EMHUOGHAẠPH ITUUGHẠ PHỌ 38
AḌUỌR PHỌ 25 A Special Possession
Nạ Radaphạn Ni Iphụr Arurụ Phọ?
“Kosighẹ ni nyoniin, obiIẹ nyoorị phọ.”—MAT. 24:40.
EGBON
Iraạr asidogh dị aZizọs adogh r’idị emhoọgh muḅọph r’iiruẹn phọ koogbonhaan bọ we mem aruukunha phọ.
1. AZizọs kaḍighi eeghe moọny amem?
YIRA odi mem dị araraạr renmeeghian ni iboom! Moọny amem, aZizọs kaagbo ni iiruẹn angọ torobọ oye dị odi siẹn ade phọ. AZizọs aḅenhị ni butelhedom mọ odị raraạr dị kemite kụ keḍeenhaan mọ odị mamhiigh ratooghị, ḅilhẹ mọ “eekuna aḅirini phọ” ophọn meteẹny. (Mat. 24:3) Areḍeenhaan phọ iphẹn phọ edi ḍinyạ aMatiu emhụ 24 r’25 ḅilhẹ r’aḍinyạ aMạk emhụ phọ 13 r’aLuk emhụ phọ 21.
2. Yira kooḅeghiọn eeghe siẹn emhuoghaạph phọ ephẹn phọ, kụ ika kụ idị iphẹn phọ kilhoghonhaạn iyira ḍighaạgh?
2 AZizọs adogh iraạr asidogh ophurọm ayira rurụ. Asidogh phọ iphẹn phọ pọ ipẹ iyool phọ r’atụ igạ phọ, oogh ariisinha anmanyaạn phọ osụ bọ olhoghi r’oogh phọ olhoghi u/sụ bọ, r’aḍidogh ikpoki phọ. Asidogh phọ iphẹn phọ ilhoghonhaạn iyira ḍighaạgh olhegheri mọ aZizọs kapogh iḍighinhom araraạr oye phọ kụ asoph ooruẹn angọ. Siẹn emhuoghaạph phọ ephẹn phọ, yira kooḅeghiọn sidogh phọ iphẹn phọ r’araraạr dị asidogh phọ itughemhị iyira. Ooḅeghiọn nyiidiphọ ḍidogh iyool igạ phọ r’atụ igạ phọ.
IYOOL IGẠ PHỌ R’ATỤ IGẠ PHỌ
3. Pụr amem kụ edị aZizọs kaagbo bọ iiruẹn angọ we?
3 Siphẹ aḍidogh iyool igạ phọ r’atụ igạ phọ, aZizọs aghaạph mọ koogbo iiruẹn ongọ we odaphạn ipẹ bidị omhegheron bọ oghị esi oghaạph iiḅi iinhaghạn phọ r’olhoghonhaạn aḍighaạgh phọ bidị ongọ bọ bumor phọ odị osagharạn bọ uwaloor iigbia phọ. (Mat. 25:31-46) Mem ‘igbogh iiḅaghamhị phọ,’ odị kaagbo ni iiruẹn phọ iphẹn phọ angọ we kụ egbi oteẹny eghạm Amagedọn. (Mat. 24:21) Idiphọ opoghom iyool igạ ragbariọn ghan bọ iyool igạ phọ esi atụ igạ phọ, kụ edị aZizọs kagbariọn buẹn oḅạr bọ bumor phọ odị osagharạn bọ uwaloor phọ esi abuẹn u/ḅạr bọ bidị.
4. Odaphạn Isaiah 11:3, 4, eeghe kụ iḍighi kụ yira okuphom bọ owol mọ aZizoṣ kaagbo ni iiruẹn dị eeleeny? (Miịn kẹn opoḍi phọ.)
