Asipuru Dị Abuẹn Robạl Ghan Bọ Rinyạ Phọ Ayira Opuru

Iphẹn aPọl aḅẹm bọ mọ: “Esi ologh phọ mị mamugh,” remạ ghan eeghe?—Gal. 2:19.

APọl agẹ mọ: “Iilogh phọ mighiigh imị eseere kụ mị awilẹ bọ, pidị mị arolonaạn Enaạn.”—Gal. 2:19.

Iphẹn aPọl agẹ bọ emoọgh muḅọph r’ikpanhạ adom mọ aPọl agẹ bọ aghiọm ookpomhoghan phọ aGaletia epẹ Rom. Abuniin aKristẹn momhiigh rodạph bukarạph abutughemhiạ. Abutughemhiạ phọ abuẹn phọ utughemhị ghan mọ orue omhoọgh apelieẹny memoghi odạph ghan Iilhogh aMozis, ekạr ekpaariọm oduna ghan. Kuolọ aPọl alhegheri ni mọ Enhaạn o/kpaariọm mun we mọ oduna yogh omhoọgh apelieẹny. Odị angọ ni riphigh dị egbạgh ikarạph itughemhị phọ iphẹn phọ, kụ aghị ghisigh akparamhị omheeraam abumor phọ esi ekiạ etagharạn phọ aZizọs Kraist.—Gal. 2:4; 5:2.

ABaibul phọ akaạph ni aagholhomhi mọ oye dị mamhugh o/lhegheri mun iyaạr obobọ ilọ araraạr phọ ipẹ ekitonhom bọ nyodị. (Eccl. 9:5) Esi iduọn phọ, mem mọ aPọl aḅẹm bọ mọ: “Esi ologh phọ mị mamugh,” odị amạ ghan mọ Olhogh phọ aMozis o/phạm mun nyodị. Kparipẹ ghụn, mọ odị “atolonaạn Enaạn” loor esi omheeraam mọ odị amhoọgh bọ aghị esi ekiạ etagharạn phọ aZizọs.

Aloor “esi olhogh” phọ kụ edị aPọl anmia bọ. Ika? Odị r’aloor agbạ ni amiteom mọ “rotuạn ghan omheeraam [aZizọs] Kraist kụ Enaạn kesighinọm mọ ophọn oye aruukuan ni, ro/tuạn ghan ooko Ologh phọ aMozis.” (Gal. 2:16) Okạr agey, Olhogh phọ aḍighi ni ephigh iyaạr. APọl agbạ aḅenhị buọ aGaletia mọ: “Uḅarạm ologh phọ obọ awe olegheri iyaạr dị opiomạn aru, kụ uwạ mọ erọl li tutụ eteẹny mem mọ onyọ eemarạ phọ Ebraham, opọ aḍighi bọ emhụ oguan phọ, katu bọ.” (Gal. 3:19) Ii, Olhogh phọ agananamhi ni mọ awe dị u/munughan ko/tue ooko Olhogh phọ eten dị emhunhughan, kụ mọ awe omoghi ni ekiạ dị emhunhughan. Esi iduọn phọ, Olhogh phọ alhoghonhaạn ḍighaạgh we olhegheri mọ aKraist kụ “eemarạ phọ” oguan bọ. Amem dị yira omhoọgh omheeraam oghị esi aZizọs Kraist kụ edị Enhaạn kụ usighẹ iyira idiphọ awe aruukuan. (Gal. 3:24) APọl aghaạph iphẹn phọ loor esi dị esi Olhogh phọ kụ edị odị alhọgh bọ elhegh aḅilhẹ amhoọgh omheeraam aghị esi aZizọs. Esi iduọn phọ aPọl amhugh ni “esi ologh phọ” bịn “arolonaạn Enaạn.” Odị o/rọl mun eeḍiạn iikpọ Olhogh phọ, kuolọ iikpọ Enhaạn.

APọl aghaạph ni idị eghighimaạm iphẹn phọ siphẹ aḍinyạ phọ odị agẹ bọ aghiọm buọ aRom. “Buọ asiya amị . . . Idiphọ oḅarạm bọ igbaany aroozọ phọ anyinha r’aKraist oghiigh bọ siphẹ oreeny . . . Muukpọ iyira iḍigh iilogh phọ, idị eḍighi bọ yira momugh ootoghonaạn ipẹ iphạm bọ iyira.” (Rom. 7:4, 6) Esi aBaibul phọ ephẹn phọ r aGaletia 2:19, remạ ghan kemiteom mọ aPọl o/ghaạph ghan ilọ omhugh loor idị odị aḍighi osoroghuom Iilhogh. Kparipẹ ghụn, odị aghaạph ghan ilọ etagharạn phọ odị amhoọgh bọ. Olhogh phọ o/phạm mun nyodị r’abunhọn dị orọl idiphọ odị. Bidị momhoọgh etagharạn esi omheeraam mọ bidị omhoọgh bọ oghị esi ekiạ etagharạn phọ aKraist.