ITUUGHẠ 14

Miteom Emhụ Iyaạr Phọ

Hibru 8:1

OGHAẠPH OOKARAGH: Loghonhaạn ḍighaạgh buphẹ ronaghạn bọ odaphạn oghaạph ph’anạ, kụ aagholhomhi ikpanhạ araraạr phọ eḅọph bọ r’emhụ iyaạr phọ nạ rawạ bọ omạ omiteom mọ, ḅilhẹ r’emhuoghaạph phọ.

IPẸ NẠ KAḌIGHI BỌ:

Moọgh iyaạr dị nạ agbon omiteom. Pogh mughumọ oghaạph ph’anạ aḍighi olọ oḅenhị awe iyaạr, olọ okuphom owol, obobọ olọ k’anyu bidị oḍighi iyaạr omiteom, kụ atuụgh aakolhobian. Miịn mọ ikpanhạ araraạr phọ nạ kamạ bọ emiteom ni iyaạr phọ nạ rawạ bọ.

Puruan loor mọ: ‘Ighẹn asipuru obobọ ḍighẹn aḍiitughiạn kụ edị buphẹ ronaghạn bọ omhoọgh ilọ emhuoghaạph phọ ephẹn? ‘Asipuru phọ k’eego eghẹn kụ etu?’ Kụ atuụgh idiphọ adẹ oghaạph ph’anạ, pidị awe phọ orue odaphạn, onhaghanhạn, oḅilhẹ omheeraam.
Kaạph ghan aghol emhuoghaạph ph’anạ. Tirom ghan ni emhuoghaạph ph’anạ siphẹ oomo oghaạph phọ, esi ooḅulha ghạn oghol iniin ikpanhạ ikpo-onhụ emhuoghaạph phọ.
Ikpanhạ araraạr oghaạph phọ eegholhaan kụ eḍighi key. Saḅạr oginha asiikpịgh dị eḅọph r’emhuoghaạph ph’anạ, kụ k’edughanhaan nyinhạ ongọ oghaạph phọ eten dị emhoon dị nạ ka/le mem. U”kaạph ghan oomo ikpanhạ araraạr phọ, kuolọ kaạph aagholhomhi torobọ ekpanhạ iyaạr dị nạ amạ amiteom, pooghian ghan kụ agbi omạ enhọn, kụ torobọ ekpanhạ iyaạr emhaạr ghan eyọ r’epẹ ketum bọ.

Siphẹ emhiighom oghaạph phọ, nạ atue ni apụr aakaragh ikpanhạ arumhụ phọ obọ awe phọ odaphạn, nạ atue kẹn ni aakaragh mem lọ nạ rakureri pidị eloghonhaạn bidị ḍighaạgh orue ootughiạn.