EMHUOGHAẠPH ITUUGHẠ PHỌ 39
“Mị Uphogh Ni Kụ Amiịn Siadạm Awe”
“Mị uphogh ni kụ amiịn siadạm awe . . . dị u/tue ubạl umuneni. Bidị umereghạ ni ghisigh agadạ odaạm emạ phọ r’aghisigh Oọny lyool Ogạ phọ.”—OGAN. 7:9.
AḌUỌR PHỌ 60 It Means Their Life
OGHAẠPH OOKARAGHa
1. Adọl otelhedom mọ aZọn irọl ika siphẹ eekuna oḅẹl okuron asiạ phọ?
MEM mọ oḅẹl okuron asiạ phọ asi bọ eekuna, otelhedom mọ aZọn asoman ni dọl dị ekpạr iikiạ. Mem mọ opọ phọ odị maḍighi okumor oye, ḅilhẹ kẹn okasaghiọm nyodị ekpu-ogbo dị oghol mọ Patmọs, kụ kẹn eeni odị kụ ogina otelhedom dị asugha mem mọ amuphẹ phọ. (Ogan. 1:9) Odị alhegheri ni mọ abuọ isophoghom moḍigh rookpomhoghan phọ rookelheghi we phọ koḅilhẹ okomọgh madia. Ighịgh mudị iyạl ikpo aKristẹn phọ osugha bọ mophe romadạn.—Jud 4; Ogan. 2:15, 20; 3:1, 17.
Otelhedom mọ aZọn amhiịn ‘ḍigbogh aḍita’ dị okpologhiạn igorogorọ arusuomạ oḅilhẹ ophamạgh ighirikị iriịr raghaạgh abidị (Miịn ekpịgh phọ 2)
2. Odaphạn Ogananami 7:9-14, oghẹn uḍien dị aḍighi olọ oḅaạl olhoghi kụ edị oḍeenhaan Zọn? (Miịn afoto oḅẹl opoḍi phọ.)
2 Eeḍiạn asidọl phọ iphẹn phọ, Enhaạn iḍeenhaan ni Zọn uḍien dị aḍighi ni olọ oḅaạl olhoghi ilọ aghisigh phọ. Siphẹ uḍien phọ, uḅenhị ni inya aruukpaạny mọ ku/meera inya oghim mọ eḍighi bọ ilọ amuphe amem igbogh iiḅaghamhị phọ eghim siẹn aḅirinhi phọ, tutụ odoghoḍi relhegh egu arebenhẹ phọ. (Ogan. 7:1-3) Egu awe phọ abuẹn phọ omạn 144,000, kụ bidị kotooghị r’aKraist epẹ k’akẹ. (Luk 12:32; Ogan. 7:4v) Kụ aZọn aḅilhẹ aghaạph aghol enhọn egu, egu phọ ephẹn phọ ibụgh ni iboom dị tutụ odị aḅẹm mọ: “Mem dị iphẹn phọ meten bọ, mị uphogh ni kụ amiịn.” AZọn amhiịn eeghe? “siadạm awe oomo areelhe r’arughunughun r’aramạ r’arunhụ dị u/tue ubạl umuneni. Bidị umereghạ ni ghisigh agadạ odaạm emạ phọ r’aghisigh Oọny lyool Ogạ phọ.” (Bạl Ogananami 7:9-14.) Gbiom olhoghi odọ oḅaạl olhoghi dị aZọn amhoọgh, mem mọ odị alhegheri bọ mọ asiadạm awe kopamanhạm ni igey iiseeny ghisigh!
3. (a) Eeghe kụ iḍighi kụ uḍien phọ aZọn kakparamhị bọ ni omheeraam mọ ayira? (b) Yira kotuughạ eeghe siẹn emhuoghaạph phọ ephẹn phọ?
