Oḅilhẹ Okparamhị Asiya Phọ Anạ R’aZihova

TOROBỌ alhạ, oḅilhẹ ghan ni romạgh koḅulhemhi siẹn ookpomhoghan phọ iyool phọ aZihova. Gbiom olhoghi iboom ibo dị retọl ghan “epẹ k’akẹ” mem dị oniin onyọ abuẹn phọ aḅula siẹn ookpomhoghan phọ! (Luk 15:7, 10) Eḍighi maạr dị momhạgh nyinhạ oḅulhemhi, pọ kuphom ni owol m’aZizọs, aruukpaạny phọ, ḅilhẹ r’aZihova r’aloor oḅaạl li olhoghi iduọn nạ maḅilhẹ bọ amheerạ agạ igey phọ. Kuolọ, iduọn nạ rakparaghạ bọ oḅilhẹ okparamhị asiya arighirị phọ anạ r’aZihova, eeni nạ kasoman ni ipaanhaạn. Eeghe kụ iniin ipaanhaạn phọ, kụ eeghe kụ kelhoghonhaạn nyinhạ ḍighaạgh?

EEGHE KỤ IPAANHAẠN PHỌ?

Ibadị romoọgh ghan iitughiạn dị ii/leeny mem dị bidị oḅula siẹn ookpomhoghan phọ. Eeni nạ alegheri ni ipẹ Uw-emhạ phọ Devid alhoghoma bọ. Ghalhamọ r’iduọn osạr bọ ni owilhenhaạn nyodị, odị aḅẹm mọ: “Ikarạph phọ amhị misoroghuom imhị.” (Ps. 40:12; 65:3) Olhoghoma apum r’umugholoor ketue ni etọl esi ibadị asiạ olhoghi opọ aḅula bọ siẹn ookpomhoghan phọ. Isabelle, oniin odị ophorogh esi asiạ dị repel li 20 asiạ,a aḅẹm mọ, “ikparanhaạn ni imhị omheeraam mọ aZihova akạr ri asạr uwilhenhaạn imhị.” Eḍighi maạr dị nạ aḅonyonhu azuan, pọ keḅilhẹ kẹn eḍighi idị asiya phọ anạ r’aZihova kedugh. (Prov. 24:10) Ka/meera ipẹ phọ emitenhaan nyinhạ.

Abuniin romoọgh ghan ni oghiilhaan esi oḍighi phọ odi bọ oḅilhẹ oḅulhemhi asiya oye phọ r’aZihova. Mem dị omhạgh Antoine oḅulhemhi siẹn ookpomhoghan phọ, odị aḅẹm mọ, “mị ulhoghoma mọ mị mawulha oomo araraạr phọ mị atuughạ bọ idiphọ onyọ aKristẹn.” Odọ phọ olhoghoma phọ opọ phọ katue ni akọm idị abuniin kokiilhaan olhọgh inyaạm rukumuan Omhạr phọ.

Omaaniọm iduọn, oye dị ogbogh eghim dị aḅarạm muụm alhereghi otu phọ eeni kaḅonyonhu ni azuan mem dị aatughiạn mem mọ r’inyaạm kesighẹ bọ oḅilhẹ olhọgh otu phọ. Igina phọ kẹn, eḍighi maạr dị asiya phọ anạ r’aZihova kụ ephụ loor esi igbogh ikarạph dị nạ aḍighi, eeni nạ kaḅonyonhu ni azuan mem dị nạ aatughiạn inyaạm mọ r’amem mọ kesighẹ bọ oḅilhẹ oḅulhemhi asiya phọ anạ r’aZihova. Kuolọ olhoghonhaạn aḍighaạgh odi ni.

AZihova rumhạgh ni iyira mọ: “Itu nyiidiphọ, oḅilhẹ oḅophoghạn oolemhi raraạr igbo ayira.” (Isa. 1:18) Eeni nạ malhọgh ni iboom ikuph “oolemhi araraạr.” AZihova aphomhoghiạn nyinhạ iboom esi ikuph phọ nạ alhọgh bọ. Tuutughiạn aạ: Esi ikuph phọ nạ alhọgh bọ, aZihova mamhoọgh ephigh ophagharanhaạn aSetan!—Prov. 27:11.

