eeni yira ko/miịn riisi dị ewạ oolemhi siẹn aghuḍum mọ ayira. Esi iduọn phọ, miigha loor kụ aạl ghan Baibul phọ.

Pogh riisi oolemhi aloor anạ, k/ilọ abunhọn. Eeni amem, yira ophogha atamaḍiki yira otue ni omiịn loor onhọn oye dị amite aani siphẹ atamaḍiki phọ, bịn eeni yira ogbon oye phọ. Iphẹn phọ etue eḍighi idị yira kopogh ghan riisi dị ewạ mọ ophoriphọ oye phọ aalemhi bịn yira obilhẹ iphẹn ayira. Iniin phọ kẹn ni, yira kotue ni obạl Baibul phọ omiịn sipiomạn abunhọn awe bịn. Kuolọ ipẹ phọ iyira ki/lhoghonhaạn ḍighaạgh oolemhi ariisi lọ yira osughanham.

Moọgh ephoghom dị eeleeny. Mem dị yira ophogha atamaḍiki kụ omhiịn ogina ariisi aloor dị i/nighẹ, yira otue ni oḅonyonhu ozuan. Esi iduọn phọ, mem dị yira robạl Baibul phọ omhoọgh ghan ephoghom dị eeleeny, kuu/tughiạn mọ yira ko/miịn riisi dị yira osughanham, ḅilhẹ kẹn ku/ḅonyonhu uzuan mem lọ yira omhiịn.—Jems 3:17.