ESI ITUUGHẠ PHỌ 24

Eeghe Kụ Igey Phọ Ilọ Aruukpaạny?

Printed Edition

AZihova rawạ ni mọ yira olhegheri ilọ eghunotu k’akẹ phọ odị. Aruukpaạny phọ odimom aani ni siphẹ eghunotu phọ epẹ phọ, kụ okol kẹn ni bidị mọ “anmụny Enhaạn.” (Job 38:7) ABaibul phọ akaạph eeghe ilọ aruukpaạny? Bidị roḍighi ghan eeghe? Kụ oomo aruukpaạny kụ uḍighi buọ eghunotu phọ Enhaạn ḍughụm?

1. Aruukpaạny phọ oḍighi bughẹn odọ awe?

AZihova malhẹm ruukpaạny phọ ebia kụ agbi olhẹm ade phọ. Bidị oḍighi ruwaloor idiphọ odị, kụ odi ghan epẹ k’akẹ. (Hibru 1:14) Irubal aruukpaạny kụ odi epẹ phọ, kụ torobọ onyọ abidị agbatanhaạn ni. (Ogananami 5:11) Bidị “roḍighi ghan ilọ [aZihova] aghaạph, konhaghanhạn eḍọgh odị.” (Psalm 103:20) Eeni amem iḍiodi phọ, aZihova arom ghan ni ruukpaạny phọ oghị oḅenhị adom, olhoghonhaạn aḍighaạgh r’oḅilhẹ ophẹl awe phọ odị. Rodon, aruukpaạny phọ rotorori ghan ni Kristẹn oghị oteẹny awe dị rowạ otuughạ ilọ Enhaạn.

2. ASetan r’ikarạph aruwaloor phọ odị oḍighi bughẹn odọ awe?

Abuniin aruukpaạny phọ u/naghanhạn aZihova. Oḅẹl ookpaạny phọ agbagharạn bọ kụ edị “oghol bọ mọ Eru ḅilẹ r’aSetan phọ [raakeleghi] bọ oomo aḅirini phọ.” (Ogananami 12:9) ASetan awạ otooghị ongọ abunhọn, esi iduọn phọ, odị aḍighi idị oḅẹl olom r’anhịr phọ ḅilhẹ r’abunhọn aruukpaạny ogbagharạn Enhaạn. Okol ruukpaạny phọ abuphẹ ogbagharạn bọ mọ ikarạph aruwaloor. AZihova angọ itọ kụ ophorogh bidị epẹ k’akẹ osoore siẹn ade phọ, kụ kopiemhi ni bidị.—Ibạl Ogananami 12:9, 12.

3. Ika kụ idị aSetan r’ikarạph aruwaloor phọ rokparaghạ ghan ookelheghi ayira?

ASetan r’ikarạph aruwaloor phọ reekelheghi ghan ni we dị eego esi idike, emhoọgh bọ maạr oḍighinhom r’oḅaanhaạn aruwaloor. Esi omaạm, abuniin awe rokị ghan koteẹny we dị otuughạ ilọ araanhaạn, buọ imiịn, budị romiịn ghan uḍien, ḅilhẹ r’ariil idike. Abuniin awe rowạ ghan rookonhom dị eḅaramaạm iiḍighi ikarạph aruwaloor. Rookelheghi ghan kẹn we omheeraam mọ bunọ kotue ni oḅaanhaạn we dị momhuughu. Kuolọ aZihova uphụr ri iyira rurụ mọ: “Ke/kị eteẹny buphẹ oghophora bọ mọ bunọ roḅaanhaạn ghan bulọ u/lo, r’abudị romiinọgh ghan imiịn.” (Leviticus 19:31) Odị ungọ iyira iphụr arurụ phọ iphẹn phọ oghoph ayira osighẹ esi aSetan r’ikarạph aruwaloor phọ. Bidị amulhọgh ḍien Enhaạn, kụ rowạ ghan oḍighi ayira ikarạph.

OLHEGHERI OBUGHẸ

Ooḅeghiọn igey araraạr dị aruukpaạny phọ roḍighi ghan, ooto r’osooromhinheen dị odi esi idike r’idị yira kotue okoph loor ayira osighẹ esi aSetan r’ikarạph aruwaloor phọ.

Ookpaạny dị raaḅakị iyạl Abugbaanhaạn aZihova idiphọ bidị roḍuạ bọ otu kogbạ otu oghaạph iiḅi iinhaghạn phọ.

