Ilọ Okpạr Opu Iikia

1-2. (a) Eeghe kụ ketue ekọm iikia engọ rebenhẹ aZihova? (b) Yira kooḅeghiọn eeghe siẹn emhuoghaạph phọ ephẹn phọ?

TOROBỌ oye ramoọgh ghan ni iikiaa eeni amem. Esi omaạm, oḍoọgh onyọ umor obobọ umaranhi atue ni aakia mughumọ aZihova akạr ri amoọgh ḍiḅeraạn odị. Esi iduọn phọ, olhoghi odị atue ni adiighian oḍiiny amuụm. Tuutughiạn ilọ onyọ umor dị mem iḍoọgh odị asighẹ rukumuan phọ aZihova aḍighi eḅẹl kparipẹ r’owạ ogbogh oḍighi. Nyiidiphọ odị mamhoọgh eghunotu kụ amaliom mabụgh kuolọ aḍighaạgh odị i/boghoghọ. Odị atue ni aakia mughumọ osopha phọ odị asopha bọ mem iḍoọgh phọ odị akạr ri anhighẹ. Gbiom olhoghi onyọ umaranhi dị asiạ meghị dị aloor phọ i/kạr mun iikparạgh ḅilhẹ u/kạr mun umoọgh inyaạm. Odị atue ni aḅonyonhu azuan loor iduọn odị ka/tue mun bọ aḍighi ipẹ odị aḍighi ghan bọ. Nạ mapuruan ghan ni loor mọ: ‘AZihova ulhọgh ni imhị elhegh ḍughụm? Arikiạ phọ mị aphinyọn bọ angọ aZihova ikạr ri ekpeanhaạn ḍughụm? Mị amoọgh niin niin maạr oḍighinhom esi aZihova?’

² Sipuru phọ iphẹn phọ kụ u/panyanhaạn, pọ ketir ri iiseeny phọ yira rongọ bọ aZihova ekarạph eten. Esi iduọn phọ, yira kooḅeghiọn siẹn emhuoghaạph phọ ephẹn phọ idị ogbon asinhị-iilhogh aBaibul phọ ketue ilhoghonhaạn iyira ḍighaạgh eḍighi maạr dị yira omhoọgh iikia (1) mọ aZihova amoọgh ni ḍiḅeraạn ayira, (2) mughumọ osopha dị yira osopha mem dị eten akạr ri anhighẹ, obobọ (3) yira omoọgh niin niin maạr oḍighinhom esi aZihova.

IDỊ YIRA KOTUE OTUUR IIKIA OSIGHẸ

3. Eeghe kụ eniin iyaạr dị yira koḍighi orue oruur osighẹ iikia lọ yira omhoọgh?

³ Eniin eten dị yira kotue otuur iikia osighẹ pọ owaaghị araraạr siphẹ Ekpo Onhụ phọ Enhaạn pidị yira omhiịn ophanyanhaạn ipẹ riiḅaghamhị bọ iyira. Yira oḍighi iduọn phọ, pọ yira kokpạr ri, opoph okị ghisigh siẹn igey phọ, oḅilhẹ onyaaghiạn ophạm omheeraam mọ ayira okparamị.—1 Kọr. 16:13.

4. Ika kụ idị yira kooḅeghiọn oomo araraạr opogh ghan? (1 Tesalonikạ 5:21)

⁴ Bạl 1 Tesalonikạ 5:21. ABaibul phọ uḅenhị iyira mọ ‘ooḅeghiọn ghan oomo araraạr ophogh.’ Ika kụ idị yira koḍighi bọ iduọn phọ? Yira ooḅeghiọn ghan ophogh mughumọ ipẹ yira omheeraam bọ eḅọph ni r’ipẹ aBaibul phọ aghaạph bọ. Esi omaạm, tuutughiạn oḍoọgh oye dị raakia mughumọ odị amạn ni maạr riḍien aZihova. Ekpẹ ni dị odị kameeraam iphẹn odị aatughiạn bọ ḍughụm? Eeye, ewạ dị odị katuughạ Baibul phọ amiịn ipẹ aZihova alhoghoma bọ ilọ odị. Iphẹn phọ keḍeenhaan mọ odị raaḅeghiọn ni oomo araraạr kaphogh.