3 Dị iikia i/lo, uḍien phọ akparamhị ni omheeraam mọ aZọn. P’eeghe idị uḍien phọ akạr kụ akparamhị omheeraam m’ayira, eḍighi bọ edị yira kụ odi bọ mem mọ uḍien phọ amunughan bọ! Yira momiịn ni riisi erubal awe dị rokumu aZihova dị omhoọgh oḍuomolhoghi okpetenhaan igbogh iiḅaghamhị phọ, omhoọgh aghuḍum k’akee-pọ siẹn ade phọ. Siẹn emhuoghaạph phọ ephẹn phọ, yira kotuughạ olegheri ipẹ aZihova agananamhi bọ ḍigbogh aḍita phọ aḍeenhaan we phọ odị, dị epel li esi 80 asiạ epẹ omhạn. Ipẹ reten kụ yira ooḅeghiọn iyạl araraạr dị egbolhomaam egu phọ ephẹn phọ: (1) ipẹ bidị olheeny bọ (2) ekpisi phọ bidị oḍuạ bọ kụ oru. Ariphigh phọ iphẹn phọ yira kooḅeghiọn bọ ekparamhị ni omheeraam oomo abuphẹ oḍuom bọ olhoghi oḍighi aani apakirị egu phọ ephẹn phọ osẹph bọ.
AḌIGBOGH AḌITA PHỌ KOTỌL EGHẸN?
4. Ighẹn igey dị edi siphẹ aBaibul phọ kụ edị aKristẹn uḅenheẹn u/tue unaghanhạn, kụ ika kụ idị Anmụny Askul ABaibul phọ ogbatanhaạn mem dị rokaạph ilọ iphẹn phọ?
4 AKristẹn Uḅenheẹn ro/tughemhị ghan igey phọ ipẹ edi bọ siphẹ aBaibul phọ eḅẹm bọ mọ, aḍio ketọl li dị abugey awe kotọl siẹn ade phọ k’agee-pọ. (2 Kọr. 4:3, 4) Ḍio arodon, ibadị aKristẹn uḅenheẹn rotughemhị ghan mọ oomo abugey awe rokeel ghan k’akẹ mem dị omhuughu. Kuolọ Anmụny Askul ABaibul phọ odiighi ghan bọ we Watch Tower phọ emhiigh lhạ phọ 1879 kụ rekị, u/tughemhị ghan idiphọ. Bidị unaghanhạn ni mọ Enhaạn k’eḅilhẹ ni eḍighi de phọ Paradais, kụ ariisi erubal awe phọ abuphẹ onhaghanhạn bọ Enhaạn, kụ kotọl siẹn ade phọ—ko/tọl k’akẹ. Toroboiperolbọ, isighẹ ni mem kụ Anmụny Askul ABaibul phọ ogbi okuamhị olhegheri awe phọ koḍighi bọ we phọ abuẹn phọ ronaghanhạn ghan bọ Enhaạn.—Mat. 6:10.
5. Anmụny Askul ABaibul phọ umheeraam eeghe ilọ 144,000 phọ?
5 Anmụny Askul ABaibul phọ uḅilhẹ kẹn ni owaaghị omhiịn siphẹ igẹ iigbia phọ mọ bunhiin egu awe koḍighi budị “motagharạn . . . osighẹ oḍuanạm siẹn ade phọ”, oghị otooghị r’aKraist epẹ k’akẹ. (Ogan. 14:3) Awe dị omhạn 144,000 kụ koḍighi egu phọ epẹ phọ, kụ bidị koḍighi Kristẹn dị moḅọgh ghuḍum abidị ongọ aZihova ḅilhẹ kokumu nyodị eten dị ekpẹ oḍuomolhoghi mem mọ bidị kotọl bọ siẹn ade phọ. Kokaạph aani ika ilọ aḍigbogh aḍita phọ?
