ESI ITUUGHẠ PHỌ 8
Ebraham R’aSera Unhaghanhạn Ni Enhaạn
Emhạ irọl li dị etumhan Babẹl dị oghol mọ Ur. Awe emhạ phọ uu/ḅereghị ghan oginha aJehova. Kuolọ oniin oye arọl li siphẹ emhạ phọ dị aaḅereghị ghan oginha aJehova. Ḍien odị ughol mọ Ebraham.
Ḍiniin aḍio aJehova aḅenhị ni Ebraham mọ: ‘Bilhẹ siya anạ r’emhạ phọ anạ, aghị arọl de dị mị kaḍeenhaan nyinhạ.’ Enhaạn aguanhaan nyodị mọ: ‘Mị kaḍighi ni idị eemarạ eemarạ anạ keḍighi egbogh eelhe, kụ dị eego esi anạ mị kasẹph ni we oomo ade phọ.’
Ebraham o/lhegheri ekpisi phọ aJehova aḅenhị bọ nyodị oghị, kuolọ odị aḍuom olhoghi aJehova. Esi iduọn phọ Ebraham r’anhịr phọ odị Sera, r’odẹ phọ odị Tera, r’aLọt oọny umor phọ odị uukoroghian ni raraạr abidị omhiigh erelhe phọ.
Ebraham mamạn 75 asiạ mem mọ bidị osi bọ ekpisi phọ aJehova aḅenhị bọ nyodị oghị phọ. Ughol ekpisi phọ mọ Kenan. Epẹ phọ Enhaạn aḅaanhaạn ni Ebraham kụ aḅenhị nyodị mọ: ‘Oomo ade phọ aḍiẹn phọ nạ ramiịn bọ, mị kangọ nmụny anạ.’ Kuolọ mem mọ amuphẹ phọ Ebraham r’aSera mokpọ kụ moọny ko”mhoọgh. Esi iduọn phọ, oguan phọ aJehova aguanhaan bọ Ebraham kamunhughan bọ ika?
‘Omheeraam kụ aḍighi bọ iyaạr phọ Ebraham anaghanạn bọ Enhaạn, kụ aḍuạ bọ agheel eelhe phọ Enhaạn kangọ bọ nyodị. Odị o/legheri ni epẹ dị rakị bọ.’—Hibru 11:8