5. Ika kụ idị yira komiịn ophagharanhaạn asipuru ayira dị aZihova aphagharanhaạn?

⁵ Mem dị yira robạl Ekpo Onhụ phọ Enhaạn, ekịgh mudị aZihova ruḅaanhaạn ghan iyira. Kuolọ mem dị yira omhoọgh ḍipuru kụ yira rowạ olhegheri iitughiạn aZihova pọ kewạ mọ olhọgh ikuph. Iduọn phọ pọ yira kowaaghị riisi aBaibul dị egbolhomaam ḍipuru phọ riiḅaghamhị bọ iyira kụ otuughạ agey. Yira kowaaghị raraạr siphẹ ariisi osighẹ otuughaạm mọ ookpomhoghan phọ aZihova mamiteom bọ. (Prov. 2:3-6) Yira otue ni ooḅereghị olọm aZihova olhoghonhaạn ayira ḍighaạgh omhiịn iitughiạn phọ odị ilọ aḍipuru phọ. Kụ yira owạ sinhị-iilhogh aBaibul r’inhọn araraạr dị eghaạph ilọ aḍipuru phọ obobọ iikia phọ ayira. Ooḅeghiọn ghan areḍeenhaan awe aBaibul dị olhoghoma aani eten phọ yira olhoghoma bọ ketue kẹn ni ingọ iyira suọ.

6. Ika kụ idị oghị ghan ituughạ kilhoghonhaạn iyira ḍighaạgh okpạr opu iikia?

⁶ Enhọn eten dị aZihova ruḅaanhaạn ghan iyira pọ ituughạ phọ yira rokị ghan bọ. Eḍighi maạr dị yira ogbor ghan oghị ituughạ, yira otue ni onaghạn iyaạr mem dị rongọ oghaạph obobọ ophagharanhaạn dị oye angọ dị kekạr ilhoghonhaạn iyira ḍighaạgh okpạr opu iikia phọ ayira. (Prov. 27:17) Nyiidiphọ yira kooḅeghiọn iniin odọ iikia dị yira kotuur osighẹ siphẹ ilhoghi phọ ayira.

MEM DỊ NẠ AMHOỌGH IIKIA MỌ AZIHOVA AMOỌGH NI ḌIḄERAẠN ANẠ

7. Eeghe aḍipuru kụ edị eeni ibadị kopuru?

⁷ Nạ maakia ghan ni mughumọ aZihova alọgh ni nyinhạ elhegh? Nạ alhoghoma mọ nạ o/mhạn maạr, pọ nạ kaatughiạn ghan mọ ke/tue edugh dị nạ kaḍighi oyaghirị aZihova, Olemhiạ oomo aḅirinhi phọ. Eeni Uw-emhạ phọ Devid aatughiạn kẹn ni eniin phọ eten phọ. Iḍighi ni ḍiigu esi odị olhegheri mọ ghalhamọ r’oye bịn aZihova alọgh ni elhegh, esi iduọn phọ, odị apuru ni mọ: “Sey Zihova, oye phọ eeghe iyaạr dị nạ amhaghamhị bọ maạr, oopho phọ oye dị nạ ranaghanhạn ghan bọ?” (Ps. 144:3) Komiịn ḍighen ophagharanhaạn aḍipuru phọ eḅẹm bọ mọ: AZihova akạr ri amoọgh ḍiḅeraạn atorobọ oye ḍughụm?

8. Odaphạn 1 Samuel 16:6, 7, 10-12, eeghe kụ edị aZihova ramiịn ghan loor oye?

⁸ ABaibul phọ aḍeenhaan ni mọ aZihova ralọgh ghan ni elhegh we dị u/mạn maạr esi abunhọn. Esi omaạm, aZihova arom Samuel oghị eghunotu aJesse osagharạn elo oniin oọny aJesse dị kaḍighi uw-emhạ Izrạl. AJesse amhoọgh ophaanyạ anmụny, kuolọ amhạgh oḍual abunọ bịn. Odị o/mhaghạm obạm mọ, Devid.b Toroboiperolbọ, aDevid kụ edị aZihova asaḅạr. (Bạl 1 Samuel 16:6, 7, 10-12.) AZihova amhiịn ni aḅilhẹ alhọgh elhegh odọ oye phọ aDevid aru bọ. Odị alhegheri ni mọ aDevid apomhoghiạn ni nyodị agey.

