Nạ Kaḍighi Eeghe Kụ Eghunotu Anạ Omoọgh Oḅaạl Olhoghi?—Ekpịgh 1

Olom r’anhịr dị purukụ aalhạn rowạ ghan ni oghiọm aghisigh omhoọgh ibo phọ ipẹ erọl bọ ḍio apinien phọ abidị. Kụ kotue ni omoọgh. Akristẹn dị maalhạn esi ibadị asiạ kụ oḅilhẹ okparaghạ ghan oḍighinhom asinhị-iilhogh aBaibul phọ siphẹ apinien phọ abidị olegheri ni mọ iphẹn phọ ketue ni emite.

1. ABaibul phọ atoma burulom oḍighi eeghe?

AZihova amạ olom mọ oḍighi uw-emhụ eghunotu phọ. (Ibạl Efesọs 5:23.) AZihova ragon ni omhiịn dị odị kasopha ghan ilọ kengọ suọ eghunotu phọ. ABaibul phọ aḅenhị burulom mọ: “ipomoghiạn nmariịr phọ anyina.” (Efesọs 5:25) Ipẹ phọ remạ ghan eeghe? Olom dị amhoọgh ephomhoghiạn razoọm ghan anhịr phọ odị eyoghoyoghọ eten siphẹ olhoghi otu phọ r’esi ogbo. Odị rakoph ghan anhịr phọ, kaḍighi idị olhoghi anhịr phọ kaḅaạl, kaḅilhẹ kẹn amiteom angọ ilọ rawạ. (1 Timoti 5:8) Dị emhạn maạr epelhom, odị raloghonhaạn ghan anhịr phọ odị ḍighaạgh okparamhị asiya phọ odị r’aZihova. (Matiu 4:4) Esi omaạm, odị katue ni aaḅereghị aḅilhẹ abạl Baibul phọ r’anhịr phọ odị. Olom dị amhaạr aphogh anhịr phọ odị r’ephomhoghiạn rakparamhị ghan siya phọ odị r’aZihova.—Ibạl 1 Pita 3:7.

2. ABaibul phọ atoma nmariịr oḍighi eeghe?

Ekpo-onhụ phọ Enhaạn eḅenhị anhịr phọ mọ ‘alọgh ghan eghuan olom mọ odị.’ (Efesọs 5:33) Ika kụ idị odị katue aḍighi iduọn phọ? Odị katue ni aatughiạn ghan imạ araagharạ olom mọ odị r’ikuph phọ ralọgh ghan bọ ophogh odị r’ibạm anmụny phọ. Odị katue kẹn ni alọgh eghuan olom mọ odị esi obakị ghan osopha odị r’oḅaanhaạn ghan odị eten dị eyoghoyoghọ ḅilhẹ r’oghaạph ghan imạ ilọ odị ghalhamọ ra/kumu ni aZihova.

3. Olom r’anhịr kokparamhị ika pinien phọ abidị?

ABaibul phọ aḅẹm mọ olom r’anhịr “koḍighi iniin iphulupul.” (Matiu 19:5) Iphẹn phọ remạ ghan mọ bidị ko/meera iyaạr eḍighi idị ephomhoghiạn phọ abidị kedugh. Bidị kotue oḍighi iduọn phọ mem dị bidị ogbor ghan omiteom mem oḅọph ghan oḍighi raraạr oḅilhẹ oghaạph ghan ipẹ bidị olhoghoma bọ r’ipẹ bidị omhiịn bọ raraạr r’eten ephomhoghiạn. Epel aZihova, bidị ku/meera enhọn iyaạr obobọ oye amhạn maạr apu nyopọ r’abidị aalhạn bọ. Bidị ogonha loor esi omhoọgh asiya dị i/kpeanhaạn r’onhọn oye.

OLHEGHERI OBUGHẸ

4. Burulom—ipomhoghiạn eḅilhẹ emhaạr ephogh nmariịr phọ anyinha

AVIDIO: Burulom, Ipomhoghiạn Nmariịr Anyinha Idiphọ Aloor Anyinha (9:53)

• Ighẹn kụ iniin areten dị olom katue aḍeenhaan mọ onọ apomhoghiạn ni aḅilhẹ amaạr rapogh anhịr phọ odị?

Ibạl Kolosị 3:12, kụ eeḅeghiọn ḍipuru phọ edaphạn bọ siẹn:

• Ighẹn areten kụ edị olom katue aḍeenhaan raagharạ phọ iphẹn phọ siphẹ eghunotu phọ?