4 Imiịn aBaibul phọ eḍeenhaan mọ aZihova mamạ Zizọs oogbo iiruẹn, kụ odị kaagbo ni iiruẹn dị eeleeny. (Bạl Isaiah 11:3, 4.) Odị rapogh ghan roozọ, raagharạ, ḅilhẹ r’ikpo onhụ awe phọ.—odị kapogh kẹn ni eten phọ epẹ bidị rozoọm bọ bumor phọ odị osagharạn bọ uwaloor iigbia phọ. (Mat. 12:36, 37; 25:40) AZizọs kalegheri ni buphẹ olhoghonhaạn bọ ḍighaạgh bumor phọ odị osagharạn bọ uwaloor phọ r’oḍighi phọ abidị.a Eniin ekpanhạ eten dị abueriphọ iyool phọ rologhonhaạn ghan ḍighaạgh bumor phọ aKraist pọ obakị abidị siẹn oḍighi oghaạph iiḅi iinhaghạn phọ. Buẹn olhoghonhaạn bọ bidị ḍighaạgh, aZizọs kasophonhaan bidị ooruẹn idiphọ “abugey awe” kụ bidị omoọgh eepoogh oghelhọm “aghuḍum dị eekuna i/lo” siẹn ade phọ. (Mat. 25:46; Ogan. 7:16, 17) P’eeghe imạ iikpiạ dị bidị komoọgh loor iduọn bidị obakị bọ bumor phọ aKraist osagharạn bọ uwaloor phọ! Eḍighi maạr dị bidị oghiọm ghisigh oḅạr aZihova mem igbogh iiḅaghamhị phọ r’amem dị iiḅaghamhị phọ meten, pọ asiḍien abidị ketọl aani ni siphẹ “aḍinyạ” aghuḍum mọ.—Ogan. 20:15.
Epẹ ghisigh, aZizọs kasoph ni iiruẹn angọ we, mughumọ oye phọ aḍeenhaan ni mọ odị aḍighi oyool ogạ obobọ atụ ogạ (Miịn ekpịgh phọ 4)
5. Eeghe iyaạr ituughạ kụ edi ḍidogh iyool igạ phọ r’atụ igạ phọ, kụ abuọ anhiạn kụ komooghọm suọ?
5 Ḍeenhaan omheeraam kụ aḅilhẹ aḅạr bumor phọ aKraist. Aḍidogh phọ aZizọs ilọ iyool r’atụ igạ phọ ekạr egbolhomaam buẹn omhoọgh bọ oḍuomolhoghi orọl isiẹn ade phọ. Bidị roḍeenhaan ghan mọ bidị omoọgh ni omheeraam esi olhoghonhaan ghan aḍighaạgh bumor phọ aKraist oghaạph iiḅi iinhaghạn phọ ḅilhẹ r’odaphạn ghan iiḅakiọm ebenhẹ phọ asụ bọ olhoghi aḅilhẹ akpẹ oḍuomolhoghi aZizọs mamạ bọ. (Mat. 24:45) Kuolọ ewạ ni dị buphẹ omhoọgh bọ oḍuomolhoghi ogheel k’akẹ phọ koḍighinhom aani iphụr arurụ phọ edi bọ siẹn aḍidogh phọ. Eeghe kụ iḍighi? Loor esi dị aZizọs amiigha ni loor rapogh roozọ, raagharạ, ḅilhẹ r’ikpo onhụ phọ abidị. Ewạ aani ni kẹn dị bidị kotọl dọl dị okpẹ oḍuomolhoghi. Okạr oghaạph, aZizọs angọ ni inhọn iyạl asidogh dị ephamhanhạm iphụr arurụ ilọ abuẹn omhoọgh bọ oḍuomolhoghi ogheel k’akẹ phọ. Asidogh phọ iphẹn phọ kẹn edi ḍinyạ aMatiu emhụ phọ 25. Ooḅeghiọn nyiidiphọ ḍidogh arisinha anmanyaạn phọ osụ bọ olhoghi r’oogh abuẹn olhoghi u/sụ bọ.