9. Eeghe kụ iḍighi kụ nạ kakuphom bọ owol mọ aZihova amoọgh ni ḍiḅeraạn anạ? (Miịn kẹn afoto phọ.)

⁹ Tuutughiạn ipẹ aZihova maḍeenhaan bọ mọ odị alhọgh ni nyinhạ elhegh. Odị rangọ ghan nyinhạ oromha dị akasiạn dọl phọ anạ. (Ps. 32:8) Odị katue ni aḍighi iphẹn phọ dị nyinhạ u/kạr ulegheri ḍughụm? (Ps. 139:1) Mem dị nạ asighẹ oromha phọ aZihova aḍighinhom kụ amhiịn idị elhoghonhaạn nyinhạ ḍighaạgh, nạ kakuphom ni owol mọ aZihova akạr amoọgh ḍiḅeraạn anạ. (1 Chron. 28:9; Iiḍ. 17:26, 27) AZihova alọgh ni elhegh ikuph phọ nạ ralọgh bọ. Odị akạr ramiịn ghan igey araagharạ phọ anạ, kụ rawạ osighẹ anạ righirị. (Jer. 17:10) Odị rawạ ni mọ meera oḍighi Oyaghirị odị.—1 Jọn 4:19.

MEM DỊ NẠ RAAKIA MUGHUMỌ OSOPHA DỊ NẠ ASOPHA MEM DỊ ETEN AKẠR RI ANHIGHẸ

10. Ighẹn asipuru kụ edị yira kotue ni opuruan siloor mem dị yira ootughiạn osopha ayira epẹ omhạn?

¹⁰ Ibadị amem abuniin ayira rootughiạn ghan ni mughumọ osopha dị yira osopha epẹ omhạn aḍighi ni ogey osopha. Eeni yira utuạn obughẹ arukumuan phọ aZihova kụ osopha owilhẹ ogbogh oḍighi obobọ ḍighi dị yira romuul. Eeni mesighẹ ni ibadị asiạ eḍighi bọ iduọn phọ. Kụ nyiidiphọ yira omiịn righirị ayira dị ophamhanhạm ni igbogh iiḍighi phọ abidị obobọ siḍighi abidị, kụ momheel eelạ. Esi iduọn phọ, yira otue ni opuruan loor mọ: ‘Arikiạ phọ mị atuạn bọ aZihova aphinyọn ikpeanhaạn ni ḍughụm? Mị atoph ni roopoogh omheel eelạ ḍughụm?’

11. Eeghe kụ iiḅaghamhị ghan olhoghi okọ suọr phọ agẹ bọ Psalm 73?

¹¹ Ipẹ phọ kụ reeḅaghamhị olhoghi anạ, pọ tuutughiạn ipẹ okọ suọr phọ agẹ bọ Psalm 73 alhoghoma bọ. Odị amhiịn we dị roo/ḅereghị aZihova, kuolọ bidị ghụn kụ umheel eelạ, omhoon loor, ḅilhẹ iiḅaghamhị u/moọgh. (Ps. 73:3-5, 12) Iduọn odị amhiịn bọ oghị aghisigh phọ abidị, bịn odị amhiigh ootughiạn mọ osopha phọ odị asopha bọ ooḅereghị aZihova eḍighi ni eepua bịn. Bịn odị amhiigh ootughiạn mọ Enhaạn “maḍighi idị [odị] ramiinhọm ghan oomo aḍio.” (Ps. 73:13, 14) Okọ suọr phọ aḍighi ika orue okpạr opu ikarạph iitughiạn phọ iphẹn phọ?

