Kookolhobian Nyiidiphọ Ilọ Ekperenhom Arookonhom

Utuạn eeghe kụ kookolhobian bọ? Ekperenhom dị olhoghi u/seere, iyaạr ketue ni emite dị kemoghi ni rookonhom ḅilhẹ r’omunheẹny oye emhinhạ arookonhom. Esi iduọn phọ, ḍighi iyaạr amiteom nyiidiphọ pidị nạ amhoọgh olhoghonhaạn aḍighaạgh ilọ oteẹny imạ arookonhom eru maạr lọ iyaạr emite. Nạ aḍighi iduọn phọ pọ nạ raḍeenhaan ghan mọ nạ alhọgh ni eegu ghuḍum ḅilhẹ r’itọ phọ aZihova ilọ iḅaạl.—Iiḍi 15:28, 29.

Nạ kaḍighi eeghe ookolhobian?

• Ḅeeḅereghị kụ amiigha loor ageeghị kạd phọ oghol bọ mọ durable power of attorney (DPA).a Abukaaphọm dị moḍiiny muụm kotue ni oteẹny opọ odi bọ gạ ongooghị arinyạ phọ osighẹ DPA kạd phọ olọ aloor abidị ḅilhẹ r’akạd phọ opọ oghol bọ mọ Identity Card (ic) olọ ibạm anmụny abidị

• Eru maạr lọ nạ odi r’eghun, pọ ḅenhị ikumor awe phọ ongọ nyinhạ Information for Expectant Mothers (S-401). Aḍinyạ phọ aḍiẹn phọ kelhoghonhaạn nyinhạ ḍighaạgh osopha ogey osopha ilọ arookonhom, siẹn nạ odi bọ r’eghun phọ r’amem emariạ

• Eru maạr lọ nạ rawạ oghị arookonhom dị oghaạph iḅaạl kamite ni obobọ komhunheẹny ni nyinhạ emhinhạ, pọ ḍighi ni idị ikumor awe phọ kolhegheri kopol amem kụ aḅenhiọm buọ arookonhom mọ m’onyọ Ogbaanhaạn aZihova katu ni aphogh nyinhạ

Ikumor awe phọ kolhọgh ika ḍighaạgh? Bidị kotue ni olhoghonhaạn nyinhạ ḍighaạgh ogeeghị aDPA kạd phọ. Toroboiperolbọ, ikumor awe phọ kụ ko/sophanhaan nyinhạ osopha ilọ arookonhom mọ obobọ ko/sogh iitughiạn esi lọ emhoghi m’oye phọ r’aloor kụ asopha. (Rom 14:12; Ga 6:5) Mem dị nạ aḅenhị ikumor awe ookpomhoghan phọ anyinha mọ nạ amheelhom ni e/moon dị oghaạph iḅaạl kamite ni, elhom elhom bidị kokol li emhụ anạ omạgh buẹn odi bọ gạ aHospital Liaison Committee (HLC).

Ika kụ idị aHLC kolhọgh ḍighaạgh? Otughemhị bumor phọ odi bọ HLC olhoghonhaạn aḍighaạgh buọ arookonhom ḅilhẹ r’abuọ iilhogh olhegheri aḍimheerạ phọ ayira ilọ iḅaạl. Bidị kotue ni oḍeenhaan opọ raakonhom bọ nyinhạ inhọn areten arookonhom dị iḅaạl ko/lhọgh. Kụ eru maạr lọ ewạ, bidị otue kẹn ni owaanhaạn nyinhạ onyọ arookonhom dị kameera ookonhom dị iḅaạl ka/lhọgh.

IPOGH VIDIO PHỌ ILỌ OSAḄẠR AROOKONHOM DỊ EGBOLHOMAAM IḄAẠL, KỤ EPHAGHARANHAẠN ḌIPURU PHỌ EDAPHẠN BỌ SIẸN:

• Nạ atuughạ eeghe siẹn avidio phọ ophọn phọ dị kelhoghonhaạn nyinhạ ḍighaạgh ookolhobian okori ilọ ekperenhom arookonhom dị kemoghi iḅaạl?

  Your answer