ARISINHA ANMANYAẠN PHỌ OSỤ BỌ OLHOGHI R’ABUPHẸ OLHOGHI U/SỤ BỌ
6. Ika kụ idị oogh arisinha anmanyaạn phọ oḍeenhaan mọ bidị osụ olhoghi? (Matiu 25:6-10)
6 Siphẹ aḍidogh arisinha anmanyaạn phọ, aZizọs aghaạph ni aghol ḍioph arisinha anmanyaạn dị omite oghị oteẹny olom. (Mat. 25:1-4) Oomo phọ abidị ukori ghan odạph olom mọ oghị k’arogọ. AZizọs aḅẹm mọ, oogh abidị usụ olhoghi obobọ “olegheri iyaạr” kụ abueriphọ oogh pho u/sụ olhoghi obobọ “u/legheri iyaạr.” Abuẹn osụ bọ olhoghi phọ uukolhobian kụ ogon ghan. Bidị uukolhobian ghan kụ okori torobọ amem dị olom mọ katu, ghalhamọ isighẹ ni kogbo aḍughul. Esi iduọn phọ, bidị uphạm ni itozị, olhoghoḍị muum itozị phọ ruuku ophamhạm, pidị esighẹ bidị tutụ olom mọ aru. Esi iduọn phọ, bidị uukolhobian ni ḅilhẹ u/meera mọ itozị phọ abidị eḍim. (Bạl Matiu 25:6-10.) Mem mọ olom mọ aru bọ asi, abuẹn osụ bọ olhoghi phọ udạph ni nyodị oghị k’arogọ phọ. Eniin phọ eten phọ, koḅenhị aani ni Kristẹn phọ abuẹn osagharạn bọ uwaloor phọ kụ roḍeenhaan bọ mọ bunọ rogon ni esi orọl adọl dị ekpẹ oḍuomolhoghi tutụ aZizọs aru, mọ bidị okpẹ ni odạph olom mọ, Zizọs Kraist, oḍigh aani siphẹ itooghị k’akẹ phọ.b (Ogan. 7:1-3) Kokaạph aani ika ilọ oogh abuphẹ olhoghi u/sụ bọ?
7. Eeghe kụ imitenhaan oogh phọ anmanyaạn phọ olhoghi u/sụ bọ, kụ eeghe kụ iḍighi?
7 Dị u/kịgh aani risinha anmanyaạn phọ osụ bọ olhoghi phọ, oogh phọ abuphẹ olhoghi phọ u/sụ bọ uu/kolhobian mem mọ olom mọ asi bọ. Itozị phọ abidị rewạ oḍim kụ bidị u/pạm muụm otozị. Esi iduọn phọ, mem mọ bidị onhaghạn bọ mọ olom mọ ratu, iwạ dị bidị kokị oko muụm otozị. Bidị k”oḅula kụ olom mọ aru bọ asi. Mem mọ olom mọ asi bọ, “buphẹ onyạ bọ oghị odạph nyodị oḍigh k’arogọ phọ, kụ oghughi eghuugh phọ.” (Mat. 25:10) Onyebel roten, mem mọ oogh arisinha anmanyaạn phọ u/sụ bọ olhoghi oḅula bọ kụ oghị bọ oḍigh aani otu phọ, olom mọ aḅenhị bidị mọ: “Mị inyina i/legheri.” (Mat. 25:11, 12) Oogh phọ anmanyaạn phọ abuẹn phọ uu/kolhobian u/kori olom mọ tutụ odị aru. Eeghe iyaạr ituughạ kụ edianhaan buphẹ osagharạn bọ uwaloor phọ siẹn phọ?
8-9. Eeghe iyaạr ituughạ kụ edị abuphẹ osagharạn bọ uwaloor phọ kotue otuughạ siphẹ aḍidogh arisinha anmanyaạn phọ? (Miịn kẹn afoto phọ.)
8 Ḍeenhaan mọ nạ aamhanham ni kụ aḅilhẹ rakori. AZizọs ra/ḅẹm ghan mọ buphẹ osagharạn bọ uwaloor phọ odi iyạl egu, bulọ ookolhobian kụ rokori mem eekunha aḅirinhi phọ r’abudị uu/kolhobian. Kparipe ghụn, odị aghaạph ghan idị ketue ni emitenhaan buphẹ osagharạn bọ uwaloor phọ eḍighi maạr dị bidị uu/kolhobian okparạm osi epẹ eekunha phọ. Kụ eḍighi iduọn phọ, pọ bidị ko/teẹny iikpiạ phọ abidị. (Jọn 14:3, 4) Oghaạph phọ ophọn pho aamọr ri! Mughumọ oḍuomolhoghi phọ ayira aḍighi olọ ogheel k’akẹ obobọ olọ orọl isiẹn ade phọ, ewạ ni mọ osighẹ ḍidogh arisinha anmanyaạn phọ olhọgh olhoghi ayira. Torobọ onyọ ayira amoọgh oghiọm aghisigh ogon ghan kụ oḅilhẹ ookolhobian okparạm osi epẹ eekunha phọ.—Mat. 24:13.
