EMHUOGHAẠPH ITUUGHẠ PHỌ 35
AZihova Amaghamhị Ni Maạr Rebenhẹ Phọ Odị Osooromhi Bọ Loor
“AZihova . . . ralọgh ghan ni elhegh nyopọ asooromhi bọ loor.”—PS. 138:6.
AḌUỌR PHỌ 48 Orelhe r’AZihova Torobọ Aḍio
OGHAẠPH OOKARAGHa
1. AZihova asighẹ ika we dị osooromhi loor? Gbạ.
AZIHOVA apomoghiạn iikiạ we dị osooromhi loor. Ogina abuphẹ okạr bọ osooromhi loor bịn kụ kotue omoọgh imạ asiya r’odị. Ḍierị phọ aḍighaạgh phọ, “odị ratọl ghan k’egher kụ apogh nyophọ aphoophe bọ loor.” (Ps. 138:6) Oomo phọ ayira rowạ ghan ni oḍighi ipẹ eḅeeraạn bọ aZihova ḅilhẹ rolhoghoma ephomoghiạn phọ odị, esi iduọn phọ yira omoọgh ni riphigh otuạn omhoọgh eegharạ osooromhi aloor.
2. Yira kooḅeghiọn eeghe siẹn emhuoghaạph phọ ephẹn phọ?
2 Siẹn emhuoghaạph phọ ephẹn phọ, yira kopanyanhaạn iraạr asipuru: (1) Osooromhi aloor p’eeghe? (2) Eeghe kụ iḍighi kụ ewạ bọ ni mọ yira omhoọgh osooromhi aloor? (3) Ḅilhẹ, ighẹn odọ asidọl kụ ketue eḍighi idị kikparanhaạn iyira osooromhi aloor? Idiphọ yira komiịn bọ ni, yira roḍighi ghan idị olhoghi aZihova k’aḅaạl ḅilhẹ yira romooghọm ghan suọ, mem dị yira omhoọgh eegharạ osooromhi aloor.—Prov. 27:11; Isa. 48:17.
OSOOROMHI ALOOR P’EEGHE?
3. Osooromhi aloor p’eeghe?
3 Osooromhi aloor pọ olhoghoma k’ekpom mọ oye phọ kụ asoorom apu buerị phọ, koo/baga obobọ oodaraghu. ABaibul phọ aḍeenhaan mọ oye dị asooromhi loor ramoọgh ghan ephoghom dị eeleeny k’aghị esi asiya phọ odị r’aZihova ḅilhẹ r’abuerị phọ awe phọ. Oye dị asooromhi loor ralọgh ghan elhegh mọ torobọ oye apuom ni nyodị iyaạr.—Fil. 2:3, 4.
4-5. Eeghe kụ iḍighi kụ yira kotue bọ ni oḅẹm mọ osooromhi aloor o/ḍighi iyaạr anyụ r’anyụ?
4 Abuniin awe okue bịn osooromhi loor anyụ r’anyụ. Eeni bidị omoọgh umugholoor bịn ekịgh mudị osooromhi loor. Obobọ eeni bidị omaạr agey olhọgh oye eegu loor esi dị epẹ kụ eḍighinhom iyaạr ekpisi abidị obobọ eeni ipẹ kụ idị ookonom bidị. Kuolọ eeni okạr oḅiila ophogh, bidị oḍighi we iibaga. Eeni esighẹ rekị kụ bidị ogbi oḍeenhaan odọ oye phọ bidị oru bọ.—Luk 6:45.
5 Ḍierị phọ aḍighaạgh phọ, awe odi ni dị omhoọgh oḅio oghaạph obobọ oḍighi iyaạr, kuolọ ipẹ phọ re/mạ ghan mọ bidị opoophe loor. (Jọn 1:46, 47) Ghalhamọ r’iduọn phọ ni, i/wạ dị awe dị orọl iduọn phọ koḍuom olhoghi iboom loor abidị. Mughumọ yira oḍighi we umugholoor obobọ we dị omhoọgh oḅio, ewạ mọ oomo phọ ayira olhọgh ikuph obọ yira omhoọgh eegharạ osooromhi aloor.