6. Anmụny Askul ABaibul phọ umheeraam eeghe ilọ aḍigbogh aḍita phọ?
6 Siphẹ uḍien phọ, aZọn aḅilhẹ amhiịn egu awe dị omhereghạ “ghisigh agadạ odaạm emạ phọ r’aghisigh Oọny lyool Ogạ phọ.” (Ogan. 7:9) Ipẹ aZọn aghaạph bọ iḍighi idị Anmụny Askul ABaibul phọ omheeraam mọ aḍigbogh aḍita phọ kotọl aani k’akẹ idiphọ 144,000 phọ. Kuolọ, eḍighi maạr dị 144,000 phọ r’aḍigbogh aḍita phọ orọl k’akẹ, ika kụ idị eniin egu kegbatanhaạn bọ r’ephedị phọ? Anmụny Askul ABaibul phọ uutughiạn ghan mọ aḍigbogh aḍita phọ, oḍighi Kristẹn dị u/kạr ghan unaghanhạn Enhaạn mem mọ bidị orọl bọ siẹn ade phọ. Bidị umheeraam mọ bunhiin abuẹn phọ udạph ghan ni siigbu aBaibul phọ, kuolọ uuḅughonhaan ghan r’aKristẹn Uḅenheẹn phọ. Anmụny Askul ABaibul phọ umheeraam mọ awe phọ abuẹn phọ uḍighi ni oḍeenhaan oophugh, kuolọ oophugh phọ abidị o/mhanhạm otooghị r’aKraist. Bidị uḅẹm mọ loor esi iduọn omheeraam mọ abidị esi Enhaạn u/manhạm bọ, aḍigbogh aḍita phọ kosianhaan omheerạ aghisigh agadạ odaạm emhạ phọ epẹ k’akẹ, kuolọ ko/tologhọm aani sigadạ.
7. Anmụny Askul ABaibul phọ, uutughiạn m’abuọ anhiạn kụ kotọl siẹn ade phọ mem Itooghị Oonịr Asiạ phọ, ḅilhẹ bidị umheeraam eeghe ilọ awe iḍiodiidi phọ okpẹ bọ oḍuomolhoghi phọ?
7 Kụ abuọ anhiạn kụ kotọl bọ siẹn ade phọ? Anmụny Askul ABaibul phọ umheeraam mọ mem dị mookpomoghi 144,000 phọ r’aḍigbogh aḍita phọ ogheelhom k’akẹ, abunhọn ariisi erubal awe kotọl li dị kokelọm ḍisẹph kirokirọ phọ ketọl bọ siẹn ade phọ eeḍiạn Oonịr Asiạ Itooghị phọ aKraist. Bidị umheeraam mọ; ariisi erubal awe phọ abuẹn phọ u/kumu aani ghan aZihova kụ egbi bọ oteẹny amem Itooghị Oonịr Asiạ phọ aKraist. Kparipẹ ghụn, bidị uutughiạn ghan mọ kotughemhị aani bidị ilọ areten phọ aZihova siphẹ Itooghị Oonịr Asiạ phọ. Ipẹ reten, kụ onmoom ghuḍum k’agee-pọ siẹn ade phọ buphẹ odạph bọ siigbu phọ aZihova, kuolọ buphẹ u/meera bọ udạph kopiemhi ni. Anmụny Askul ABaibul phọ uḅilhẹ kẹn ootughiạn ghan mọ, eeni abunhiin abuphẹ kokumu bọ idiphọ “araalhạ” siẹn ade phọ mem mọ amuphẹ phọ—eḅaramaạm “buphẹ iḍiodiidi phọ osianhaan bọ” (iduọn phọ pọ awe ph’abuphẹ okpẹ bọ oḍuomolhoghi phọ, omhuughu bọ kụ egbi bọ oteẹny amem mọ aKraist)—kookpomoghi okeelhom aani k’akẹ mem dị Itooghị Oonịr Asiạ phọ mesi eekunha.—Ps. 45:16.
8. Ighẹn iraạr agạ awe kụ edị Anmụny Askul ABaibul phọ ootughiạn ghan mọ komooghọm suọ rigbiom mọ Enhaạn?
8 Esi iduọn phọ, Anmụny Askul ABaibul phọ uutughiạn ghan mọ iraạr egu awe odi bọ: (1) 144,000, awe dị kotooghị r’aKraist epẹ k’akẹ; (2) aḍigbogh aḍita phọ omheeraam mọ abidị u/manhạm bọ, komeerạ ghisigh agadạ odaạm emhạ phọ aZizọs epẹ k’akẹ; (3) ariisi erubal awe dị kotughemhị aani ilọ areten phọ aZihova siphẹ Itooghị Oonịr Asiạ phọ aKraist.b Kuolọ esighẹ rekị, bịn aZihova aḍighi idị aḍiḅaạl igey phọ, ilọ itughemhị phọ iphẹn phọ emhiigh okpoghoronu enụm enụm.—Prov. 4:18.