4. Aruukpaạny phọ rologhonhaạn ghan we ḍighaạgh otuughạ ilọ aZihova

Aruukpaạny phọ Enhaạn kụ re/kaạph ghan iiḅi iinhaghạn phọ. Kparipẹ ghụn, bidị rooḅakị ghan rebenhẹ Enhaạn oghị oteẹny awe dị rowạ otuughạ ilọ Enhaạn. Ibạl Ogananami 14:6, 7, kụ eeḅeghiọn sipuru phọ iphẹn:

Uḍighi ika kụ yira owạ bọ ni olhoghonhaạn aḍighaạgh aruukpaạny phọ orue oghaạph iiḅi iinhaghạn phọ?
Olhegheri mọ aruukpaạny phọ kotue ni olọgh ḍighaạgh oteẹny oye dị kotughemhị Baibul ekparamhị ni nyinhạ ḍughụm? Eeghe kụ iḍighi?

Araraạr dị egbolhomaam iiḍighi ikarạph aruwaloor, dị eḅarạm ni okpooghi idike, ralạ, insẹns, aglạs dị aaghiraany, aḍinyạ dị eghaạph ilọ iḍim dị remoọph ghan iḅaạl awe, asibebi, asikandụl r’asiwọt idike.

5. Kel idike

ASetan r’ikarạph aruwaloor phọ oḍighi mulhọgh ḍien aZihova. Bidị kẹn amulhọgh ḍien ayira. Ibạl Luk 9:38-42, kụ eeḅeghiọn ḍipuru phọ aḍiẹn:

Ikarạph aruwaloor phọ rezoọm ghan ika we?

Yira ro/wạ dị ikarạph aruwaloor phọ kinyuughiom iyira. Ibạl Deuteronomy 18:10-12, kụ eeḅeghiọn sipuru phọ iphẹn:

Ighẹn areten kụ edị ikarạph aruwaloor phọ rewạ ghan onyuughiom r’oḅilhẹ oḅaanhaạn ayira? Ighẹn inhọn iḍighinhom araraạr kụ iitura ekpisi anyinha?
Nạ ragbi mọ enighẹ ni iduọn aZihova aḅẹm bọ mọ oghel iiḍighi idike? Eeghe kụ iḍighi?

Ipegh VIDIO phọ, kụ eeḅeghiọn sipuru phọ edaphạn bọ siẹn.

AVIDIO: “Imerenyạn Eru Phọ” (5:02)

Nạ ragbi mọ olạ phọ olhọgh bọ ḍighaạgh onyanhị phọ aPalesa aḍighi ni ooto r’osooromhinheen? Eeghe kụ iḍighi?
Iwạ dị aPalesa kaḍighi eeghe orue oḍuạ esi iiḅaghamhị ikarạph aruwaloor?

Abugey aKristẹn romerenyạn ghan ni ikarạph aruwaloor phọ. Ibạl Iiḍighi 19:19 r’1 Korịnt 10:21, kụ eeḅeghiọn ḍipuru phọ aḍiẹn:

Uḍighi ika kụ emạn bọ ni maạr ophiemhi atorobọ iyaạr dị nạ amhoọgh dị egbolhomaam ikarạph aruwaloor?

6. Kpạr apu Setan r’ikarạph aruwaloor phọ odị

ASetan kụ oḍiemhiom ikarạph aruwaloor phọ. Kuolọ uw-emhụ abugey aruukpaạny phọ pọ aMaikẹl, iduọn phọ pọ aZizọs. AMaikẹl amoọgh iikpọ dị esi k’iḍighen? Ibạl Ogananami 12:7-9, kụ eeḅeghiọn sipuru phọ iphẹn:

Siẹn aMaikẹl r’aruukpaạny phọ odị ḅilhẹ r’aSetan r’ikarạph aruwaloor phọ odị, abuọ anhiạn kụ umhoọgh iboom iikpọ?
Nạ ragbi mọ ewạ ni dị buphẹ rodạph bọ Zizọs kokiilhaan Setan r’ikarạph aruwaloor phọ odị?

Nạ katue ni akpạr apu Setan r’ikarạph aruwaloor phọ odị. Ibạl Jems 4:7, kụ eeḅeghiọn ḍipuru phọ aḍiẹn:

Ika kụ idị nạ katue akoph loor anạ asighẹ esi aSetan r’ikarạph aruwaloor phọ?

ABUNIIN AWE OOTUGHIẠN MỌ: “Iyaạr dị eeph i/lo ophegh ghan areephegh asikomputa obobọ ophogh ghan asifim dị roḍeenhaan iiḍighi ikarạph aruwaloor. Eḍighi raraạr umoore bịn.”

Uḍighi ika kụ aḍiitughiạn phọ aḍiẹn phọ eḍighi bọ ooto r’osoorominheen?

OGHAẠPH OOKARAGH

Abugey aruukpaạny rulhoghonhaạn ghan iyira ḍighaạgh. Kuolọ aSetan r’ikarạph aruwaloor phọ odị oḍighi mulhọgh ḍien aZihova, kụ rosighẹ ghan idike kookelheghiom we.