Otelhedom mọ aPọl o/lhoghoma mọ onọ kụ apu buerị phọ
(Miịn ekpịgh phọ 6)d
6. Yira otuughạ eeghe esi eḍeenhaan phọ aPọl, odaphạn ipẹ ogẹ bọ siphẹ 1 Korịnt 15:10?
6 Ooḅeghiọn eḍeenhaan otelhedom mọ Pọl. AZihova asighẹ ni nyodị aḍighinhom ophighi imhoom arookpomhoghan ibadị arikpisi. Eeni kẹn odị kụ aḍighi oḍighi iphelhegbeel phọ apu buerị phọ abutelhedom mọ aZizọs Kraist. Ghalhamọ r’iduọn phọ ni, aPọl oo/tughiạn r’ootughiạn mọ onọ kụ amhạn maạr apu buerị phọ. R’osooromhi aloor, odị aḅẹm mọ: “Mị kụ uḍigh aagiạ aḅarạm oḅịph siphẹ abutelhedom mọ. Mị phọ kẹn bịn u/mạn oghola mọ otelhedom, idị eḍighi bọ mị ugbiphoghọm ni buọ asiosị phọ [Enhaạn].” (1 Kọr. 15:9) Kụ aPọl amạ amiteom mọ i/ḍighi iikpọ onọ obobọ iboom idị odị kụ anhighẹ apu buerị phọ, kuolọ aloor esi onmạ ighirigiir phọ Enhaạn u/kpeanhaạn bọ. (Bạl 1 Korịnt 15:10.) P’eeghe emạ iyaạr dị yira otuughạ ilọ osooromhi aloor, siphẹ aḍinyạ phọ aPọl agẹ bọ aghiomaạn we aKorịnt phọ—ekạr ekpaariọm mem dị yira ootughiạn mọ awe urọl li siphẹ ookpomhoghan phọ dị owạ ghan oḅẹm mọ bunọ kụ ulhegheri iyaạr opu Pọl!—2 Kọr. 10:10.
Karl F. Klein, onyọ umor dị asooromhi loor dị aḍighi aani ghan oniin siphẹ Aloor Phọ Repogh Bọ
(Miịn ekpịgh phọ 7)
7. Ika kụ idị abuniin abumor dị ophạm roopoogh arukumuan dị eḍighan elhegh ḍio arodon moḍeenhaan osooromhi aloor? Mạ eḍeenhaan.
7 Iphirigba aghuḍum umor phọ Karl F. Klein aḍighi aani ghan bọ oniin siphẹ Oloor Phọ Repogh Bọ, mekạr kụ ekparamhị ibadị awe phọ aZihova. Siphẹ igẹ iphirigba aghuḍum mọ odị, eten osooromhi aloor ḅilhẹ r’ogbạ agey, Umor phọ Klein aghaạph ni ilọ ibadị asidugh r’ipaanhaạn dị odị asoman siphẹ adọl aghuḍum mọ odị. Esi omaạm, lhạ phọ 1920, oḍighi oḍuạ otu ogbạ otu phọ akparanhaạn ni nyodị iboom dị tutụ odị awilhẹ oghị ghan epẹ erugh phọ esi iyạl asiạ. Eniin amem kẹn dị odị akumu ghan epẹ Betẹl, odị aghaghạm ni olhoghi onyọ umor dị angọ nyodị oroma. Ḅilhẹ kẹn, eniin amem odị o/rolọm ghan loor, loor oboom otọ r’ooḅaghamiạn aloor, kuolọ i/bia bịn odị amhoon. Ghalhamọ r’iduọn phọ ni, odị aghelhọm ni ibadị aroopoogh arukumuan. Gbiom olhoghi odọ osooromhi aloor dị ewạ ḍighaạgh onyọ umor phọ ophọn aaleghaan bọ iduọn, oghaạph ilọ asidugh r’ipaanhaạn odị! Reḅeeraạn ghan ni ibadị abumor r’abumarani ootughiạn ilọ ogbạ agey Umor phọ Klein, r’imạ iphirigba aghuḍum mọ odị.b
EEGHE KỤ IḌIGHI KỤ EWẠ BỌ NI MỌ YIRA OMHOỌGH OSOOROMHI ALOOR?
