Nạ Raḍighinhom Ghan Ni Ibạl ABaibul Phọ Ronaghanhạm Ghan Bọ Rurụ?

ABaibul phọ ophọn ronaghanhạm ghan bọ rurụ phọ pọ oghẹn? ABaibul phọ aạl bọ onhaghanhạm arurụ phọ pọ aNew World Translation phọ ni dị aạl olhọgh siphẹ intanẹt phọ. Enụm enụm romiteoghom ni ibadị arunhụ. Eniin iyaạr dị eḍighan elhegh ilọ aBaibul phọ ophọn phọ abumor r’abumaranhi kirokirọ kụ roḅạ ghan esi awe aBaibul phọ. Robạl ghan ikpo-onhụ phọ eten dị eegholaany r’eenyuụm orue okạr omiteom adom aBaibul phọ.

Ika kụ idị ibadị momhooghọm suọ ibạl aBaibul phọ iphẹn phọ? Ibadị awe dị rogbor ghan konhaghạn iḅạl aBaibul phọ iphẹn phọ oḅẹm mọ Ekpo-onhụ phọ Enhaạn mekạr etu eye esi abidị. Bidị ologhoma mọ onhaghạn aroḍọgh kirokirọ phọ egbariọn bọ buẹn roḅạ bọ, rekịgh ghan mudị bidị okạr kụ romiịn aani ipẹ remite bọ, bịn onhaghanhạn aḍughụm mọ abidị ilọ ipẹ ogẹ bọ mekạr eegholaany. (Pr 4:5) Ibadị oḅilhẹ kẹn omiịn mọ onhaghạn ghan ibạl phọ iphẹn phọ reedereghị ghan bidị mem dị bidị olhoghoma ooḅaghamhiạn aloor.—Ps 94:19.

Mem dị aạl Ekpo-onhụ phọ Enhaạn omiteom retir ghan ni iboom sighuḍum mọ ayira. (2Ch 34:19-21) Eḍighi maạr dị apakirị obobọ okpom aBaibul phọ ophọn phọ odi onhụ dị nạ anhaghạn, nạ katue ni asighẹ ogbor ghan onhaghạn ibạl aBaibul phọ aḍighi pakirị aghuḍum mọ anạ ḍughụm?

IPOGH VIDIO PHỌ OMITEOM ABAIBUL PHỌ RONAGHANHẠM GHAN BỌ RURỤ—OOKPERA PHỌ, KỤ EPHAGHARANHAẠN DIPURU PHỌ EDAPHẠN BỌ SIẸN:

Eeghe kụ iḅeraạn nyinhạ ilọ ipẹ romiteoghom bọ Baibul onaghanhạm arurụ phọ?