9 AZizọs rodogh bọ ḍidogh arisinha anmanyaạn phọ abuẹn phọ oghaạph idị emhạn maạr ookolhobian kụ oḅilhẹ oomhanham, odị aḅilhẹ adogh ḍidogh ikpoki. Aḍidogh phọ aḍiphẹ phọ eḍeenhaan iyaạr phọ eḍighi bọ kụ ewạ bọ olhọgh inyaạm okumuan ghan.
Emạn ni maạr dị torobọ onyọ ayira kamaghamhị maạr iphụr arurụ aḍidogh arisinha anmanyaạn phọ osụ bọ olhoghi r’abuphẹ olhoghi u/sụ bọ esi ookolhobian, oomhanham, kụ okparạm okori tutụ eekunha phọ (Miịn siikpịgh phọ 8-9)
AḌIDOGH IKPOKI PHỌ
10. Iyạl phọ arebenhẹ phọ uḍighi eeghe oḍeenhaan mọ bidị okpẹ ni oḍuomolhoghi? (Matiu 25:19-23)
10 Siphẹ aḍidogh ikpoki phọ, aZizọs aghaạph aghol iyạl arebenhẹ dị okpẹ oḍuom olhoghi r’oniin dị u/kpẹ oḍuom olhoghi. (Mat. 25:14-18) Iyạl phọ abuẹn okpẹ bọ oḍuomolhoghi phọ ukumuan igey obughẹ araraạr emhoọgh odẹ otu phọ abidị. Kụ agbi bọ oghị erelhe eekelhạ ekpisi phọ, odẹ otu phọ aḅọgh ni ikpoki dị ebụgh ni iboom angọ bidị. Iyạl phọ arebenhẹ phọ okpẹ bọ oḍuomolhoghi phọ, uḍighi we dị rokumuan ghan kụ omhaạr oḍighinhom ikpoki phọ agey. Eeghe kụ iḍuạ emite? Mem mọ odẹ otu phọ abidị arigheel bọ, bidị moḅaarị ikpoki phọ odị angọ bọ bidị. Odẹ otu phọ abidị asẹph ni bidị—kụ bidị “oḍighan nyodị, omoọgh oḅaạl ologhi.” (Bạl Matiu 25:19-23.) Kụ kokaạph aani ika ilọ ophoriphọ ebenhẹ phọ? Odị aḍighinhom aani ika ikpoki phọ odẹ otu phọ odị angọ bọ nyodị?
11. Eeghe kụ imitenhaan “[uwo-egboghoIeẹr]” ebenhẹ phọ, kụ eeghe kụ iḍighi?
11 Ophoriphọ ebenhẹ phọ ongọ bọ oniin okpoki phọ aḍighi “[uwo-egboghoIeẹr].” Odẹ-otu phọ odị awạ mọ odị asighẹ ikpoki phọ aḍighinhom r’osụ olhoghi. Kparipẹ r’oḍighi iphẹn phọ, odị aguph aḍi ikpoki phọ. Mem mọ odẹ-otu phọ arigheel bọ, ebenhẹ phọ o/pumom iyaạr siphẹ ikpoki phọ ongọ bọ nyodị. Ebenhẹ phọ o/mhoọgh egey eegharạ. Kparipẹ r’ooḅereghiạn odẹ-otu phọ odị iduọn odị u/pumom bọ iyaạr, ebenhẹ phọ amhạgh ghụn odẹ-otu phọ odị mọ “oye dị akpạr ezọ.” Ebenhẹ phọ ophọn phọ o/teẹny aani ḍisẹph odẹ-otu phọ odị. Kụ edị eeph epu pạ, aạr ri nyodị okpoki phọ ongọ bọ nyodị kụ oḅilhẹ ophorogh nyodị siphẹ k’odẹ otu phọ odị.—Mat. 25:24, 26-30.