AḌIḄAẠL IGEY PHỌ RESOOR GHAN BỊN
Siphẹ ookpomhoghan eephugh phọ ophạm bọ 1935, aḍigbogh aḍita awe dị omhoọgh oḍuomolhoghi orọl isiẹn ade phọ uḍiiny ni muụm (Miịn ekpịgh phọ 9)
9. (a) Eghẹn eten kụ edị aḍigbogh aḍita phọ komeerạ “ghisigh agadạ odaạm emạ phọ r’aghisigh Oọny lyool Ogạ phọ”? (b) Eeghe kụ iḍighi kụ omhoom onhaghanhạn aḍughụm mọ ayira ilọ Ogananami 7:9 amoọgh bọ emhụ?
9 Lhạ phọ 1935, ulhegheri ni we phọ oḍighi bọ ḍigbogh aḍita phọ aZọn amhiịn bọ siphẹ uḍien phọ. Abugbaanhaạn AZihova uru ni olhegheri mọ i/moghi dị aḍigbogh aḍita phọ komereghạ “ghisigh agadạ odaạm emạ phọ r’aghisigh Oọny lyool Ogạ phọ” eten egaan. Kparipẹ ghụn eḍighi eten dị otoomaạm. Ghalhamọ bidị kotọl li siẹn ade phọ, aḍigbogh aḍita phọ komeerạ ni “ghisigh agadạ odaạm emạ phọ” esi olhọgh elhegh iikpọ itooghị phọ aZihova ḅilhẹ r’osooromhi aloor ongọ elhiom mọ epẹ odị amhoọgh bọ idiphọ otooghiạ. (Isa. 66:1) Bidị komeerạ “ghisigh oọny lyool Ogạ phọ” esi oḍighi oḍeenhaan omheeraam oghị esi ekiạ etagharạn phọ aZizọs. Dị eghighimaạm aani iphẹn phọ, siphẹ Matiu 25:31, 32, eḅẹm mọ “oomo awe siẹn aḅirini phọ”—eḅaramaạm bukarạph phọ—“Kookpomoghi” ghisigh agadạ odaạm emhạ eghuan phọ Zizọs. Dị eegholhaan ni, areelhe phọ abuẹn phọ u/lo ghan epẹ k’akẹ, kuolọ odi ghan siẹn ade phọ. Omhoom onhaghanhạn aḍughụm mọ ophọn phọ akạr kụ amhoọgh emhụ. Ekaạph iyaạr phọ eḍighi bọ kụ aBaibul phọ u/kaạph bọ mọ kookpomhoghi ḍigbogh aḍita phọ okeelhom k’akẹ. Eniin egu bịn kụ edị oguanhaan bọ mọ komoọgh ghuḍum k’agee-pọ epẹ k’akẹ—144,000 phọ, “kụ kodạ . . . de phọ” r’aZizọs.—Ogan. 5:10.
10. Eeghe kụ iḍighi kụ emhoghi bọ ni dị aḍigbogh aḍita phọ kotuughạ ilọ areten phọ aZihova kụ egbi oteẹny itooghị Oonịr Asiạ phọ aKraist?
10 Emhiigh lhạ phọ eḍighi bọ 1935, Abugbaanhaạn AZihova moru olegheri mọ aḍigbogh aḍita phọ aZọn amhiịn bọ siphẹ uḍien phọ, eḅaramaạm egu aKristẹn dị okpẹ oḍuom olhoghi dị omhoọgh oḍuomolhoghi orọl isiẹn ade phọ k’agee-pọ. Orue okpetenhaan igbogh iiḅaghamhị phọ, kewạ dị aḍigbogh aḍita phọ kotuughạ ilọ areten phọ aZihova kụ egbi oteẹny amem Itooghị Oonịr Asiạ Phọ AKraist. Kewạ dị bidị koḍeenhaan omheeraam dị akpạr pidị bidị omhoọgh “inyaạm omerenyạn oomo araraạr phọ iphẹn” kemite bọ, kụ egbi oteẹny Itooghị Oonịr Asiạ Phọ AKraist.—Luk 21:34-36.
11. Eeghe kụ iḍighi kụ Anmụny Askul ABaibul phọ ootughiạn ghan bọ mọ eeni kosighẹ buniin awe okeelhom k’akẹ mem dị Itooghị Oonịr Asiạ Phọ aKraist mesi eekunha?
