Eghạm Mọ Edi Bọ Ukraine Mebughẹ Ekuom Eḍien Phọ Edi Bọ Oomo Aḅirinhi Phọ

Unwanyụ aMay 19, 2022, aUnited Nations Security Council uḅẹm mọ awe dị opel li 75, dị ophạm ni iikpọ itooghị gomẹt oḅẹm mọ “ekuom eḍien phọ ezẹgh aCOVID-19 r’iiḅaghamhị araraạr eseeriom mọ ekọm bọ, reten igbakurọ loor esi eghạm mọ edi bọ epẹ Ukraine.” I/bia bịn anewspaper dị oghol mọ The Economist aghaạph mọ “opumom iiḅaghamhị phọ edi bọ siẹn aḅirinhi phọ, eghạm mọ mekọm idị ekuom eḍien rebụgh iboom.” ABaibul phọ aghaạph ni mọ iiḅaghamhị ekuom eḍien ketọl li mem mọ ayira, kuolọ akaạph kẹn ni iyaạr dị kilhoghonhaạn iyira ḍighaạgh odaluạn iiḅaghamhị phọ iphẹn phọ.

ABaibul phọ aghaạph ni mọ iiḅaghamhị ekuom eḍien ketọl li

• AZizọs aghaạph mọ: “Eelhe kotupheom ni eeIhe eghạm, emạ otupheom emạ, kụ . . . igbakurọ ketọl li.”—Matiu 24:7.

• Aḍinyạ Ogananami phọ ekaạph ni ilọ inya abukiilhom arusụ. Oniin siphẹ phọ ameerạ esi eghạm. Kụ onhọn dị odi omhạn odị ameerạ esi amem igbakurọ, mem dị kekpạr oteẹny eḍien, kụ aḍighi eḍien kekị anyụ iboom. Esi aBaibul phọ eḅẹm mọ: “Mị uphogh ni kụ amiịn oḍiil asụ. Opọ aḍigh bọ aphạm iyaạr dị rotooghiọm ghan eemọr ḍighaạgh odị. Kụ mị anaghạn iyaạr dị eḅạ idiphọ eḍọgh . . . Iḅẹm mọ, “Eekaạgh-okolo memạn ikpoki oḍighi emụ aḍio, ḅilẹ kẹn iraạr aruwol apitakạ emạn ikpoki oḍighi emụ aḍio.”—Ogananami 6:5, 6, Ooḅi Oghaạph.

Imiịn aBaibul phọ ilọ iiḅaghamhị ekuom eḍien remunhughan ni nyiidiphọ, eḍighi bọ mem dị aBaibul phọ aghol mọ asiḍio “aruukuna phọ.” (2 Timoti 3:1) Olhegheri obughẹ ilọ asiḍio “aruukuna phọ” r’ilọ inya abukiilhom arusụ phọ oghaạph bọ oghol siphẹ Ogananami phọ, pọ pogh vidio phọ Aḅirinhi Phọ Manmia Emhiigh 1914 kụ aḅilhẹ aạl emhuoghaạph phọ “Inya Phọ Abukiilhom Arusụ Phọ—Bidị Phọ Abuọ Anhiạn?”

Idị ABaibul phọ kaloghonhaạn ḍighaạgh

• ABaibul phọ apamanhạm ni oroma dị kulhoghonhaạn iyira ḍighaạgh odaluạn iiḅaghamhị kirokirọ, idiphọ amem dị aḍighi eḍien eghị anyụ obobọ ekuom eḍien edi. Omhiịn iniin areḍeenhaan, pogh emhuoghaạph phọ “Ilọ Orọl Amem Dị Araraạr I/boghoghọ.”

• ABaibul phọ aḅilhẹ kẹn ni ungọ iyira oḍuomolhoghi mọ araraạr kenighẹ ni. ABaibul phọ aguanhaan kẹn mọ amem retu ni dị “ariiḍien keepaany siẹn ade phọ” ḅilhẹ torobọ oye kamoọgh riiḍien olhe. (Psalm 72:16) Olhegheri obughẹ ilọ oḍumolhoghi phọ aBaibul phọ angọ bọ ilọ aghisigh phọ r’iyaạr phọ eḍighi bọ kụ nạ kameeraam bọ ni ipẹ aghaạph bọ, bạl emhuoghaạph phọ “Ogey Oḍuomolhoghi Dị Odi Olọ Iḍue.”