Ilọ Okparamhị Omheeraam Mọ Ayira Esi Oguanhaan Omhoom Aḅirinhi Phọ AZihova

1-2. Ewạ mọ oḍighi ghan eeghe siẹn yira rokori bọ omhoom aḅirinhi phọ?

YIRA omaghamhị ni maạr oguanhaan phọ aZihova ilọ onme eghimoghọm araraạr aḅirinhi phọ ophọn phọ kụ ongọ ayira omhoom aḅirinhi elhiom eḍighinhom iyaạr. (2 Pit. 3:13) Ii, yira u/legheri mem mọ omhoom aḅirinhi phọ kasighẹ bọ dọl, kuolọ ariphigh edi ni dị eḍeenhaan mọ ke/bia mun.—Mat. 24:32-34, 36; Iiḍighi 1:7.

² Ghalhamọ r’iduọn phọ ni, etigheri onhụ asiạ phọ yira morọl bọ siẹn igey phọ, oomo ayira omoghi ni okparamhị omheeraam mọ ayira ilọ oguanhaan phọ ophọn phọ. Eeghe kụ iḍighi? Loor esi dị ghalhamọ omheeraam dị akpạr ri katue ni adugh. Okạr oghaạph, otelhedom mọ aPọl aḅẹm mọ e/moọgh omheeraam eḍighi ‘ikarạph dị rikpophonom ghan iyira.’ (Hib. 12:1) Orue oḍighi idị omheeraam mọ ayira ka/dugh, pọ ewạ dị yira kogbor ghan ooḅeghiọn raraạr phọ eḍeenhaan bọ mọ omhoom aḅirinhi phọ matuman siẹn.—Hib. 11:1.

3. Yira kooḅeghiọn eeghe siẹn emhuoghaạph phọ ephẹn phọ?

³ Siẹn emhuoghaạph phọ ephẹn phọ, yira kooḅeghiọn iraạr areten dị yira kotue okparamhị omheeraam mọ ayira ilọ oguanhaan omhoom aḅirinhi phọ aZihova: (1) ogbirima ghan ilọ ekiạ etagharạn phọ, (2) ootughiạn ghan iikpọ phọ aZihova, ḅilhẹ (3) r’olhọgh amem oḍighi araraạr dị kiḍur iyira etumeriom aZihova. Kụ yira ogbi ooḅeghiọn ipẹ adom mọ aZihova aḅenhị bọ Habakkuk ekparamhị omheeraam mọ ayira rodon. Kuolọ ophụr ooḅeghiọn ilọ iniin asidọl dị yira kotue ni osoman nyiidiphọ dị kewạ omheeraam dị akpạr ilọ oguanhaan omhoom aḅirinhi phọ ratu bọ.

ASIDỌL DỊ EMHOGHI OMHEERAAM DỊ AKPẠR

4. Eeghe osopha kirokirọ kụ amhoghi omheeraam dị akpạr?

⁴ Torobọ aḍio, yira rosopha ghan ni osopha dị amhoghi omheeraam dị akpạr. Esi omaạm, yira rosopha ghan ni ilọ odọ arighirị dị yira kooḅughonhaan ghan, umoore, askul oghị, pinien, ibạm anmụny, ḅilhẹ r’oḍighi oḍigh. Enighẹ ni dị yira kopuruan loor mọ: ‘Osopha kirokirọ phọ amhị aḍeenhaan ni mọ mị akuphom ni owol mọ moọny amem omhoom aḅirinhi phọ Enhaạn kasighẹ ni dọl siẹn aḅirinhi phọ ophọn phọ ḍughụm? Obobọ mị raḍighi aani ghan raraạr idiphọ abuphẹ roḅẹm ghan bọ mọ oye phọ r’omhugh bịn memhunheen ḍughụm?’ (Mat. 6:19, 20; Luk 12:16-21) Yira kosopha ni ogey osoph eḍighi maạr lọ yira okparamhị omheeraam mọ ayira, mọ omhoom aḅirinhi phọ masi siẹn edạ aḍighaạgh.

5-6. Uḍighi ika kụ yira omhoghi bọ omheeraam dị akpạr simem iiḅaghamhị? Kaạph amaaniọm.