8. Ika kụ idị 1 Pita 5:6 ulhoghonhaạn iyira ḍighaạgh omhiịn mọ osooromhi aloor aḅeeraạn ni aZihova?
8 Ephigh iyaạr phọ ewạ bọ mọ yira omhoọgh osooromhi aloor pọ aloor esi dị eḅeeraạn aZihova. Otelhedom mọ aPita aghaạph ni iphẹn phọ aagholhomhi. (Bạl 1 Pita 5:6.) Idị egbolomaam ikpo onhụ phọ aPita iphẹn, aḍinyạ phọ “Come Be My Follower” eḅẹm mọ: “Ophoophe aloor ekịgh idiphọ ikạ dị ketue ni eḍighi oye iyaạr. Eegharạ phọ ephẹn phọ ketue ni eḍighi idị ghalhamọ oye dị amhoọgh ni imạ asighalhanyạ ka/moọgh maạr oḍighinhom esi Enhaạn. Ḍierị phọ aḍighaạgh phọ, osooromhi aloor katue ni aḍighi iyaạr dị oye dị asoorom k’amoọgh maạr oḍighinhom esi aZihova. . . . [Odị] k’aḅaạl . . . li olhoghi okpẹ anạ iikpiạ loor esi osooromhi aloor phọ anạ.”c Okạr oghaạph, enhọn iyaạr edi ni dị ketue ingọ iyira ibo dị epeleghiom oḍighi idị olhoghi aZihova k’aḅaạl ḍughụm?—Prov. 23:15.
9. Ika kụ idị osooromhi aloor raḍighi ghan idị awe koḍuraan utuman iyira?
9 Epel oḅẹm mọ reḍighi ghan idị olhoghi aZihova kaḅaạl, yira oḅilhẹ kẹn ni romooghọm ghan suọ kirokirọ esi osooromhi aloor. Osooromhi aloor raḍighi ghan iyaạr dị awe rutuman ghan iyira. Okuamhị onhaghanhạn iphẹn phọ, pọ sighẹ mọ nạ kụ abuerị phọ awe phọ. (Mat. 7:12) Iyira ri/ḅeeraạn ghan otuman awe dị ro/meera ghan kosighẹ ilọ onhọn aghaạph, epel ipẹ abidị. Kparipẹ ghụn riḅeeraạn ghan iyira otuman abuphẹ r’ayira oḅọph bọ omheeraam mọ, mem dị bidị roḍeenhaan ghan ipẹ aBaibul phọ aḅẹm bọ mọ “emoọgh ghan igbiririph. Ipomoghiạn idiphọ anmụny-onhiin. Oniin anmạ ghan nyoniin ighirigiir, esooromi ghan loor anyina.” (1 Pit. 3:8) Eḍighi maạr dị yira oḍuraan otuman we dị orọl iduọn phọ, bidị koḍuraan aani ni utuman iyira—loor esi osooromhi aloor ph’ayira.