11 Kokaạph aani ika ilọ iphẹn oghaạph bọ mọ abuniin awe imạ areḍeenhaan kokeel k’akẹ mem dị Itooghị Oonịr Asiạ Phọ aKraist kesi eekunha? Ughaạph Ipẹ siạ dị meten siphẹ Watch Tower aFebruary 15, 1913. Oye atue ni apuru mọ, ‘Eeghe kụ iḍighi kụ aKristẹn dị u/kạr ukpẹ oḍuomolhoghi kụ kokeel bọ k’akẹ kparipẹ r’awe iḍiodiidi phọ okpẹ bọ oḍuomolhghi phọ koḅerion bọ?’ Aḍipuru phọ aḍiphẹ imite loor esi dị bidị ugbi ghan mọ: (1) kookpomhoghi ḍigbogh aḍita phọ okeelhom k’akẹ ḅilhẹ mọ (2) aḍigbogh aḍita phọ koḍighi Kristẹn dị omheeraam mọ u/manhạm.
12-13. Aḍibạm r’aḍigbogh aḍita phọ olọgh elhegh eeghe, idị egbolhomhaam iikpiạ phọ abidị?
12 Idiphọ yira momhiịn bọ ni, emhiigh lhạ phọ eḍighi bọ 1935, Abugbaanhaạn AZihova mokạr kụ onaghanhạn mọ abuphẹ koḅeẹny bọ eghạm Amagedọn kụ aḍigbogh aḍita phọ aZọn amhiịn bọ siphẹ uḍien phọ. Bidị abudị “mokpetenaan bọ iboom iminimiịn phọ” siẹn ade phọ, kụ kokiọm ni ghisigh kụ “olọ ghan [okiọm] anyụ mọ: ‘Apelieẹny phọ ayira aḍuạ ghan k’Enaạn phọ ayira erolọm bọ agadạ odaạm emạ phọ r’esi Oọny Iyool Ogạ phọ kụ ratu.’ ” (Ogan. 7:10, 14) Aḍinyạ iigbia phọ ekiọm ghisigh etughemhị mọ, abuphẹ koḅerion bọ okeelhom k’akẹ ‘ogbiighinhaan inhọn imạ oseenhaan’ dị epu ilọ awe iḍiodiidi phọ okpẹ bọ oḍuomolhoghi phọ. (Hib. 11:40) R’aḍiḅeeraạn, abumor phọ ayira umhiigh ni omhạgh aani awe oru okumu aZihova r’oḍuomolhoghi orọl isiẹn ade phọ k’agee-pọ.
13 Abuphẹ oḍighi bọ ḍigbogh aḍita phọ oḅaạl li olhoghi ilọ oḍuomolhoghi phọ abidị. Bidị olegheri mọ aZihova kụ k’amạ ekpisi lọ torobọ ebenhẹ odị dị akpẹ oḍuomolhoghi katọl akumu nyodị, mughumọ isiẹn ade phọ obobọ epẹ k’akẹ. Aḍibạm r’aḍigbogh aḍita phọ olọgh elhegh mọ aruunmo aghuḍum k’agee-pọ phọ eḍuạ esi onmạ ighirigiir phọ aZihova u/kpeanhaạn bọ kụ etu, dị eego esi ekiạ etagharạn phọ aZizọs Kraist.—Rom. 3:24.
OBỤGH IIKIẠ
14. Alhạ phọ 1935 r’eten, eeghe kụ iḍighi kụ ibadị ookia ghan bọ ilọ ipẹ imiịn aḍigbogh aḍita phọ kemunughan bọ?
14 Mem dị onhaghanhạn aḍughụm awe phọ aZihova r’oogholhaan lhạ phọ 1935, ibadị uukia ghan ni ilọ ipẹ onhụ awe phọ kotọl bọ siẹn ade phọ kobụgh bọ oḍighi ḍigbogh aḍita phọ. Esi omaạm, umor phọ Ronald Parkin amhạn 12 asiạ mem mọ onhaghanhạn aḍughụm ilọ aḍigbogh aḍita phọ akạr bọ aagholhaan. Odị aḅẹm mọ “mem mọ amuphẹ phọ, abukaaphọm dị r’omạn ni 56,000 bịn kụ urọl siẹn oomo aḅirinhi phọ, kụ siphẹ phọ eeni ogbogh opol uḍighi buphẹ mosaḅạr bọ ogheel k’akẹ. Aḍigbogh aḍita phọ u/kạr ubụgh mem mọ amuphẹ phọ.”