⁵ Yira rosoman ghan kẹn ni odẹgh ophogh dị amhoghi omheeraam dị akpạr. Yira otue ni osoman igbiphoghọm, e/moon dị re/soph ghan mem, obobọ raraạr dị ketue ni ekọm oḅonyonhu ozuan ingọ iyira. Eḅẹl amem mọ rekịgh ghan mudị yira kotue ni okparạm. Kuolọ mem dị reekomoghạn ghan—idiphọ odẹgh ophogh raḍighi ghan bọ, pọ kemoghi omheeraam dị akpạr orue oghiọm aghisigh okparạm kụ okumu aZihova r’ibo.—Rom. 12:12; 1 Pit. 1:6, 7.

⁶ Odẹgh ophogh rabia, eḅilhẹ rekịgh ghan mudị omhoom aḅirinhi phọ aZihova ka/tu. Iduọn phọ pọ remạ ghan mọ omheeraam mọ ayira madugh? Eeye. Ooḅeghiọn oghaạph omaaniọm. Oḅẹm mọ yira odi ogbo aghozogh dị egholhoghọl ephughạn, yira otue ni ootughiạn mọ unu ka/tu. Kuolọ ekperenhom bịn poronọ unu. Iniin phọ kẹn ni, mem dị yira oḅonyonhu ozuan, rekịgh ghan mudị omhoom aḅirinhi phọ ka/tu ni bịn. Kuolọ omheeraam mọ ayira kụ akpạr, yira kolegheri ni mọ aruguanhaan phọ Enhaạn ke/ḅilhẹ omhunhughan. (Ps. 94:3, 14, 15; Hib. 6:17-19) R’odọ oḍuom olhoghi phọ opọ, bịn yira morue okiọm ghisigh oḍighi iiseeny phọ aZihova eḅẹl iyaạr.

7. Eeghe iitughiạn kụ edị ewạ mọ ogona loor?

⁷ Ooḅeghiọn enhọn iyaạr dị kewạ omheeraam dị akpạr—oḍighi ogbạ ikpo onhụ phọ. Ibadị abuphẹ yira rogbạ ghan bọ ikpo onhụ phọ koḅenhị rootughiạn ghan mọ “ooḅi oghaạph” ilọ omhoom aḅirinhi phọ Enhaạn ratu bọ ka/tu. (Mat. 24:14; Ezek. 33:32) Yira ro/wạ r’amem r’amem dị adọl iikia phọ abidị kitir aani iyira. Kụ orue oḍighi iduọn phọ, pọ yira kokiọm ghisigh okparamhị omheeraam mọ ayira. Uguạ, ooḅeghiọn iraạr areten dị yira kotue oḍighi iduọn phọ.

GBIRIMA ILỌ EKIẠ ETAGHARẠN PHỌ

8-9. Ika kụ idị ogbirima ghan ilọ etagharạn phọ kekparamhị omheeraam mọ ayira?

⁸ Eniin eten dị yira kotue okparamhị omheeraam mọ ayira pọ ogbirima ghan ilọ ekiạ etagharạn phọ. Ekiạ etagharạn phọ ingọ iyira okuphom owol mọ aruguanhaan phọ Enhaạn kemunughan ni. Mem dị yira omhiigha loor okiririom ophogh iyaạr phọ eḍighi bọ kụ ongọ bọ ekiạ etagharạn phọ ḅilhẹ r’ipẹ ewạ bọ omiteom etagharạn phọ, pọ kekparamhị ni omheeraam mọ ayira mọ oguan phọ Enhaạn ilọ aghuḍum k’agee-pọ phọ eeḍiạn aḅirinhi dị anhighẹ katu ni onọ. Uḍighi ika kụ yira koḅẹm bọ iduọn phọ?

⁹ Iwạ eeghe orue omiteom etagharạn phọ? AZihova arom oḅẹl Oọny phọ odị opọ odị aphomhoghiạn bọ iboom, atuman bọ nyodị, oru isiẹn ade phọ dị komạr idiphọ oye dị amhunhughan. Mem mọ aZizọs arọl bọ siẹn ade phọ, odị asoman ni ḍikparamhinheẹn kirokirọ. Amhiinhọm aḅilhẹ amhugh ḍuugh egbo. P’eeghe iikpiạ dị aZihova akpẹ! Mọ aghuḍum mọ kungọ bọ iyira aḍighi olọ ekulha amem bịn obọ Odẹ ephomhoghiạn phọ ayira mu/meera ooḅi Oọny phọ odị amhiinhọm aḅilhẹ amhugh. (Jọn 3:16; 1 Pit. 1:18, 19) Kụ makpẹ bọ ḍighi dị elheeny idiphọ, aZihova kaḍighi ni idị yira kokelhọm ghuḍum k’agee-pọ siphẹ omhoom aḅirinhi phọ.