12. Iyạl phọ arebenhẹ phọ okpẹ bọ oḍuom olhoghi omeerạ enye abuọ anhiạn rodon?
12 Iyạl arebenhẹ phọ okpẹ bọ oḍuom olhoghi omeerạ enye aKristẹn phọ osagharạn bọ uwaloor iigbia phọ okpẹ bọ oḍuom olhoghi. Odẹ-otu phọ, Zizọs, amhạgh bidị ‘oḍighan odị omoọgh oḅaạl ologhi.’ Oḅẹl oḅerion esi aḍuugh phọ kụ aruunmo k’akẹ phọ abidị. (Mat. 25:21, 23; Ogan. 20:5b) Ḍieriphọ aḍighaạgh phọ, ekarạph eḍeenhaan uwo-egboghoIeẹr ebenhẹ phọ eḍighi iphụr arurụ engọ buphẹ osagharạn bọ uwaloor iigbia phọ. Ika?
13-14. Eeghe araraạr kụ edị aKristẹn phọ abuphẹ osagharạn bọ uwaloor phọ kotuughạ esi aḍidogh ikpoki phọ? (Miịn kẹn afoto phọ.)
13 Ḍighi oye arukumuan dị akpạr ḍighaạgh. Siphẹ aḍidogh ikpoki phọ, ḅilhẹ r’isiphẹ aḍidogh arisina anmanyaạn phọ, aZizọs o/ghaạph ghan mọ epẹ ghisigh mọ aKristẹn phọ abuphẹ osagharạn bọ uwaloor phọ koḍighi rugbogholeẹr. Kparipẹ ghụn, odị aghaạph ghan idị kemitenhaan bidị eḍighi maạr dị bidị u/pamanhạm oophugh phọ abidị. Bidị ko/moọgh oḍuomolhoghi mọ Enhaạn memhạgh bidị “esaḅạr esighẹ,” kụ ḅilhẹ kẹn ko/meera mọ bidị oḍigh siphẹ Omhạr k’akẹ phọ.—2 Pit. 1:10.
14 Aḍidogh arisina anmanyaạn phọ r’aḍidogh ikpoki phọ aZizọs adogh bọ ekaạph eegholhomhi mọ ewạ dị aKristẹn phọ osagharạn bọ uwaloor phọ kookolhobian, oomhanham, ḅilhẹ okpạr ḍighaạgh esi arukumuan. Kuolọ aZizọs aghaạph ni enhọn iyaạr dị eḍighi iphụr arurụ engọ Kristẹn phọ abuphẹ osagharạn bọ uwaloor phọ ḍughụm? Ii odị aghaạph ni! Ikpo onhụ phọ aZizọs edi bọ Matiu 24:40, 41 ekaạph ilọ iphụr arurụ phọ iphẹn phọ.
AZizọs rawạ dị abuphẹ osagharạn bọ uwaloor iigbia phọ kokumuan oḅilhẹ okpạr ḍighaạgh (Miịn siikpịgh phọ 13-14)d
ANHIẠN KỤ EDỊ “KOSIGHẸ” BỌ?
15-16. Ika kụ idị aMatiu 24:40, 41 eghaạph ekparamhị odọ idị emhạn maạr dị aKristẹn phọ abuphẹ osagharạn bọ uwaloor phọ kogon ghan?
