Iiruẹn Phọ Enhaạn​—Odị Rangọ Ghan Ni Iphụr Arurụ Dị Ekasiạn Ḍughụm?

OYE dị atuughạ ilọ okuaḍio phọ, asighẹ ni iyaạr phọ bidị ropoghom ghan bọ aphoghomhiom okuaḍio phọ. Kụ amhiịn mọ ogbagarạ oghim rawạ ghan oghim ekpisi dị ibadị awe orughogh. Loor esi ogbolhomhaam mọ odị amhoọgh bọ aghị esi awe phọ, odị alhọgh ni iboom inyaạm ophụr awe phọ rurụ kụ egbi oteẹny amem dị oghim mọ k’akim.

Eniin phọ eten phọ, aZihova rapụr ri rurụ we phọ orugh bọ siẹn ade phọ ilọ “oghim” dị agbagarạ apu ipẹ abuẹn otuughạ bọ ilọ okuaḍio phọ rokaạph ghan bọ. Ika kụ idị odị raḍighi ghan bọ iduọn phọ? Ḅilhẹ eeghe kụ iḍighi kụ yira omheeraam bọ ni mọ odị angọ ni we mem dị ekasiạn oḍighi iyaạr omiteom? Omhiịn ophanyanhaạn phọ, ophụr ooḅeghiọn omhiịn iphụr arurụ dị aZihova m’angọ ghan siạ dị meten epẹ omhạn.

ASIMEM DỊ ENHAẠN MANGỌ GHAN IPHỤR ARURỤ

Simem aBaibul phọ, aZihova aphụr ri rurụ ilọ “oghim kirokirọ,” obobọ iiḍighi iiruẹn dị odị kasophonhaan buphẹ okạr bọ olhegheri kụ roḅaạr ghan emhụ k’oghị esi itọ ph’odị. (Prov. 10:25; Jer. 30:23) Torobọ amem mọ, odị alhọgh ghan ni mem dị ekasiạn aphurọm we phọ rurụ aḅilhẹ ghan aḅenhị mọ onmeeghi sidọl aghuḍum mọ abidị, orọl idị emhoọgh muuḅọph r’ogbi phọ odị. (2 Ki. 17:12-15; Neh. 9:29, 30) Oḍighi idị awe phọ komegheron emạ eten, odị agbor ghan asighẹ aḍighinhom rebenhẹ phọ oḅạr bọ nyodị siẹn ade phọ, kụ ogbeelhom ilọ iiruẹn phọ odị ḅilhẹ r’oḅenhiọm abidị odọ idị reegboronhom.​—Amos 3:7.

ANoa aḍighi ni oniin odị akpẹ oḍuomolhoghi dị Enhaạn asighẹ aḍighinhom. Esi ibadị asiạ, dị u/ḅarạm ghan oghiilhaan, odị aphụr ri rurụ we phọ abuphẹ ozooghị ghan bọ roozọ dị i/ḅaạl ḅilhẹ ogạm ghan bọ, ilọ Amuụm Aḍigho phọ amem mọ odị. (Gen. 6:9-13, 17) Odị aḅilhẹ kẹn ni aḅenhị bidị idị bidị koḍighi kụ okpetenhaan muphe phọ​—⁠dị tutụ oghol nyodị mọ oye dị aghaạph ghan mọ awe “orọl dọl aruukuan.”​—2 Pit. 2:5.

Etigheri ikuph phọ aNoa alhọgh bọ, awe phọ orọl bọ kụ egbi eteẹny Muụm Aḍigho phọ uphogh ni ogunhọm iphụr arurụ phọ Enhaạn. Bidị uḍeenhaan e/⁠moọgh omheeraam. Esi iduọn phọ, bidị umhuughu ni mem mọ “amuụm-aḍigho phọ aru bọ aghughom bidị aḍuanạm.” (Mat. 24:39; Hib. 11:7) Bidị ko/⁠tue oḅẹm mọ Enhaạn kụ edị bunọ rurụ ko/⁠phụr.

Inhọn asimem, aZihova aphụr ghan rurụ we phọ esi ekulha amem bịn kụ egbi oteẹny amem dị “oghim” iiruẹn phọ odị kakim. Ghalhamọ r’iduọn phọ ni, odị angọ ghan ni we phọ mem dị ekasiạn okiton. Esi omaạm, odị angọ ni iphụr arurụ weye Izipt iḍiodiidi phọ ilọ Aḍioph Areezẹgh phọ kụ egbi oteẹny amem mọ kemite bọ. Eniin amem, aZihova arom ni rebenhẹ phọ odị Mozis r’Eeron oghị ophụr awe phọ rurụ ilọ ezẹgh dị emhunhenhiom oḍual, eḍighi bọ ibikpo dị kekaraghụ kụ ekọm muboom amuphe. Eḍighi bọ edị ibikpo phọ kekaraghụ ḍierị phọ aḍio phọ, kotue ni oḅẹm mọ Enhaạn ingọ ni bidị mem dị ekasiạn owạ ariisi dị bidị koḍiku mem dị ibikpo phọ kemiigh bọ ḍughụm? ABaibul phọ aḅẹm mọ: “Arebenhẹ phọ aFero abuphẹ oghiilhaan bọ ekpo onhụ phọ aZihova uugboronhom ni osighẹ rebenhẹ abidị r’inhạm abidị odoghoḍi ilhoghi aruutu, kuolọ buphẹ umaghamhị bọ maạr ekpo onhụ phọ aZihova uwilhẹ yogh ni rebenhẹ abidị r’inhạm abidị epẹ iizo phọ.” (Ex. 9:18-21) Eten dị eegholhaan, aZihova angọ ni bidị iphụr arurụ dị ekasiạn, iduọn phọ pọ abuphẹ onhaghanhạn bọ aZihova ukpetenhaan ni muphe phọ abueriphọ ophe bọ.