OOTUGHIẠN GHAN IIKPỌ PHỌ AZIHOVA

10. Odaphạn Efesọs 3:20 eeghe kụ edị aZihova katue aḍighi?

¹⁰ Eten dị emhunhenhiom iyạl dị yira kotue okparamhị omheeraam mọ ayira pọ ootughiạn ghan ilọ iikpọ phọ aZihova. Odị amoọgh ni iikpọ omhunhenhi atorobọ iyaạr dị odị aguanhaan. Ii, osighẹ ilọ awe kụ ropoghom, oguan aghuḍum dị eekunha i/lo eḍighi iyaạr dị ke/tue emite. Kuolọ aZihova ragbor ghan kaguanhaan omhạr awe raraạr dị bidị ko/tue oḍighi. Pọ kụ iyaạr phọ odị aḍighi bọ Enhaạn Oomo Iikpọ. (Job 42:2; Mạk 10:27) Esi iduọn phọ, re/ḍighi ghan iikia mem lọ odị aguanhaan iikiạ araraạr.—Bạl Efesọs 3:20.

11. Ngọ eniin eḍeenhaan iikiạ aruguanhaan phọ Enhaạn. (Miịn igbe phọ “Iikiạ Araraạr Dị Eghịgh Mudị Ke/tue Emite Dị Emhunhughan.”)

¹¹ Ooḅeghiọn ophogh iniin odọ araraạr dị erọl mudị ke/tue emite dị aZihova aguanhaan we odị iḍiodi phọ. Odị aḅenhị Ebraham r’aSera mọ bidị komạr ri moọny olhephiri ghalhamọ r’iduọn bidị mokpọ bọ. (Gen. 17:15-17) Odị aḅilhẹ kẹn aḅenhị Ebraham mọ eemharạ phọ odị kụ kole erua ade phọ aKena. Siphẹ ibadị asiạ phọ eemharạ phọ Ebraham, anmụny phọ Izrạl oḍighi bọ rebenhẹ epẹ Ijipt, ighịgh ni esi abidị mudị oguanhaan phọ opọ phọ ka/munughan. Kuolọ amhunhughan ni. Onyebel roten, aZihova aḅilhẹ ni aguanhaan okumor anhịr phọ Elizabet mọ kamạr moọny olhephiri. Odị aḅilhẹ kẹn aguanhaan esinha onyanhị phọ Meri, mọ odị kụ kamạr Oọny phọ odị, opọ aZihova maghaạph bọ ni ilọ eeruanhaan phọ odị k’epẹ oghoony phọ Iden!—onhọn oguanhaan dị amhunhughan.—Gen. 3:15.

12. Joshua 23:14 r’ Isaiah 55:10, 11 ungọ iyira eeghe okuphom owol ilọ iikpọ phọ aZihova?

¹² Yira rokparamhị ghan omheeraam mọ ayira esi iikpọ phọ aZihova amhoọgh bọ osighẹ oru omhoom aḅirinhi phọ esi ogbirima ghan ilọ aruguanhaan dị odị mamhunhenhi ghan r’ipẹ bidị emhunhughan bọ. (Bạl Joshua 23:14; Isaiah 55:10, 11.) Ipẹ phọ rinyaamhị ghan iyira olhoghonhaạn aḍighaạgh bunhọn olhegheri mọ oguanhaan omhoom aḅirinhi phọ o/ḍighi malhạ obobọ eepua oghaạph. AZihova r’aloor aghaạph iduọn idị egbolhomaam imhoom asikẹ phọ r’aḍimhoom ade phọ mọ: “Ikpo onhụ phọ iphẹn inẹ ni, amabi o/lo.”—Ogan. 21:1, 5.