12. Odaphạn Psalm 73:16-18, eeghe kụ ilhoghonhaạn ḍighaạgh okọ suọr phọ oolemhi iitughiạn phọ odị?

¹² Bạl Psalm 73:16-18. Okọ suọr phọ aghị aḍigh siphẹ otu iiḅereghị phọ aZihova. Siphẹ phọ kụ edị odị amhiịn raraạr eten dị eegholhaan. Odị aru ni anhaghanhạn mọ ghalhamọ r’iduọn eghịgh bọ mudị abuniin rokelhọm ni ghuḍum, ke/bia, ḅilhẹ oḍuomolhoghi o/lhonhaan bidị. Esi iduọn phọ, odị o/ḅonyonhu ozuan, olhoghi odị aphọ, kụ odị aru akuphom owol mọ osighẹ aZihova kụ oḍighi eḅẹl kụ osopha dị anhighẹ apelheghiom. Eekunha phọ, okọ suọr phọ aḅilhẹ ni aasạ ikuph phọ odị oghiọm aghisigh okumu aZihova.—Ps. 73:23-28.

13. Ika kụ idị nạ katue amoọgh eephọ olhoghi eḍighi maạr dị nạ raakia mughumọ ogbaany osopha anạ aḍighi ni ogey? (Miịn kẹn afoto phọ.)

¹³ Idiphọ okọ suọr phọ aḍighi bọ, nạ katue ni amoọgh eephọ olhoghi dị eego esi Ekpo Onhụ phọ Enhaạn. Ika? Gbirima suọ phọ nạ amhoọgh bọ nyiidiphọ, eḅaramaạm bọ siya phọ anạ r’aZihova, kụ atomaạm suọ abuphẹ roo/ḅereghị bọ aZihova. Ibadị abuphẹ roo/ḅereghị bọ aZihova obeḍenhọm raraạr r’aḍimạ adọl dị bidị momhoọgh siẹn aḅirinhi phọ, loor esi dị bidị u/moọgh oḍuomolhoghi epẹ ghisigh. Toroboiperolbọ, elọ anạ aZihova aguanhaan ḍisẹph kirokirọ epẹ ghisigh, etigheri iphẹn nạ rakelhọm bọ nyiidiphọ. (Ps. 145:16) Ḅilhẹ kẹn, tuutughiạn iphẹn phọ: Nạ alegheri ni idị adọl anạ mitọl mọ nạ mu/sopha bọ osighẹ aZihova oḍighi eḅẹl? Eniin iyaạr emeerạ ni: Buphẹ osopha bọ osighẹ ephomhoghiạn aZihova r’amatuman kụ oḍighi eḅẹl siphẹ aghuḍum mọ abidị, egey iyaạr i/lo dị bidị kotoph.

MEM DỊ NẠ RAAKIA MUGHUMỌ NẠ AMOỌGH NIIN NIIN MAẠR OḌIGHINHOM ESI AZIHOVA

14. Eeghe adọl kụ edị ibadị osoman, kụ eeghe aḍipuru kụ reeḅaghamhị ghan bidị?

¹⁴ Aḍikpọ, e/moon, obobọ eghạ reeḅaghamhị ni buniin arebenhẹ aZihova. Iphẹn phọ etue ni eḍighi iyaạr dị bidị kootughiạn mọ eeni siẹn aZihova o/mhoọgh mun maạr oḍighinhom abidị. Bidị otue ni opuru mọ, ‘mị amoọgh niin niin maạr oḍighinhom esi aZihova ḍughụm?’

15. Eeghe kụ edị okọ suọr phọ agẹ bọ Psalm 71 akuphom owol?

¹⁵ Okọ suọr phọ agẹ bọ Psalm 71 amhoọgh aani ni oniin phọ ooḅaghamhiạn aloor phọ ophọn phọ. Odị aaḅereghị mọ: “Ku/ḅitonhaạn imhị nyiidiphọ mị madugh bọ.” (Ps. 71:9, 18) Kuolọ okọ suọr phọ akuphom ni owol mọ eḍighi maạr dị odị aḅạr ri aZihova Enhaạn phọ odị, pọ kaaḅakị ni aḅilhẹ abakị nyodị. Okọ suọr phọ matuughạ amiịn mọ reḅeraạn ghan agey aZihova mem dị yira oḍighi oomo ipẹ yira kotue bọ okumu Odị, etigheri dọl phọ ayira.—Ps. 37:23-25.

