Ika Kụ Idị Yira Kotue Ooḅereghị Enhaạn Eten Dị Eḅeraạn Nyodị?

Iduọn yira mooḅeghiọn bọ ni, k/oomo aruukụ iiḅereghị kụ iḅeraạn Enhaạn. Toroboiperolbọ, yira kotue ni ooḅereghị Olemhiạ phọ ayira eten dị olhoghi odị kaḅaạl. Eghẹn eten iiḅereghị obobọ ekụ iiḅereghị kụ iḅeraạn Enhaạn? (Jems 1:27) Ooḅeghiọn idị aBaibul phọ aghaạph.

1. Ekpẹ dị iiseeny phọ ayira kekpasị ḍighen?

Ekpẹ dị iiseeny phọ ayira kekpasị siphẹ aBaibul phọ. AZizọs aḅenhị Enhaạn mọ: “Oghaạph phọ anạ inẹ ni.” (Jọn 17:17) Iniin aruukụ iiḅereghị opogh igey phọ edi bọ siphẹ Ekpo-onhụ phọ Enhaạn bịn oḅitonhaạn. Osighẹ ghụn iḍighinhom araraạr r’itughemhị awe kụ rotughemhị ghan. Kuolọ olhoghi aZihova ra/ḅaạl ghan omhiịn awe dị “ogumọm omạn iilogh phọ Enaạn.” (Ibạl Mạk 7:9.) Ḍieriphọ aḍighaạgh phọ, olhoghi aZihova raḅaạl ghan ni omhiịn dị yira okpasị iiseeny phọ ayira siphẹ aBaibul phọ.

2. Ika kụ idị yira kooḅereghị aZihova?

Oginha aZihova bịn kụ edị yira kooḅereghị, loor esi dị odị kụ Olemhiạ ayira. (Ogananami 4:11) Iphẹn phọ remạ ghan mọ yira kopomhoghiạn, oḅilhẹ ooḅereghị oginha odị, dị yira u/ḅarạm ikaaghinheẹn araraạr.—Ibạl Isaiah 42:8.

Iiseeny phọ ayira emoọgh oḍighi ilọ “aruukuan dị Enaạn kesighẹ.” (Rom 12:1) Iduọn phọ pọ, yira kooko ghan iilhogh phọ odị. Esi omaạm, abuphẹ ophomhoghiạn bọ aZihova ropomhoghiạn ghan koḅilhẹ odaphạn siigbu apinien phọ odị amiteom bọ. Kụ okel iḍighinhom araraạr dị repuẹ ghan loor oye, idiphọ ophughọl asigerẹt obobọ oḍighinhom amiim r’asirooghọ eten dị i/kpeanhaạn.a

3. Uḍighi ika kụ yira koḍighan bọ buḅaramạ omheeraam mọ ayira ooseeny aZihova?

Ituughạ phọ ayira ringọ ghan iyira eepoogh “oboom aZihova . . . siphẹ ookpomhoghan phọ.” (Psalm 111:1, 2) Eniin eten dị yira roḍighi ghan iduọn phọ pọ omhoọr ghan asuọr oboom Enhaạn. (Ibạl Psalm 104:33.) AZihova uḅenhị iyira oghị ghan ituughạ loor esi dị odị uphomhoghiạn iyira aḅilhẹ alegheri mọ kilhoghonhaạn iyira ḍighaạgh oghelhọm aghuḍum k’agee-pọ. Mem dị yira ookpomhoghan, oniin ralọgh ghan ni nyoniin kaphophe.

OLHEGHERI OBUGHẸ

4. Yira ku/sighẹ raraạr dị okạ uuḅereghiọm Enhaạn

AVIDIO: Enhaạn Ameera Ni Mọ Osighẹ Ikaaghinheẹn Araraạr Ooḅereghiọm Nyinhọ? (3:26)

• Eeghe kụ imite mem dị abuniin awe Enhaạn iḍiodi phọ osighẹ ikaaghinheẹn araraạr ooseenyom nyodị?