10. Ika kụ idị osooromhi aloor kadughe dọl aghuḍum mọ ayira?
10 Osooromhi aloor aḅilhẹ kẹn radughe ghan dọl aghuḍum oye phọ. Okạr oghaạph, eeni amem yira romiịn ghan ni raraạr dị eghịgh mudị i/kpeanhaạn. Uw-emhạ phọ asụ bọ olhoghi phọ aSolomọn aḅẹm mọ: “Mị amiịn ni dị arebenhẹ kụ oḍiku omhạn asụ kuolọ anmụny araalhạ rotelhe owol ade idiphọ arebenhẹ.” (Eccl. 10:7) Eeni amem buphẹ olhegheri bọ iyaạr obobọ omhoọgh bọ ḍighalhanyạ phọ kụ ro/sighẹ ghan rughuenhian phọ. Kuolọ eeni amem buphẹ maạr u/legheri bọ kụ romoọgh ghan ghụn rughuenhian. Ghalhamọ r’iduọn phọ ni, aSolomọn alhọgh ni elhegh mọ eḍighi ni osụ olhoghi osighẹ araraạr ipẹ yira omhiịn bọ kparipẹ rooḅaghamhiạn aloor ilọ idị adọl aghuḍum ayira i/kị eten phọ epẹ yira rowạ bọ. (Eccl. 6:9) Eḍighi maạr dị yira osooromhi loor, kidughanhaan iyira osighẹ aani araraạr ipẹ yira omhiịn bọ—ghalhamọ i/kị ni ipẹ yira ootughiạn bọ.
IGHẸN ODỌ ASIDỌL KỤ KETUE EḌIGHI IDỊ KIKPARANHAẠN IYIRA OSOOROMHI ALOOR?
Ika kụ idị aḍidọ adọl phọ aḍiẹn phọ ketue edẹgh osooromhi aloor phọ ayira?(Miịn siikpịgh phọ 11-12)e
11. Yira komegheron ghan ika mem lọ oye ungọ iyira oroma?
11 Torobọ aḍio, yira romoọgh ghan ni ibadị aroopoogh dị kewạ mọ yira oḍeenhaan osooromhi aloor phọ ayira. Idiphọ amem dị ungọ iyira oroma. Enighẹ ni dị yira kootughiạn ghan mọ iyaạr dị tutụ oye kụ alhọgh ikuph aru ungọ iyira oroma, pọ eeni yira mopiomạn iboom dị olhoghi u/seere. Kuolọ eeni amem rinyu ghan iyira oghel oroma phọ. Eeni yira kotue bịn opogh osooromhi oye phọ obobọ eten phọ epẹ odị angọ bọ oroma phọ. Kuolọ, eḍighi maạr dị yira osooromhi loor, yira kokparaghạ ni omhegheron eten dị enhighẹ.
12. Odaphạn Proverbs 27:5, 6, eeghe kụ iḍighi kụ ewạ bọ ni mọ oḍeenhaan ghan osereghiạn mem dị oye ungọ iyira oroma? Kaạph amaanhiọm.
12 Oye dị asooromhi loor rasighẹ ghan oroma kamhaghamhị maạr. Esi omaạm: Oḅẹm mọ nạ masi otu ituughạ, akaaphạn ibadị abumor r’abumarani, kụ oniin amhiigha loor amhạgh nyinhạ atenhom ogbạl kụ aḅenhị nyinhạ mọ ekpereghiom eedoony eparariạn olhaạy anạ. Iikia i/lo, umugholoor kasiph ni nyinhạ. Kuolọ olhoghi anạ ka/ḅaạl esi iduọn odị aḍighi bọ idị nạ alhegheri ḍughụm? Ogbạ agey, nạ kaatughiạn ni mọ saị, ḅẹm loor mọ oye anhuụn ni uḅenhị imhị! Iniin phọ kẹn ni, r’osooromhi aloor osereghiạn ghan oye lọ aḍeenhaan akpọ oḅio kụ ungọ ayira oroma ilọ iyaạr dị yira oḍighi dị i/nighẹ. Osighẹ oye phọ idiphọ oyaghirị, ka/mulhọgh ḍien.—Bạl Proverbs 27:5, 6; Gal. 4:16.
Eeghe kụ iḍighi kụ ewạ bọ ni osooromhi aloor mem dị abunhọn awe omhoọgh roopoogh arukumuan?