ḌIGHI RARAẠR DỊ KEḌUR NYINHẠ ETUMERIOM AZIHOVA

13. Ika kụ idị ituughạ ookpomhoghan phọ ketue ekparamhị omheeraam? Gbạ.

¹³ Eten dị emhunhenhiom iraạr dị yira kotue okparamhị omheeraam mọ ayira pọ olhọgh amem oḍighi araraạr dị kiḍur iyira etumeriom aZihova. Esi omaạm, ooḅeghiọn idị yira romooghọm ghan suọ ituughạ arookpomhoghan phọ. Umaranhi dị oghol mọ Anna, dị makumuan ni ibadị areten rukumuan oomo amem mọ, aḅẹm mọ: “Ituughạ rekparamhị ghan omheeraam amhị. Ghalhamọ okaaphọm mọ o/kạr omhaạr itughemhị obobọ o/ghaạph emhoom iyaạr siphẹ oghaạph phọ odị, bịn mị kanaghạn ni iyaạr dị kilhoghonhaạn imhị ḍighaạgh okuamhị onhaghanhạn igey aBaibul phọ eḅilhẹ ekparamhị omheeraam mọ amhị.”b Dị iikia i/lo, ophagharanhaạn abumor r’abumaranhi phọ katue ni akparamhị omheeraam mọ ayira kẹn.—Rom. 1:11, 12; 10:17.

14. Ika kụ idị oḍighi iphelhegbeel phọ rakparamhị ghan omheeraam ayira?

¹⁴ Yira rokparamhị ghan kẹn omheeraam mọ ayira mem dị yira ophinhom aani ghan bin oḍighi iphelhegbeel phọ. (Hib. 10:23) ABarbara, dị makumu ni aZihova esi asiạ dị repel li 70 aḅẹm mọ: “Mị amiịn mọ oḍighi iphelhegbeel phọ rakparamhị ghan omheeraam. Idiphọ mị rakaạph bọ kaḅenhị bunhọn ilọ imạ aruguanhaan phọ aZihova, idiphọ kụ edị rekparamhị keḅilhẹ engọ ghuḍum omheeraam mọ amhị.”

15. Ika kụ idị ituughạ ogina anạ kekparamhị omheeraam anạ? (Miịn kẹn afoto phọ.)

¹⁵ Oḅilhẹ ooḅeghiọn enhọn iyaạr dị rekparamhị ghan omheeraam mọ ayira: ituughạ ogina anạ. Umaranhi dị oghol mọ Susan amhiịn mọ omhoọgh edeọm ituughạ ilhoghonhaạn nyodị ḍighaạgh agey. Odị aḅẹm mọ: “Ḍio aSondị, mị raakolhobian ghan ituughạ Otu Okoriom mọ kotuughạ bọ ophoriphọ awiki phọ. Kụ Mondị r’aTusdee, mị raakolhobian ghan ituughạ ogboku awiki phọ. Kụ siḍughulotu phọ ipẹ esugha bọ mị rasighẹ ghan katuughaạm inhọn araraạr dị mị rawạ otuughạ.” Edeọm ituughạ phọ aSusan aphamhanhạm bọ, ighị ni ghisigh ekparamhị omheeraam mọ odị. Irene, dị makumuan esi ibadị asiạ epẹ emhụ agadạ phọ, amhiịn ni mọ otuughạ ilọ imiịn aBaibul phọ mekạr kụ ekparamhị omheeraam mọ odị. Odị aḅẹm mọ: “Riphẹr ghan ni imhị iboom omhiịn dị oomo imiịn phọ aZihova remunughan bọ ipẹ oghaạph bọ.”c

“KEKẠR RI EMITE”

16. Uḍighi ika kụ okuphom owol phọ Enhaạn angọ bọ Habakkuk igbolhomaam aani bọ iyira rodon? (Hibru 10:36, 37)

¹⁶ K’amem dị mebia ni, abuniin arebenhẹ aZihova rokori ghan ni eekunha aḅirinhi phọ ophọn phọ. Odaphạn ephoghom awe, ekịgh mudị omhunhughan imiịn oguan phọ Enhaạn reebinya ni. AZihova aghaạph ni ilọ iphẹn phọ angọ okuphom owol oyil phọ Habakkuk mọ: “Loor esi dị ke/teẹny mem dị kemite, kụ amem mọ kenuụn ni etu, kụ ipẹ mị aḍeenhaan bọ nyinạ kemite ni. Kekịgh mudị reebinya ni omite, kụ kori ni; kekạr ri emite, kụ kee/binya!” (Hab. 2:3) Ogina aHabakkuk kụ edị Enhaạn angọ bọ okuphom owol phọ ophọn phọ? Obobọ ikpo onhụ phọ ipẹ phọ igbolhomaam aani ni iyira rodon? Enhaạn inyu ni otelhedom mọ Pọl oghaạph oghol ikpo onhụ phọ ipẹ phọ mem mọ agẹ bọ aghiọm Kristẹn phọ abuphẹ rokori bọ omhoom aḅirinhi phọ. (Bạl Hibru 10:36, 37.) Ii, ghalhamọ iibinya ni, yira okuphom ni owol mọ oguanhaan phọ Enhaạn ophẹl ayira “kekạr ri emite. Kụ kee/binya!”