Iphẹn phọ meḍighi idị nạ maḍuraan atuman aZihova, kụ odị aguanhaan ni oḅilhẹ oḍuraan aani otuman anạ. (Jems. 4:8) Toroboiperolbọ, emoghi ni ibadị araraạr dị epelhom oḍighi idị abunhọn kolegheri nyinhạ idiphọ oye dị maḅula siẹn ookpomhoghan phọ. Ewạ mọ kparamhị ephomhoghiạn phọ nạ amhoọgh bọ aghị esi Odẹ phọ anạ ḅilhẹ r’Oyaghirị phọ anạ, Zihova. Ika kụ idị nạ kaḍighi bọ iphẹn phọ?

PIGHI SIIGBU DỊ NẠ KATUE ATEẸNY IDUỌN NẠ RAḄILHẸ BỌ KAḄULHEMHI

Kparaghạ ophighi asiigbu dị nạ katue ateẹny. Legheri mọ iḅẹl iphighiom mọ nạ amhoọgh bọ—ḅilhẹ r’olhegheri iyaạr phọ nạ amhoọgh bọ ilọ aZihova r’aguanhaan ilọ aghisigh phọ edi ni loor anạ. Kuolọ ewạ ni mọ ḅilhẹ aalemhi dọl aghuḍum onyọ aKristẹn phọ anạ, kụ iphẹn phọ eḅaramaạm oḍighi oghaạph iiḅi iinhaghạn phọ, r’ogbor ghan ooḅughonhaan abumor r’abumarani phọ ḅilhẹ r’oghị ghan ituughạ. Ooḅeghiọn siigbu phọ edaphạn bọ siẹn.

Gbor ghan aḅaanhaạn aZihova. Odẹ phọ anạ anaghanhạn ni mọ oboom olhoghoma apum mọ kaḍighi ni idị kekparanhaạn nyinhạ oḅaanhaạn odị esi iiḅereghị. (Rom. 8:26) Toroboiperolbọ, ‘ḅeeḅereghị ghan oomo amem’ aḅenhị aZihova odọ idị nạ rawạ osighẹ odị righirị. (Rom. 12:12) Andrej aghaạph mọ: “Mị ulhoghoma ni oboom apum r’umugholoor. Kuolọ torobọ amem dị mị aaḅereghị amhạn, olhoghoma phọ opọ phọ rasoor ghan ni. Mị raloghoma ghan eephọ ekpom.” Eḍighi maạr dị nạ u”legheri iyaạr oghaạph, pọ ḅeeḅeghiọn iiḅereghị Uw-emhạ phọ Devid akiton bọ esi ikarạph, ogẹ bọ siphẹ Psalms 51 r’65

Gbor ghan atuughạ Baibul phọ. Iphẹn phọ kengọ inyaạm omheeraam mọ anạ eḅilhẹ eḍighi idị ephomhoghiạn phọ anạ esi aZihova kebụgh. (Ps. 19:7-11) AFelipe aḅẹm mọ, “iyaạr phọ eḍighi bọ kụ mị adugh bọ aḅilhẹ aḍighi iyaạr dị eeph esi aZihova, pọ aloor esi dị mị u/moọgh ghan edeọm ituughạ aBaibul ogina amhị. Mị u/wạ mun oḍighi idiphọ phọ iyạl amem. Esi iduọn phọ mị usopha ni ophạm ghan ituughạ aBaibul ogina amhị.” Nạ katue ni aḍighi aani iniin phọ. Eḍighi maạr dị nạ amhoghi olhoghonhaạn aḍighaạgh omhiịn arumhuoghaạph dị ekpeanhaạn dị nạ kaaḅeghiọn ghan, pọ puru onyọ umor obobọ umarani dị asianhaan.