(Miịn siikpịgh phọ 13-14)f
13. Ika kụ idị yira kotue oḍeenhaan osooromhi aloor mem dị abunhọn awe omhoọgh roopoogh iiḍighi?
13 Mem dị abunhọn awe omhoọgh roopoogh iiḍighi. Oniin okumor oye dị oghol mọ Jason aḅẹm mọ “Mem dị mị amhiịn dị abunhọn awe omhoọgh roopoogh iiḍighi, eeni amem mị upuruan ghan ni loor amhị mọ, eeghe kụ iḍighi kụ imhị u/mạ aani bọ?” Nạ raloghoma aani ghan eten phọ epẹ phọ ḍughụm? I/beeph ‘ozuạ’ aroopoogh arukumuan. (1 Tim. 3:1) Toroboiperolbọ, ewạ ni mọ yira ooḅakị iitughiạn phọ ayira. Eḍighi maạr dị yira u/gona loor, ophoophe aloor katue ni bịn aḍigh ekpom ayira. Esi omaạm, onyọ umor katue ni bịn amiigh ootughiạn mọ onọ kụ akạr asianhaan oḍighi iniin iiḍighi siphẹ ookpomhoghan phọ. Obobọ onyọ umarani katue ni aatughiạn mọ, ‘Obọ olom amhị kụ akạr akpeanhaạn oḍighi opeẹr oḍighi!’ Toroboiperolbọ, yira osooromhi loor k’ekpom, yira kokel li uwaloor iibaga.
14. Yira otuughạ eeghe esi eten phọ epẹ aMozis azọ bọ mem mọ ongọ aani bọ bunhọn roopoogh iiḍighi phọ?
14 Yira kotue otuughạ iyaạr esi eten phọ epẹ aMozis azọ bọ mem dị abunhọn omhoọgh aani eepoogh arukumuan. AMozis asereghiạn ni oḍighi oḍiemhiom eelhe phọ Izrạl. AMozis azọ ika mem mọ aZihova angọ aani bọ bunhọn eepoogh okumuan r’odị? I/pin olhoghi odị. (Num. 11:24-29) Mem dị rokaạph ilọ oogbo iiruẹn, r’osooromhi aloor odị amheera ghan ni mọ abunhọn awe olhoghonhaạn nyodị ḍighaạgh. (Ex. 18:13-24) Iphẹn phọ keloghonhaạn ḍighaạgh dị konuụn ghan oogbo iiruẹn ongọ we phọ. Iphẹn phọ eḍeenhaan mọ, aMozis amhoọgh ḍiḅeeraạn awe phọ apuemhi eepoogh arukumuan phọ odị. P’eeghe imạ eḍeenhaan! Eḍighi maạr dị yira okạr rowạ mọ aZihova usighẹ iyira aḍighinhom, pọ ewạ osooromhi aloor kparipẹ r’aḍighalhanyạ. Ghalhamọ r’iduọn “aZihova akẹl bọ ni k’epẹ anyụ, odị ralọgh ghan ni elhegh nyopọ asooromhi bọ loor.”—Ps. 138:6.
15. Eeghe imhoom asidọl kụ edị ibadị mosoman?
15 Mem dị asidọl phọ enmia. Siạ dị ke/bia, monmeeghi ni eepoogh arukumuan ibadị abumor r’abumarani dị mokumu ni aZihova esi ibadị asiạ. Esi omaạm, lhạ phọ 2014, oḍighom mọ aḅẹm ni mọ abupoghom eephugh ko/tọl ghan mun, kụ iḍighi kụ iwạ m’abidị r’anmariịr abidị oghị oḍigh inhọn agạ arukumuan oomo-amem mọ. Ḍinhiin phọ alhạ phọ, oḍighom mọ aḅilhẹ ni aḅẹm mọ abupoghom eghir dị momhạn 70 asiạ koḅilhẹ ni oḍighi phọ. Ḅilhẹ kẹn mọ abumor dị momhạn 80 asiạ ko/ḍighi ghan mun ookpomoghiom aḍita ikumor awe siphẹ ookpomhoghan phọ. Dị ke/kạr ri ebia kẹn, m’oḅenhị ibadị abudị okumuan ghan Betẹl mọ oghị okọy eten. Ibadị dị orọl ghan rukumuan oomo-amem dị egbatanhaạn mowilhẹ rukumuan phọ loor e”moon, iiḅaghamhị olhoghi otu, obobọ inhọn araraạr.