17. Ika kụ idị oniin onyọ umaranhi adạph oromha phọ aZihova angọ bọ Habakkuk?

¹⁷ Esi ibadị asiạ, ibadị arebenhẹ aZihova rodạph ni ipẹ aZihova aroma bọ mọ ‘ikori ni.’ Esi omaạm, umaranhi dị oghol mọ Louise, amhiigh okumu aZihova lhạ phọ 1939. Odị aḅẹm mọ: “Mem mọ amuphẹ phọ, mị uutughiạn ghan mọ mị ka/mạn kolẹz phọ amhị kụ Amagedọn agbi oru. Kuolọ i/mite idiphọ. Emhiigh k’amem mọ opọ, aạl ghan igẹ aBaibul dị eghaạph ilọ awe dị okori ghan dị aZihova kamunenhi ruguanhaan phọ odị, milhoghonhaạn imhị ḍighaạgh okori ghan dị aZihova kamunenhi ruguanhaan phọ odị. Mị aạl li ilọ aNoa, Ebraham, Josef, ḅilhẹ r’ilọ abunhọn. Okparạm okori ghan meḍighi idị mị r’abunhọn okuphom owol mọ omhoom aḅirinhi phọ matuman siẹn.” Ibadị awe dị mokumu aZihova esi ibadị asiạ omeeraam aani iduọn phọ!

18. Ika kụ idị okiririom ophogh olhẹm mọ kakparamhị omheeraam mọ ayira ilọ oguanhaan omhoom aḅirinhi phọ ratu bọ?

¹⁸ Okạr oghaạph, omhoom aḅirinhi phọ ko/ru ni. Toroboiperolbọ, tuutughiạn ni ilọ iniin araraạr phọ yira romiịn bọ—araanhaạn, ireeny, inhạm, ḅilhẹ r’awe iduọn ayira. Ghalhamọ r’iduọn emhoọgh bọ ni mem dị araraạr phọ iphẹn phọ i/tọl ghan, oye o/lho dị kaakia mọ araraạr phọ iphẹn phọ i/lo ghan. Yira romiịn raraạr phọ iphẹn nyiidiphọ loor esi dị aZihova malhẹm bidị amiteom. (Gen. 1:1, 26, 27) Enhaạn phọ ayira maguanhaan ophighi omhoom aḅirinhi. Odị kamunenhi ni ogbi phọ opọ phọ. Siphẹ omhoom aḅirinhi phọ, awe kokelhọm ghuḍum dị eekunha i/lo r’omhoon aloor dị amhunhughan. Eteẹny mem mọ amuphẹ Enhaạn amaanhaạn bọ, omhoom aḅirinhi phọ katu ni onọ idiphọ yira romiịn bọ kẹ phọ r’ade phọ ḍio arodon.—Isa. 65:17; Ogan. 21:3, 4.

19. Ika kụ idị nạ katue akparamhị omheeraam mọ anạ?

¹⁹ Kụ egbi oteẹny amem mọ amuphẹ phọ, sighẹ torobọ eepoogh dị nạ amhoọgh akparamhiọm omheeraam mọ anạ. Sereghiạn ekiạ etagharạn phọ. Tuutughiạn iikpọ phọ aZihova. Lọgh mem aḍighi ghan raraạr dị keḍur nyinhạ etumeriom aZihova. Nạ aḍighi ghan iphẹn phọ, pọ nạ kaḍighom aani ni igbo abuphẹ “oghol bọ omeeraam mọ r’okparạm mọ kụ ropin aani bọ bin ipẹ Enaạn eguanaan bọ.”—Hib. 6:11, 12; Rom. 5:5.