Abuniin awe roḍighinhom ghan ikaaghinheẹn araraạr phọ loor esi dị rowạ oḍuraan otumhan Enhaạn. Kuolọ nạ ragbi mọ oḍighi iduọn phọ ghụn ke/ḍighi idị bidị kokelhạn Enhaạn? Ibạl Exodus 20:4-6 r’aPsalm 106:35, 36, kụ eeḅeghiọn sipuru phọ edaphạn bọ siẹn:

• Ighẹn ikaaghinheẹn araraạr kụ edị nạ amhiịn dị awe roḍighinhom ghan mem iiḅereghị abidị?

• Oḍighinhom ikaaghinheẹn araraạr eḅeraạn ni Enhaạn ḍughụm?

• Oḍighinhom ikaaghinheẹn araraạr etọl ika esi anạ?

5. Ooḅereghị ghan oginha aZihova kighoph iyira esighẹ esi itughemhị okpẹ

AVIDIO: Igey Kụ Itagharạn (5:16)

Ibạl Psalm 91:14, kụ eeḅeghiọn ḍipuru phọ aḍiẹn:

• AZihova aguanhaan oḍighinhaan ayira eeghe eḍighi maạr dị yira oḍeenhaan mọ yira opomhoghiạn ni nyodị esi ooḅereghị oginha odị?

6. Yira rooḅereghị ghan aZihova siphẹ ituughạ phọ

Yira roboom ghan aZihova koḅilhẹ okparamhị bunhọn mem dị yira omhoọr suọr oḅilhẹ ophagharanhaạn aani ghan ḍipuru mem dị ookpomhoghan. Ibạl Psalm 22:22, kụ eeḅeghiọn sipuru phọ iphẹn:

• Reḅeraạn ghan ni nyinhạ onhaghạn ophanyanhaạn abunhọn?

• Keḅeraạn ni nyinhạ ookolhobian ophagharanhaạn aani aḍipuru?

7. Reḅeraạn ghan ni aZihova mem dị yira oḅenhị bunhọn ipẹ yira otuughạ bọ

Ibadị aroopoogh oḅenhị aani abunhọn igey aBaibul phọ edi ni. Ibạl Psalms 9:1 r’34:1, kụ eeḅeghiọn ḍipuru phọ aḍiẹn:

• Eeghe iyaạr dị nạ matuughạ siẹn aBaibul phọ kụ iḅeraạn nyinhạ oḅenhị aani abunhọn?

OGHAẠPH OOKARAGH

Yira roḍighi ghan idị eḅeraạn Olemhiạ phọ ayira mem dị yira ooḅereghị oginha odị, oboom nyodị siphẹ ookpomhoghan phọ oḅilhẹ oḅenhị aani bunhọn ipẹ yira motuughạ bọ.

Ooḅula

• Yira kokị ḍighen kụ otuughạ ilọ ooḅereghị Enhaạn eten phọ epẹ eḅeraạn bọ nyodị?

• Uḍighi ika kụ yira kooḅereghị bọ oginha aZihova?

• Uḍighi ika kụ yira koḍighan bọ bunhọn dị rowạ oḍighi ipẹ eḅeraạn bọ Enhaạn ooḅereghị nyodị?

WAAGHỊ AMHIỊN

Bạl emhuoghaạph phọ “Mị U/ḍighi Mun Ebenhẹ Ikaaghinheẹn Araraạr,” omhiịn idị oniin anhịr arue awilhẹ iiḅereghị ikaaghinheẹn araraạr.

“ABaibul Phọ Ranme Ghan Ni Sighuḍum Awe” (The Watchtower, July 1, 2011)

Miịn iyaạr dị kelhoghonhaạn nyinhạ ḍighaạgh ophagharanhaạn ghan aḍipuru otu ituughạ.

“Boom AZihova Siphẹ Ookpomhoghan Phọ” (The Watchtower, January 2019)

Miịn suọ dị oniin oḍoọgh oọny amhoọgh esi oghị ghan ituughạ ghalhamọ r’idiphọ i/dughanhaan bọ ni nyodị oghị.

AZihova Akạr Kụ Uphogh Imhị (3:07)

Ibadị awe oḅẹm mọ akrọs phọ iyaạr aKristẹn, kuolọ enighẹ ni oḍighinhom ghan mem dị yira rooḅereghị Enhaạn?

“Uḍighi Ika Kụ Abugbaanhaạn AZihova Ro/ḍighinhom Ghan Bọ Akrọs Siphẹ Iiḅereghị Phọ Abidị?” (Edi intanẹt)