Uphụr ri kẹn rurụ Fero r’arebenhẹ phọ odị, kụ egbi oteẹny amem mọ ezẹgh phọ emhunhenhiom bọ ḍioph phọ emheelhom bọ bidị. Toroboiperolbọ, elologhi phọ abidị i/⁠meera mọ bidị onhaghanhạn iphụr arurụ phọ. (Ex. 4:22, 23) Esi iduọn phọ, ikpanhạ anmụny phọ abidị umhuughu ni. P’eeghe imananaany dị emite! (Ex. 11:4-10; 12:29) Bidị m’utue ni odaphạn iphụr arurụ phọ kụ egbi oteẹny amem dị iiḅaghamhị phọ mimite ḍughụm? Ii! AMozis o/⁠roph mem oḅenhị anmụny Izrạl ilọ ezẹgh phọ emhunhenhiom bọ ḍioph phọ ḅilhẹ r’idị bidị koḍighi kụ opẹl rughunotu abidị. (Ex. 12:21-28) Ika awe kụ udạph iphụr arurụ phọ? Odaphạn iniin idị ogbiighi omhiịn, iraạr erubal awe Izrạl “r’oolhoọgh awe” dị u/ḍighi aani buọ Izrạl ḅilhẹ r’abunhọn abuọ Izipt uḍighan aani buọ Izrạl, bịn okpetenhaan ghelhẹ phọ Enhaạn oḍuạ Izipt.​—Ex. 12:38; igẹ dị edi ude.

Odaphạn reḍeenhaan phọ ipẹ phọ, oomo amem aZihova angọ ghan ni we phọ mem dị ekasiạn odaphạn iphụr arurụ phọ odị. (Deut. 32:4) Enhaạn atuạn eeghe kụ aḍighi ghan bọ iduọn phọ? Otelhedom mọ aPita aḅẹm ni mọ aZihova “o/⁠wạ ophiemi r’oniin oye, odị rawạ ghan ghụn mọ oomọ phọ awe phọ okiton esi ikarạph phọ abidị.” (2 Pit. 3:9) Okạr agey, Enhaạn amhoọgh agey ogbolhomhaam aghị esi awe phọ. Odị awạ ghan dị bidị kokiton kụ egbi oteẹny amem dị aghelhẹ phọ odị k’ameelhom bidị.​—Isa. 48:17, 18; Rom. 2:4.

ONHAGHANHẠN GHAN IPHỤR ARURỤ PHỌ ENHAẠN ḌIO ARODON

Ḍio arodon, ewạ mọ oomo awe onhaghanhạn aani iphụr arurụ dị reegboronhom ni, dị rogbeelhom oomo isiẹn ade phọ. Mem mọ aZizọs arọl bọ siẹn ade phọ, odị aphụr ri rurụ mọ kopiemhi ni eghimoghọm araraạr aḅirinhi phọ ophọn phọ mem ‘igbogh iiḅaghamhị phọ’. (Mat. 24:21) Idị egbolhomaam iiruẹn phọ odị epẹ ghisigh, odị angọ ni imiịn dị eghaạph ilọ araraạr dị abumatuạn phọ komiịn kụ olegheriom mọ amem mọ meteẹny. Oḍighi iduọn phọ, aZizọs amạ ni raraạr kirokirọ dị memhiigh ni remiteghu ḍio arodon.​—Mat. 24:3-12; Luk 21:10-13.

Dị emhoọgh muuḅọph r’imiịn phọ ipẹ phọ, aZihova rakpaariọm ni torobọ oye osooromhi aloor ongọ itooghị ephomhoghiạn phọ Odị. Odị rawạ mọ abuphẹ phọ ronaghanhạn ghan bọ nyodị oghelhọm imạ eten aghuḍum nyiidiphọ, ḅilhẹ r’aḍisẹph kirokirọ siphẹ omhoom aḅirinhi phọ odị. (2 Pit. 3:13) Oḍighi idị awe komoọgh omheeraam okị esi aruguanhaan phọ odị, aZihova mamiteom dom dị kepẹl sighuḍum awe​—⁠adom mọ pọ “ooḅi oghaạph omạr phọ,” ḍiẹn kụ adom mọ aZizọs aḅẹm bọ mọ “kokaạph ni oleenye oomo aḅirini phọ, ogbạ oIeenyemi oomo aramạ.” (Mat. 24:14) Enhaạn maakpomoghi bugey abuseenyom oghị ongọ “ogbaanhaạn,” kụ mogbeelhom ni dom mọ Enhaạn rere dị emhạn ni 240. AZihova rawạ mọ ibadị awe odaphạn iphụr arurụ phọ, obọ okpetenhaan “oghim” iiruẹn phọ odị eḍighi bọ elọ elhiom eḍighinhom iyaạr.​—Zeph. 1:14, 15; 2:2, 3.

Esi iduọn phọ, opuru ghan mughumọ aZihova rangọ ghan ni mem dị ekasiạn kụ ka/ḍipuru dị ewạ mọ yira opuru ghan siẹn amem mọ amuẹn phọ. Ariphigh phọ eḍeenhaan ni mọ odị rangọ ghan ni mem dị ekasiạn. Aḍipuru dị ewạ ghụn mọ opuru pọ: Awe komeera ni odaphạn iphụr arurụ phọ Enhaạn nyiidiphọ amem mọ edi bọ ḍughụm? Eḍighi idị yira phọ abuẹn oḍighi bọ rebenhẹ phọ Enhaạn kologhonhaạn ḍighaạgh ibadị awe lọ edugh ni, okpetenhaan aani eekunha eghimoghọm araraạr phọ ephẹn phọ.