15. Ika kụ idị ookpomhoghi aḍigbogh aḍita phọ aphoph rakị ghisigh?
15 Toroboiperolbọ, siạ phọ ipẹ edaphạn bọ siphẹ, urom ni simisonarị oghiighị ibadị areelhe, kụ onhụ abạl Abugbaanhaạn phọ AZihova amhiigh obụgh. Kụ, lhạ phọ 1968, umiteom ni ḍinyạ dị oghol mọ The Truth That Leads to Eternal Life, kụ omhiigh osighẹ otughemhiọm ghan awe Baibul phọ. Eten phọ epẹ aḍinyạ phọ egbạ bọ eegholhomhi igey aBaibul phọ, iḍighi ni iyaạr dị aḍita awe onhaghạn igey phọ eten dị ke/mite ghan k’ekulha. Esi inya asiạ bịn, awe dị ropel li egbem erubal abumhoom abumatuạn kụ uḍiiny muụm. Kụ idiphọ iikpọ asiosị awe aCatholic remeel bọ pakirị epẹ Latin America ḅilhẹ r’inhọn areelhe, ḅilhẹ kẹn idiphọ oḅilhẹ bọ omheera mọ oḍighi oḍighi phọ ayira epẹ Eastern Europe r’iniin arikpisi ephẹn Africa, ariisi erubal awe uḍiiny ni muụm. (Isa. 60:22) Siạ dị ke/kạr ri ebia iboom, Oḍighom Mọ AZihova momiteom ni inhọn araraạr dị emhoon, olhoghonhaạn awe ḍighaạgh olhegheri ipẹ aBaibal phọ ratughemhị bọ. Dị iikia i/lo, aḍigbogh aḍita—dị r’opel li ophaanyạ erubal—kụ edị mookpomoghi nyiidiphọ.
AḌIGBOGH AḌITA DỊ OOKPOMOGHI ESI OOMO AREELHE
16. Aḍigbogh aḍita phọ koḍuạ eghẹn kụ otu?
16 Mem mọ aZọn ragẹ bọ uḍien phọ odị, odị aḅẹm mọ aḍigbogh aḍita phọ koḍuạ “oomo areelhe r’arughunughun r’aramạ r’arunhụ dị u/tue ubạl umuneni” kụ otu. Oyil phọ aZekaraya aghaạph ni k’eepẹ omhạn iniin phọ kẹn. Odị agẹ mọ: “Siẹn asiḍio eekunha phọ, ḍioph awe esi oomo arunhụ aḍiaḅạ isiẹn areelhe phọ kokpạph ni, ii, kokpạph ni okparamhị asuomạ onyọ aJu, kụ oḅẹm ghan mọ: ‘yoor kodạph nyinhạ, loor esi dị yoor onaghạn m’Enhaạn edi r’anyinha awe phọ.’ ”—Zech. 8:23.
17. Eeghe kụ edị moḍighi olhoghonhaạn aḍighaạgh we oomo areelhe r’arunhụ aḍiaḅạ kirokirọ?
17 Abugbaanhaạn AZihova olọgh elhegh mọ orue ookpomoghi oomo awe arunhụ aḍiaḅạ kirokirọ, pọ omoọgh osighẹ arunhụ aḍiaḅạ kirokirọ kụ oghaaphọm iiḅi iinhaghạn phọ. Kụ iḍighi kụ, yoor rogbạ ghan rinyạ dị rotuughaạm ghan Baibul phọ koteneghi inhọn arunhụ siạ dị repel li 130, Kuolọ nyiidiphọ yoor okạr ri olọgh ikuph dị emhanhạm esi oḍighi ogbạ oteneghi phọ, rukuron arunhụ aḍiaḅạ. Dị eegholhaan ni, aZihova raḍighi ni oḍighi iiḍaạny ph’odị ḍio arodon—ookpomoghi aḍigbogh aḍita phọ esi areelhe kirokirọ. Enhighenhaạn bọ itughemhị aBaibul phọ edi bọ runhụ aḍiaḅạ kirokirọ, arugu awe kirokirọ phọ abuẹn phọ moḅophoghạn rooḅereghị aZihova. Kụ molhegheriom Bugbaanhaạn phọ idiphọ awe dị rogbạ ghan ikpo onhụ phọ r’oophugh ḅilhẹ r’ephomhoghiạn abumor phọ abidị. P’eeghe idị ipẹ phọ eḍighi iyaạr okparamhị omheeraam!—Mat. 24:14; Jọn 13:35.
