Iigamhanhiạn Dị Eḅarạm Itạph Asilaagbạ Eleeny Ni Elheeny Aḅirinhi Phọ—ABaibul Phọ Akaạph Aani Eeghe?

Unwanyụ aJuly 2022, araraạr dị eeph onhaghạn ilọ iigamhanhiạn itạph asilaagbạ ileeny ni elheeny aḅirinhi phọ:

• “Aḍuugh ophelhegbe ephegh imirighan itooghị phọ aJapan [aḍighi ghan Prime Minister Shinzo Abe] iiḅaghamhị ni eelhe phọ, awe oomo aḅirinhi phọ ukperenhom ni onhaghạn ipẹ phọ, loor esi iduọn ro/gbor ghan bọ konhaghạn ilọ iigamhanhiạn siẹn eelhe phọ, ḅilhẹ omoọgh bọ ni iilhogh dị ekpạr ilọ asilaagbạ.”—July 10, 2022, The Japan Times.

• “Awe aDenmark ukperenhom ni onhaghạn m’oye dị u/legheri azẹ ni iraạr awe dị oghị ogho raraạr esi ibool epẹ Copenhagen.”—July 4, 2022, Reuters.

• “South Africa: 15 awe omugh bọ mem dị oye dị u/legheri akpariọn ikpo alaagbạ esi ipughọl amiim epẹ egbogh emhạ phọ aSoweto.”—July 10, 2022, The Guardian.

• “Awe dị oraḅạl ozẹ epẹ U.S. siẹn ophooghian phọ arọl bọ eekunha awiki aJuly 4 ropel li 220.”—July 5, 2022, CBS News.

Oḍuom olhoghi odi ni mọ iigamhanhiạn phọ iphẹn phọ kesi ni eekunha? ABaibul phọ akaạph aani eeghe?

Eekunha Iigamhanhiạn

ABaibul agbaaghị mem mọ yira odi bọ mọ asiḍio “aruukunha,” amem dị awe kozọ ghan eten igbagbaar, oḍighi buugamhạ, ḅilhẹ r’eten dị eeph elhoghorị. (2 Timoti 3:1, 3) Aroozọ iigamhanhiạn phọ iphẹn phọ r’eḍighi ghan idị awe kotolhọm r’oghiilhaany. (Luk 21:11) Toroboiperolbọ, aBaibul phọ aguanhaan ni mem dị iigamhanhiạn ke/tọl mụn, kụ “awe kotọl esi dị eephọ kụ edi, riisi dị eḍighi oghoph riisi ophooghian ḅilhẹ r’eborọph.” (Isaiah 32:18) Iigamhanhiạn kesi ika eekunha?

Enhaạn kaḅeer asighẹ buọ asipioghọm mọ kụ apiemhi oomo araraạr eghạm.

• “Idị egbolhomaam buọ asipioghọm mọ, kopiemhi ni bidị siẹn ade phọ.”—Proverbs 2:22.

• “[Enhaạn] kasiemhi eekunha raaghạm oomo isiẹn ade phọ. Odị kabunughi sikumhụgh phọ kụ apueghị isọph phọ; odị kaguom niạn rughuugh eghạm mọ.”—Psalm 46:9.

Enhaạn kapiemhi ni raraạr phọ rekọm ghan bọ iigamhanhiạn dị eego esi otughemhị awe ilọ orọl r’eephọ.

• “Bidị ke/ḍighi mụn oye iyaạr obobọ ikarạph siphẹ eeḅarạph iigbia phọ amhị, idị eḍighi bọ ade phọ k’ekạr kụ kemuza rolhegheri iyaạr phọ aZihova idiphọ amuụm amuza bọ riphiịny phọ.”—Isaiah 11:9.

• Iduọn rokaạph bọ, Enhaạn r’atughemhị ni we oomo isiẹn aḅirinhi phọ okporiọn arighaạgh iigamhanhiạn r’oḍighinhom areenemhạ, “bidị kogurọgh rolool eghạm mọ abidị otene iguphom kụ isọph phọ abidị kotene silekẹ osạm.”—Micah 4:3.

Olhegheri obughẹ oguan aBaibul phọ ilọ aḅirinhi dị oghiilaany ka/tọl mụn, pọ bạl emhuoghaạph phọ “Adọl Dị Oghiilaany U/lo Mụn—Ketue ni edugh?”

Olhegheri obughẹ ipẹ kosiemhi bọ eekunha iigamhanhiạn mem bịn ḅeer omadạn, pọ bạl emhuoghaạph phọ “Eephọ Mesi Siẹn Ade Phọ!”