Ḅilhẹ akparamhị siya arighirị abumor r’abumarani phọ anạ. Ibadị dị oḅula siẹn ookpomhoghan phọ rooḅaghamhiạn ghan loor mọ abunhọn kopogh ghan bunọ ekarạph ekpeḍien obobọ kokaghạm bidị olhoghi. Umarani phọ Larissa aḅẹm mọ: “Umugholoor akạr kụ usiph imhị. Mị ulhoghoma mọ mị mabi ookpomhoghan phọ. Iitughiạn phọ iphẹn phọ irọl li olhoghi amhị ebia.” Legheri mọ ikumor awe phọ r’abunhọn abumor dị osi omhanhanhaạm onyạ ni olhoghonhaạn anạ ḍighaạgh iduọn nạ raḅilhẹ bọ kalhọgh akparamhị siya phọ anạ r’aZihova. (Miịn igbe phọ “Ikumor Awe Phọ Koḍighi Eeghe?”) Olhoghi abidị aḅaạl agey iduọn nạ maḅula bọ, kụ bidị rowạ ni mọ kiọm ghisigh aḍighi ghan igey!—Prov. 17:17.

Eeghe kụ keḍur nyinhạ egbiemhị ookpomhoghan phọ? Pinomaam aani ghan bin raraạr phọ ipẹ abumor r’abumarani phọ roḍighi bọ—aghị ghan ituughạ aḅilhẹ adạph ghan bidị amite epẹ erugh phọ. Ika kụ idị iphẹn phọ kelhoghonhaạn nyinhạ ḍighaạgh? AFelix aḅẹm mọ: “Abuọ ookpomhoghan phọ ugon ghan ni dị mị kaḅula. Mị ulhoghoma mọ mị amạn ni maạr. Bidị ulhoghonhaạn ni imhị ḍighaạgh oḅilhẹ oḍigh isiẹn eghunotu phọ ephẹn phọ, oḅilhẹ oḍighi idị mị alhoghoma mọ mosạr uwilhenhaạn imhị, ḅilhẹ r’oghiọm aghisigh okumu aZihova.”—Miịn igbe phọ “Eeghe Kụ Edị Nạ Kaḍighi?”

NYINHẠ KI/PHẸR!

ASetan kasighẹ ghan ni “ogbogh oghim” iiḅaghamhị atu esi anạ, ilọ odughe anạ iduọn nạ rakparaghạ bọ oḅilhẹ olhọgh okparamhị asiya phọ anạ r’aZihova. (Luk 4:13) Kookolhobian okparamhị otu asiya arighirị phọ anạ r’aZihova.

Idị egbolhomaam iyool phọ odị, aZihova aguanhaan ni mọ: “Mị kawạ ipẹ mepheeghu bọ, aḅulemhi ipẹ meyeelha bọ, akoroghiọm ukpe ipẹ eḍighima bọ raraạr phọ, aakonhom ipẹ reerurughiạn bọ.” (Ezek. 34:16) AZihova malhoghonhaạn ni ḍighaạgh ibadị abudị momheel ghan oḍuạ siẹn igey phọ oḅilhẹ oḅula isiẹn ookpomhoghan phọ. Esi iduọn phọ, kuphom ni owol mọ odị aakolhobian ni olhoghonhaạn anạ ḍighaạgh dị nạ kaḅilhẹ alọgh akparamhị siya phọ anạ r’odị.

Ikumor Awe Phọ Koḍighi Eeghe?

Ikumor awe phọ omoọgh ni oboom oḍighi olhoghonhaạn aḍighaạgh oye dị omhạgh oḅulhemhi, orue oḅilhẹ oolemhi asiya phọ odị r’aZihova. Lọgh elhegh raraạr dị ewạ mọ ikumor awe phọ oḍighi ongọ buphẹ omhạgh bọ oḅulhemhi.

Ingọ bidị okuphom owol. Otelhedom mọ aPọl alhegheri ni mọ olhoghi oye dị akiton esi ikarạph atue ni ‘agurọgh’ nyodị akiigh. (2 Kọr. 2:7) Odị atue ni ameel aḍighanhaan olhoghoma umugholoor r’oḅonyonhu ozuan. APọl aphụr rurụ ookpomhoghan phọ mọ: “Isạr bịn ewiIenaạn ekparamị ghan oIoghi odị.” Ewạ ni mọ ongọ ghan okuphom owol buphẹ omhạgh bọ oḅulhemhi mọ aZihova r’abumor r’abumarani phọ opomhoghiạn ni bidị iboom. Osẹph ghan abidị egbạ gbạ amem ketue ni eloghonhaạn bidị ḍighaạgh, eḅilhẹ ekoph bidị esighẹ esi oḅonyonhu ozuan.