UḌIEN PHỌ RAMẠ GHAN EEGHE ESI AYIRA?
18. (a) Dị emhoọgh muuḅọph r’ipẹ ogẹ bọ siphẹ Isaiah 46:10, 11, uḍighi ika kụ i/ḍighi bọ iikia esi ayira mọ aZihova mamhunhenhi imiịn ilọ aḍigbogh aḍita phọ? (b) Eeghe kụ iḍighi kụ buẹn omhoọgh bọ oḍuomolhoghi orọl isiẹn ade phọ ko/loghoma bọ mọ u/loghomaạn aani bunọ?
18 Yira omoọgh ni oomo ariphigh otuạn obo ilọ imiịn aḍigbogh aḍita phọ! I/ḍighi iikia esi ayira mọ aZihova mamhunhenhi imiịn phọ ipẹ phọ eten dị olhoghi u/seere. (Bạl Isaiah 46:10, 11.) Aḍigbogh aḍita phọ oḅaạl li olhoghi ilọ oḍuomolhoghi phọ aZihova mangọ bọ bidị. Bidị u/loghoma mọ bunọ u/loghomaạm iduọn uwaloor iigbia phọ u/saḅạr aani bọ bidị okumuan r’aZizọs epẹ k’akẹ. Siẹn oomo aḍinyạ iigbia phọ, yira robạl ghan ilọ alhephiri r’anmariịr dị okpẹ oḍuomolhoghi dị uwaloor iigbia phọ kụ aaḅakị ghan, dị u/ḍighom aani 144,000 phọ. Esi omaạm, aZọn oḍiinyeom muụm mọ aḍighi aani ni oniin onyọ abuẹn ko/keel aani bọ k’akẹ. (Mat. 11:11) ADevid aḍighi aani ni nyoniin. (iiḍighi 2:34) Abuẹn phọ r’abunhọn dị ko/tue ogbi, koḅerion ni ongọ ghuḍum de dị eḍighi paradais. Oomo phọ abidị—ḅilhẹ r’aḍigbogh aḍita phọ—komoọgh ni eepoogh oḍeenhaan adọl oḅạr phọ abidị esi aZihova ḅilhẹ r’elhiom itooghị phọ odị.
19. Ika kụ idị omhunhughan imiịn phọ aZọn ilọ aḍigbogh aḍita phọ eghaạph elhọgh iiphaghamhiọm m’amem mọ reegboronhom ni?
19 Ephẹn kụ eḅẹl amem dị Enhaạn reekpomoghi riisi erubal awe oomo areelhe kirokirọ. Mughumọ oḍuomolhoghi ayira aḍighi olọ ogheel k’akẹ obobọ orọl isiẹn ade phọ, ewạ dị yira kologhonhaạn ḍighaạgh ibadị lọ edugh, oḍighi aani apakirị aḍigbogh aḍita “iyool igạ” phọ. (Jọn 10:16) Moọny amem, aZihova kasighẹ atumom igbogh iiḅaghamhị phọ, kesiemhi bọ eekunha itooghị omhạr awe ḅilhẹ r’aruukụ iiḅereghị phọ rekọm bọ imhinhimhiịn k’engọ omhạr awe. P’eeghe imạ eepoogh dị rekori oomo abuẹn oḍighi bọ ḍigbogh aḍita phọ—okumu aZihova k’agee-pọ!—Ogan. 7:14.
AḌUỌR PHỌ 139 See Yourself When All Is New
a Siẹn emhuoghaạph phọ ephẹn phọ, yira kooḅeghiọn uḍien phọ aZọn eghaạph bọ ilọ ‘asiadạm awe’ dị ookpomhoghi. Eten dị iikia i/lo, uḍien phọ ophọn phọ kakạr kụ akparamhị omheeraam oomo abuphẹ oḍighi aani bọ pakirị egu awe phọ abuẹn phọ mosẹph bọ.
b Miịn ḍinyạ phọ, Jehovah’s Witnesses—Proclaimers of God’s Kingdom, ipoḍi phọ 159-163.