15 Kụ odị agbi bọ odogh iraạr asidogh phọ, aZizọs aghaạph ilọ ooruẹn dị asughanham omhạn dị katolhonhaạn buphẹ osagharạn bọ uwaloor phọ, dị kagananami buphẹ kosighẹ bọ. Odị aghaạph ilọ iyạl awe dị odi ozo ḅilhẹ r’iyạl anmariịr dị odi esi rogbẹ ghan ibiakpạ. Torobọ ekpịgh awe phọ abuẹn phọ, iyạl phọ abidị roḍighi ni oniin phọ oḍighi phọ, kuolọ, aZizọs aghaạph mọ “kosighẹ ni nyoniin, obilẹ nyoorị phọ.” (Bạl Matiu 24:40, 41.) Odị aḅenhị budaphạm mọ odị mọ: “Iduọn kụ iḍighi kụ igon ghan. Nyina i/legheri odọ phọ aḍio phọ Omoọgh-we phọ anyina katigheeI bọ.” (Mat. 24:42) AZizọs aghaạph kẹn ni ikpo onhụ dị eghighimaạm iphẹn phọ mem mọ odị adogh bọ ḍidogh arisina anmanyaạn phọ. (Mat. 25:13) Ikpo onhụ phọ iphẹn phọ rekaạph ni eniin phọ iyaạr phọ ḍughụm? Ekịgh idiphọ. Ogina aKristẹn phọ abuphẹ osagharạn bọ uwaloor phọ ḅilhẹ okpẹ bọ oḍuom olhoghi kụ edị aZizọs ‘kasighẹ’ bọ akeelhom epẹ Omhạr k’akẹ phọ.—Jọn 14:3.
16 Igon ghan. Torobọ onyọ abuẹn osagharạn bọ uwaloor phọ dị uu/mhanham obobọ u/gon ghan ka/ḍighom aani buphẹ ‘osaḅạr’ bọ ookpomhoghi. (Mat. 24:31) Opumom isiẹn, torobọ ebenhẹ Enhaạn mughumọ amoọgh oḍuomolhoghi ogheel k’akẹ obobọ orọl isiẹn ade phọ amhaghamhị maạr ikpo onhụ iphụr arurụ phọ aZizọs esi oghiọm aghisigh ogon ghan r’ophamhanhạm aḍimheerạ phọ odị.
17. Eeghe kụ iḍighi kụ yira koo/ḅaghamhiạn bọ loor eḍighi maạr dị aZihova asopha osaḅạr oye osagharạn uwaloor phọ siẹn asiạ phọ iphẹn?
17 Yira olegheri ni aZihova igey, esi iduọn phọ, yira oḍuom olhoghi iiruẹn phọ odị. Loor iduọn phọ, yira roo/ḅaghamhiạn loor eḍighi maạr dị aZihova aḅilhẹ asaḅạr budị osagharạn uwaloor phọ siẹn asiạ phọ iphẹn.c Yira ootughiạn ni ipẹ aZizọs aghaạph bọ siphẹ oghaạph omaaniọm mọ odị ilọ abuphẹ oru bọ ozo ireeny amiim mọ dulhe. (Mat. 20:1-16) Buphẹ omhạgh bọ oru aani ozo ireeny amiim mọ dulhe phọ ukpẹ aani ni iniin phọ onhụ ikpoki phọ r’abuphẹ oru bọ eḅon aḍiroọr phọ. Iniin phọ kẹn ni, etigheri mem mọ osaḅạr bọ buphẹ k’okeel bọ k’akẹ phọ, kụ bidị oḍighi ni budị okpẹ oḍuomolhoghi, pọ bidị komoọgh ni ḍinhiin phọ aḍimhạgh k’akẹ phọ.
DAPHẠN IPHỤR ARURỤ PHỌ
18-19. Eeghe araraạr ituughạ r’iphụr arurụ kụ edị yira mooḅeghiọn?
18 Yira motuughạ eeghe siẹn emhuoghaạph phọ ephẹn phọ? Idị egbolhomaam buẹn omhoọgh bọ oḍuomolhoghi orọl isiẹn ade phọ, aḍidogh iyool igạ phọ r’atụ igạ phọ emạ emiteom iyaạr phọ emhạn bọ maạr dị bidị kokiọm ghisigh otọl dọl dị ekpẹ oḍuomolhoghi ḅilhẹ oḅạr aZihova—nyiidiphọ r’amem igbogh iiḅaghamhị phọ. Mem mọ amuphẹ phọ, aZizọs kasoph ni ooruẹn angọ buphẹ okpẹ bọ oḍuomolhoghi phọ idiphọ awe dị okpeanhaạn oḍigh “esi aghuḍum dị eekuna i/lo.”—Mat. 25:46.