Iiḅereghị r’abidị. “Oye aruukuan kụ aaḅereghị, iiḅereghị phọ remoọgh ghan ni iikpọ keḍighi ekol.” (Jems. 5:16) ALarissa, oghaạph bọ oghol epẹ omhạn aḅẹm mọ: “Mị uḅenhị ni ikumor awe phọ iikia phọ r’oghiilaan phọ mị amhoọgh bọ. Bidị uuḅereghinhaạn ni imhị. Pọ kụ amem dị mị alhegheri mọ ikumor awe phọ imhị u/ghaghạm olhoghi. Bidị rowạ ghụn olhoghonhaạn amhị ḍighaạgh oḅilhẹ oolemhi asiya phọ amhị r’aZihova.” ATheo aḅẹm mọ: “Iiḅereghị ikumor awe phọ ingọ imhị okuphom owol mọ aZihova akạr ri uphomhoghiạn imhị ḅilhẹ mọ ramiịn ghan kẹn igey phọ ipẹ mị raḍighi bọ, k”ogina ikarạph phọ amhị bịn.”

Isighẹ bidị righirị. Buphẹ omhạgh bọ oḅulhemhi siẹn ookpomhoghan phọ omoghi ni righirị. Oniin okumor oye dị oghol mọ Justin aḅẹm mọ, “Sighẹ ni aḍighinhom torobọ eepoogh lọ nạ amhoọgh omhạgh aani abidị mem lọ nạ ramite epẹ erugh phọ ḅilhẹ r’oghị ghan ilhoghi aruutu abidị ophogh abidị. Emạn maạr agey osighẹ abidị righirị!” Onhọn okumor oye dị oghol mọ Henry aḅẹm mọ, “Eḍighi maạr dị abunhọn siphẹ ookpomhoghan phọ omhiịn dị ikumor awe phọ osighẹ righirị buphẹ momhạgh bọ oḅulhemhi, keloghonhaạn ni ḍighaạgh bidị oḍighi aani igina phọ.”

Iloghonhaạn bidị ḍighaạgh omhoọgh ituughạ aBaibul ogina abidị. Okpokolo oyaghirị katue ni aloghonhaạn ḍighaạgh oye dị omhạgh oḅulhemhi ophighi edeọm ituughạ aBaibul ogina odị. Okumor oye dị oghol mọ Darko aḅẹm mọ: “Riḅeraạn ghan imhị oghaạph oḅenhị aani abuẹn phọ imạ araraạr dị mị aguphogh amhiịn siphẹ aBaibul phọ ḅilhẹ r’idị mị rakelhọm ghan otuughạ aBaibul phọ. Mị aḅilhẹ ghan kẹn raakolhobian ghan dị yoor koḅophoghạn otuughạ ḍinyạ.” Onhọn okumor oye dị oghol mọ Clayton aḅẹm mọ: “Mị raḅenhị ghan bidị mọ aạl reḍeenhaan aBaibul dị eghighimaạm ilọ asidọl phọ abidị.”

Ikị ghan ekparamhị bidị. Abuphẹ momhạgh bọ oḅulhemhi molhegheriom ikumor awe phọ idiphọ abugboom iiruẹn. Kuolọ nyiidiphọ ewạ mọ bidị omhiịn bidị idiphọ abupoghom. (Jer. 23:4) Ikumor awe phọ oogboronhom ghan olher rurụ ongọ bidị kụ osẹph ghan bidị. Igbor ghan eghaaphạn. Lọgh elhegh idị oniin okumor dị oghol mọ Marcus raḍighi ghan mem dị bidị oghị okparamhị oye: “Yoor rooḅeghiọn ghan esi aBaibul r’abidị, kosẹph bidị, oḅilhẹ okpoomị iḅio abidị mọ olhoghi ayoor, r’aZihova aḅaạl li iduọn bidị olhọgh bọ ikuph oḅilhẹ oḅula siẹn ookpomhoghan phọ. Aḍio phọ aḍiphẹ yoor oghị bọ reten yoor oḅilhẹ ghan kẹn rogu ghan ḍinhọn aḍio dị yoor koḅilhẹ okị.”

a Siḍien phọ ediighi bọ siẹn emhuoghaạph phọ ephẹn phọ m’onmeeghi.