16. Ika kụ idị abumor r’abumarani ayira moḍeenhaan osooromhi aloor esi odaphạn imhoom asidọl?
16 I/dughanhaan bumor r’abumarani phọ abuẹn phọ odaphạn imhoom asidọl phọ iphẹn phọ. Okạr oghaạph, ibadị abuẹn phọ osereghiạn iboom igbaany arukumuan phọ abidị loor esi dị meluạn bidị. Buniin rotọl ghan ni dọl “okururu” iduọn bidị rokparaghạ bọ odaphạn aḍimhoom adọl phọ. Toroboiperolbọ, esighẹ rekị bịn bidị rotue ghan ni kodaphạn ḍimhoom adọl phọ abidị. Eeghe kụ iḍighi? Loor esi dị bidị opomhoghiạn aZihova. Bidị olegheri mọ bidị oḅọgh ghuḍum abidị ongọ Enhaạn—ko/ḍighi phọ, ko/mheera aḍigbogh aḍien, obobọ eepoogh arukumuan phọ abidị. (Kọl. 3:23) Reḅaạl ghan ni olhoghi abidị oghiọm aghisigh okumu aZihova torobọ esi lọ esi bidị. Bidị ‘onyaariọm aZihova oomo iiḅaghamhị abidị’ loor esi dị bidị olegheri mọ odị kụ rapogh ghan bidị.—1 Pit. 5:6, 7.
17. Eeghe kụ iḍighi kụ olhoghi ayira aḅaạl bọ ni, esi iduọn Ekpo onhụ phọ Enhaạn iroma bọ iyira osooromhi aloor?
17 Olhoghi ayira o/ḅaạl esi iduọn Ekpo onhụ phọ Enhaạn iroma bọ iyira oḍighi awe dị osooromhi loor ḍughụm? Mem dị yira omhoọgh emạ phọ eegharạ phọ ephẹn phọ, kingọ ni iyira suọ ḅilhẹ r’abunhọn kẹn ni. Rilhoghonhaạn ghan iyira ḍighaạgh orue okaran ipaanhaạn siẹn aghuḍum mọ ayira. Dị epelhom siẹn, keḍighi idị yira koḍuuraan otuman Odẹ k’akẹ phọ ayira. P’eeghe idị edụgh iikiạ olhegheri mọ “opọ phọ Aghị bọ Anyụ aḅilhẹ Apelheghiom,” apomhoghiạn ni aḅilhẹ amaghamhị maạr rebenhẹ phọ odị osooromhi bọ loor!—Isa. 57:15.
AḌUỌR PHỌ 45 The Meditation of My Heart
a Osooromhi aloor aḍighi eniin eegharạ dị emhạn maạr iboom dị ewạ mọ yira omhoọgh. Osooromhi aloor p’eeghe? Eeghe kụ iḍighi kụ ewạ bọ ni mọ yira omhoọgh osooromhi aloor? Ḅilhẹ, eeghe kụ iḍighi kụ rikparanhaạn ghan bọ iyira osooromhi aloor mem dị asidọl phọ enmia? Emhuoghaạph phọ ephẹn phọ kepanyanhaạn ni sipuru phọ iphẹn phọ emhạn bọ ni maạr iboom.
b Miịn emhuoghaạph phọ eḅẹm bọ mọ “Jehovah Has Dealt Rewardingly With Me” siphẹ Watchtower October 1, 1984.
c Miịn emhuoghaạph phọ 3, ekpịgh phọ 23.
d ILỌ AFOTO: Dị bidị odi olhoghotu onyọ umor, r’osooromhi aloor otelhedom mọ aPọl rakelọm ni ooḅughonhaan r’abunhọn, ghalhamọ r’ibạm anmụny ni.
e ILỌ AFOTO: Okumor oye asooromhi loor rasighẹ oroma aBaibul ḍighaạgh onyọ iḍoọgh umor.
f ILỌ AFOTO: Okumor onyọ umor phọ o/phoghom ekarạph ekpeḍien oḍoọgh onyọ umor phọ aphạm bọ eepoogh arukumuan phọ siphẹ ookpomhoghan phọ.