16. Ighẹn areten kụ edị abulọ asiạ meghị omhạn bọ maạr esi aZihova? (Psalm 92:12-15)

¹⁶ Nyinha abuphẹ asiạ meghị bọ, imiịn dọl phọ anyinha eten phọ epẹ aZihova imhiịn bọ inyinha. Odị katue ni alhoghonhaạn nyinhạ ḍighaạgh okumu odị ghalhamọ aloor anạ i/kạr mun iikparạgh. (Bạl Psalm 92:12-15.) Kparipẹ r’ootughiạn ghan araraạr phọ ipẹ nạ ka/tue mun bọ aḍighi, gbon ghụn ipẹ nạ katue bọ aḍighi. Esi omaạm, nạ katue ni asighẹ eḍeenhaan omheeraam mọ anạ ḅilhẹ r’aḍiḅeraạn phọ anạ esi abunhọn akparamhiọm bunhọn. Nạ katue ni akaạph ipẹ aZihova mabakị bọ nyinhạ k’aḍio phọ r’okuphom owol phọ nạ amhoọgh bọ aghị esi aruguanhaan phọ odị. Kụ r’amem r’amem ka/pogh asooromhi iikpọ phọ ooḅereghinhaạn abunhọn emhoọgh bọ. (1 Pit. 3:12) Torobọ adọl dị yira osoman nyiidiphọ, yira omoọgh ni maạr oḍighinhom esi aZihova r’abunhọn.

17. Eeghe kụ iḍighi kụ emhoghi bọ dị yira kokel inyuughiom otomaạm iiḍighi ayira r’ilọ abunhọn?

¹⁷ Eḍighi maạr dị nạ aḅonyonhu azuan loor idị nạ u/tue mun ukumuan ipẹ nạ akumuan ghan bọ angọ aZihova, pọ kuphom ni owol mọ aZihova asereghiạn ni ilọ nạ arue aḍighi nyiidiphọ. Eeni kenyu ghan ni nyinhạ otomaạm idị abunhọn roḍighi r’ipẹ anạ. R’amem r’amem ka/ḍighi idipihọ! Eeghe kụ iḍighi? AZihova ra/sighẹ ghan ilọ oniin katomaạm ilọ ophoriphọ. (Gal. 6:4) Esi omaạm, aMeri anmoom ni Zizọs elo eeḅi eḍu dị emhạn iboom ikpoki. (Jọn 12:3-5) Ḍieriphọ aḍighaạgh phọ, uwekulom ekpukele anhịr phọ alhọgh iyạl ibạm ikpoki dị emhạn egbem akobọ bịn. (Luk 21:1-4) Kuolọ aZizọs o/sighẹ ipẹ uwekulom ekpukele anhịr phọ o/tomaạm iphẹn aMeri. Odị amhiịn bidị idiphọ awe dị oḍeenhaan omheeraam mọ abidị. Odẹ phọ odị, Zihova, amaghamhị ni maạr torobọ iyaạr dị nạ arue aḍighi dị eḍuạ esi ephomhoghiạn phọ nạ amhoọgh bọ esi odị kụ eru, ghalhamọ ighom ni esi anạ.

18. Eeghe kụ kilhoghonhaạn iyira ḍighaạgh okpạr opu iikia? (Miịn kẹn igbe phọ “Ekpo Onhụ Phọ AZihova Kelhoghonhaạn Ni Nyinhạ Ḍighaạgh Okpạr Opu Iikia.”)

¹⁸ Onyọ ayira o/lho dị ra/moọgh ghan iikia eeni amem. Kuolọ, idiphọ yira mooḅeghiọn bọ, Ekpo Onhụ phọ Enhaạn, aBaibul phọ, katue ni ulhoghonhaạn iyira ḍighaạgh okpạr opu iikia. Esi iduọn phọ, lọgh ikuph aruur iikia asighẹ. Oḍuomolhoghi kụ asighẹ esi iikia phọ anạ. AZihova alhegheri ni nyinhạ r’aloor. Oomo arikiạ phọ nạ rapinyọn bọ loor emhụ aZihova, odị kaanmo ni nyinhạ ruunmo phọ. Kuphom ni owol mọ aZihova amiịn ni oomo arebenhẹ phọ odị oḅạr bọ nyodị idiphọ awe dị okpeanhaạn ni oteẹny ephomhoghiạn phọ r’ogbolhomaam mọ odị.