19 Yira uuḅeghiọn kẹn iyạl asidogh dị engọ iphụr arurụ buphẹ osagharạn bọ uwaloor iigbia phọ. Siphẹ aḍidogh arisinha anmanyaạn phọ osụ bọ olhoghi r’abuphẹ olhoghi u/sụ bọ, oogh abidị uḍeenhaan ni mọ bidị osụ olhoghi. Bidị uukolhobian kụ oḅilhẹ oomhanham, kụ okori ghan dị olom mọ abidị katu etigheri mem mọ katu bọ. Kuolọ arisina anmanyaạn phọ olhoghi u/sụ bọ uu/kolhobian. Esi iduọn phọ, olom mọ o/mheera bidị odạph nyodị oghị k’arogọ phọ odị. Ewạ kẹn ni dị yira kookolhobian okori mem mọ aZizọs kasiemhi bọ eekunha aḅirinhi phọ, ghalhamọ ighịgh ni mudị reebinya ni. Siphẹ aḍidogh ikpoki phọ, yira uuḅeghiọn omhiịn mọ iyạl phọ arebenhẹ phọ okpẹ bọ oḍuomolhoghi ukumuan ghan kụ oḅilhẹ okpạr ḍighaạgh. Bidị ukumuan agey olhoghonhaạn aḍighaạgh odẹ-otu phọ abidị, kụ usẹph ni bidị. Kuolọ, ughel li uwo-egbogholeẹr ebenhẹ phọ. Yira otuughạ eeghe? Oghiọm ghisigh rukumuan phọ aZihova tutụ k’eekuna phọ. Edị esughanham omhạn, yira uuḅeghiọn idị emhạn maạr dị abuphẹ osagharạn bọ uwaloor iigbia phọ kokiọm ghisigh ogon ghan pidị bidị oḍighom aani buphẹ aZizọs ‘kasighẹ’ bọ akeelhom k’akẹ angọ ruunmo phọ abidị. R’ikpukpụ ni, bidị opogh ni rokiọm ghisigh “oḅophoghạn kụ oroIạn” r’aZizọs epẹ k’akẹ. Mem dị eghạm Amagedọn meten, bidị koḍighi anhịr phọ Oọny Iyool Ogạ phọ kakị bọ k’arogọ phọ.—2 Tẹs. 2:1; Ogan. 19:9.
20. AZihova kaḍighi eeghe kụ angọ buphẹ odaphạn bọ iphụr arurụ phọ odị?
20 Ii, amem iiruẹn phọ meesulhom siẹn, kuolọ ephigh otuạn oghiilhaan i/lo. Eḍighi maạr dị yira orọl li dọl dị ekpẹ oḍuomolhoghi, pọ Odẹ k’akẹ phọ ayira kungọ ni iyira iikpọ, dị “ki/lo ayira, ilọ Enaạn,” pidị yira otue ‘omoọgh inyaạm . . . omeeraạm aghisigh Oọny phọ oye.’ (2 Kọr. 4:7; Luk 21:36) Mughumọ yira omoọgh oḍuomolhoghi ogheel k’akẹ obobọ orọl isiẹn ade phọ, olhoghi Odẹ phọ ayira kaḅaạl li eḍighi maạr dị yira odaphạn iphụr arurụ phọ edi bọ siphẹ asidogh phọ aZizọs. Kụ dị eego esi onmạ ighirigiir phọ aZihova, kogẹ aani ni siḍien ayira siphẹ “aḍinyạ” aghuḍum mọ.—Dan. 12:1; Ogan. 3:5.
AḌUỌR PHỌ 26 You Did It for Me
a Miịn emhuoghaạph phọ “Eeghe Kụ Edị Yira Olhegheri Ilọ Iiruẹn Phọ AZihova Kasophonhaan Bọ We Epẹ Ghisigh?” siphẹ Otu Okoriom aMay 2024.
b Olhegheri obughẹ, miịn emhuoghaạph phọ “Will You ‘Keep on the Watch’?” siphẹ Watchtower aMarch 15, 2015.
d ILỌ AFOTO: Onyọ umaranhi dị amhoọgh aani oḍuomolhoghi ogheel k’akẹ ratughemhị ghan Baibul oḍoọgh onyanhị dị odị azuan epẹ erugh phọ.