Asipuru Dị Ạbuen Rọbal Ghan Bọ Rịnya Phọ Ayira Opuru

Oḍighi iphelhegbeel phọ kasi eekunha pụr amem?

A Jizọs ạḅem mọ: “Kogbeelhom ni iiḅi ịinhaghan phọ ịlo Ọmhar phọ oomo ịsien aḅirinhi phọ, ọgba oleenye oomo areelhe phọ kụ eekunha phọ egbi oru.” (Mạt. 24:14) Ekpo ọnhu a Grik phọ ọgba bọ mọ “eekunha” sịen ẹkpigh phọ ẹphen phọ ḅịlhe r’ạsiikpigh phọ 6 ra 13, okol mọ teʹlos. Kụ rẹma ghan mem mọ aḅirinhi phọ a Setạn kasi bọ eekunha sịphe ẹgham mọ Ạmạgẹdọn. (Ogan. 16:14, 16) Ịduon phọ pọ, yira kọkiom ni ghisigh ọkaaph iiḅi ịinhaghan phọ tụtu ẹteeny mem dị ẹgham Ạmạgẹdọn kemiigh. Ịphen phọ meeḅenhion ịpe yira ọnhaghanhan ghan bọ esi ạ Bạịbul phọ ẹphen phọ ẹpe ọmhan.

Mem dị eten, yira ụnhaghanhan mọ oḍighi iphelhegbeel phọ kasi eekunha mem dị igbogh ịiḅaghamhi phọ kemiigh bọ r’amuphe Ạ Bạbịlọn Ogbogh phọ. (Ogan. 17:3, 5, 15, 16) Yira ụutughian ghan mọ mem dị igbogh ịiḅaghamhi phọ emhiigh, a Jehova kạ́ngo mụn we eepoogh ọnhaghan adom iiḅi ịinhaghan phọ ọbo oru okumu nyọdi. (Isa. 61:2) Yira ụutughian ghan kẹn mọ awe phọ ạbuphe kọḅeeny bọ igbogh ịiḅaghamhi phọ pọ awe dị momhiigh ni okumu a Jehova kụ igbogh ịiḅaghamhi phọ egbi ẹteeny. Yira ụsighe bịdi ọtomaam we a Ju phọ ạbuphe okpetenhaan bọ muphe phọ a Jeruselem lhạ phọ 607 B.C.E. Awe a Ju phọ phọ ụmhoogh elhegh ạpelieeny loor esi dị bịdi momhiigh ni ọoḅereghi a Jehova ọḅilhe ọlogh ḍien ẹkaraph eḍighinhom ịyaar. (Ezek. 5:11; 9:4) Tọrobo ịpe ẹrol bọ, ọtomaam mọ ọphon phọ ọ́ḅophan r’ikpo ọnhu phọ a Jizọs edi bọ sịphe Mạtiu 24:14, eḍeenhaan bọ mọ awe kọmoogh ni eepoogh ọnhaghan iiḅi ịinhaghan phọ, okiton okumu a Jehova kụ ẹgham Ạmạgẹdọn egbi omhiigh.

Ịphen yira mọnhaghanhan bọ Mạtiu 24:14 nyịidipho meeḅenhion kẹn ịpe yira ọnhaghanhan bọ Ogananami 16:21, ẹghaaph bọ ịlo adom mọ ẹghigh bọ iboom iiḅoghoḍi ibikpo dị ẹemorogh. Mọoḅeghion kẹn ọmiin mọ ịyal phọ ariisi ạ Bạịbul phọ ịphen phọ rẹkaaph ghan eniin phọ ịyaar phọ. Uḍighi ika kụ yira ọḅem bọ ịduon phọ?. Ọphagharanhaan phọ odi esi ịpe awe omhegheron bọ ọghi esi adom mọ mem mọ bịdi ọnhaghan bọ. Ạ Pọl ạge mọ adom iiḅi ịinhaghan phọ eḍighi eeḅi eḍu aghudum kụ ẹngo bụphe kopẹl bọ. Kụolo bụen oḍighi bọ ẹ́pomoghian Ẹnhaan, eḍighi ịkaraph ịinhaghan ẹḅilhe eḍighi eḍu ẹlo aḍuugh aḍuugh. (2 Kọr. 2:15, 16) Bịdi okel dom Ọmhar phọ ịdi eḍighi bọ mẹyegheron ịpe aḅirinhi phọ ạbidi odi bọ, mọ ọkaraph aḅirinhi dị a Setạn kụ rạtooghi dị mọony amem kopiemhi ni.—Jọn 7:7; 1 Jọn 2:17; 5:19.

Lọgh elhegh kẹn mọ ạ Bạịbul phọ ạkaaph ni mọ iboom iiḅoghoḍi ibikpo phọ keḍighi ịyaar dị “k’ekula” kẹ́ghar ghan. Eeni ịphen phọ rẹma ghan mọ mem igbogh ịiḅaghamhi phọ, kọkar kụ ọkpoonhi ọghaaph iiḅi ịinhaghan phọ, ịduon phọ pọ kogbeelhom ḍien phọ a Jehova eten dị kẹ́rol ghan. (Ezek. 39:7) Rophiemhi Bạbịlọn Ogbogh phọ, awe kọtol li dị komegheron agey otu esi adom iịbi ịinhaghan phọ ḍụghum? Etue ni eḍighi ịduon phọ. Bịdi otue ni ọotughian ọbobo ọtuugha olegheri mọ Ạbugbaanhaan a Jehova mọghaaph ghan ni mọ kopiemhi ni rụuku ịiḅereghi ọkpe.

Ịphen phọ ẹkigh ịpe emite bọ ẹpe Ijipt mem mọ a Jehova ạsighe bọ Ḍioph Ịmhinhimhiin phọ ạlhiom we phọ Ijipt. A Jehova “[rosophonhaan] oomo ạrumugh phọ Ijipt ọoruen,” “aḍita ạbunon awe” dị úḍighi aani bụo Izrẹl phọ ụdaph aani ni bịdi ọḍua. (Ex. 12:12, 37, 38) Eeni aruuruen phọ ạbuen phọ usopha ọdaph awe phọ Izrẹl loor esi dị bịdi ụmhiin mọ oomo ịpe a Mozis ạghaaph bọ ịlo Aḍioph Ịmhinhimhiin phọ ịtuugh ni bịn emite.

Tọrobo oye dị asopha okumu a Jehova mem dị mophiemhi Bạbịlọn Ogbogh phọ kạmoogh ni eepoogh ọbaki aani abumor phọ ạ Krạịst kosugha bọ sịen ade phọ. (Mạt. 25:34-36, 40) Ii eepoogh osoph ọoruen ịlo ạbuphe koḍighi bọ iyool ịga phọ kesi ni eekunha kụ Ạmạgẹdọn agbi omhiigh, mem dị ạbuphe ọsagharan bọ uwaloor phọ osugha bọ sịen ade phọ mogheel k’ạke.

Ọnhaghanhan ạḍughum mọ ọphon phọ mooḅenhion bọ eḍeenhaan eboom ẹphomhoghian r’ọnma ighirigiir phọ a Jehova. Ii, ọdi “ọ́wa ophiemi r’oniin oye, ọdi rạwa ghan ghụn mọ oomo phọ awe phọ okiton esi ịkaraph phọ ạbidi.”—2 Pit. 3:9.