5. Nmariịr—ipomhoghiạn eḅilhẹ elhọgh eghuan burulom mọ anyinha

ABaibul phọ atoma anhịr phọ olhọgh eghuan olom odị mughumọ rakumu ni aZihova obobọ ra/kumu. Ibạl 1 Pita 3:1, 2, kụ eeḅeghiọn sipuru phọ edaphạn bọ siẹn:

• Eḍighi maạr dị nạ aạl olom dị ra/kumu ghan aZihova, iikia i/lo mọ nạ rawạ ni dị kakumu aani nyodị. Siẹn ogbor ghan oḅenhị odị ilọ aBaibul phọ r’omhoọgh imạ araagharạ kụ oḅilhẹ olhọgh ghan odị eegu, eghẹn kụ kenuụn eḍạ ḍiḅeraạn olom mọ? Eeghe kụ iḍighi?

Olom r’anhịr oḅophoghạn kotue ni osopha ogey osopha. Toroboiperolbọ, eeni amem aḍiitughiạn anhịr phọ kegbatanhaạn ni r’aḍiọ olom mọ. Mem dị eḍighi iduọn phọ, r’eten olhọgh eegu odị atue ni asogh aani ḍiitughiạn, kuolọ odị ku/bulha mọ aZihova angọ olom mọ odị oḍighi osopha ghan ilọ kenighenhaạn eghunotu phọ. Odị aḍighi ni oomo ipẹ odị katue bọ obakị osopha olom mọ odị. Odị aḍighi iphẹn phọ, keḍighi ni idị eghunotu phọ komoọgh oḅaạl olhoghi. Ibạl 1 Pita 3:3-5, kụ eeḅeghiọn ḍipuru phọ edaphạn bọ siẹn:

• AZihova raloghoma ghan ika mem dị anhịr alhọgh eghuan olom odị?

6. Nạ katue ni akpạr apu iiḅaghamhị dị retọl ghan pinien

AVIDIO: Ipẹ Kokparamhị Bọ Ogọ Apinien Phọ (5:44)

• Siphẹ avidio phọ, eeghe kụ iḍeenhaan bọ mọ asiya olom r’anhịr phọ redugh?

• Bidị uḍighi eeghe okparamhị apinien phọ abidị?

Ibạl 1 Korịnt 10:24 r’aKolosị 3:13. Mem dị nyinha aạl eniin esi aBaibul, iiḅeghiọn ghan ḍipuru phọ aḍiẹn:

• Eeghe asuọ kụ kaḍuạ amite esi oḍighinhom oroma phọ ophọn phọ?

ABaibul phọ aḅẹm mọ oniin aghuenhi ghan nyoniin. Olhọgh oye eghuan eḅaramaạm ozoọm ghan oye phọ eten dị eyoghoyoghọ r’oḅilhẹ olhọgh ghan eegu. Ibạl Rom 12:10, kụ eeḅeghiọn sipuru phọ iphẹn:

• Ewạ ni dị olom obobọ anhịr kakori mọ opọ r’odị aalhạn bọ kụ aphụr alhọgh nyodị eghuan ḍughụm? Eeghe kụ iḍighi?

OGHAẠPH OOKARAGH

Olom r’anhịr kotue ni omoọgh oḅaạl olhoghi mem dị ophomhoghiạn siloor, oḍighinhom ghan sinhị-iilhogh aBaibul phọ, ḅilhẹ oniin alhọgh ghan eegu nyoniin.

Ooḅula

• Olom kaḍighi eeghe pidị oḅaạl olhoghi atọl siphẹ apinien phọ?

• Anhịr kaḍighi eeghe pidị oḅaạl olhoghi atọl siphẹ apinien phọ?

• Eḍighi maạr dị nạ maḍigh pinien, aḍighẹn aḍinhị-olhogh aBaibul kụ kelhoghonhaạn nyinhạ ḍighaạgh okparamhị apinien phọ anạ?

WAAGHỊ AMHIỊN

Miịn raraạr dị ketue elhoghonhaạn nyinhạ ḍighaạgh omhoọgh eghunotu dị eḍighi elọ oḅaạl olhoghi.

Eghunotu Anạ Kotue Ni Omoọgh Oḅaạl Olhoghi (abrosọ)

Pogh ḍuọr dị koḍeenhaan vidio dị eghaạph eekaragh ḍisẹph kirokirọ dị edi oḍighinhom oromha Enhaạn siphẹ apinien phọ.

Egey Ephomhoghiạn (4:26)

Miịn iyaạr dị osooromhi aloor ongọ olom mọ idiphọ oḍiemhiom remạ ghan.

“Nmariịr, Uḍighi Ika Kụ Nyinha Kesooromhi Bọ Loor Engọ Burulom Mọ Anyinha Idiphọ Abuḍiemhiom Anyinha?” (The Watchtower, May 15, 2010)

Miịn idị oniin olom r’anhịr okpạr opu iiḅaghamhị dị eḍighi idị bidị okạ pinien phọ abidị.

R’olhoghonhaạn Aḍighaạgh Enhaạn Apinien Phọ Ayoor Anhighẹ Ni (5:14)